2 Tɛsalɔnikaebi 3 - EBƆRƐ BE KAWƆL

Kebaakule Ebɔrɛ a sa beshuŋipo be asheŋ

¹ Ade kikɛ be buushi, bekurgepoana, men baa kule Ebɔrɛ a sa anyi nɛ Enyɛnpe be kubɔya na e nya manaŋ n sɔ kakpa kikɛ n nya kemaŋkura fanɛ kananɛ k daŋ wora menyi kutɔ na.

² Men baa kule Ebɔrɛ a sa anyi nɛ e baa pete anyi basa lubi be yiri kikɛ to. Ŋkpal manɛ so, mannɛ basa kikɛ e kɔ yirda.

³ Ama Enyɛnpe bre maa chɛrga mbe asheŋ to kikɛ. E beeŋ sa menyi eleŋ nseŋ pete menyi ashi kulubi to.

⁴ Enyɛnpe na so an yirda menyi a nyi men ka bee wora ŋ kraa beeŋ wora asɔ nɛ anyee kaŋɛ menyi.

⁵ Enyɛnpe na e ŋini menyi be ŋgbene Ebɔrɛ be kasha nɛ Kristo be kanyiti na.

Betɔlpo be asheŋ

⁶ Bekurgepoana, naniere anyee fiɛ menyi so Enyɛnpe Yesu Kristo be ketre to fanɛ men baa gelge ekurgepo kikɛ nɛ e wɔ ntɔl be kebaawɔtɔ to a maa bɛ keŋini nɛ an sa menyi na so.

⁷ Menyi gbagba e baa nyi a ka daga men ka bee kute anyi to. An ka daa wɔ menyi kutɔ, an daa maŋ kɔ ntɔl.

⁸ An daa maŋ ji ekama be kejibi a maŋ ka mo, ama kapa nɛ kanyɛ an daa mɔ an be amu nna a shuŋ nɛ an sa maŋ bɔ ekama kukɔ.

⁹ Mannɛ fanɛ an daa maa kɔ kumo be ekpa nna, ama an daa maŋ wora loŋ nna nɛ men wu anyi be kebaawɔtɔ na ŋ kute anyi to.

¹⁰ Anyi nɛ menyi ka daa wɔtɔ na gba, an chɛr ŋ kaŋɛ menyi fanɛ: “Ekama nɛ e maŋ shuŋ, men sa maŋ shin nɛ e ji.”

¹¹ Ŋkpal manɛ so, an nu fanɛ men be beko wɔ ntɔl be kebaawɔtɔ to nna a maa shuŋ shɛŋ nsaa wɔtɔ a kilgi to fanɛ menyi ka bee shuŋ na.

¹² Anyee kaŋɛ nsaa fiɛ le be basa so Enyɛnpe Yesu Kristo be ketre to fanɛ b ta bumo be amu boeŋ a wora bumo be ashuŋ a bela bumo gbagba be amu.

¹³ Bekurgepoana, men sa maŋ shin nɛ kelela be kewora e baa gben menyi.

¹⁴ Nɛ ekama nɛ e kini kewora kusɔ nɛ anyee kaŋɛ menyi kawɔl ere to ere, men baa de amodoŋwura so a gelge mo nɛ anishinyɔr e pɛ mo.

¹⁵ Men sa maŋ ta mo ŋ ki men doŋ, ama men fiɛ mo so fanɛ ekurgepo.

Lalaloge be mmalga be asheŋ

¹⁶ To, kagbenewushi be Enyɛnpe na gbagba e sa menyi kagbenewushi saŋkama ashi kusɔ kama to. Enyɛnpe na e baa wɔ menyi kikɛ to.

¹⁷ Ma Pɔɔl gbagba be enɔ to be kechɔrɔ be kasibɛ nde. Kananɛ mee dulgi ma nwɔl kikɛ nna na. Loŋ nɛ mee sibɛ.

¹⁸ An Nyɛnpe Yesu Kristo be kuwɔr be kakɛ na e baa wɔ menyi kikɛ so.