2 Tɛsalɔnikaebi 2 - EBƆRƐ BE KAWƆL

Alubipo na be asheŋ

¹ To, bekurgepoana, an Nyɛnpe Yesu Kristo be kebɛta m ba na nɛ anyi be kechala a wɔ mo kutɔ na malɛ be asheŋ nde:

² Anyee kule menyi nna fanɛ men sa maŋ kaŋ shin nɛ men be nfɛra e wul menyi to ŋko n shin nɛ kananɛ basa ko bee kaŋɛ fanɛ Enyɛnpe be kachɛ na teŋ ba na e baa jija men be ŋgbene. Shere esa ko e kaŋɛ fanɛ e wu kumo loŋ nna ŋko esa ko e malga abɔrɛsheŋ ŋ kaŋɛ loŋ ŋko basa e naa kaŋɛ fanɛ anyi e sibɛ kumo anyi be kawɔl to.

³ Men sa maŋ kaŋ shin nɛ esa kama e bɔla ekpa kikɛ so n fule menyi, ŋkpal manɛ so, Enyɛnpe be kachɛ na maaŋ ba ama kenyaŋɛto m buu Ebɔrɛ na ba na nɛ alubipo nɛ mbe kelamba la edɛ to be keluri na lar na pɔɛŋ.

⁴ Kusɔ kama nɛ enyiŋgbasa bee bɛ so a kaŋɛ fanɛ k shi Ebɔrɛ kutɔ nna ŋko a tre kumo kabɔrɛshuŋ, alubipo na beeŋ ji kumo emɔrɔ ŋ ki kumo doŋ. E beeŋ wu mbe kumu hale n ya luri n chena bɔrɛlambu na to a tre mbe kumu Ebɔrɛ.

⁵ Men maŋ nyiŋi fanɛ ŋ ka daa wɔ menyi kutɔ ŋ kaŋɛ menyi asheŋ ere kikɛ a?

⁶ Naniere menyi alɛ gba nyi kusɔ nɛ k bee shin nɛ alubipo na maaŋ tiŋ m ba, ama mbe jemanɛ na ya fo nna nɛ e lar efuli.

⁷ Daŋga be asheŋ lubi be kewora na bre teŋ fara, ama asɔ nɛ a beeŋ wora na be eleŋ gbagba maŋ naŋ lar efuli she emo nɛ e bee kuŋ amo ekpa na lar ashi to nna.

⁸ Kachɛ na kaŋ fo, alubipo na beeŋ ba lara mbe kumu efuli nɛ Enyɛnpe Yesu e fute mbe kɔnɔ to be afu m mɔ mo n shin nɛ mo ere Yesu be kemaŋkura be keba na e mur alubipo na.

⁹ Alubipo na beeŋ bɔla Setani be eleŋ to n wora efɛ be edaŋga nɛ emamachisheŋ damta.

¹⁰ E beeŋ bar efɛ be edalubisheŋ damta m ba fule bumo nɛ baaŋ mur na. Baaŋ wu kasogberge be luwu na ŋkpal b ka kini kashenteŋ nɛ baaŋ bɔla kumo so n nya kumɔlga na so.

¹¹ Amoso nɛ Ebɔrɛ bee shin nɛ kefoe ekpa be eleŋ ba bumo to na. Loŋ e naaŋ shin nɛ b yirda kusɔ nɛ k la efɛ.

¹² Bekama malɛ nɛ b maŋ yirda kashenteŋ na nseŋ ta alubi ŋ ki bumo be aparsheŋ na kikɛ beeŋ mur.

Kananɛ Ebɔrɛ lara Tɛsalɔnikaebi nɛ b nya kumɔlga be asheŋ

¹³ Bekurgepoana, a daga an ka chɔrɔ Ebɔrɛ saŋkama ŋkpal menyi nɛ Enyɛnpe bee sha na so. Ŋkpal manɛ so, Ebɔrɛ fara nna n lara menyi nɛ men nya kumɔlga ashi Kiyoyu Cheeŋ na to nseŋ ki Ebɔrɛ be basa cheembi a wɔ keyirda kashenteŋ na to.

¹⁴ Baru lela nɛ an malga n sa menyi na to nɛ Ebɔrɛ bɔla n tre menyi. E tre menyi nna nɛ menyi alɛ e ba nya an Nyɛnpe Yesu Kristo be kemaŋkura na.

¹⁵ Amoso, bekurgepoana, men baa kɔ men be amu to kpakpa a kɔ kashenteŋ nɛ an ta abɔrɛsheŋ be kemalga nɛ kawɔl be kesibɛ ŋ ŋini menyi na to kpakpa.

¹⁶ An Nyɛnpe Yesu Kristo gbagba nɛ Ebɔrɛ an Tuto nɛ e sha anyi nseŋ bɔla mbe kuwɔr be kakɛ so a leŋ anyi to mbaanaayɔ nsaa sa anyi tama lela na

¹⁷ e baa leŋ menyi to nɛnɛ nsaa sa menyi eleŋ nɛ men baa wora asheŋ lela kikɛ nsaa malga mmalga lela.