2 Bewura 16 - EBƆRƐ BE KAWƆL

Juda be ewura Ahaz be asheŋ

¹ Remaliya pibinyɛn Pɛka ka ji Israɛl be kuwura be kafɛ kuduashunusopo to, nɛ Jotam pibinyɛn Ahaz malɛ ki Juda be ewura.

² Nfɛ adunyɔ nɛ Ahaz daŋ ji pɔɛŋ nseŋ ki ewura, mo alɛ daŋ ji kuwura Jerusalɛm to nfɛ kuduashe nna. E daa maŋ bɛ kebaawɔtɔ lela nɛ mo nananyɛn ewura Deevid daa kɔ na so. E daŋ maŋ wora kusɔ nɛ k bee par Enyɛnpe Ebɔrɛ na.

³ E daŋ bɛ Israɛl be bewura be kebaawɔtɔ lubi so nna. E daŋ ta mo gbagba pibinyɛn nna n lara sarga chɔɔso n sa agbir. Mo alɛ daa kute basa nɛ b daa wɔ Israɛl be efuli so nɛ Enyɛnpe Ebɔrɛ ju bumo saŋɛ so nɛ Israɛlebi daa ba kasawule na so na to nna.

⁴ Ahaz daa lara mbe esarga nsaa chɔɔ duwu mboŋ nɛ nnyamase bee shuŋ bumo be agbir ashi abee so nɛ ndibi be afito nna.

⁵ Siriya be ewura Reezin nɛ Israɛl be ewura Pɛka daŋ ya kulti Jerusalɛm na nna n wɔtɔ ŋ kɔ kumo kena, ama bumo alɛ daa maŋ tiŋ m pɔɔ ewura Ahaz so.

⁶ Loŋ be saŋɛ na so gbagba nɛ Siriya be ewura Reezin laŋɛ n ya kɔ n sɔ Elaf nseŋ ju Judaebi nɛ b wɔ ndoŋ na. Kumo be kaman nɛ Edɔmebi ya chena Elam hale nɛ mbre.

⁷ Ndoŋ nna nɛ ewura Ahaz ya kule Tiglaf Pilesa nɛ e la Asiriya be efuli so be ewurgboŋ na fanɛ e wora bumo kechɛto. E yɛ: “N la fo kayɛrbi nna, amoso ba mɔlga ma ashi Siriya nɛ Israɛl be bewura nɛ baa kɔ ma kena na be enɔ to.”

⁸ Amoso ewura Ahaz daŋ ta asɔ ko nna ashi bɔrɛlambu na to nɛ ewura be laŋ to nɛ bejuŋkparpoana na pe n ya sa Asiriya be ewura na.

⁹ Tiglaf Pilesa ka nu Ahaz be baru na, nɛ e shin nɛ mbe benapo ya kɔ Damaskɔs kena n sɔ kumo nseŋ mɔ ewura Reezin gba, nseŋ pɛ ndoŋebi n ya ti ebu ashi Kiir.

¹⁰ Ade kikɛ be kaman ewura Ahaz ka yɔ Damaskɔs n ya tu ewurgboŋ Tiglaf Pilesa na, nɛ e wu bɔrɛsure ko ndoŋ. Kumo be kaman nɛ e shin nɛ b ta kumo be foto n ya sa bɔrɛmatapo Uriya fanɛ e keni so m pɔr kumo be kaduli.

¹¹ Ndoŋ nna nɛ Uriya pɔr bɔrɛsure na be kaduli gbagba n loge pɔɛŋ nɛ Ahaz bɛta m ba.

¹² Ewura Ahaz ka shi Damaskɔs m ba nɛ b teŋ pɔr bɔrɛsure na n loge.

¹³ Ndoŋ nna nɛ e lara sarga chɔɔso nɛ ayu be sarga nɛ asɔnuuso be sarga nɛ kɔnɔkoŋwuleso be sarga bɔrɛsure na so.

¹⁴ Danyaŋ be bɔrɛsure nɛ b daŋ ta m bɔɔ Enyɛnpe Ebɔrɛ enɔ na daa yil bɔrɛsure popɔr na nɛ bɔrɛlambu na be kefɛato nna, amoso ewura Ahaz daŋ shin nna nɛ b lɔŋɛ danyaŋ be bɔrɛsure na n yili bɔrɛsure popɔr na be kekilto ashi kelargato be esoso be kaba so.

¹⁵ Kumo be kaman nɛ ewura Ahaz kaŋɛ bɔrɛmatapo Uriya le: “Yili kabre a yɔ baa lara esarga chɔɔso nɛ ayu be esarga nɛ ewura be esarga chɔɔso nɛ mbe ayu be esarga nɛ kasawule na so be basa kikɛ be esarga chɔɔso nɛ bumo be ayu nɛ asɔnuuso be esarga na kikɛ a deŋi ma bɔrɛsure gboŋgboŋi na so kachipurso nɛ kaaseso be jemanɛ kikɛ, nsaa ta asɔbɔya nɛ b mɔ n lara sarga na kikɛ be ŋklaŋ a ŋmenyaŋ kumo so. Ama meeŋ baa lara esarga danyaŋ be bɔrɛsure na bre so a bishi so a fin Enyɛnpe Ebɔrɛ na be nfɛra.”

¹⁶ Ndoŋ nna nɛ bɔrɛmatapo Uriya wora kusɔ nɛ ewura Ahaz kaŋɛ mo na kikɛ.

¹⁷ Kumo be kaman nɛ ewura Ahaz shin nɛ b lara danyaŋ be eturko na nseŋ bɛge echeenshi nɛ a bɛ amo so na n yili, nseŋ shin nɛ b bɛge katishaŋgboŋ nɛ baa tre Teku, nɛ k bɛ danyaŋ be egbolu kuduanyɔ na be mman na, n yili kejembu be ketɔl so.

¹⁸ Ŋkpal ewura Ahaz ka daa sha kewora kusɔ nɛ k bee par Asiriya be ewurgboŋ Tiglaf Pilesa na so, e daŋ shin nna nɛ b gboŋi wajɛbu lela nɛ ewura bee chena to a shuŋ Enyɛnpe Ebɔrɛ kewushiachɛ kikɛ na nna nseŋ ti kabuna nɛ Juda be bewura bee bɔla a luri bɔrɛlambu na to na.

¹⁹ B daŋ sibɛ kusɔ nɛ ewura Ahaz wora saŋɛ so nɛ e ji kuwura na kikɛ be asheŋ nna n wɔtɔ Juda nɛ Israɛl be bewura be adrasheŋ be nwɔl to.

²⁰ Ewura Ahaz ka wu nɛ b puli mo Jerusalɛm nɛ k la ewura Deevid be kade to na, nɛ mo pibinyɛn Hɛzekaya sɔ mo so n ji kuwura.