2 Bewura 7 - EBƆRƐ BE KAWƆL

¹ Ade kikɛ be kaman nɛ Elaisha kaŋɛ fanɛ b loto n nu kusɔ nɛ Enyɛnpe Ebɔrɛ na kaŋɛ. E yɛ: “Echefo saŋɛ ere so menyeeŋ tɔ ayu lela kurwa asasa nɛ ayu peper malɛ kurwa asheshe gbiti be kadɛrbi koŋwule ashi Samɛria be kade to.”

² Ndoŋ nna nɛ ewura na be benapo be enimu nɛ e bee fute a yigeso na kaŋɛ anebi Elaisha le: “Loŋ maaŋ tiŋ n wora. Hale Enyɛnpe Ebɔrɛ shin nɛ bɔrɛ ba ga nɛ ayu wora ga gba, amo be yawu maaŋ baa du loŋ.” Nɛ Elaisha kaŋɛ: “Fo anishi nɛ feeŋ ta n wu amo ama fo maaŋ ji amo be ajibi.”

Siriya be benapo ka bɛta n yɔ be asheŋ

³ Jemanɛ na so nɛ ebotiponyɛn ana ko daa wɔ Samɛria be egbal na be ekarso a mata kabunagboŋ na nseŋ kaŋɛ abar le: “Manɛ e ba nɛ anyeeŋ chena nfe hale n ya wu?

⁴ An yɔ kade to gba an maaŋ nya shɛŋ ndoŋ n ji. Anyi alɛ chena nfe gba akoŋ e naŋ mɔ anyi. Amoso men shin nɛ an yɔ Siriyaebi na be keeyi to n ya ta anyi be amu m bɔɔ bumo enɔ. Ashere baaŋ mɔ anyi ŋko baaŋ yige anyi.”

^5-6 Kanyɛ ka bee biri, nɛ ebotipo ana na lar n yɔ Siriyaebi na be keeyi to nɛ esa kama maŋ wɔtɔ. Enyɛnpe Ebɔrɛ na e shin nɛ Siriya be benapo na nu egbri ko fanɛ benapo damta ka dii egbaŋɛ nɛ egbaŋɛturko a ba na, nseŋ fɛ fanɛ Israɛl be ewura na e ya haya Hitebi nɛ Ijiptebi be bewura nɛ bumo benapo fanɛ b ba kɔ bumo kena.

⁷ Ŋkpal loŋ so nɛ Siriyaebi na shile bumo be keeyi to n yige bumo be ewajɛbu nɛ bumo be egbaŋɛ nɛ ekurma kumo be kanyɛ na kikɛ.

⁸ Ebotipo ana na ka fo keeyi na to nɛ b ya luri ewajɛbu na be kuko to n ji ajibi nseŋ nuu asɔnuuso nɛ a wɔ kumo to na nseŋ muu shuwa nɛ gbiti nɛ asɔbuuso n ya ŋana nseŋ naŋ bɛta m ba luri wajɛbu ko gba to m muu asɔ nɛ a wɔ kumo to n ya ŋana.

⁹ Kumo be kaman nɛ b kaŋɛ abar le: “K daa maŋ daga an ka wora le! An kɔ baru lela ko nɛ k maŋ daga k shir an nawule kutɔ. An baŋ yige nɛ kare e chɛ anyi pɔɛŋ nɛ an bɔ baru ere, baaŋ gberge anyi kusoe, amoso men shin nɛ an yɔ manaŋ n ya kaŋɛ ewura na be benapo be benimu na kesheŋ ere!”

¹⁰ Ndoŋ nna nɛ b lar Siriyaebi be benapo na be keeyi to m bɛta n yɔ Samɛria be kade na to n ya ponte ŋ kaŋɛ kumo be mbunakumpoana na le: “An ka yɔ Siriyaebi be benapo na be keeyi to, anyi maŋ wu esa, anyi alɛ maŋ nu esa kama gba be asheŋ ndoŋ. Bumo be egbaŋɛ nɛ ekurma nawule a chɛ a mur ndoŋ ashi bumo be ewajɛbu ase.”

¹¹ Nɛ bekumpo na ya bɔ baru na ashi ewurkpa.

¹² Ndoŋ nna nɛ ewura na koso kanyɛso na ŋ kaŋɛ mbe laŋ to be beshumpo be benimu na le: “Men shin nɛ ŋ kaŋɛ menyi kusɔ nɛ Siriya be benapo na bee kre. Ŋkpal b ka nyi akoŋ ka tɔr nfe so nɛ b lar bumo be keeyi to n ya ŋana kupuŋ to na, saŋɛ na so an kaŋ lar nɛ an ya fin ajibi, baaŋ kɔ m pɔɔ anyi so n sɔ anyi be kade.”

¹³ Nɛ mbe benapo be benimu na be eko kaŋɛ le: “Anyi nɛ an ka ere gba bee shin nɛ an wu fanɛ bumo nɛ b juŋkpar n wu na nna na. Amoso men shin nɛ an ta egbaŋɛ nɛ b ka ere be benu n shuŋi basa nɛ b ya keni kusɔ nɛ k wora ere.”

¹⁴ Ndoŋ nna nɛ b lara basa ko nɛ b ta egbaŋɛturko anyɔ nɛ ewura na shuŋi bumo fanɛ b ya keni kusɔ nɛ k wora Siriya be benapo na.

¹⁵ Nɛ basa na pɛ ekpa hale n ya fo Jɔɔdan be lɔr na ase kikɛ nseŋ wu Siriyaebi na be asɔbuuso nɛ akɔsɔ nɛ b yige n lɛ kubɔrso saŋɛ so nɛ baa shile na. B ka wu loŋ na, nɛ b bɛta m ba kaŋɛ ewura na.

¹⁶ Ndoŋ nna nɛ Samɛriaebi na shile n yaa muu Siriyaebi na be asɔ ashi bumo be keeyi to. Nɛ kusɔ nɛ Enyɛnpe Ebɔrɛ kaŋɛ na fanɛ, baaŋ baa fa ayu lela kurwa asa asa nɛ ayu peper kurwa ashe ashe gbiti be kadɛrbi koŋwule na bɔlɔ so.

¹⁷ Loŋ be saŋɛ na nɛ ewura na daŋ shin nɛ benapo be enimu nɛ e bee fute a yige so na bee keni kade na be kabunagboŋ na so, nɛ gbirgbir gbirgbir na shin nɛ basa chichi mo so m mɔ. Nɛ kusɔ nɛ Enyɛnpe Ebɔrɛ bɔla anebi Elaisha so ŋ kaŋɛ saŋɛ nɛ ewura na yɔ mo pe na bɔlɔ so.

¹⁸ Elaisha daŋ kaŋɛ ewura na nna fanɛ kare ya ka chɛ, baaŋ fa ayu lela kurwa asa asa ŋko ayu peper kurwa ashe ashe ashe gbiti be kadɛrbi koŋwule ashi Samɛria to.

¹⁹ Nɛ ewura na be laŋ to be beshumpo be enimu na malɛ kaŋɛ fanɛ hale nɛ Enyɛnpe Ebɔrɛ shin nɛ ayu wora ga gba loŋ maaŋ tiŋ n wora kikɛ. Nɛ Elaisha malɛ kaŋɛ mo le: “Feeŋ ta fo anishi n wu amo ama fo alɛ be kɔnɔ maaŋ bɛta amo!”

²⁰ Loŋ malɛ gbagba e daŋ wora mo. Basa daŋ chichi mo so nna m mɔ ashi kabunagboŋ na to. Nɛ kusɔ nɛ Elaisha malga na gbagba bɔlɔ so.