2 Bewura 3 - EBƆRƐ BE KAWƆL

Israɛl nɛ Mowab be kena be asheŋ

¹ Juda be efuli so be ewura Jehoshafat ka ji kuwura be kafɛ kuduaburwasopo be jemanɛ nɛ Ahab malɛ pibinyɛn Joram ki Israɛl be ewura nseŋ ji kuwura Samɛria be kade to nfɛ kuduanyɔ.

² Mo alɛ gba daŋ wora kulubi ŋ gbiti Enyɛnpe Ebɔrɛ ama mo ere daa maŋ wora alubi fanɛ mo tuto ŋko mo nio Jɛzebel. E daŋ bure Baal be agbir nɛ mo tuto daŋ pɔr n yili a shuŋ na nna.

³ Ama kananɛ Nebat pibinyɛn ewura Jeroboam nɛ daŋ ji kuwura n wora alubi nseŋ shin nɛ Israɛlebi wora kulubi na, nɛ mo alɛ gba daŋ wora.

⁴ Mowab be efuli so be ewura Mɛsha daa bela mbolpɔ nna, amoso kafɛ kikɛ e daa ka mbolpɔfɔlbi ŋgboŋ kalfa nɛ ekpakpa ŋgboŋ kalfa malɛ be afuibi be lampo nna a sa Israɛl be ewura.

⁵ Ama Israɛl be ewura Ahab ka wu nɛ Mɛsha kini kebaanu a sa Israɛlebi na.

⁶ Ŋkpal loŋ so nɛ ewura Joram lar Samɛria be kade to n ya gbargbar Israɛl be efuli so be benapo abar so.

⁷ Nseŋ ta kubɔya n ya sa Juda be ewura Jehoshafat ŋ kaŋɛ: “Mowab be ewura kini kebaanu a sa ma. Feeŋ ba chɛ ma to ŋ kɔ bumo kena a?” Nɛ Jehoshafat kaŋɛ le: “N yil fo kaman, aloŋ e la ma basa nɛ ma egbaŋɛ gba.

⁸ Nnɛ nɛ anyeeŋ bɔla n ya kɔ bumo?” Nɛ Joram yɛ: “Anyeeŋ bɔla Edɔm be efuli so be keshishɛrsawule na so n yɔ.”

⁹ Ndoŋ nna nɛ Edɔm be bewura ti bumo so nɛ bumo be bewura asa na keta bumo be benapo n lar nɛ b ya kɔ Mowab be ewura kena. B ka nite nchɛ ashunu nɛ bumo be nchu kikɛ loge nɛ benapo na nɛ egbaŋɛ na kikɛ maŋ naŋ nya nchu nɛ b nuu.

¹⁰ Nɛ ewura Joram ponte ŋ kaŋɛ le: “Nuso be kenishipere be asheŋ e tu anyi ere! Enyɛnpe Ebɔrɛ na bar anyi nfe nna nɛ Mowab be ewura na e ba kɔ m pɔɔ anyi so a?”

¹¹ Nɛ Jehoshafat bishi: “Anebi kikɛ maŋ wɔ nfe nɛ anyeeŋ yɔ mo kutɔ n ya sɔ Enyɛnpe Ebɔrɛ be nfɛra a?” Ndoŋ nna nɛ Joram be benapo be enimu ko kaŋɛ: “Shafat pibinyɛn Elaisha nɛ e daa la anebi Elaija be echɛtopo na wɔ an kutɔ nfe.”

¹² Nɛ ewura Jehoshafat kaŋɛ le: “E la kashenteŋ be anebi nna.” Ndoŋ nna nɛ bewura asa na yɔ Elaisha kutɔ.

¹³ Nɛ Elaisha kaŋɛ Israɛl be ewura na le: “Manɛ nɛ ma nɛ fo kɔ nɛ mee chɛ fo to? Yɔ n ya bishi efuli pɔtɛana so be agbir nɛ fo tuto nɛ fo nio bee yɔ amo kutɔ n ya ka sɔ nfɛra na.” Nɛ ewura Joram kaŋɛ: “M-m, Enyɛnpe Ebɔrɛ na e bar anyi bewura asa ere nɛ anyi be benapo nfe nɛ Mowab be ewura e kɔ m pɔɔ anyi so.”

¹⁴ Nɛ Elaisha malɛ kaŋɛ le: “Nɛ mannɛ Enyɛnpetale Ebɔrɛ nɛ e wɔ ŋkpa to nɛ mee shuŋ mo ere be ketre so, nɛ bunyaŋ nɛ ŋ kɔ a sa Juda be ewura Jehoshafat so n daa maaŋ malga fo kutɔ gba.

¹⁵ Ama men fin eshɛbompo nɛ e bee laŋ jaŋjilaŋ m bar ma naniere.” Eshɛbompo na ka fara a laŋ mbe jaŋjilaŋ na, nɛ Enyɛnpe Ebɔrɛ ta kubɔya ere n sa Elaisha fanɛ e sa ewura Joram.

¹⁶ E yɛ: “Chaŋɛ achubɔr n wɔtɔ eboŋ nɛ k feeto n wɔlto ere be kabombi to.

¹⁷ Fo maaŋ wu bɔrɛ ŋko afu gba, ama kepa ere beeŋ bɔlɔ nchu nɛ fo nɛ fo asɔbɔya e nya nchu n nuu yɛlyɛla so.”

¹⁸ Le be kesheŋ maŋ du Enyɛnpetale Ebɔrɛ so kpakpa. E beeŋ shin nɛ men kɔ m pɔɔ Mowabebi na so.

¹⁹ Meeŋ kɔ m pɔɔ bumo be nde nɛ b pɔr egbal ŋ kulti nɛ nde gboŋgboŋi lela kikɛ so. Menyeeŋ kuya bumo be ndibisɔrso nseŋ ti bumo be atirbu, nseŋ ta ajembu n lɛ n lɛ bumo be kasawule so nɛ a buu kumo kikɛ so n jija kumo.

²⁰ Kare ka chɛ kachipurso, saŋɛ so nɛ baa lara sarga a sa Enyɛnpe Ebɔrɛ na, nɛ nchu shi Edɔm be efuli so be kaba so n shile m ba bɔlɔ n sɔ kasawule na kikɛ so.

²¹ Mowabebi na ka nu fanɛ bewura asa na bee ba nɛ b ba kɔ bumo kena, nɛ b tre benyɛn kikɛ, benimu nɛ mbrantiɛ nɛ baaŋ tiŋ ŋ kɔ kena na, n shin nɛ b ya yuu bumo be keeyi efuli na be kasawule so be ekar.

²² Ŋklade kachipurso, b ka koso, nɛ epeŋi nyaŋɛ n yuu nchu na so nɛ a pre le kpaw fanɛ ŋklaŋ na.

²³ Ndoŋ nna nɛ bumo kikɛ kaŋɛ le: “Ŋklaŋ nna! Ashere bewura asa na be benapo e kilgi ŋ kɔ abar kena m mɔ abar na, amoso men shin nɛ an yɔ bumo be keeyi to n ya muu bumo be asɔ kikɛ.”

²⁴ B ka yɔ Israɛlebi na be keeyi to nɛ Israɛlebi na lar ŋ kɔ bumo nɛ b bɛta a shile nɛ b ju m bɛ bumo so n yɔ Mowab n ya mɔ bumo be damta,

²⁵ nseŋ jija bumo be ndegboŋana na kikɛ. B daŋ ti Mowabebi na be abuye kikɛ nna nseŋ kuya bumo be ndibi sɔrso kikɛ n lɛ, nseŋ muu ajembu n lɛ bumo be nsawule lela so nɛ ajembu sɔ amo kikɛ so n jija amo. Bumo be kadegboŋ nɛ baa tre Kir Herɛs na nawule e daŋ ka, nɛ basa nɛ b kɔ atababu a kɔ kena ta bumo be atababu n ya kulti kumo n wɔtɔ ŋ kɔ kumo kena.

²⁶ Mowab be ewura na ka wu fanɛ kena na bee pɔɔ mo so, nɛ e ya keta benapo alfa ashunu nɛ b kɔ etokobi a kɔ kena na, nɛ b kɔ a fin fanɛ e lar bumo doŋana to n shile n yɔ Siriya be ewura kutɔ, ama b daŋ wora ŋ gben.

²⁷ Ade kikɛ be kaman nɛ e ta mo pibinyɛn nimuso nɛ e beeŋ sɔ mo so n ji kuwura na n lara sarga n sa Mowab be kegbir ashi kade na be egbal be esoso. Nɛ kumo be loŋ daŋ pɛ Israɛlebi na kufu ga nɛ b bɛta n yɔ bumo be efuli so.