2 Tɛsalɔnikaebi 1 - EBƆRƐ BE KAWƆL

¹ Kawɔl ere shi ma Pɔɔl nɛ Sailas nɛ Timoti kutɔ nna a yɔ Tɛsalɔnika be asɔriebi nɛ b la Ebɔrɛ an Tuto nɛ Enyɛnpe Yesu Kristo peya na kutɔ.

² Ebɔrɛ Etuto na nɛ Enyɛnpe Yesu Kristo e sa menyi mo ere Ebɔrɛ na be kuwɔr be kakɛ nɛ kagbenewushi.

Kristo be keba be kachɛ be demu be keji be asheŋ

³ Bekurgepoana, a daga an ka bee chɔrɔ Ebɔrɛ saŋkama ŋkpal menyi so. An kɔ ekpa nɛ an chɔrɔ mo ŋkpal kananɛ men be yirda bee wora keshi a ti so so. Kananɛ men be ekama bee sha mo braana na gba bee ti so.

⁴ Amoso nɛ anyi gbagba wɔ Ebɔrɛ be asɔriana to a ji njɔŋ ŋkpal menyi so na. Men be yirda nɛ kanyiti nɛ men kɔ a wɔ awurfoŋ nɛ tɔrɔ damta ere to so nɛ anyee ji njɔŋ loŋ na.

⁵ Kede ere e naaŋ ŋini Ebɔrɛ be demu be keji ka du cheembi, ŋkpal manɛ so, ade kikɛ e shin nɛ men daga mbe kuwura nɛ men kpal kumo so a ji awurfoŋ na.

⁶ Ŋkpal manɛ so, Ebɔrɛ bee wora asɔ nɛ amo be ekpa so nna. Basa nɛ baa tɔrɔ menyi ere, e beeŋ shin nɛ tɔrɔ e ba bumo so.

⁷ Mo e naaŋ sa anyi nɛ menyi nɛ menyee ji awurfoŋ ere ewushi kachɛ nɛ Enyɛnpe Yesu beeŋ lara mbe kumu ŋ ŋini durnya saŋɛ nɛ mo nɛ mbe emalaika lempo beeŋ shi ebɔrɛso m ba nɛ edɛ chɔɔso

⁸ m ba gberge basa nɛ b maŋ nyi Ebɔrɛ nɛ bumo nɛ b maa bɛ an Nyɛnpe Yesu be baru lela na so kusoe.

⁹ Baaŋ nya kemur be kasogberge mbaanaayɔ nɛ Ebɔrɛ e barga bumo ashi mo kutɔ nɛ mbe eleŋ be kemaŋkuragboŋ na to.

¹⁰ Kachɛ nɛ e beeŋ ba nya kemaŋkura nɛ bunyaŋ ashi mbe basa nɛ b yirda mo na kutɔ na, menyi alɛ gba beeŋ ti loŋ be basa na so ŋkpal men ka yirda kubɔya nɛ an daŋ bɔ n sa menyi na so.

¹¹ Amoso nɛ anyee kule anyi be Ebɔrɛ saŋkama a sa menyi fanɛ e shin nɛ men be kebaawɔtɔ e baa du fanɛ kananɛ e tre menyi fanɛ men ba kaa kɔ na. Anyee kule mo fanɛ e ta mbe eleŋ na n shin nɛ men be kelela be kasha na e wora kashenteŋ n shin nɛ men be yirda be kushuŋ na e bɔlɔ so nyam.

¹² Loŋ nɛ an Nyɛnpe Yesu be ketre beeŋ nya kemaŋkura menyi kutɔ, nɛ menyi alɛ gba e bɔla an Nyɛnpe Yesu Kristo nɛ an be Ebɔrɛ be kuwɔr be kakɛ so n nya kemaŋkura ashi mo kutɔ.