2 Kronikɛls 12 - EBƆRƐ BE KAWƆL

Ijipt be esa ka kɔ m pɔɔ Juda so be asheŋ

¹ Rehoboam be kuwura ka baŋ yili nɛnɛ, nɛ mo nɛ mbe basa kini kebaabɛ Enyɛnpe Ebɔrɛ be mbra so.

² Rehoboam ka ji kuwura be kafɛ nusopo to, nɛ Enyɛnpe Ebɔrɛ gberge bumo kusoe n shin nɛ Ijipt be ewura Shishak ba kɔ n sɔ Jerusalɛm ŋkpal b ka maa wora Enyɛnpe Ebɔrɛ kasonu so.

³ Benapo nɛ baa ta egbaŋɛturko a kɔ kena na be basa kagboŋ nɛ alfa anyɔ nɛ egbaŋɛdiipoana malɛ ŋgboŋ adeshe nɛ benapo damta nɛ esa maaŋ tiŋ ŋ karga nɛ b shi Libiya nɛ Sukkit nɛ Itiopia nɛ ewura na daŋ ta n ya kɔ kena na.

⁴ E daŋ kɔ n sɔ Juda be nde nɛ b pɔr egbal ŋ kulti na kikɛ nna hale n ya fo Jerusalɛm.

⁵ Anebi Shemaya daŋ yɔ ewura Rehoboam nɛ Juda be bejuŋkparpoana nɛ b shile n ya ŋana Shishak so ashi Jerusalɛm na kutɔ nna n ya kaŋɛ bumo le: “Enyɛnpe be kubɔya nɛ e kɔ a sa menyi nde. E yɛ: ‘Ŋkpal men ka kini ma so, ma alɛ gba yige menyi m bɔɔ Shishak enɔ.’ ”

⁶ Nɛ ewura na nɛ mbe bejuŋkparpoana shuli fanɛ b wora kulubi nseŋ kaŋɛ le: “Kusɔ nɛ Enyɛnpe Ebɔrɛ wora na kɔ akpa.”

⁷ Enyɛnpe Ebɔrɛ na ka nu loŋ, nɛ e kaŋɛ Shemaya le: “Ŋkpal b ka shuli fanɛ b wora kulubi so, m maaŋ mur bumo. Hale Shishak bee kɔ bumo gba, baaŋ pete. Ma agbo maaŋ naŋ ba Jerusalɛm so ga,

⁸ ama Shishak beeŋ pɔɔ bumo so, loŋ nɛ baaŋ pin kebaashuŋ ma nɛ kebaashuŋ durnya ere to be bewura ere be mbarga.”

⁹ Ewura Shishak daŋ ba Jerusalɛm nna m ba ta bɔrɛlambu na to nɛ ewura be laŋ to be asɔ lela kikɛ. E daŋ ta asɔ kikɛ nna nseŋ ta benapo be shuwa be asɔkuŋso nɛ ewura Sɔlɔmɔn lɔŋɛ na gba n ti so.

¹⁰ Ewura Rehoboam daŋ lɔŋɛ danyaŋ be asɔkuŋso nna n tal amo na to nseŋ ta amo n wɔtɔ bekumpo nɛ baa keni ewurkpa be mbunagboŋ so na be benimu be enɔ to.

¹¹ Saŋkama nɛ ewura na baaŋ yɔ bɔrɛlambu na to, bekumpo na bee ta asɔkuŋso na nna a keta, ewura na baaŋ bɛta n yɔ epe nɛ b naŋ bɛta amo n ya wɔtɔ ebu nɛ baa kuŋ na to.

¹² Ŋkpal ewura Rehoboam ka naŋ bɛta m ba Enyɛnpe Ebɔrɛ kutɔ so, Enyɛnpe na be agbo daa maŋ mur mo cheche, nɛ asheŋ naŋ nyalɛ ashi Juda be efuli so.

¹³ Ewura Rehoboam daŋ ji kuwura ashi Jerusalɛm nna nɛ mbe kuwura malɛ ji eleŋ ga. E daa la nfɛ adena nɛ kako nna pɔɛŋ nseŋ ji kuwura nfɛ kuduashunu ashi Jerusalɛm nɛ Enyɛnpe Ebɔrɛ lara ashi Israɛl be efuli so kikɛ fanɛ b baa bunyaŋ mo ndoŋ na. Ewura Rehoboam mo nio e daa la Naama nɛ e shi Ammɔn be efuli so na.

¹⁴ E daŋ wora alubi nna ŋkpal e ka daa maa wora Enyɛnpe Ebɔrɛ be aparsheŋ so.

¹⁵ B sibɛ ewura Rehoboam be kusɔ nɛ e wora saŋɛ so nɛ e daa la ewura na nɛ mbe kanaŋ to be asheŋ kikɛ nna n wɔtɔ anebi Shemaya nɛ anebi Iddo be adrasheŋ be nwɔl to. Saŋɛ so nɛ Rehoboam daa la Juda be ewura na, mo nɛ Israɛl be ewura Jeroboam daa kɔ abar kena nna saŋkikɛ.

¹⁶ Ewura Rehoboam ka wu, kakpa nɛ baa puli bewurbi ashi Jerusalɛm nɛ k la ewura Deevid be kade to na nɛ b daŋ puli mo. Ndoŋ nna nɛ mo pibinyɛn Abija sɔ mo so ŋ ki ewura.