2 Jɔn 1 - EBƆRƐ BE KAWƆL

¹ Kawɔl ere shi ma nɛ baa tre Enimu na kutɔ nna a yɔ kowurche nɛ Ebɔrɛ lara na nɛ mbe mbia kutɔ. Amo be kache na be asheŋ nɛ mee sha kashenteŋto na. Mannɛ n nawule malɛ gba e naa sha mbe asheŋ, bekama nɛ b nyi kashenteŋ be keŋini na gba bee sha mbe asheŋ,

² ŋkpal kashenteŋ be keŋini na ka wɔ anyi to, kumo alɛ ŋkaa beeŋ shir a wɔ anyi to mbaanaayɔ na so.

³ Ebɔrɛ Etuto na nɛ Yesu Kristo nɛ e la Etuto na Pibinyɛn na sa anyi kuwɔr be kakɛ nɛ kuwɔr nɛ kagbenewushi n shin nɛ an nya kashenteŋ be kasha.

Kashenteŋ nɛ kasha be asheŋ

⁴ Kowurche, ŋ ka pin fanɛ fo mbia ko wɔ kashenteŋ be kebaawɔtɔ na to fanɛ kananɛ Ebɔrɛ Etuto na nase na, ma kagbene fuli ma paa.

⁵ Naniere malɛ mee kule fo nna fanɛ fo shin nɛ an kikɛ e baa sha abar be asheŋ, kumo alɛ maŋ la kamalga naseso popɔr ko nna nɛ mee sibɛ a sa fo, kumo nɛ an nya sososo na kikɛ na nna.

⁶ Keŋini kasha e la kebaabɛ Ebɔrɛ be mmalga naseso so. Menyi alɛ kikɛ chɛr n nu dra dra na kikɛ fanɛ kusɔ nɛ Ebɔrɛ na nase e la fanɛ a daga fanɛ men kikɛ e baa wɔ kasha be kebaawɔtɔ to.

⁷ Befɛpo damta mo nɛ b maa yirda fanɛ Yesu Kristo ba durnya ere to nna fanɛ dimɛdi, lar n luri durnya to. Loŋ be basa na be ekama e la efɛpo nɛ Kristo mo doŋ na.

⁸ Amoso, men baa de so n sa maŋ paŋ kusɔ nɛ men kpal kumo so n shuŋ na, ama men wora ania n nya men be tɔnɔ kikɛ nyam.

⁹ Esa kama nɛ e maa shir a wɔ Kristo be keŋini na to nsaa ta asheŋ a ti amo so, maŋ kɔ Ebɔrɛ mo to. Ama ekama nɛ e shir a wɔ Kristo be keŋini na to, kɔ Etuto na nɛ Ebinyɛn na kikɛ mo to.

¹⁰ Esa kama nɛ e ba men kutɔ nsaa maŋ bar le be keŋini ere, men sa maŋ chɔrɔ mo ŋko n sɔ mo n wɔtɔ men peana,

¹¹ ŋkpal manɛ so, ekama nɛ e chɔrɔ mo bee chɛ mo to a wora mbe ashuŋ lubi na nna na.

Lalaloge be kechɔrɔ be mmalga be asheŋ

¹² Ŋ kraa kɔ asɔ damta nɛ ŋ kaŋɛ menyi, ama m maa sha kesibɛ amo kawɔl to. Kusɔ nɛ mee tama e la fanɛ meeŋ ba bɔɔ menyi so nɛ ma nɛ menyi e chena m malga, saŋɛ na so an kikɛ be ŋgbene beeŋ fuli anyi parr.

¹³ Fo sipo cheso nɛ Ebɔrɛ lara na gba be mbia bee chɔrɔ fo.