2 Bewura 9 - EBƆRƐ BE KAWƆL

B ka chulgi ŋku n wurge Jehu so n ta mo ŋ ki Israɛl be ewura

¹ Kachako nɛ anebi Elaisha tre anebiana be katuŋ na to be eko ŋ kaŋɛ mo le: “Bela ase n ta ɔlif be ŋku kɔlba ere n yɔ Ramɔf nɛ k wɔ Giliad na.

² Fo kaŋ fo ndoŋ fo fin Jehoshafat pibinyɛn Jehu nɛ e la Nimshi mo nanabi na nseŋ keta mo n lar mo braana to n yɔ ebuŋkpar,

³ n ya chulgi ŋku n wurge mbe kumu so m buu mo kuwura ŋ kaŋɛ le: ‘Enyɛnpe Ebɔrɛ e lara fo fanɛ fo baa la Israɛl be ewura.’ Kumo be kaman nɛ fo lar kade na to manaŋ nsaa maŋ ji shɛŋ.”

⁴ Ndoŋ nna nɛ anebifɔlbi na yɔ Ramɔf.

⁵ E ka fo ndoŋ nɛ e wu benapo be benimu na nɛ b wɔ nshɛr to nɛ e kaŋɛ: “N nyɛnpe, ŋ kɔ baru ko nɛ ŋ kaŋɛ fo.” Nɛ Jehu bishi: “Anyi be emo bre nɛ fee malga a sa ere?” Nɛ anebifɔlbi na kaŋɛ: “N nyɛnpe fo nɛ mee malga a sa.”

⁶ Ndoŋ nna nɛ Jehu koso n luri ebu to nɛ anebifɔlbi na n luri ebu na to n ya chulgi ɔlif be ŋku n wurge mbe kumu so nseŋ kaŋɛ mo le: “Enyɛnpe nɛ e la Israɛl be Ebɔrɛ na yɛ e bee buu fo mbe basa Israɛlebi be kuwura nna.

⁷ Ama a daga fo ka mur ewura Ahab nɛ e la fo nyɛnpe na be laŋ to ebi kikɛ ŋ gberge bumo kusoe ŋkpal mbe eche Jɛzebel ka mɔ mbe anabiana nɛ mbe nyɛrbi so.

⁸ Ahab be kanaŋ nɛ mbe kaman to ebi kikɛ daga luwu. Meeŋ mur kanaŋ na to be benimu nɛ mbia nɛ b la benyɛn kikɛ.

⁹ Kananɛ m baŋ wora Israɛl be ewura Jeroboam nɛ mbe kanaŋ nɛ ewura Baasha nɛ mbe kanaŋ na gbagba nɛ meeŋ wora Ahab malɛ gba.

¹⁰ B maaŋ puli Jɛzebel, njɔnɔ e naaŋ we mbe kebuni ashi Jizreel be kade to.” Anebifɔlbi na ka malga n loge, nɛ e lar ebu na to n shile n yɔ.

¹¹ Ndoŋ nna nɛ Jehu bɛta n yɔ mo braana benimu na kutɔ nɛ b bishi mo le: “Nuso nɛ asheŋ du? Manɛ nɛ ebompo ere bee fin fo kutɔ?” Nɛ Jehu kaŋɛ: “Men nyi kusɔ nɛ e bee sha gba.”

¹² Nɛ b kaŋɛ le: “An maŋ nyi, kaŋɛ anyi kusɔ nɛ e kaŋɛ!” Nɛ Jehu kaŋɛ: “Kusɔ nɛ e yɛ Enyɛnpe na kaŋɛ e la fanɛ, e buu ma Israɛl be kuwura.”

¹³ Epul to nɛ Jehu mo braana benimu na parga bumo be epiŋi to n deŋi ketempreŋ na so nɛ Jehu dii n yili so. Nɛ b foŋ mbel nseŋ cha awɔr ŋ kaŋɛ: “Jehu e la ewura!”

B ka mɔ Israɛl be ewura Joram be asheŋ

^14-15 Loŋ be saŋɛ na nɛ ewura Joram daŋ nya doro ashi kena nɛ Ramɔfebi nɛ Siriya be ewura Haziɛl daŋ kɔ na to, nɛ mo ere ewura Joram na wɔ Jizreel a chɛ mbe kumu na, Jehu daŋ kaŋɛ mo braana benapo be benimu na nna le: “Menyi be ekama nɛ e bɛ ma so, e sa maŋ kaŋ juŋkpar n yɔ Ramɔf n ya kaŋɛ Jizreel be basa kesheŋ ere.”

¹⁶ Kede be kaman nɛ e luri mbe gbaŋɛturko to n yɔ Jizreel. Loŋ be jemanɛ na kikɛ nɛ Joram maŋ naŋ nya alenfia nɛ Juda be ewura Ahaziya malɛ yɔ ndoŋ nɛ e ya bɔɔ mo so.

¹⁷ Ekumpo ko nɛ e yil egbal be kakpa jeŋgreŋ nɛ bekumpo bee keni so ashi Jizreel na ka wu Jehu nɛ mbe basa ka bee ba, nɛ e cha awɔr ŋ kaŋɛ ewura na le: “N wu basa ko ka bee ba.” Ndoŋ nna nɛ Joram kaŋɛ bumo le: “Men shuŋi esa ko nɛ e ta gbaŋɛ n ya bishi bumo fanɛ belɔpo e la bumo ŋko bedoŋ?”

¹⁸ Nɛ kabɔ dii gbaŋɛ n yɔ Jehu kutɔ n ya kaŋɛ mo fanɛ ewura yɛ: “Kagbenewushiso nɛ fee ba a?” Nɛ Jehu kaŋɛ: “Kumo ere maŋ la fo asheŋ! Bɛ ma basa ere so.” Kumo be jemanɛ nɛ ekumpo nɛ e yil egbal be kakpa jeŋgreŋ na kaŋɛ fanɛ kabɔ na yɔ katuŋ na kutɔ ama mo alɛ maŋ naŋ bɛta m ba.

¹⁹ Ndoŋ nna nɛ b naŋ shuŋi kabɔ ko nɛ mo alɛ gba ya bishi Jehu loŋ be kesheŋ koŋwule na. Nɛ Jehu malɛ kaŋɛ le: “Kumo ere maŋ la fo asheŋ! Bɛ ma basa ere so.”

²⁰ Nɛ ekenipo na naŋ ba kaŋɛ ewura na fanɛ kabɔ na yɔ basa na kutɔ mo alɛ maŋ naŋ bɛta m ba, nseŋ kaŋɛ le: “Katuŋ na be ejuŋkparpo na bee dii mbe gbaŋɛturko na fanɛ ebompo. Ashere Jehu nna na!”

²¹ Nɛ ewura Joram kaŋɛ: “Men ta ma gbaŋɛturko m bar ma.” B ka ta kumo m bar mo nɛ mo nɛ ewura Ahaziya dii bumo be egbaŋɛturko n ya shɛr Jehu to ashi kudɔsawule nɛ k daa la Nabɔf nɛ Jɛzebel daŋ mɔ ashi mbe ndibi be kudɔ to na peya na.

²² Joram ka wu Jehu na nɛ e bishi mo le: “Kagbenewushi so nɛ fee ba a?” Ndoŋ nna nɛ Jehu malɛ kaŋɛ: “Nuso nɛ kayurwushi beeŋ tiŋ a wɔtɔ saŋɛ so nɛ fo nio Jɛzebel be kegbaya nɛ kagbirshuŋ wɔ anyi to.”

²³ Ahaziya ka ta mbe gbaŋɛturko nɛ Joram kilgi nɛ e shile nseŋ kaŋɛ: “Ahaziya, an yɔ, kejigbelɛ nɛ b sho anyi na.”

²⁴ Ndoŋ nna nɛ Jehu ta mbe keta n to Joram nɛ k ya da mbe kaman n luri n ya da mbe kukuumu n ya bɔl. Nɛ Joram tɔr mbe gbaŋɛturko to epul na to n wu.

²⁵ Nɛ Jehu kaŋɛ Bidka nɛ e la mbe kayɛrbi na le: “Ta mbe kebuni na n ya lɛ kasawule nɛ k daa la Nabɔf peya na so. Fo nyiŋi saŋɛ so nɛ ma nɛ fo daa dii egbaŋɛturko a bɛ ewura Joram mo tuto Ahab so na a? Kumo be jemanɛ nɛ Enyɛnpe Ebɔrɛ na daŋ kaŋɛ le na.”

²⁶ E yɛ: “N wu b ka mɔ Nabɔf be mbinyɛnsobi ndre. Ma alɛ beeŋ gberge fo kusoe kasawule nɛ b mɔ Nabɔf ere gbagba so.” Kumo be kaman nɛ Jehu kaŋɛ mbe kayɛrbi na fanɛ e ya ta Joram be kebuni n ya lɛ Nabɔf be kasawule na so saŋɛ na so Enyɛnpe Ebɔrɛ be kamalga na beeŋ bɔlɔ so.

B ka mɔ Juda be ewura Ahaziya be asheŋ

²⁷ Ewura Ahaziya ka wu kusɔ nɛ k wora na, nɛ e luri mbe gbaŋɛturko to a shile a yɔ Bɛf Hegan nɛ Jehu ju m buu mo so nsaa kaŋɛ le: “Men mɔ mo alɛ gba!” Ndoŋ nna nɛ Jehu be benapo doro mo saŋɛ so nɛ e wɔ Guur nɛ k mata Iblim be kade to be ekpa to a yɔ na. Nɛ e keta doro na n ya fo kade nɛ baa tre Mɛjido na pɔɛŋ nseŋ wu.

²⁸ Ndoŋ nna nɛ mbe benimu na ta mbe kebuni na n yɔ Jerusalɛm nɛ k la ewura Deevid be kade to na n ya puli bewura be kejembulaŋ be nchaŋ nɛ baa puli bewura na to.

²⁹ Ahab pibinyɛn Joram ka ji Israɛl be kuwura be kafɛ kudukakosopo to, nɛ Ahaziya malɛ ki Juda be ewura.

B ka mɔ ewurche Jɛzebel be asheŋ

³⁰ Jehu ka yɔ Jizreel nɛ Jɛzebel nu mbe asheŋ, nseŋ ya ŋe kile nseŋ mɔ mbe emin to nɛnɛ nsaa jule a keni tokuro to ashi ewura na be laŋ to.

³¹ Jehu ka bɔla kade na be kabuna to a ba, nɛ Jɛzebel boŋ to ŋ kaŋɛ le: “Fo nɛ baa tre Zimri na a? Emɔpo ere! Manɛ e bar fo nfe?”

³² Ndoŋ nna nɛ Jehu maŋ kumu so ŋ keni tokuro na ase m ponte ŋ kaŋɛ: “Wanɛ e bɛ ma so?” Nɛ ewura be laŋ to be benimuana yili tokuro na ase a jule a keni mo.

³³ Nɛ Jehu ponte ŋ kaŋɛ bumo le: “Men ta Jɛzebel n lɛ tokuro na to!” Ndoŋ nna nɛ b ta mo n lɛ to nɛ egbaŋɛ chichi mo so nɛ mbe ŋklaŋ fiɛ egbal na nɛ egbaŋɛ nɛ b chichi mo so na. Nɛ Jehu dii mbe egbaŋɛturko n ya chichi mbe kebuni na so,

³⁴ n ya luri ewura be laŋ na to nɛ e ya fin a ajibi n ji nseŋ kaŋɛ le: “Kashenteŋ nna fanɛ e la alubiworapo ama mo alɛ la ewura pibiche nna amoso meeŋ sa mo kupuli lela.”

³⁵ Basa nɛ b yɔ nɛ b ya puli mo na daa maŋ wu mbe eyur ama mbe kumuwibi nɛ mbe enɔana nɛ mbe aya be awibi nawule nɛ b daŋ wu.

³⁶ B ka ya bɔ Jehu kesheŋ ere be baru nɛ e kaŋɛ le: “Kananɛ Enyɛnpe Ebɔrɛ bɔla mbe kayɛrbi Elaija so ŋ kaŋɛ fanɛ njɔnɔ e naŋ ji Jɛzebel be eyur ashi Jizreel be kasawule so na gbagba e wora na.

³⁷ E yɛ baaŋ ta mbe eyur nɛ k ka na n farnyaŋ to n lɛ fanɛ anabin nɛ esa kama maaŋ tiŋ m pin mo.”