2 Bewura 12 - EBƆRƐ BE KAWƆL

Juda be ewura Jɔash be asheŋ

¹ Jehu ka ji Israɛl be kuwura be nfɛ ashunu nɛ Jɔash ki Juda be efuli so be ewura nseŋ ji kuwura nfɛ adena ashi Jerusalɛm to. Mo nio e daa la Zibia nɛ e shi Bɛshiba be kade to na.

² E daa wora kusɔ nɛ k walɛ Enyɛnpe Ebɔrɛ be anishito nna ŋkpal manɛ so bɔrɛmatapo Jehowada e daŋ bela mo.

³ Ama Jɔash daa maŋ jija kakpa nɛ b daa shuŋ bumo be agbir na bre. Amoso basa na daa wɔtɔ nna a lara bumo be esarga nsaa chɔɔ eduwu ndoŋ.

⁴ Kachako nɛ ewura Jɔash tre bɔrɛmatapoana na ŋ kaŋɛ bumo fanɛ b sɔ etoto nɛ elampo be amansherbi nɛ b chala na kikɛ n wɔtɔ bɔrɛlambu be kpanjawu na to.

⁵ E yɛ: “Bɔrɛmatapowura kikɛ kɔ ekpa nɛ e ta amansherbi na be ako ŋ ka bɔrɛlambu na be kelɔnɛ be kukɔ kama.”

⁶ Ama Jɔash ka ji kuwura be nfɛ adunyɔ nɛ asa kikɛ to nɛ bɔrɛmatapoana maŋ naŋ lɔŋɛ bɔrɛlambu na.

⁷ Ndoŋ nna nɛ ewura Jɔash tre bɔrɛmatapo Jehowada nɛ bɔrɛmatapoana na m bishi bumo le: “Manɛ nna nɛ menyi maa lɔŋɛ bɔrɛlambu na? Baŋ yili kabre a yɔ, men sa maŋ naŋ ta amansherbi nɛ menyee sɔ na a yili. Men baa ta amo a sa nɛ b baa lɔŋɛ bɔrɛlambu na.”

⁸ Ndoŋ nna nɛ bɔrɛmatapoana na maŋ shuli fanɛ b baa sɔ amansherbi na a yili nseŋ kaŋɛ fanɛ bumo alɛ maaŋ lɔŋɛ bɔrɛlambu na.

⁹ Nɛ Jehowada ta deka n futi kumo be buuso nseŋ ta kumo n yili m mata bɔrɛsure nɛ k wɔ fo ka bee luri bɔrɛlambu na to be jisa so na. Bɔrɛmatapoana nɛ baa kuŋ bɔrɛlambu na be kabuna na, e naa sɔ basa be ŋkɛ a wɔtɔ deka na to.

¹⁰ Saŋkama nɛ amansherbi wora keshi deka na to, ewura be nwɔlsibɛpo nɛ bɔrɛmatapo nimuso na bee karga amo nna nseŋ ta amo n wɔtɔ ekɔlgu to.

¹¹ Kumo be kaman nɛ b ta amansherbi na n sa basa nɛ baa keni bɔrɛlambu na be kelɔnɛ so na nɛ bumo alɛ e ta amo ŋ ka ekapɛnta nɛ bepɔrpo nɛ baa shuŋ ndoŋ na

¹² nɛ bumo nɛ baa shɛl ajembu na nɛ bumo nɛ baa pɔr egbal na. B daŋ ta amansherbi na be ako gba nna ŋ ka bɔrɛlambu na be akɔ ko.

¹³ B daa maŋ ta amansherbi na be akama n wora gbiti be asɔ nuu nchu nɛ ntishaŋ jito nɛ mbel nɛ kefitilatɔl be asɔ nɛ baa ta amo be achɛbi a fɛga to na nɛ kusɔ kama nɛ baa ta gbiti ŋko shuwa a lɔŋɛ.

¹⁴ B daa ta loŋ be amansherbi na nna a ka beshumpo na nsaa ta amo be ako malɛ a tɔ asɔ nɛ baa ta a lɔŋɛ bɔrɛlambu na.

¹⁵ Basa nɛ kushuŋ na bɔɔ bumo be enɔ na kikɛ daa ji kashenteŋ nna, amoso esa kama daa maa keni bumo be asheŋ to.

¹⁶ B daa maa ta amansherbi nɛ b ta n lara alubi be ketampaŋ nɛ kejintɔr be esarga na bre a wɔtɔ bɔrɛlambu be amansherbi be deka na to. B daa ta amo ere nna a sa bɔrɛmatapoana na.

¹⁷ Loŋ be jemanɛ na nɛ Siriya be Ewura Haziɛl daŋ ya kɔ m pɔɔ Gaaf be kade so nseŋ kilgi n ya kaa kɔ Jerusalɛm malɛ gba.

¹⁸ Ndoŋ nna nɛ Juda be ewura Jɔash ta esarga nɛ mo nananyɛnana Jehoshafat nɛ Jehoram nɛ Ahaziya daŋ ta n sa Enyɛnpe Ebɔrɛ na nɛ mo gbagba be sarga nɛ shuwa nɛ a wɔ bɔrɛlambu to nɛ ewura pe na n ya sa ewura Haziɛl fanɛ mbe kakɛ pɔɛŋ nɛ e shin nɛ mbe benapo lar Jerusalɛm to.

¹⁹ B daŋ sibɛ kusɔ kama nɛ ewura Jɔash wora kikɛ n wɔtɔ Juda be bewura be adrasheŋ be nwɔl to.

^20-21 Shimei pibinyɛn Jozabad nɛ Shoma pibinyɛn Jehozabad nɛ b la ewura Jɔash be benimuana na e kre mbe kemɔ nseŋ mɔ mo ashi kowu nɛ b pɔr n yili kasawule nɛ k wɔ Jerusalɛm be epeŋilarkpa be kemantaŋ nɛ b sulɔ shishɛr n wɔtɔ nɛ k mata kade nɛ baa tre Silla na. Jerusalɛm nɛ k la ewura Deevid be kade to be kakpa nɛ baa puli bewura na, nɛ b daŋ puli Jɔash nɛ mo pibi Amaziya malɛ sɔ mo so n ji kuwura.