2 Bewura 8 - EBƆRƐ BE KAWƆL

Shunɛm be kache na ka bɛta m ba be asheŋ

¹ Elaisha daŋ kaŋɛ Shunɛm be kache nɛ mbe kebia daŋ wu nɛ mo ere Elaisha tiŋi mo na nna fanɛ e keta mbe kanaŋ n yɔ kaplɛkama nɛ e bee sha n ya chena ŋkpal manɛ so Enyɛnpe Ebɔrɛ na beeŋ shin nɛ akoŋgboŋ e tɔr kasawule na so nfɛ ashunu.

² Kache na daŋ bɛ kusɔ nɛ Elaisha daŋ kaŋɛ na so nna nɛ mo nɛ mbe kanaŋ yɔ Filisti be kasawule so n ya ji ndoŋ nfɛ ashunu.

³ Nfɛ ashunu na be kaman nɛ e naŋ bɛta n yɔ Israɛl be kasawule so nseŋ ya kule ewura na fanɛ b bɛta mbe kasawule nɛ mbe laŋ kikɛ n sa mo.

⁴ Ewura na malɛ daa malga Elaisha be kayɛrbi Gehazi kutɔ nna a bishi mo Elaisha be emamachisheŋ nɛ e wora na be asheŋ.

⁵ Gehazi ka bee kaŋɛ ewura na kananɛ Elaisha tiŋi kebia ashi luwu to, nɛ kache na fo ndoŋ. Nɛ Gehazi kaŋɛ ewura na le: “Yiramu, Kache nɛ Elaisha tiŋi mbe kebia ashi luwu to na nde!”

⁶ Nɛ Ewura na bishi kache na kesheŋ na, nɛ kache na kaŋɛ mo kusɔ nɛ Gehazi kaŋɛ na gbagba. Ndoŋ nna nɛ ewura na tre mbe benimuana na be eko ŋ kaŋɛ mo fanɛ e ya keni nɛ kache na e nya mbe asɔ kikɛ n ta tɔnɔ nɛ e daa beeŋ nya mbe ndɔ to nfɛ ashunu nɛ a choŋ na kikɛ n ti so.

⁷ Jemanɛ na so nɛ Siriya be ewura Bɛnhadad daa lɔ, nɛ Elaisha yɔ Damaskɔs nɛ e ya chɔrɔ mo. B ka kaŋɛ ewura na fanɛ Elaisha ba ndoŋ,

⁸ nɛ e kaŋɛ kanyɛn ko nɛ baa tre Haziɛl nɛ e la mbe benimuana na be eko na le: “Ta kakɛ n ya sa anebi na ŋ kule mo fanɛ e bishi Enyɛnpe Ebɔrɛ ŋ keni meeŋ nya alenfia a?”

⁹ Ndoŋ nna nɛ Haziɛl fin asɔ nɛ a walɛ be yiri yiri ashi Damaskɔs be kade to ŋ kre n deŋi enyɔma adena so nɛ e ya sa Elaisha. Haziɛl ka yɔ Elaisha kutɔ nɛ e kaŋɛ mo le: “Fo kayɛrbi ewura Bɛnhadad yɛ m ba bishi fo fanɛ e beeŋ koso mbe kulɔ ere to a?”

¹⁰ Nɛ Elaisha malɛ kaŋɛ le: “Enyɛnpe Ebɔrɛ na lara ŋ ŋini ma fanɛ ewura Bɛnhadad beeŋ wu ama mo alɛ beeŋ nya alenfia pɔɛŋ.”

¹¹ Ndoŋ nna nɛ Elaisha keni Haziɛl be anishito tenini nɛ anishinyɔr pɛ Haziɛl nɛ e kurgi kumu n yuu to nɛ Elaisha fara a shu.

¹² Nɛ Haziɛl bishi mo: “Manɛ nna nɛ fee shu n nyɛnpe?” Nɛ Elaisha kaŋɛ: “Ŋkpal ŋ ka wu asheŋ lubi nɛ feeŋ wora Israɛlebi so. Feeŋ chɔɔ bumo be kumɔlga be mboŋ lempo nseŋ mɔ bumo be mbrantiɛ, m bure bumo be mbi popɔrbi be amu to nseŋ baŋɛ bumo be bedampoche be epunana to.”

¹³ Nɛ Haziɛl kaŋɛ: “Fo kayɛrbi e la ma. M maŋ kɔ eleŋ. Fo tama fanɛ meeŋ shuli n wora loŋ a?” Nɛ Elaisha kaŋɛ mo le: “Enyɛnpe Ebɔrɛ na e lara ŋ ŋini ma fanɛ fo e naŋ ba ki Siriya be ewura m bɛ emo nɛ e bee ji ere so.”

¹⁴ Haziɛl ka bɛta n yɔ ewura Bɛnhadad kutɔ nɛ e bishi mo kusɔ nɛ Elaisha kaŋɛ. Nɛ Haziɛl yɛ: “E kaŋɛ nna fanɛ feeŋ naŋ nya alenfia.”

¹⁵ Ama kare ka cha, nɛ Haziɛl ta ketaa gbɛgbɛso m pɔlɔ nchu to nseŋ ta kumo m buu ewura na be anishi so hale nɛ e wu. Nɛ Haziɛl sɔ Bɛnhadad so n ji Siriya be kuwura.

Juda be ewura Jehoram be asheŋ

¹⁶ Ahab pibinyɛn Joram ka ji Israɛl be kuwura be kafɛ nusopo to nɛ Jehoshafat pibinyɛn Jehoram malɛ ji Juda be kuwura.

¹⁷ Nfɛ adesa nɛ anyɔ nɛ Jehoram daŋ ji pɔɛŋ ŋ ki ewura, nseŋ ji kuwura Jerusalɛm to nfɛ aburwa.

¹⁸ Ewura Jehoram daŋ ta ewura Ahab pibiche nna, amoso e daa wora asheŋ nna fanɛ ewura Ahab be kanaŋ to ebi nɛ Israɛl be bewura nseŋ wora alubi ŋ gbiti Enyɛnpe Ebɔrɛ na.

¹⁹ Ama Enyɛnpe Ebɔrɛ na daa maa sha fanɛ e mur Juda ŋkpal e ka nase kɔnɔ n sa ewura Deevid dra dra fanɛ mbe kaman to ebi e naŋ baa ji Juda be kuwura saŋkikɛ so.

²⁰ Saŋɛ so nɛ Jehoram daa la Juda be ewura na, Edɔm be efuli so be basa na daa kini kebaanu a sa Judaebi nna nsaa lara bumo gbagba be bewura.

²¹ Amoso ewura Jehoram nɛ mbe benapo be benimuana na daŋ ta egbaŋɛturko nna n yɔ kade nɛ baa tre Zair nɛ b ya kɔ Edɔmebi na kena. Ama Edɔmebi na daŋ kulti bumo nna n wɔtɔ. Kanyɛ ka biri, nɛ Judaebi na kɔ Edɔmebi kena nɛ Edɔmebi na pɔɔ bumo so nɛ b shile n yɔ epe.

²² Yili loŋ be saŋɛ na, nɛ Edɔmebi sɔ bumo be amu ashi Judaebi be enɔ to. Kumo be saŋɛ nɛ Libna be kade to ebi gba kini kebaanu a sa ewura Jehoram ŋkpal e ka kini kebaanu a sa Enyɛnpe Ebɔrɛ nɛ e la mo nananyɛnana be Ebɔrɛ na so.

²³ B daŋ sibɛ kusɔ kama nɛ ewura Jehoram wora nna n wɔtɔ Juda be bewura be adrasheŋ be nwɔl to.

²⁴ E ka wu, kakpa nɛ baa puli bewura ashi Jerusalɛm nɛ k la Deevid be kade to na nɛ b daŋ puli mo, nɛ mo pibinyɛn Azariya sɔ mo so n ji kuwura.

Juda be ewura Ahaziya be asheŋ

²⁵ Ahab pibinyɛn Joram ka ji Israɛl be kuwura be kafɛ kuduanyɔ to nɛ Jehoram pibinyɛn Ahaziya malɛ ki Juda be ewura.

²⁶ Ahaziya daŋ fo nfɛ adunyɔ nɛ anyɔ nna pɔɛŋ nseŋ ki ewura. Mo alɛ daŋ ji kuwura Jerusalɛm to kafɛ koŋwule nna. Atalia nɛ e la Israɛl be Ewura Ahab pibiche nsaa la ewura Omri mo nanabi na, e daa la Ahaziya mo nio.

²⁷ Ahaziya gba daŋ bɛ ewura Ahab be kaman to ebi be ekpa so nna n wora alubi ŋkpal mo nio Atalia nɛ e la Israɛl be ewura Ahab pibiche na so.

²⁸ E daŋ bɛ bumo be kasotoji so nna n tu Israɛl be ewura Joram n ya kɔ Siriya be ewura Haziɛl kena. Ramɔf nɛ k wɔ Giliad na nɛ b daŋ tu abar ŋ kɔ kena na nseŋ doro ewura Joram ashi kena na to.

²⁹ E ka doro na, nɛ e bɛta n yɔ Jezreel be kade to nɛ e ya chɛ mbe doro na, nɛ ewura Ahaziya yɔ ndoŋ nɛ e ya bɔ mo so.