2 Bewura 1 - EBƆRƐ BE KAWƆL

Anebi Elaija nɛ ewura Ahaziya be asheŋ

¹ Israɛl be ewura Ahab ka wu be kaman nɛ Mowab be efuli so be basa kini kenu n sa Israɛlebi.

² Kachako nɛ Israɛl be efuli so be Ewura Ahaziya shi mbe laŋ be kuchoŋi be esoso ashi Samɛria be kade to n tɔrto nseŋ doro ga. Ŋkpal loŋ so e daŋ shuŋi mbɔ Ekrɔn be kade to nna fanɛ b ya bishi Filistiebi be kegbir nɛ baa tre Baalzebɔb na ŋ keni e beeŋ nya alenfia ŋko e maaŋ nya?

³ Ndoŋ nna nɛ Enyɛnpe Ebɔrɛ be malaika kaŋɛ anebi Elaija nɛ e shi Tishbe na fanɛ e ya shɛr Ewura Ahaziya be mbɔ na to nseŋ bishi bumo le: “Manɛ nna nɛ menyee yɔ Ekrɔn nɛ men ya wu kegbir nɛ baa tre Baalzebɔb na? Menyee fɛ nna fanɛ Ebɔrɛ kikɛ maŋ wɔ Israɛl be efuli so nɛ men ya wu mo a?

⁴ Men ya kaŋɛ ewura na fanɛ ma Enyɛnpe Ebɔrɛ na kaŋɛ fanɛ e maaŋ naŋ nya alenfia kikɛ; e beeŋ wu!” Kusɔ nɛ Enyɛnpe Ebɔrɛ na daŋ kaŋɛ na gbagba chap nɛ anebi Elaija daŋ wora.

⁵ Ama mbɔ na ka bɛta m ba ewura na kutɔ le nɛ e daŋ bishi bumo: “Manɛ nna nɛ men bɛta m ba manaŋ loŋ?”

⁶ Nɛ b yɛ: “Kanyɛn ko e ba tu anyi nseŋ kaŋɛ anyi fanɛ an bɛta m ba kaŋɛ fo le: ‘Manɛ nna nɛ fo lara mbɔ fanɛ b yɔ Baalzebɔb be kegbir nɛ k wɔ Ekrɔn na to n ya bishi so? Fee fɛ fanɛ Ebɔrɛ kikɛ maŋ wɔ Israɛl be kasawule so nna a? Fo maaŋ naŋ nya alenfia ashi fo doro ere to kikɛ: Feeŋ wu!’ ”

⁷ Nɛ ewura Ahaziya bishi bumo le: “Nuso b esa e la kanyɛn na?”

⁸ Nɛ b yɛ: “E daŋ buu piŋi nɛ b ta asɔbɔya be kawɔl n lɔŋɛ nna nseŋ ta kawɔl be kreso ŋ kreto.” Ndoŋ nna nɛ ewura na kaŋɛ le: “Kumo ere Elaija nna na!”

⁹ Nseŋ shuŋi benapo be enimu nɛ benapo adunu epul to fanɛ b ya bar anebi Elaija. Nɛ benapo be enimu na ya wu Elaija nɛ e tase kebee be esoso nseŋ kaŋɛ mo le: “Ebɔrɛ be esa, ewura yɛ, fo gbelge m ba, e bee sha k kewu fo.”

¹⁰ Nɛ Elaija malɛ kaŋɛ le: “Nɛ n la Ebɔrɛ be esa kashenteŋ nna, kumo ere Ebɔrɛ e shin nɛ edɛ e shi esoso m ba chɔɔ fo nɛ fo basa ere kikɛ m mɔ!” Epul to nɛ edɛ shi esoso m ba chɔɔ benapo be enimu na nɛ mbe benapo na kikɛ m mɔ.

¹¹ Kumo be kaman nɛ ewura na naŋ shuŋi benapo be enimu pɔtɛ ko nɛ mbe benapo adunu nɛ bumo alɛ naŋ yɔ Elaija kutɔ n ya kaŋɛ mo le: “Ebɔrɛ be esa, ewura yɛ fo gbelge m ba naniere, e bee sha kewu fo.”

¹² Nɛ Elaija malɛ kaŋɛ le: “Nɛ n la Ebɔrɛ be esa kashenteŋ nna, kumo ere Ebɔrɛ e shin nɛ edɛ e shi esoso m ba chɔɔ fo nɛ fo basa ere kikɛ m mɔ!” Epul to nɛ edɛ shi esoso m ba chɔɔ benapo be enimu na nɛ mbe benapo na kikɛ m mɔ.

¹³ Ade kikɛ be kaman nɛ ewura na naŋ shuŋi benapo be enimu sasopo kutɔ nɛ benapo adunu Elaija. Nɛ enimu na ya dii kebee na n yɔ Elaija kutɔ n ya gbir mbe anishito amuli so ŋ kule mo ŋ kaŋɛ le: “Ebɔrɛ be esa, wu ma nɛ ma benapo ere kuwɔr nseŋ yige anyi nɛ an ji efute!

¹⁴ Edɛ daŋ shi esoso nna m ba chɔɔ benapo be benimu anyɔ nɛ bumo be basa nɛ b juŋkpar m ba mɔ, ama jande, wu ma ere kuwɔr!”

¹⁵ Ndoŋ nna nɛ Enyɛnpe Ebɔrɛ be malaika ba kaŋɛ Elaija le: “Sa maa lɔ kufu, tu mo a yɔ.” Nɛ Elaija koso ŋ gbelge n tu benapo be enimu na n yɔ ewura na kutɔ

¹⁶ n ya kaŋɛ mo le: “Yiramu! Enyɛnpetale Ebɔrɛ yɛ, Israɛl ka maŋ kɔ Ebɔrɛ so nɛ fo shuŋi mbɔ Baalzebɔb be kegbir nɛ k wɔ Ekrɔn na to fanɛ b ya bishiso a? Ŋkpal fo ka wora le ere so, fo maa ba nɛ fo nya alenfia kikɛ. Feeŋ wu!”

¹⁷ Amoso ewura Ahaziya daŋ wu nna, nɛ kusɔ nɛ Enyɛnpe Ebɔrɛ bɔla anebi Elaija so ŋ kaŋɛ na bɔlɔ so. Ahaziya daa maŋ kɔ mbinyɛnsobi amoso e ka wu mo sipo Joram e daŋ sɔ mo so n ji kuwura jemanɛ nɛ Jehoshafat pibinyɛn Jehoram daŋ ji Juda be kuwura be kafɛ nyɔsopo to na.

¹⁸ B sibɛ kusɔ kama nɛ ewura Ahaziya daŋ wora jemanɛ nɛ e daa ji kuwura na be asheŋ kikɛ n wɔtɔ Israɛl be bewura be adrasheŋ be nwɔl to.