2 Kronikɛls 1 - EBƆRƐ BE KAWƆL

¹ Sɔlɔmɔn nɛ e la ewura Deevid pibinyɛn na daŋ ji Israɛl be efuli na so eleŋ ga ŋkpal Enyɛnpe nɛ e la mbe Ebɔrɛ na ka daŋ nɛfa mo nseŋ sa mo eleŋ ga so.

² Kachako nɛ ewura Sɔlɔmɔn kaŋɛ mbe benapo be benimuana nɛ b daa keni benapo kagboŋ be katuŋ so nɛ benapo kalfa be katuŋ so nɛ ekrachi nimuso nɛ kanaŋ to be benimuana nɛ basa nɛ b ka na kikɛ nna kenishipereso

³ fanɛ b tu mo n yɔ kakpa nɛ baa bunyaŋ Ebɔrɛ ashi Gibiɔn na. B daŋ yɔ ndoŋ nna ŋkpal Enyɛnpe Ebɔrɛ be wajɛbu nɛ mbe kayɛrbi Mosis daŋ lɔŋɛ ashi kiyi to dra dra na ka daa wɔ ndoŋ so.

⁴ Loŋ be saŋɛ na nɛ b ta Enyɛnpe Ebɔrɛ be ŋkre be deka na ashi Kiriaf Jearim m ba yili wajɛbu nɛ ewura Deevid wora ashi Jerusalɛm na to.

⁵ Danyaŋ be bɔrɛsure nɛ Yuri pibinyɛn Bezalɛl nɛ e la Hur mo nanabi daŋ lɔŋɛ na gba daa yil Enyɛnpe Ebɔrɛ be wajɛbu na be anishito nna ashi Gibiɔn. Ewura Sɔlɔmɔn nɛ basa na kikɛ daŋ yɔ ndoŋ nna n ya bunyaŋ Enyɛnpe Ebɔrɛ.

⁶ Ewura Sɔlɔmɔn ta asɔbɔya kagboŋ nna n chɔɔ n lara sarga danyaŋ be bɔrɛsure na so n sa Enyɛnpe Ebɔrɛ.

⁷ Kumo be kanyɛso na gbagba nɛ Ebɔrɛ lara mbe kumu ŋ ŋini Sɔlɔmɔn edare to nseŋ bishi mo le: “Manɛ nɛ fee sha nɛ n wora n sa fo?”

⁸ Nɛ ewura Sɔlɔmɔn kaŋɛ Enyɛnpe na le: “Kasha nɛ fo kɔ n sa fo kayɛrbi, n tuto Deevid maa chɛrga kikɛ. Naniere fo alɛ ta ma n tal mbe katelamu to nɛ ŋ ki ewura.

⁹ O Enyɛnpe Ebɔrɛ, jande shin nɛ fo nnɔ nɛ fo nase n sa n tuto na e bɔlɔ so. Fo ta ma nna ŋ ki basa nɛ b shibi m baŋ so kekarga ere be ewura,

¹⁰ amoso jande sa ma kanyiasheŋ nɛ nfɛra nɛ meeŋ ta n ji bumo so kuwura nɛnɛ, nɛ mannɛ aloŋ, nuso nɛ meeŋ wora n tiŋ n ji fo basa lempo ere kikɛ so kuwura?”

¹¹ Nɛ Enyɛnpe Ebɔrɛ malɛ kaŋɛ Sɔlɔmɔn le: “Fo kule kusɔ nɛ k walɛ. Fo maŋ kule kedamaya ŋko amansherbi ŋko fo ketre be kedii ŋko fo doŋana be luwu ŋko ŋkpa tenteŋ n sa fo kumu ama kanyiasheŋ nɛ nfɛra nɛ fo kule ma nɛ fo tiŋ n ji ma basa nɛ n ta fo ŋ ki bumo be ewura na so kuwura nɛnɛ.

¹² Meeŋ sa fo kanyiasheŋ nɛ nfɛra nseŋ naŋ ta kedamaya nɛ amansherbi n ti fo so. Ma alɛ beeŋ shin nɛ fo ketre e dii a chɔ bewura kama nɛ b juŋkpar fo nɛ bumo nɛ baaŋ bɛ fo so kikɛ.”

Ewura Sɔlɔmɔn be eleŋ nɛ mbe kedamaya be asheŋ

¹³ Ndoŋ nna nɛ ewura Sɔlɔmɔn lar kakpa nɛ Enyɛnpe Ebɔrɛ be wajɛbu na daa wɔ ashi Gibiɔn na m bɛta n yɔ Jerusalɛm n ya kaa ji Israɛl be kuwura.

¹⁴ Mbe egbaŋɛturko nɛ egbaŋɛ daŋ baa wora keshi nna hale m ba fo egbaŋɛturko kagboŋ nɛ alfa ana nɛ egbaŋɛ malɛ ŋgboŋ kuduanyɔ. E daŋ yige beko Jerusalɛm nna nseŋ yige beko malɛ ndegboŋ na be ako to.

¹⁵ Jemanɛ nɛ e daa ji kuwura na, shuwa nɛ gbiti bre daŋ gbigi nna fanɛ ajembu ashi Jerusalɛm be kade to, nɛ ndibi nɛ baa tre sida na malɛ daŋ gbigi fanɛ ndibi nɛ baa tre sikamɔɔ nɛ a wɔ Juda be abee be efuli so na.

¹⁶ Ewura Sɔlɔmɔn be ewurkpa be eyawujipoana e daa tɔ mbe ewurkpa be egbaŋɛ ashi efuli wɔfɔana nɛ baa tre Musri nɛ Silishiya na a bar mo.

¹⁷ Gbiti be ndarbi alfa ashe nɛ b daŋ tɔ mbe gbaŋɛturko na be kekama nseŋ tɔ gbaŋɛ kama malɛ gbiti be ndarbi kalfa nɛ adunu. Bumo e daa fa egbaŋɛ nɛ egbaŋɛturko a sa Hitebi nɛ Siriyaebi be bewura gba.