2 Kronikɛls 10 - EBƆRƐ BE KAWƆL

Eyiriana nɛ a wɔ kelargato be esoso be kaba so na ka kini kenu n sa ewura Rehoboam be asheŋ

¹ Rehoboam daŋ yɔ Shɛkɛm nna nɛ Israɛlebi nɛ b wɔ kelargato be esoso be kaba so chala abar a jo mo ndoŋ nɛ b buu mo kuwura.

² Jeroboam nɛ e la Nebat pibinyɛn nseŋ daŋ shile n ya ŋana Ewura Sɔlɔmɔn so ashi Ijipt na ka nu loŋ nɛ e bɛta m ba epe.

³ Kelargato be esoso be kaba so be eyiriana na e daŋ shuŋi n tre mo, nɛ bumo nɛ mo kikɛ yɔ Rehoboam kutɔ n ya kaŋɛ mo le:

⁴ “Fo tuto bre daŋ shin nɛ anyee gben ga. Fo baaŋ ku anyi be ashuŋ so nseŋ shin nɛ asheŋ bɔ n sa anyi bre, kumo ere anyi alɛ beeŋ baa shuŋ fo saŋkama.”

⁵ Nɛ Rehoboam kaŋɛ bumo le: “Men sa ma nchɛ asa nɛ n fɛ kesheŋ ere be asheŋ. Kumo be kaman nɛ men bɛta m ba nu kusɔ nɛ k wɔtɔ.” Ndoŋ nna nɛ basa na bɛta n yɔ.

⁶ Kumo be kaman nɛ Rehoboam ya bishi benimu nɛ b daa la mo tuto be asoetojipoana na le: “Manɛ nɛ menyee sha fanɛ ŋ kaŋɛ basa ere?”

⁷ Nɛ bumo alɛ kaŋɛ le: “Fo baa wora basa ere kelela nsaa wora kusɔ nɛ baa sha a sa bumo, kumo ere bumo alɛ beeŋ baa shuŋ fo saŋkikɛ.”

⁸ Ama e daŋ kini benyɛnnimu na be kasotoji nna nseŋ ya sɔ mo braana mbifɔlbi nɛ mo nɛ bumo la sarato na be kasotoji.

⁹ Le nɛ e daŋ bishi bumo: “Manɛ be kasotoji nɛ men kɔ n sa ma? Manɛ nɛ menyee sha ŋ ka kaŋɛ basa nɛ baa kaŋɛ ma fanɛ ŋ ku bumo be kushuŋ so n sa bumo ere?”

¹⁰ Ndoŋ nna nɛ mo braana nɛ mo nɛ bumo koso kebiato na kaŋɛ e kaŋɛ basa na le: “Men sa maa ta n tuto a ber ma.

¹¹ Nɛ n tuto daa ta ashuŋ damta a sa menyi nna ma ere beeŋ naŋ wora amo keshi n ti so. Nɛ e daa ta kuchuchɔ fuloŋ a kuya menyi so, ma ere beeŋ ta gbaŋɛ be kuchuchɔ a kuya menyi so!”

¹² Nchɛ asa na ka fo nɛ Jeroboam nɛ basa na kikɛ bɛta m ba Rehoboam kutɔ fanɛ kananɛ e yili bumo na gbagba.

¹³ Ewura na daŋ kini benyɛnnimu na be kasotoji nna nsaa malga basa na m malga jiga

¹⁴ fanɛ kananɛ mbrantiɛbia na kaŋɛ mo na, a kaŋɛ le: “Nɛ n tuto daa shin nɛ menyee shuŋ ga, ma ere beeŋ shin nɛ men shuŋ a chɔ loŋ. Nɛ e daa ta kuchuchɔ fuloŋ a kuya menyi so, ma ere beeŋ ta gbaŋɛ be kuchuchɔ ŋ kuya menyi so!”

¹⁵ K daa la Enyɛnpe Ebɔrɛ be kepar nna fanɛ kusɔ nɛ e bɔla anebi Ahija nɛ e shi Shilo na so ŋ kaŋɛ Nebat pibinyɛn Jeroboam na e bɔlɔ so. Kumo alɛ be loŋ so nɛ ewura na be shɛŋ daa maŋ wɔ basa na to na.

¹⁶ Basa na ka wu fanɛ ewura na maŋ nu n sa bumo na, nɛ b ponte ŋ kaŋɛ le: “Anyi nɛ Deevid nɛ mbe kanaŋ maŋ kɔ shɛŋ! Manɛ nɛ b daŋ wora n sa anyi? Israɛlebi, men shin nɛ an yɔ epe! Men yige Rehoboam nɛ e baa ji mbe laŋ to ebi nawuleso kuwura.” Ndoŋ nna nɛ Israɛlebi na kini kenu n sa mo

¹⁷ nɛ Juda be kaba so nawule ebi sɔ Rehoboam fanɛ bumo be ewura.

¹⁸ Kede be kaman nɛ ewura Rehoboam shuŋi Adoniram nɛ e bee keni beshumpo so na fanɛ e ya malga Israɛlebi na kutɔ. E ka yɔ nɛ b kpa mo ajembu m mɔ. Nɛ Rehoboam nya manaŋ n luri mbe gbaŋɛturko to n shile n yɔ Jerusalɛm.

¹⁹ Baŋ yili loŋ be saŋɛ m ba fo kabre, basa nɛ b wɔ Israɛl be kelargato be esoso be kaba so na bee kini kebaanu a sa ewura Deevid be kanaŋ to be kuwurji be mbra nna.