2 Bewura 6 - EBƆRƐ BE KAWƆL

Kekpanfu nɛ k fuŋi nchu so na be asheŋ

¹ Kachako nɛ anebiana be katuŋ nɛ Elaisha bee keni so na fubel ŋ kaŋɛ mo le: “Kakpa nɛ anyi nɛ fo bee shɛr ere du fimbi ga!

² Amoso to anyi ekpa nɛ an yɔ Jɔɔdan be lɔr to n ya ku ndibi m ba wora kakpa a wɔtɔ.” Nɛ Elaisha kaŋɛ le: “To, kenyalɛ, men yɔ.”

³ Anebiana na be eko daŋ mata mo so nna fanɛ e tu bumo n yɔ, nɛ e shuli.

⁴ Mo nɛ bumo e daŋ pɛ ekpa n yɔ nɛ b ya fo Jɔɔdan be lɔr na ase m fara a ku ndibi.

⁵ Basa na be eko ka bee ku kedibi nɛ mbe kekpanfu be kebɛlso pe n tɔr nchu to. Nɛ kanyɛn na bishi Elaisha le: “Nuso nɛ meeŋ wora naniere n nyɛnpe? M paŋ kekpanfu ere nna!”

⁶ Nɛ Elaisha bishi mo le: “Nnɛ nɛ kekpanfu na tɔr to?” Nɛ kanyɛn na ŋini mo kakpa nɛ k tɔr to. Ndoŋ nna nɛ Elaisha ku kedibi n lɛ nchu na to nɛ kebɛlso na tu n deŋi so.

⁷ Nɛ Elaisha kaŋɛ kanyɛn na le: “Deŋi kekpanfu na!” Nɛ kanyɛn na murgi n deŋi kumo.

B ka kɔ m pɔɔ Siriya be benapo so be asheŋ

⁸ Saŋkama nɛ Siriya be efuli so be ewura nɛ Israɛl be efuli so ebi bee kɔ kena e daa tre mbe benapo be benimu nna nɛ b fin kakpa nɛ baaŋ wora bumo be keeyi to.

⁹ Loŋ be saŋɛ malɛ kikɛ anebi Elaisha daa ta kubɔya nna a sa Israɛl be ewura a kpele mo kusoe a ŋini mo kakpa nɛ Siriyaebi na wɔ fanɛ e sa maŋ yɔ ndoŋ.

¹⁰ Nɛ Israɛl be ewura malɛ e kpele mbe benapo kusoe fanɛ b baa da loŋ be kaboŋ so.

¹¹ Siriya be ewura na ka pin kumo be loŋ nɛ e nya agbo alegaiso nseŋ tre mbe benapo be benimu m bishi bumo le: “Menyi be emo e naa kaŋɛ Israɛl be ewura anyi be ashiri?”

¹² Nɛ benapo na be eko kaŋɛ le: “Yiramu, manɛ anyi be ekama nna. Elaisha nɛ e la anebi a wɔ Israɛl na e naa kaŋɛ Israɛl be ewura na kusɔ kama. Hale kusɔ kama nɛ fo kaŋɛ fo ebu to wulo to gba, e beeŋ tiŋ n wu ŋ kaŋɛ.”

¹³ Nɛ Siriya be ewura na kaŋɛ le: “Kumo ere men fin kakpa nɛ e wɔ, nɛ b ya pɛ mo m ba.” B ka kaŋɛ mo fanɛ Elaisha wɔ kade nɛ baa tre Dotan na,

¹⁴ nɛ e shin nɛ benapo damta ta egbaŋɛ nɛ egbaŋɛturko n yɔ ndoŋ n ya kulti kade na n wɔtɔ kanyɛ na kikɛ.

¹⁵ Kare ka chɛ chipurdidi nɛ anebi Elaisha be kayɛrbi tiŋi n lar laŋ to nseŋ wu Siriya be benapo be egbaŋɛ nɛ egbaŋɛturko ka kulti kade na kikɛ. Ndoŋ nna nɛ e ya kaŋɛ Elaisha le: “N nyɛnpe, an wu n loge! Nuso nɛ anyeeŋ wora?”

¹⁶ Nɛ Elaisha kaŋɛ mo: “Sa maa lɔ kufu, benapo nɛ b wɔ an kutɔ chɔ bumo nɛ wu ere.”

¹⁷ Kumo be kaman nɛ Elaisha kule ŋ kaŋɛ: “O Enyɛnpe Ebɔrɛ bugi mbe anishi nɛ e wu kusɔ nɛ k wɔtɔ.” Nɛ Enyɛnpe Ebɔrɛ nu Elaisha be kekule nseŋ bugi mbe kayɛrbi be anishi nɛ e maŋ kumu so ŋ keni nɛ egbaŋɛ nɛ egbaŋɛturko nɛ e bee suse edɛ kulti Elaisha n wɔtɔ kebee na so kikɛ.

¹⁸ Siriya be benapo na ka bee taga kade na to, nɛ Elaisha kule Ebɔrɛ ŋ kaŋɛ: “O Enyɛnpe Ebɔrɛ, shin nɛ basa ere kikɛ a tan!” Nɛ Enyɛnpe Ebɔrɛ nu mbe kekule nseŋ shin nɛ basa na kikɛ tan.

¹⁹ Ndoŋ nna nɛ Elaisha yɔ bumo kutɔ n ya kaŋɛ bumo: “Men fo ekpa nna, ŋkpal manɛ so manɛ kade nɛ menyee fin na nde. Men bɛ ma so nɛ n ya ŋini menyi esa nɛ menyee fin na.” Nseŋ keta bumo n yɔ Samɛria be kade to.

²⁰ B ka luri kade na to nɛ Elaisha kule Ebɔrɛ ŋ kaŋɛ: “Enyɛnpe Ebɔrɛ, bugi basa ere be anishi.” Nɛ Enyɛnpe Ebɔrɛ bugi bumo be anishi nɛ b wu fanɛ Samɛria nɛ b wɔ.

²¹ Israɛl be ewura na ka wu Siriya be benapo na, nɛ e bishi Elaisha le: “N nyɛnpe m mɔ bumo a?”

²² Nɛ Elaisha malɛ kaŋɛ: “Fo maŋ kɔ m pɔɔ benapo ere be ekama so, nɛ ekpa mo nɛ fo kɔ nɛ fo mɔ bumo? Sa bumo kusɔ ko nɛ b ji nseŋ sa bumo nchu nɛ b nuu. Kumo be kaman nɛ fo shin nɛ b bɛta n yɔ bumo be ewura kutɔ.”

²³ Ndoŋ nna nɛ Israɛl be ewura na shin nɛ b wora kejigboŋ n sa Siriya be benapo na. B ka ji nseŋ nuu n loge na, nɛ e shin nɛ b bɛta n yɔ Siriya be ewura na kutɔ. Baŋ yili kumo be saŋɛ, nɛ Siriyaebi na yige kebaata kena a purgi Israɛl be efuli so ebi.

Benapo ka pugi ŋ kulti Samɛria be asheŋ

²⁴ Asheŋ ere kikɛ be kaman be jemanɛ ko, nɛ Siriya be ewura Bɛnhadad juŋkpar mbe benapo nɛ e ya kɔ Israɛlebi kena nseŋ shin nɛ b pugi ŋ kulti Samɛria be kade na kikɛ.

²⁵ Ŋkpal benapo na ka daŋ pugi ŋ kulti kade na so, ajibi be asheŋ daŋ ki kpakpa nna ashi kade na to. Ŋkpal loŋ so gbiti be ndarbi aduburwa nɛ b daa fa kurma be kumu nsaa fa kupuŋ to be albasa kurwa fimbi be bɔlɔ malɛ gbiti be ndarbi anu.

²⁶ Kachako nɛ Israɛl be ewura na daa na kade na be egbal nɛ b pɔr ŋ kulti na be esoso nseŋ nu kache ko ka boŋto ŋ kaŋɛ: “Yiramu, chɛ ma to!”

²⁷ Nɛ ewura na malɛ kaŋɛ: “Enyɛnpe Ebɔrɛ baa maŋ chɛ fo to, manɛ be kechɛto nɛ malɛ beeŋ tiŋ n sa fo? Fo wu ŋ ka kɔ ayu nɛ asɔnuuso nna nɛ n sa fo a?”

²⁸ Kumo be kaman nɛ e bishi mo le: “Manɛ e kɔ fo?” Nɛ kache na yɛ: “Ŋkpal akoŋ ka pɛ anyi ga so, nɛ ma nɛ kache ko wora kɔnɔ fanɛ an mɔ ma kebia n we, kare kaŋ chɛ nɛ an mɔ mo alɛ peya n we.

²⁹ Amoso an daŋ mɔ ma kebia nna n daŋɛ n we ndre. Nɛ ŋ kaŋɛ mo fanɛ kabre mo alɛ peya e ka nɛ an mɔ n daŋɛ n we nɛ e ta mo n ya ŋana!”

³⁰ Ewura na ka nu baru ere nɛ e kpɛa mbe asɔbuuso to kagbenejijaso nɛ basa nɛ b wɔ egbal na be kaseto na wu e ka buu kagbenejijaso be asɔbuuso mbe epiŋi nɛ e buu na be kaseto.

³¹ Ndoŋ nna nɛ ewura na kaŋɛ le: “Nɛ m baa maŋ shin nɛ b chuge Elaisha be kumu kabre kumo ere Ebɔrɛ e gberge ma kusoe alegaiso.”

³² Kumo be kaman nɛ e shuŋi kabɔ Elaisha kutɔ nɛ benimu ko malɛ baŋ ba nɛ b ba bɔɔ Elaisha so. Ama pɔɛŋ nɛ kabɔ na e ba na nɛ Elaisha tiŋ ŋ kaŋɛ benimu nɛ b ba nɛ b ba bɔɔ mo so na le: “Emɔpo na shuŋi esa ko fanɛ e ba mɔ ma. E kaŋ ba men ti kukuloŋ n sa maŋ shin nɛ e luri ebu ere to. Ewura na gba yil mbe kaman nna.”

³³ E kraa malga nna nɛ kabɔ na ba luri ŋ kaŋɛ le: “Enyɛnpe Ebɔrɛ na e bar le be kasogberge ere anyi so. Manɛ nna nɛ an naa jo mo fanɛ e wora kusɔ ko?”