2 Kronikɛls 11 - EBƆRƐ BE KAWƆL

Shemaya be kewuŋkaŋɛ be asheŋ

¹ Ewura Rehoboam ka ba Jerusalɛm na, nɛ e tre Bɛnjamin nɛ Juda be yiri na to be benapo lempo ŋgboŋ kalfa nɛ aduburwa m ba abar so. E daa sha keyɔ n ya kɔ Israɛl be eyiri nɛ a wɔ kelargato be esoso be kaba so na kena nna saŋɛ na so efuli na kikɛ beeŋ baa kraa la kukoŋwule.

² Ama Enyɛnpe Ebɔrɛ na daŋ kaŋɛ anebi Shemaya

³ nna fanɛ e ta le be kubɔya ere n sa ewura Rehoboam nɛ Juda nɛ Bɛnjamin be yiri to be basa na kikɛ.

⁴ E yɛ: “Men sa maŋ kaŋ kɔ menyi gbagba be basa Israɛlebi na kena. Menyi kikɛ e baa yɔ epe. Ma keparso nɛ le be asheŋ ere kikɛ wora na.” Nɛ b nu kusɔ nɛ Enyɛnpe Ebɔrɛ kaŋɛ bumo na nseŋ yige keya kɔ Jeroboam nɛ mbe basa kena.

Rehoboam ka pɔr egbal ŋ kulti ndeana na be asheŋ

⁵ Nɛ ewura Rehoboam shir a wɔ Jerusalɛm nseŋ shin nɛ b pɔr egbalana ŋ kulti Juda nɛ Bɛnjamin be yiri to be nde ere.

⁶ Amo ale Bɛtlɛhɛm nɛ Etam nɛ Tekua

⁷ nɛ Bɛfzur nɛ Soko nɛ Adulam

⁸ nɛ Gaaf nɛ Marɛsha nɛ Ziif

⁹ nɛ Adoraim nɛ Lakish nɛ Azeka

¹⁰ nɛ Zora nɛ Aijalɔn nɛ Hibrɔn.

¹¹ E daŋ shin nna nɛ baa kuŋ amo nɛnɛ nseŋ lara benapo be benimu nɛ baa keni nde na be kekama so nseŋ ta ajibi nɛ ɔlif be ŋku nɛ asɔnuuso,

¹² nɛ abɛlso be asɔkuŋso nɛ akpaana n wɔtɔ amo to. Ŋkpal loŋ so e daŋ ji eleŋ Juda nɛ Bɛnjamin be nde so ga.

Bɔrɛmatapoana nɛ Livaiebi ka ba Juda be kasawule so be asheŋ

¹³ Bɔrɛmatapoana nɛ Livaiebi nɛ b shi Israɛl be kelargato be esoso be kaba so be eyiri to na kikɛ daa bɛ ewura Rehoboam so nna.

¹⁴ Livaiebi na yige bumo be asɔbɔya be ejikpa nɛ nsawule ko nna n lɛ nseŋ koso n yɔ Juda nɛ Jerusalɛm ŋkpal ewura Jeroboam nɛ e bee ji Israɛl be kuwura na nɛ bewura nɛ b bɛ mo so na kikɛ ka maŋ shuli fanɛ b baa shuŋ fanɛ Enyɛnpe Ebɔrɛ be bɔrɛmatapoana so.

¹⁵ Ewura Jeroboam daŋ lara mo gbagba be bɔrɛmatapoana nna fanɛ b baa shuŋ kakpa nɛ nnyamase na bee lɔŋɛ bumo be agbir na nsaa sha fanɛ b baa shuŋ ayoyu lubi nɛ egbolufɔlbi nɛ e lɔŋɛ fanɛ agbir na.

¹⁶ Ndoŋ nna nɛ Israɛl be eyiriana na to be basa nɛ b daa sha kebaashuŋ Enyɛnpe Ebɔrɛ kashenteŋto na bɛ bɔrɛmatapoana na nɛ Livaiebi na so n yɔ Jerusalɛm, saŋɛ na so baaŋ tiŋ a lara esarga a sa Enyɛnpe Ebɔrɛ nɛ e la bumo nananyɛnana be Ebɔrɛ na.

¹⁷ Ŋkpal loŋ so Juda be kuwurji na daŋ ji eleŋ ga nɛ b chɛ Sɔlɔmɔn Pibinyɛn Rehoboam to nfɛ asa, nɛ bumo nɛ mo chena fanɛ kananɛ bumo nɛ ewura Deevid nɛ ewura Sɔlɔmɔn daa wɔtɔ na.

¹⁸ Ewura Rehoboam e daŋ ta Mahalaf nɛ mo tuto daa la Jerimɔf nɛ e la ewura Deevid pibinyɛn na. Mo nio e daa la Eliab pibiche Abiheel nɛ e la Jɛsi nɛ e la ewura Deevid mo tuto na mo nanabi na.

¹⁹ Ewura Rehoboam nɛ Mahalaf daa kɔ mbinyɛnsobi asa nna: Bumo e la, Jewush nɛ Shemariya nɛ Zaham.

²⁰ Kumo be kaman nɛ Rehoboam ta Absalɔm pibiche Maaka. Mo nɛ Maaka daa kɔ mbinyɛnsobi ana nna, bumo e daa la: Abija nɛ Attai nɛ Ziza nɛ Shelomif.

²¹ Ewura Rehoboam daa kɔ beche kuduaburwa nɛ bejipo malɛ adeshe. E daa kɔ bibinyɛn adunyɔ nɛ aburwa nɛ bibiche malɛ adeshe. Mbe beche nɛ bejipo kikɛ to Maaka nɛ e daa sha ga.

²² Mbe mbia malɛ kikɛ to, Maaka be pibinyɛn Abija nɛ e daa sha ga hale n lara mo fanɛ esa nɛ e beeŋ ba sɔ mo so n ji kuwura mbe kaman.

²³ Ewura Rehoboam daŋ wora kanyiasheŋ nna n shin nɛ mbe mbinyɛnso na be ekama bee keni Juda nɛ Bɛnjamin be eyiriana be nde nɛ b pɔr egbal ŋ kulti na so. E daŋ sa bumo asɔ kama nɛ baaŋ ta a keni ndeana na so nna nseŋ ta beche damta n sa bumo n ti so.