2 Bewura 11 - EBƆRƐ BE KAWƆL

Juda be ewurche Atalia be asheŋ

¹ Juda be ewura Ahaziya mo nio Atalia ka nu fanɛ mo pibinyɛn wu nna, nɛ e kaŋɛ fanɛ b mɔ basa nɛ b shi Juda be ewura be kanaŋ to na kikɛ.

² Ahaziya pibinyɛn Jɔash nawule e daŋ nya ekpa n shile ŋ ŋana. Mo nɛ basa na kikɛ nɛ b daa sha kemɔ nɛ mo tana Jehosheba nɛ e daa la ewura Jehoram pibiche nsaa la Ahaziya malɛ mo tuto pibi na mɔlga mo. E daŋ ta mo nɛ eche nɛ e bee keta mo kakurge na nna ŋ ŋana Enyɛnpe be bɔrɛlambu na be ebu deseto to. Ŋkpal loŋ so, Atalia daa maŋ nya mo m mɔ.

³ Nfɛ ashe nɛ Jɔash daŋ ŋana bɔrɛlambu na to. Loŋ be jemanɛ na nɛ Atalia malɛ bee ji kuwurche ashe efuli na so.

⁴ Kafɛ shunusopo na to nɛ bɔrɛmatapo Jehowada shuŋi n tre benimu nɛ benapo nɛ baa keni ewura be laŋ to so na nɛ b shɛr bɔrɛlambu na to m bɔ ntaŋ Enyɛnpe Ebɔrɛ be ketre so a yɔ kusɔ nɛ e bee sha kewora na be kaplɛa so. Ade kikɛ be kaman nɛ e ŋini bumo ewura Ahaziya pibinyɛn Jɔash

⁵ nseŋ kaŋɛ bumo le: “Men kaŋ baa ba kushuŋ to kewushiachɛ, kananɛ b barga menyi to ntuŋ asa na be katuŋ koŋwule e naŋ baa keni bɔrɛlambu na be mbunaana so,

⁶ nɛ katuŋ koŋwule malɛ e baa keni kabuna nɛ baa tre Suur be kabuna na so. Nɛ katuŋ nɛ k ka na malɛ e baa keni kakpa nɛ ewura be bekumpo wɔ na so. Loŋ be ntuŋ asa ere e naaŋ baa keni ewura na be laŋ so.

⁷ Ntuŋ na be anyɔ nɛ b maa yɔ kushuŋ to kewushiachɛ na, daga b ka ya yili bɔrɛlambu na ase nna a kuŋ Jɔash.

⁸ A daga men ka keta men be etokobi n wora shiriya n yili a kuŋ ewura Jɔash. Kaplɛkama nɛ e bee yɔ men bɛ mo so. Ekama malɛ nɛ e pɛl n taga mo to, daga luwu.”

⁹ Benapo be benimu na daŋ bɛ kusɔ nɛ Jehowada kaŋɛ na so nna nseŋ shin nɛ bumo be basa ba mo kutɔ. Amoso benapo be benimu na daŋ gbargbar basa nɛ b koso kushuŋ to nɛ bumo nɛ b ba nɛ b ba sɔ bumo so na kikɛ ndoŋ nna.

¹⁰ Ndoŋ nna nɛ Jehowada ta akpa nɛ asɔkuŋso nɛ a daa la ewura Deevid peya nsaa yil bɔrɛlambu na to na n sa benapo be benimu na.

¹¹ E daŋ shin nna nɛ bekumpo na ta bumo be etokobi ŋ keta n yili ŋ kulti bɔrɛsure na ashi bɔrɛlambu na be anishito a kuŋ Jɔash.

¹² Kede be kaman nɛ Jehowada keta Jɔash n lar kowu nseŋ ta kuwurwuro m buu mo nseŋ n ta bewura be mbra be kawɔl n sa mo nseŋ chulgi ŋku n wurge mbe kumu so n ta mo ŋ ki ewura. Ndoŋ nna nɛ ekama na kpla enɔ nseŋ cha awɔr ŋ kaŋɛ le: “Ebɔrɛ e teŋi ewura na be ŋkpa so.”

¹³ Ewurche Atalia ka nu basa na ka bee dele ewura na, nɛ e nya manaŋ n yɔ kakpa nɛ jimaŋ na shɛr na ashi bɔrɛlambu na to.

¹⁴ E ka ya wu ewura popɔr na nɛ e yili eshabɔrɛana na akpa ashi bɔrɛlambu na be kabuna be anishito be kakpa nɛ bewura bee chena na, nɛ benapo be benimu nɛ mbelfompoana yili ŋ kulti mo, nɛ basa na kikɛ bee cha awɔr kagbenefuli so nsaa foŋ mbel nɛ bɔrɛlambu to be beshɛbompoana bee juŋkpar kasheŋ wora na kikɛ, nɛ e kpɛa mbe asɔbuuso to kagbenejijaso nseŋ boŋto ŋ kaŋɛ le: “Menyi bedebɔrpo ere!”

¹⁵ Jehowada daa maa sha b ka mɔ ewurche Atalia bɔrɛlambu na ase, ŋkpal loŋ so, e daŋ tre benapo be benimuana na nna ŋ kaŋɛ bumo le: “Men ta mo m bɔla bekumpo na to n yɔ. Esa kama malɛ nɛ e kaŋ pɛl a sha kesɔ mo n yige, men mɔ amodoŋwura.”

¹⁶ Ndoŋ nna nɛ b pɛ mo n ta mo n yɔ ewura be laŋ to be kelɔnɛ so be kakpa nɛ baa tre ‘Egbaŋɛ be Kabuna’ na, n ya mɔ mo ndoŋ.

Jehowada ka naŋ lɔŋɛ asheŋ

¹⁷ Bɔrɛmatapo Jehowada daŋ shin nna nɛ mo nɛ ewura Jɔash nɛ basa na wora kɔnɔkoŋwule be ŋkre fanɛ baaŋ baa ji kashenteŋ a sa Enyɛnpe Ebɔrɛ.

¹⁸ Kumo be kaman nɛ b ya da Baal be lambu na n lɛ nseŋ bure kumo be ebɔrɛsure nɛ agbirana nɛ a wɔ ndoŋ na kikɛ nseŋ mɔ Maatan nɛ e la Baal be kegbirwura na ashi ebɔrɛsureana na ase gbagba. Ndoŋ nna nɛ Jehowada shin nɛ bekumpo yili a keni Enyɛnpe be bɔrɛlambu na so.

¹⁹ Ade kikɛ be kaman nɛ benapo be benimuana nɛ Jerusalɛm be kade to be benimuana nɛ ekrachiana nɛ basa nɛ b ka na kikɛ ba Jehowada kutɔ nɛ b bɛ abar so n ya keta ewura na bɔrɛlambu na to m ba ewura be laŋ to. Kabunagboŋ na to nɛ b daŋ bɔla n luri laŋ na to nɛ ewura na ya chena mbe kuwurputi so.

²⁰ Basa na kikɛ be ŋgbene daŋ fuli bumo nna ga nɛ kade na kikɛ wora shruum ŋkpal ewurche Atalia ka wu na so.

²¹ Nfɛ ashunu nɛ Jɔash daŋ ji pɔɛŋ nseŋ ki Juda be ewura.