2 Bewura 4 - EBƆRƐ BE KAWƆL

Elaisha ka chɛ Ekulpoche ko to be asheŋ

¹ Kachako nɛ ekulpoche nɛ e la anebiana na be katuŋ to be eche na yɔ Elaisha kutɔ n ya kaŋɛ mo le: “N nyɛnpe, ma kul wu nna. Fo alɛ nyi e ka daa la esa nɛ e kɔ kabɔrɛŋana ga. Naniere esa ko nɛ e paŋ amansherbi a maŋ tiŋ ŋ ka na, ba nɛ e ba keta ma mbinyɛnsobi anyɔ.”

² Ndoŋ nna nɛ Elaisha bishi mo le: “Manɛ nɛ fo kɔ laŋ to? Ashere meeŋ tiŋ n chɛ fo to.” Nɛ kache na yɛ: “M maŋ kɔ shɛŋ ama ɔlif be ŋku kɔlba fimbi ko be bɔlɔ nawule.”

³ Ndoŋ nna nɛ Elaisha kaŋɛ mo le: “Yɔ fo kurgepoana kutɔ n ya kule bumo ekɔlba fuloŋ damta kananɛ feeŋ tiŋ.

⁴ Kumo be kaman nɛ fo nɛ fo mbinyɛnsobi na e luri ebu to n ti kukuloŋ nseŋ fara a chulgi ŋku na a wɔtɔ ekulba na to nsaa lɔŋɛ amo nɛ a bɔlɔ na a yili.”

⁵ E ka malga n loge, nɛ kache na bɛta n yɔ epe n ya keta mbe mbia na n luri ebu to n ti kukuloŋ n fara e chulgi kɔlbabi na to be ŋku na a wɔtɔ ekɔlba na to nɛ mbe mbinyɛnsobi na malɛ bee ta ekɔlba fuloŋ na a sa mo.

⁶ B ka chulgi ŋku na n wɔtɔ ekɔlba na kikɛ to, nɛ kache na bishi le: “Kɔlba fuloŋ kama kra wɔtɔ a?” Nɛ mbe mbinyɛnsobi na be eko kaŋɛ le: “Ekɔlba na be lalaloge nna na.” Epul to nɛ kɔlbabi na be ŋku na ku.

⁷ E ka bɛta n yɔ anebi Elaisha kutɔ nɛ Elaisha kaŋɛ mo le: “Ya fa ŋku na ŋ ka fo akɔ kikɛ. Amansherbi na be akama nɛ a ka nɛ fo nɛ fo mbia e ta amo a chɛ men be amu to.”

⁸ Kachako malɛ nɛ Elaisha yɔ kade ko nɛ baa tre Shunɛm nɛ damawurache ko wɔ ndoŋ. Nɛ damawurache na tre Elaisha mbe laŋ to fanɛ e ba tu mbe laŋ to ebi n ji. Baŋ yili loŋ be jemanɛ na, saŋkama nɛ Elaisha baŋ naŋ ba Shunɛm kache na b laŋ to nɛ e bee ji.

⁹ Kachako nɛ kache na kaŋɛ mo kul le: “N tama fanɛ kanyɛn nɛ e bee ba nfe saŋkama ere la Ebɔrɛ be esa nna.

¹⁰ Amoso shin nɛ an pɔr ebu fimbi ko m bɛ anyi be kuchoŋi ere be esoso n ta gedo nɛ teebɔl nɛ kabɛ nɛ fitila n yili kumo to, saŋɛ na so saŋkama nɛ e ba, e beeŋ ba ka di ndoŋ.” Nɛ b wora loŋ.

¹¹ Kachako nɛ Elaisha yɔ Shunɛm n ya luri kache na be laŋ to nseŋ luri ebu nɛ e bee di to na to.

¹² Kumo be kaman nɛ e shin nɛ mbe kayɛrbi Gehazi ya tre kache na. Kache na ka ba nɛ

¹³ Elaisha kaŋɛ Gehazi fanɛ e bishi mo kusɔ nɛ e bee sha fanɛ e wora n sa mo ŋkpal kelela nɛ e bee wora bumo na so. E yɛ: “E beeŋ ba sha fanɛ n ya kaŋɛ ewura ŋko benapo be enimu na mbe asheŋ lela ere be asheŋ a?” Nɛ kache na kaŋɛ le: “Ŋ kɔ kusɔ kama nɛ mee sha nfe ashi ma basa to.” Nseŋ bɛta n yɔ.

¹⁴ Kumo be kaman nɛ Elaisha bishi Gehazi le: “Manɛ a daga ŋ ka wora n sa mo?” Nɛ Gehazi kaŋɛ: “E maŋ kɔ ebinyɛn, nɛ mo kul malɛ bel.”

¹⁵ Nɛ Elaisha naŋ kaŋɛ Gehazi fanɛ e tre kache na nɛ e bɛta m ba. Ndoŋ nna nɛ Gehazi tre kache na nɛ e ba yili kabuna to

¹⁶ nɛ Elaisha kaŋɛ mo le: “Ta a ba kafɛ a ba saŋɛ ere so nɛ fo keta ebinyɛn fo enɔ to.” Nɛ kache na kaŋɛ: “Jande sa maŋ fule ma ŋkpal manɛ so Ebɔrɛ be esa e la fo!”

¹⁷ Kusɔ nɛ Elaisha daŋ malga na bɔlɔ so. Kafɛ ka ya bɔ a ba nɛ kache na kurge ebinyɛn.

¹⁸ Kebia na ka ki kebigboŋibi, kachako nɛ e tu mo tuto n yɔ ndɔ to kasɔteŋi be jemanɛ, nɛ mo tuto nɛ mbe beshumpo bee teŋi asɔ.

¹⁹ B wɔ ndɔ na to nna nɛ kebia na boŋto n tre mo tuto ŋ kaŋɛ: “Ma kumu bee besa! Ma kumu bee besa ma!” Ndoŋ nna nɛ kebia na mo tuto kaŋɛ mbe kayɛrbi fanɛ e keta kebia na n ya sa mo nio.

²⁰ Nɛ kayɛrbi na keta kebia na n ya sa mo nio nɛ mo nio ta mo n chena mbe aya so. Ta n ya fo kapaso be jemanɛ so nɛ kebia na wu.

²¹ Kebia na ka wu nɛ kache na ta mo m ba Elaisha be ebu to m ba nase mbe gedo so nseŋ lar n ti kukuloŋ.

²² Kumo be kaman nɛ e tre mo kul ŋ kaŋɛ mo le: “Shin nɛ fo nyɛrbi na be eko e ta kurma m bar ma. Mee sha nna nɛ n yɔ anebi Elaisha kutɔ m ba naniere.”

²³ Nɛ mo kul bishi mo: “Manɛ nna nɛ fee sha keyɔ kabre? Kabre maŋ la kewushiachɛ ŋko kufɔl popɔr be kejigboŋ be kachɛgboŋachɛ.” Nɛ kache na shuli so ŋ kaŋɛ: “Kashenteŋ nna.”

²⁴ Nseŋ shin nɛ b ta gaare n deŋi kurma so nɛ e kaŋɛ mbe kayɛrbi: “Shin nɛ kurma na e ba nite manaŋ manaŋ. Sa maŋ kaŋ pɔ aya kikɛ ama m ba kaŋɛ fo fanɛ fo wora loŋ nna.”

²⁵ Ndoŋ nna nɛ e ta n yɔ Elaisha kutɔ ashi kebeegboŋ nɛ baa tre Kaamɛl na so. Elaisha ka wu mo nɛ e kraŋ shi kufɔ e ba, nɛ e kaŋɛ mbe kayɛrbi Gehazi le: “Keni, kache nɛ e shi Shunɛm na e naa ba na!

²⁶ Wora manaŋ n shɛr mo to m bishi mo fanɛ a wɔ ebel a? Kumo be kaman nɛ fo naŋ bishi mo kul nɛ mbe kebinyɛnsobi na be asheŋ.” Gehazi ka yɔ kache na kutɔ nɛ kache na kaŋɛ fanɛ kulubi kama maŋ wɔtɔ.

²⁷ Ama e ka fo Elaisha kutɔ kebee na so, nɛ e gbir m pɛ mbe keyadra to. E ka wora loŋ na nɛ Gehazi bee shin nɛ a ŋin mo ashi Elaisha kutɔ nɛ Elaisha kaŋɛ: “Yige mo ŋkpal manɛ so n wu fanɛ mbe kagbene jija ga! Enyɛnpe Ebɔrɛ na malɛ maŋ naŋ kaŋɛ ma shɛŋ a yɔ mbe kaplɛa so.”

²⁸ Ndoŋ nna nɛ kache na kaŋɛ mo le: “N nyɛnpe! M maŋ kule fo fanɛ fo sa ma kebia. Manɛ nna nɛ fo sa ma tama fuloŋ?”

²⁹ Nɛ Elaisha kaŋɛ Gehazi le: “Wora shiriya n ta ma kekpabi n yɔ kache ere be laŋ to n ya deŋi kebia na be anishi so. Fo kaŋ ya tu esa kama ekpa to, fo sa maŋ malga mo kutɔ, hale esa na malga fo kutɔ gba, fo sa maŋ tuge mo.”

³⁰ Ndoŋ nna nɛ kebia na mo nio kaŋɛ Elaisha le: “Ŋkpal Ebɔrɛ ka la ma shɛdajipo nɛ menyi alɛ gba la so, maaŋ naŋ bɛta n yɔ epe ama fo baŋ bɛ ma so nna.” Nɛ Elaisha koso m bɛ mo so n yɔ.

³¹ Ndoŋ nna nɛ Gehazi juŋkpar n ta kekpabi na n ya deŋi kebia na so, ama kebia na daa maŋ gbegber to gba. Nɛ Gehazi bɛta n yɔ Elaisha kutɔ n ya kaŋɛ mo le: “Kebia na maŋ tiŋi.”

³² Elaisha ka fo kache na pe nɛ e yɔ ebu nɛ kebia na wɔtɔ na to nɛ kebia na wu kashenteŋto a dese gedo so.

³³ Ndoŋ nna nɛ Elaisha ti kukuloŋ nseŋ kule Enyɛnpe Ebɔrɛ.

³⁴ Kumo be kaman nɛ e dese kebia na so nseŋ ta mbe kɔnɔ nɛ mbe anishi m pugi kebia na be kɔnɔ nɛ mbe anishi so nseŋ parga mbe enɔana n deŋi kebia na be enɔana so. E ka teŋi to n dese kebia na be eyur so na, nɛ kebia na be eyur fara a bel edɛ.

³⁵ Kumo be kaman nɛ Elaisha koso n nite ŋ kilgi to ebu na to nseŋ naŋ ya teŋi to n dese kebia na so fanɛ kananɛ e daŋ wora sososo na. E ka wora loŋ kela nyɔsopo, nɛ kebia na ŋishi ale shunu nseŋ bugi mbe anishi.

³⁶ Ndoŋ nna nɛ Elaisha kaŋɛ Gehazi fanɛ e tre kebia na mo nio m ba. Kache na ka ba nɛ Elaisha kaŋɛ mo le: “Keta fo kebia a yɔ.”

³⁷ Nɛ kache na tɔr epun so bunyaŋ so Elaisha be aya ase. Kumo be kaman nɛ e keta mbe kebia n yɔ.

Emamachisheŋ anyɔ mo nɛ Elaisha naŋ wora be asheŋ

³⁸ Ade be kaman nɛ Elaisha bɛta n yɔ Gilgaal nɛ akoŋgboŋ ko tɔr ndoŋ. E ka bee ŋini anebiana be katuŋ ko, nɛ e kaŋɛ mbe kayɛrbi fanɛ e ta kapuliya gboŋgboŋi n wora nyɔto n sa bumo.

³⁹ Anebiana na be eko daŋ yɔ ndɔ to nna nɛ e ya fin epofantaŋ nseŋ wu kiyi to be kefantaŋ ko nɛ asɔrso bumbuŋ chɔ kumo so nɛ e chuge amo be adamta n wɔtɔ mbe piŋi to m ba chɛr to n wɔtɔ nyɔto na to. E daa maŋ nyi asɔ nɛ a la amo.

⁴⁰ B ka ta nyɔto na n sa anebiana na nɛ b daŋ amo nseŋ kaŋɛ Elaisha le: “B wɔtɔ nyɔto na to kɔrtɔ nna.” Amoso anyi maaŋ ji amo.

⁴¹ Nɛ Elaisha kaŋɛ le: “Men fin nyifu n sa ma.” B ka fin amo n sa mo nɛ e chulgi amo n wɔtɔ kapuliya na nɛ nyɔto na to nseŋ kaŋɛ le: “Men jɔ nyɔto na be adamta n sa bumo.” B ka ji amo shɛŋ shɛŋ maŋ wora bumo.

⁴² Kachako malɛ nɛ kanyɛn ko nɛ e shi Baal Shalisha ta ayu peper nɛ b fara n teŋi kafɛ to n wora ebodobodo adunyɔ nɛ aboyu bumbuŋ m bar Elaisha. Ndoŋ nna nɛ Elaisha kaŋɛ mbe kayɛrbi fanɛ e ta amo n ya sa anebiana na nɛ b ji.

⁴³ Ama le nɛ mbe kayɛrbi na daŋ kaŋɛ: “Fee tama fanɛ ajibi ere beeŋ fo basa kalfa a?” Nɛ Elaisha kaŋɛ le: “Ta ajibi na n sa bumo nɛ b ji, ŋkpal manɛ so Enyɛnpe Ebɔrɛ na yɛ baaŋ ji amo m moɛ nɛ ako gba e ka.”

⁴⁴ Ndoŋ nna nɛ mbe kayɛrbi na ta ajibi na n sa bumo nɛ bumo kikɛ ji hale nɛ ako ka. Nɛ kusɔ nɛ Enyɛnpe Ebɔrɛ bɔlɔ Elaisha so ŋ kaŋɛ na bɔlɔ so.