2 Kronikɛls 13 - EBƆRƐ BE KAWƆL

Abija ka kɔ Jeroboam kena be asheŋ

¹ Ewura Jeroboam ka ji kuwura ashi Israɛl be efuli so be kafɛ kuduaburwasopo be jemanɛ so nɛ Abija malɛ ki Juda be efuli so be ewura

² nseŋ ji kuwura Jerusalɛm to nfɛ asa. Mo nio e daa la Yuriya nɛ e shi Gibia na pibiche Mikaya. Ndoŋ nna nɛ kena tɔr ewura Abija nɛ ewura Jeroboam so.

³ Abija be benapo daa wɔ basa ŋgboŋ alfa ana, nɛ Jeroboam daŋ keta benapo ŋgboŋ alfa aburwa n ya kɔ mo kena.

⁴ Benapo na daŋ ya tu abar abee so be efuli nɛ k wɔ Efrayim na nna. Ewura Abija daŋ dii kebeegboŋ nɛ baa tre Zemariam na nna n yɔ kumo be esoso n ya tre Jeroboam nɛ Israɛlebi na m ponte ŋ kaŋɛ le: “Men nu nfe!

⁵ Men maŋ nyi fanɛ Enyɛnpe Ebɔrɛ nɛ e la Israɛl be Ebɔrɛ na nase kɔnɔ kpakpaso n sa ewura Deevid fanɛ mo ere Ebɔrɛ na ta Israɛl be kuwurji nna n sa mbe kaman to ebi mbaanaayɔ a?

⁶ Nebat pibinyɛn Jeroboam daŋ kini kenu n sa mbe ewura Sɔlɔmɔn nna.”

⁷ Kumo be kaman nɛ e chala befɛpo nɛ basa fuloŋ be katuŋ ko nɛ b tintiŋ Rehoboam nɛ e baa wora kusɔ nɛ baa sha ŋkpal e ka kra la kebia nsaa maaŋ tiŋ n yili asheŋ kananɛ a daga loŋ be saŋɛ na so.

⁸ Naniere, fee fɛ fanɛ feeŋ tiŋ ŋ kɔ m pɔɔ kuwurji nɛ Enyɛnpe ta n sa ewura Deevid be kaman to ebi ere so nna? Menyi alɛ kɔ benapo damta nɛ agbir nɛ Jeroboam ta shuwa n lɔŋɛ fanɛ egbolu fɔlbi na nna nɛ e baa la menyi be agbirana.

⁹ Fo ju Enyɛnpe Ebɔrɛ be bɔrɛmatapoana nɛ b la Ɛɛrɔn be kaman to ebi na nseŋ ju Livaiebi na gba. Fo lara basa pɔtɛ ko nna nɛ b sɔ bumo be kabɔrɛmata be kushuŋ be eyilikpa fanɛ kananɛ efuli pɔtɛ ko be basa bee wora na. Ekama malɛ nɛ e baŋ ta gbolu ŋko mbolpɔ ashunu m ba, fo shin nɛ e bee ki menyi be agbirana nɛ a maŋ la shɛŋ na be kegbirwura nna.

¹⁰ “Ama anyi ere kraa shuŋ Enyɛnpe nɛ e la anyi be Ebɔrɛ na nna. Anyi alɛ maaŋ kini mo kikɛ. Ɛɛrɔn be kaman to ebi e kraa shuŋ kabɔrɛmata be kushuŋ na nɛ Livaiebi na malɛ bee chɛ bumo to.

¹¹ Kachipurso nɛ kaaseso kikɛ, baa chɔɔ duwu nɛ asɔbɔya be kechɔɔ m mur be esarga nna a sa Enyɛnpe Ebɔrɛ. Baa ta bodobodo be sarga na nna a deŋi teebɔl nɛ k du cheembi na so daŋkare be ekpa so nsaa chɔɔ efitila nɛ a yil shuwa be kefitilatɔl na malɛ so kaaseso kikɛ. Anyi ere bee bɛ Enyɛnpe Ebɔrɛ be mbra na so nna, ama menyi ere kini mo.

¹² Ebɔrɛ gbagba e la anyi be ejuŋkparpo nɛ mbe bɔrɛmatapoana malɛ wora shiriya nɛ b foŋ bumo be mbel n tre anyi nɛ anyi nɛ menyi e kɔ kena. Israɛlebi, men sa maŋ kaŋ kɔ an nananyɛnana be Ebɔrɛ na kena ŋkpal manɛ so menyi maaŋ pɔɔ so kikɛ!”

¹³ Jemanɛ ere so nɛ ewura Jeroboam shin nɛ mbe benapo ko ya pugi Judaebi na be benapo na be kaman to nɛ bumo nɛ b ka na malɛ wɔ bumo be anishito a jo nɛ b kɔ bumo kena.

¹⁴ Judaebi na ka keni n wu fanɛ b kulti bumo n wɔtɔ na, nɛ b shu n tre Ebɔrɛ fanɛ e chɛ bumo to. Ndoŋ nna nɛ bɔrɛmatapoana na foŋ bumo be mbel

¹⁵ nɛ Judaebi na cha kena to be awɔr ga. Kede be kaman nɛ ewura Abija juŋkpar bumo n ya kɔ kena na nɛ Ebɔrɛ chɛ bumo to nɛ b pɔɔ Jeroboam nɛ Israɛlebi be benapo na so m mɔ bumo.

¹⁶ Israɛlebi na daŋ kilgi nna a shil nɛ Ebɔrɛ na shin nɛ Judaebi na ju m bɛ bumo so a mɔ bumo.

¹⁷ Ewura Abija nɛ mbe benapo daŋ kɔ m pɔɔ Israɛlebi na so nna nseŋ mɔ bumo be benapo ŋgboŋ alfa anu kikɛ.

¹⁸ Ŋkpal Juda be basa ka ta bumo be yirda n lɛ Enyɛnpe Ebɔrɛ nɛ e la bumo nananyɛnana be Ebɔrɛ na so so, nɛ b daŋ kɔ m pɔɔ Israɛlebi na so na.

¹⁹ Ewura Abija daŋ ju m buu Jeroboam be benapo na so nna hale n ya sɔ bumo be nde ko ana. Nde na e la Bɛtɛl nɛ Jeshana nɛ Efrɔn nɛ ndewurbi nɛ a kulti amo na kikɛ.

²⁰ Jemanɛ nɛ Abija daa ji Juda be efuli so be kuwura na, Jeroboam daa maŋ naŋ nya eleŋ kikɛ. Amo kikɛ be lalaloge, nɛ Enyɛnpe Ebɔrɛ shin nɛ e wu.

²¹ Abija bre be kuwurji be eleŋ daŋ baa ti so nna ga. E daa kɔ beche kuduana nɛ mbinyɛnsobi adunyɔ nɛ anyɔ nɛ mbichesobi kuduashe nna.

²² B daŋ sibɛ Abija be mmalga nɛ mbe aworbi kikɛ nna n wɔtɔ anebi Iddo be adrasheŋ be nwɔl to.