2 Kronikɛls 14 - EBƆRƐ BE KAWƆL

Ewura Asa ka kɔ m pɔɔ Itiopiaebi na so be asheŋ

¹ Ewura Abija ka wu, kakpa nɛ baa puli bewura na nɛ b ta mo n ya puli ashi Jerusalɛm nɛ baa tre ewura Deevid be kade to na. Mo pibinyɛn Asa e daŋ sɔ mo so n ji kuwura. Asa be jemanɛ to, efuli na kikɛ daŋ nya kagbenewushi nfɛ kudu kikɛ nna.

² Ewura Asa daŋ wora kusɔ nɛ k niŋi nsaa walɛ Enyɛnpe mbe Ebɔrɛ na be anishito nna.

³ E daŋ bure efuli pɔtɛana so be ebɔrɛsureana nɛ mboŋ nɛ baa shuŋ bumo be agbirana kikɛ nna nseŋ bure agbirjembu nɛ eshabɔrɛ be mboŋ nɛ basa bee shuŋ kegbirche Ashira na ashi mbe efuli so.

⁴ Kumo be kaman nɛ e kaŋɛ Juda be basa kenishipereso fanɛ b baa bɛ Enyɛnpe Ebɔrɛ nɛ e la bumo nananyɛnana be Ebɔrɛ na be keŋini nɛ mbe mbra so.

⁵ Ŋkpal e ka bure agbirana nɛ ebɔrɛsureana nɛ baa chɔɔ duwu amo so ashi Juda be nde kikɛ to na so, mbe kuwurji be jemanɛ daa kɔ kagbenewushi nna.

⁶ Mbe jemanɛ to e daŋ shin nna nɛ b naŋ pɔr egbalana n deŋi deŋi egbalana nɛ b pɔr ŋ kulti Juda be nde na so nɛ nde na nya eleŋ n ti so. Amoso nfɛ damta nɛ b daa maŋ naa kɔ kena ŋkpal Enyɛnpe Ebɔrɛ ka sa bumo kagbenewushi so.

⁷ Le nɛ e daŋ kaŋɛ Juda be basa: “Men shin nɛ an pɔr atempreŋ jeŋgreŋ nseŋ pɔr egbalana ŋ kulti anyi be ndeana, nseŋ wɔtɔ amo ekuloŋgboŋ nɛ anyeeŋ baa ti nsaa ta ndibi gboŋgboŋi a laga amo to. An kɔ kasawule na so be eleŋ. Ŋkpal an ka bee wora Enyɛnpe Ebɔrɛ be aparsheŋ so, E kuŋ anyi be ŋkpa ekpa kikɛ so.” Amoso b daŋ pere kenishi nna m pɔr ga nseŋ nya nɛfa malɛ ga.

⁸ Ewura Asa be benapo nɛ b shi Juda n daa kɔ abɛlso be asɔkuŋso nɛ ekpa na daa wɔ basa ŋgboŋ alfa asa nɛ bumo nɛ bumo alɛ daa shi Bɛnjamin nsaa kɔ abɛlso be asɔkuŋso wurbi nɛ ata na daa wɔ basa ŋgboŋ alfa anyɔ nɛ aduburwa. Bumo kikɛ daa kɔ kenyɛn ga nsaa nyi kena be kekɔ nɛnɛ.

⁹ Zɛra nɛ e shi Itiopia be efuli so na e daŋ juŋkpar benapo damta nɛ b maŋ kɔ kekarga na nɛ egbaŋɛturko nɛ b kɔ a kɔ kena be benapo alfa asa n ya kɔ Juda hale ŋ kɔ n ya lar kade nɛ baa tre Marɛsha na kikɛ.

¹⁰ Nɛ ewura Asa nɛ mbe benapo lar n ya yili ŋ karga abar so n wora shiriya nɛ b tu mo ŋ kɔ kena ashi Zefata be ketaŋɛ nɛ k mata Marɛsha na ase.

¹¹ Ndoŋ nna nɛ ewura Asa kule Enyɛnpe mbe Ebɔrɛ na ŋ kaŋɛ le: “O Enyɛnpe Ebɔrɛ, fo nawule e naa tiŋ a chɛ benapo pɔshipo to nɛ baa tiŋ a kɔ a pɔɔ benapo lempo so. Amoso, an Nyɛnpe nɛ anyi be Ebɔrɛ, ba chɛ anyi to naniere, ŋkpal manɛ so, fo nɛ anyee fute a yige so. Fo ketre be eleŋ na malɛ to nɛ an ba nɛ an ba kɔ benapo damta ere na. Enyɛnpe, fo e la anyi be Ebɔrɛ. Esa kama malɛ maŋ wɔtɔ nɛ e beeŋ tiŋ m pɔɔ fo so.”

¹² Enyɛnpe Ebɔrɛ daŋ chɛ Asa nɛ mbe benapo to nna nɛ b kɔ m pɔɔ Itiopiaebi na so nɛ bumo be benapo kikɛ shile,

¹³ nɛ Asa nɛ mbe benapo ju m buu bumo so hale n ya fo Gɛra. B daŋ pɔɔ bumo so cheche nna hale Itiopiaebi na daa maŋ naŋ tiŋ nɛ b kɔ gba. B daŋ mɔ bumo be bedamta nna. Enyɛnpe Ebɔrɛ na e daŋ kɔ m pɔɔ bumo so n sa benapo na nɛ b muu Itiopiaebi na be asɔ kikɛ.

¹⁴ Kumo be kaman nɛ Asa be benapo na kɔ ndewurbi nɛ a kulti Gɛra na kena m pɔɔ amo kikɛ so ŋkpal Enyɛnpe Ebɔrɛ be kusɔ nɛ e wora na ka shin nɛ kufu pɛ bumo ga so. Ndoŋ nna nɛ Juda be benapo na muu bumo be asɔ lela kikɛ n yɔ.

¹⁵ B daŋ yɔ mbolpɔkpapoana be echenakpaana nɛ a mata nde na gba to nna n ya kɔ bumo kena nseŋ pɛ bumo be mbolpɔ nɛ mboe nɛ enyɔma damta. Ade kikɛ be kaman nɛ b bɛta n yɔ Jerusalɛm.