2 Bewura 2 - EBƆRƐ BE KAWƆL

Anebi Elaija ka yɔ Ebɔrɛso be asheŋ

¹ Jemanɛ ka fo nɛ Enyɛnpe Ebɔrɛ na e bɔla kawuliwuli so n ta anebi Elaija n yɔ ebɔrɛso na, Elaija nɛ Elaisha daŋ lar Gilgaal be kade to nna a yɔ.

² B ka wɔ ekpa to a yɔ na, nɛ anebi Elaija kaŋɛ Elaisha le: “Enyɛnpe Ebɔrɛ na kaŋɛ fanɛ n yɔ Bɛtɛl, amoso fo ere e baa jo nfe.” Nɛ Elaisha kaŋɛ le: “Enyɛnpe Ebɔrɛ ka baa wɔ ŋkpa to nɛ fo ere gba wɔ ŋkpa to ere bre, meeŋ tu fo n yɔ.” Amoso bumo kikɛ daŋ bɛ abar so nna n yɔ Bɛtɛl.

³ B ka fo Bɛtɛl nɛ anebiana be katuŋ ko nɛ b wɔ Bɛtɛl na ya bishi Elaisha le: “Fo nyi Enyɛnpe Ebɔrɛ ka beeŋ ta fo nyɛnpe ere ŋ ka fo kabre a?” Nɛ Elaisha kaŋɛ: “Mm n nyi, ama sa maŋ kaŋ malga kumo be asheŋ.”

⁴ Ndoŋ nna nɛ Anebi Elaija naŋ kaŋɛ Elaisha le: “Enyɛnpe Ebɔrɛ na yɛ n yɔ Jɛriko, amoso ba jo nfe.” Nɛ Elaisha malɛ kaŋɛ le: “Enyɛnpe Ebɔrɛ ka baa wɔ ŋkpa to nɛ fo ere gba wɔ ŋkpa to ere bre, maaŋ bɛta fo so kikɛ.” Ndoŋ nna nɛ b yɔ Jɛriko.

⁵ Nɛ anebiana be katuŋ ko nɛ b wɔ Jɛriko na yɔ Elaisha kutɔ n ya bishi mo le: “Fo nyi Enyɛnpe Ebɔrɛ ka beeŋ ta fo nyɛnpe ere ŋ ka fo kabre a?” Nɛ Elaisha kaŋɛ: “Mm n nyi, ama men sa maŋ kaŋ naŋ malga kumo be asheŋ.”

⁶ Kumo be kaman nɛ Elaija naŋ kaŋɛ Elaisha le: “Enyɛnpe Ebɔrɛ na yɛ n yɔ Jɔɔdan be Lɔr na to, amoso baa jo ma nfe.” Nɛ Elaisha yɛ: “Enyɛnpe Ebɔrɛ ka baa wɔ ŋkpa to nɛ fo ere gba wɔ ŋkpa to ere bre, maaŋ bɛta fo so kikɛ.” Ndoŋ nna nɛ b bɛ abar so a yɔ.

⁷ Nɛ anebiana na be basa adunu shi Jɛriko m bɛ bumo so n yɔ Jɔɔdan be lɔr na to nɛ anebi Elaija nɛ Elaisha ya yili lɔrkar na ase gbagba nɛ anebi adunu na malɛ feŋ bumo n yili.

⁸ Ndoŋ nna nɛ anebi Elaija lara mbe piŋi nseŋ bɔlɔɔ kumo ŋ ŋmɛa nchu na nɛ a ku to anyɔ nɛ mo nɛ Elaisha nite kasawule wɔlso so n yɔ lɔr na be kaba ndoŋ.

⁹ B ka fo lɔr na be kaba ndoŋ nɛ anebi Elaija bishi Elaisha le: “Manɛ nɛ fee sha ŋ ka wora n sa fo pɔɛŋ nɛ Enyɛnpe Ebɔrɛ e ta ma a yɔ?” Nɛ Elaisha malɛ kaŋɛ: “Sa ma fo kenebiya be eleŋ na be ntuŋnyɔ so saŋɛ na so meeŋ tiŋ n sɔ fo so a shuŋ.”

¹⁰ Nɛ anebi Elaija kaŋɛ mo le: “Fo bishi kusɔ kpakpaso bre, ama fo baŋ wu ŋ ka bee yɔ, feeŋ nya kusɔ nɛ fee bishi ere, ama fo baa maŋ wu ŋ ka bee yɔ bre, fo maaŋ nya kumo.”

¹¹ B ka bee nite a yɔ nsaa malga na epul to nɛ egbaŋɛ nɛ e bee suse edɛ gberge egbaŋɛturko nɛ k bee suse edɛ m ba luri bumo be nferinto nɛ afu gboŋgboŋi lempo ko ba maŋ anebi Elaija so n yɔ ebɔrɛso.

¹² Elaisha ka wu loŋ nɛ e boŋto ŋ kaŋɛ anebi Elaija le: “Israɛl be benapo nɛ baa dii egbaŋɛ a kɔ kena nɛ bumo nɛ baa ta egbaŋɛturko a kɔ kena na ta n nyɛnpe n choŋ!” E ka baŋ kaŋɛ loŋ n loge, e maŋ naŋ wu anebi Elaija. Nɛ Elaisha chaŋɛ mbe piŋi to a ŋini mbe kagbenejija.

¹³ Kumo be kaman nɛ e ya ta anebi Elaija be piŋi nɛ k gbaŋ n tɔr na m bɛta n yɔ Jɔɔdan be lɔr na to,

¹⁴ n ya ta piŋi na ŋ ŋmɛa nchu na so nseŋ kaŋɛ le: “Nnɛ nɛ anebi Elaija be Ebɔrɛ na wɔ?” Ndoŋ nna nɛ lɔr na naŋ ku to anyɔ nɛ e naŋ dii.

¹⁵ Jɛriko be anebiana adunu na ka wu loŋ nɛ b kaŋɛ le: “Anebi Elaija be eleŋ gbelge Elaisha so,” Kumo be kaman nɛ b ya shɛr mo to ŋ jɔŋɛ mo ase

¹⁶ ŋ kaŋɛ le: “Anyi basa adunu e ba nfe, anyi alɛ kikɛ kɔ eleŋ. Shin nɛ an ya fin fo nyɛnpe. Ashere Enyɛnpe Ebɔrɛ na be kiyoyu maŋ mo so nna n ya lɛ kebeegboŋ ko so ŋko ketaŋɛ ko to.” Nɛ Elaisha kaŋɛ le: “M-m, men sa maŋ yɔ.”

¹⁷ Ama b daŋ mata so hale nɛ e wora bumo anishinyɔr nseŋ shuli. Ndoŋ nna nɛ anebiana adunu na ta nchɛ asa n fin anebi Elaija kanaŋkama ŋ gben.

¹⁸ B ka fin anebi Elaija ŋ gben nseŋ bɛta m ba Elaisha kutɔ ashi Jɛriko na, nɛ e kaŋɛ bumo le: “M maŋ kaŋɛ menyi fanɛ men maaŋ wu mo a?”

Emamachisheŋ nɛ Elaisha wora be asheŋ

¹⁹ Kachako nɛ Jɛriko be basa ko yɔ Elaisha kutɔ n ya kaŋɛ mo le: “An nyɛnpe, kakpa nɛ anyi be kade ere wɔ ere walɛ ama kumo be kebuye be nchu bre maŋ walɛ. Kumo be kasawule na gba maa wora adɔjibi.”

²⁰ Ndoŋ nna Elaisha kaŋɛ bumo le: “Men fin nfɔl n wɔtɔ katishaŋ popɔr to m ba sa ma.” Nɛ b ta amo m ba sa mo,

²¹ nɛ e ta nfɔl na n yɔ kebuye na ase n ya chulgi n wɔtɔ kumo be nchu to nseŋ kaŋɛ fanɛ Enyɛnpe Ebɔrɛ na yɛ: “N shin nɛ nchu na ki nchu lela, amoso basa maaŋ naa wu chilchil. Kasawule na malɛ beeŋ baa wora ajibi nɛnɛ.”

²² Baŋ yili loŋ be saŋɛ na m ba fo kabre, nchu na kraŋ baa walɛ nna fanɛ kananɛ Elaisha kaŋɛ na gbagba.

²³ Elaisha ka lar Jɛriko a yɔ Bɛtɛl, nɛ mbinyɛnsobi ko lar kade ko to m ba kaa wora mo eyurto a kaŋɛ awɔrso le: “Kumu nyiɛso wura, lar nfe!”

²⁴ Elaisha ka gbɛ ŋ keni n wu bumo nɛ e gbɛlɛ bumo nseŋ sho bumo kɔnɔ ashi Enyɛnpe Ebɔrɛ be ketre to. Epul to nɛ eshishiri cheso anyɔ lar kupuŋ to ŋ kpɛa mbia na be adena nɛ anyɔ to chɛbarchɛbarbi.

²⁵ Kede be kaman nɛ Elaisha dii n yɔ kebee nɛ baa tre Kaamɛl na so, nseŋ yili ndoŋ m bɛta n yɔ Samɛria be kade to.