2 Bewura 5 - EBƆRƐ BE KAWƆL

Neeman ka nya kechɛ be asheŋ

¹ Kanyɛn ko e daa wɔtɔ nɛ baa tre mo Neeman nɛ e daa la Siriya be benapo be enimu, nɛ Siriya be ewura daa sa mo bunyaŋ ga; ŋkpal Enyɛnpe Ebɔrɛ ka daŋ bɔla mo so n shin nɛ Siriyaebi be benapo daŋ kɔ m pɔɔ bumo doŋana so so. E daa nyi kena be kekɔ a chɔ ekama ama mo alɛ daa lɔ keboti nna.

² Jemanɛ ko nɛ Siriyaebi na ta kena n ya purgi Israɛlebi nseŋ pɛ Israɛl be kebichebi ko kena na to nɛ e ya ki Neeman be eche be kebita.

³ Ndoŋ nna nɛ kachako nɛ kebichebi na kaŋɛ mo chepe le: “N nyɛnpe daa beeŋ yɔ anebi nɛ e wɔ Samɛria na kutɔ nna, dafanɛ e beeŋ chɛ mbe keboti ere.”

⁴ Neeman ka nu loŋ nɛ e yɔ ewura na kutɔ n ya kaŋɛ mo kusɔ nɛ kebichebi na kaŋɛ kikɛ.

⁵ Ndoŋ nna nɛ ewura na kaŋɛ mo le: “Kumo ere fo yɔ, meeŋ sa fo kawɔl nɛ fo ya sa Israɛl be ewura.” Nɛ Neeman ta gbiti be ndarbi ŋgboŋ adesa nɛ shuwa malɛ be ndarbi ŋgboŋ ashe nɛ ewajɛ lela malɛ be yiri yiri be mpɔ kudu m pɛ ekpa.

⁶ Le nɛ kawɔl nɛ e daŋ ta n ya sa Israɛl be ewura na kaŋɛ: “N shuŋi ma kayɛrbi Neeman nna fanɛ fo chɛ mbe keboti ere n sa mo.”

⁷ Israɛl be ewura na ka kraŋ kawɔl na nɛ mbe aba pɔ mo nɛ kufu pɛ mo ŋkpal Siriya be benapo na be eleŋ nɛ b kɔ so nɛ e kpɛa mbe asɔbuuso to m ponte ŋ kaŋɛ le: “A ji nuso nɛ Siriya be ewura na kaŋɛ fanɛ kanyɛn ere e ba ŋ kutɔ nɛ n chɛ mbe keboti? E bee fɛ fanɛ n la Ebɔrɛ nna nsaa kɔ luwu nɛ ŋkpa be eleŋ a? Naniere bre k baŋ fuli geeŋ nna fanɛ kolu nɛ e bee sha ma!”

⁸ Anebi Elaisha ka nu loŋ, nɛ e ta ebɔl n sa ewura na ŋ kaŋɛ le: “Manɛ nna nɛ fo kagbene jija fo loŋ? Shin nɛ kanyɛn na e ba ŋ kutɔ, nɛ ŋ ŋini mo fanɛ anebi wɔ Israɛl be efuli so!”

⁹ Nɛ Neeman ta mbe egbaŋɛ nɛ amo be eturko n ya yili Elaisha be laŋ to be kabuna to.

¹⁰ Ndoŋ nna nɛ Elaisha kaŋɛ mbe kayɛrbi fanɛ e lar kowu n ya kaŋɛ mo nɛ e yɔ Jɔɔdan be lɔr to n ya ber ale shunu nɛ keboti na kikɛ a yɔ.

¹¹ Ama Neeman daŋ nya agbo nna a munto a yɔ a kaŋɛ le: “N fɛ fanɛ e beeŋ lar m ba ŋ kutɔ nna m ba teŋi mbe enɔ n shoŋi ma nseŋ kule mo Nyɛnpe Ebɔrɛ na n sa ma nɛ n nya alenfia!

¹² Elɔr nɛ baa tre Abana nɛ Faapa ashi ma kadegboŋ Damaskɔs na be nchu maŋ walɛ a chɔ Israɛl be efuli so be elɔrana be nchu a? N daa beeŋ tiŋ n ya bɛr amo to n nya kechɛ!”

¹³ Ndoŋ nna nɛ Neeman be nyɛrbi yɔ mo kutɔ n ya kaŋɛ mo le: “Enyɛnpe, anebi ere daŋ kaŋɛ fanɛ fo wora kusɔ kpakpaso ko nna, fo daa maaŋ wora a? Nɛ manɛ e ba nɛ e kaŋɛ fo fanɛ fo ya bɛr nchu na to nseŋ nya alenfia nɛ fo kini?”

¹⁴ B ka kaŋɛ loŋ na nɛ Neeman yɔ Jɔɔdan be lɔr na to n ya muni kumo to ale shunu nɛ mbe keboti na kikɛ yɔ fanɛ kananɛ anebi Elaisha kaŋɛ na gbagba chap. Nɛ mbe kayurwule nyalɛ so a du fanɛ kebibi be kayurwule.

¹⁵ Kede be kaman nɛ Neeman nɛ basa nɛ mo nɛ bumo daŋ yɔ ndoŋ na kikɛ bɛta m ba anebi Elaisha kutɔ nɛ Neeman kaŋɛ le: “Naniere nɛ m pin fanɛ Ebɔrɛ kikɛ maŋ naa wɔtɔ ama Israɛl be Ebɔrɛ ere nawule. Amoso jande, sɔ ma kakɛ ere.”

¹⁶ Nɛ Elaisha malɛ kaŋɛ le: “Enyɛnpe Ebɔrɛ nɛ mee shuŋ nɛ e wɔ ŋkpa to ere so, maaŋ sɔ kakɛ ere.” Ndoŋ nna nɛ Neeman mata mo so fanɛ e sɔ kakɛ na nɛ e kini.

¹⁷ Kumo be kaman nɛ Neeman kaŋɛ le: “Hale nɛ fo maaŋ sɔ kakɛ ere gba, kumo ere fo shin nɛ n jɔ fo kasawule ere so be shishɛr n sulɔ ma ekurma ere be benyɔ n yɔ epe, ŋkpal manɛ so baŋ yili kabre a yɔ, Enyɛnpe Israɛl be Ebɔrɛ na nawule nɛ meeŋ baa lara sarga ŋko sarga chɔɔso a sa.”

¹⁸ Ama mee kule Enyɛnpe Ebɔrɛ nna nɛ e ta ma alubi m paŋ ma saŋkama nɛ n shuŋi n nyɛnpe Siriya be ewura na n yɔ kegbirlambu to n ya bunyaŋ kegbir nɛ baa tre Rimmɔn na.

¹⁹ Ndoŋ nna nɛ anebi Elaisha kaŋɛ mo le: “Ebɔrɛ e yɛr fo nɛ alenfia.” Nɛ Neeman lar n choŋ. Neeman ka baŋ yɔ anishito gbrɛbɛ,

²⁰ nɛ anebi Elaisha be kayɛrbi Gehazi fɛ mbe kumu to le: “Manɛ nna nɛ n nyɛnpe yige Siriya be kanyɛn ere nɛ e bee yɔ jiga loŋ? K daŋ daga e ka sɔ kakɛ nɛ e bar mo na. Enyɛnpe Ebɔrɛ nɛ e wɔ ŋkpa to ere so meeŋ ju m buu mo so n ya sɔ kusɔ ko mo kutɔ.”

²¹ Ndoŋ nna nɛ Gehazi shile m bɛ Neeman so. Neeman ka wu e ka shile a bɛ mo so, nɛ e shin nɛ mbe gbaŋɛturko yili nɛ e shɛr mo to m bishi mo: “A wɔ ebel a?”

²² Nɛ Gehazi kaŋɛ: “N nyɛnpe e shuŋi ma fanɛ ŋ kaŋɛ fo fanɛ anebiana be katuŋ ko be basa anyɔ e shi Efrayim be kebee be efuli so m ba. Amoso e bee sha fanɛ fo sa bumo gbiti be ndarbi ŋgboŋ asa nɛ ewajɛ lela malɛ be yiri yiri mpɔ anyɔ.”

²³ Ndoŋ nna nɛ Neeman kaŋɛ mo le: “Jande sɔ gbiti be ndarbi ŋgboŋ ashe a yɔ.” Nseŋ mata Gehazi so nɛ e sɔ amo, nɛ e kre gbiti be ndarbi na n wɔtɔ ekɔlgu anyɔ to nseŋ ta ewajɛ lela be yiri yiri be mpɔ anyɔ na n shin nɛ mbe nyɛrbi anyɔ ta amo n juŋkpar Gehazi nɛ e bɛ so.

²⁴ B ka fo kebee nɛ Elaisha daa wɔ na so nɛ Gehazi ta asɔ na n luri mbe ebu to nseŋ shin nɛ Neeman be nyɛrbi na bɛta.

²⁵ Kede be kaman nɛ Gehazi bɛta n yɔ laŋ to Elaisha kutɔ nɛ Elaisha bishi mo le: “Nnɛ nɛ fo shi?” Nɛ e yɛ: “N nyɛnpe, maŋ shi kaplɛkama.”

²⁶ Nɛ Elaisha kaŋɛ le: “Saŋɛ so nɛ kanyɛn na lar mbe gbaŋɛturko to nɛ fo nɛ mo yil na, nɛ n wɔ men kutɔ kiyoyu to. Mannɛ saŋɛ nɛ k daga fo ka sɔ amansherbi nɛ ewajɛ nɛ ɔlif be ndɔ nɛ ndibi nɛ baa tre greep na be ndɔ nɛ mbolpɔ nɛ ana ŋko nyɛrbi nde!

²⁷ Ŋkpal kusɔ nɛ fo wora ere so Neeman be keboti ere beeŋ pɛ fo nseŋ ki fo nɛ fo kaman to ebi be kulɔ mbaanaayɔ.” Gehazi ka lar Elaisha kutɔ nɛ keboti pɛ mo, epul to nɛ mbe kayurwule kikɛ fuli parr fanɛ ketebi.