1 Timoti 6 - EBƆRƐ BE KAWƆL

Anya be asheŋ

¹ A daga fanɛ anya kikɛ e baa sa bumo nyɛnpeana bunyaŋ kikɛ nɛ k daga nɛ basa pɔtɛ e sa maŋ nya ekpa m malga kulubi kikɛ ŋ gbiti Ebɔrɛ be ketre ŋko anyi be keŋini na.

² Anya nɛ bumo nyɛnpeana la beyirdapo e sa maŋ kpal b ka la bumo to ebi so a fɛl bumo. Bumo e daga fanɛ b bugi kagbene n shuŋ gba nɛnɛ, ŋkpal manɛ so, beyirdapo nɛ beshapo e naa ji bumo be kushuŋ be tɔnɔ. Ŋini basa asheŋ ere kikɛ nseŋ leŋ bumo to nɛ b bɛ amo so.

Befɛpo nɛ kashenteŋ be dama be asheŋ

³ Esa kama nɛ e kɔ keŋini pɔtɛ a ŋini nsaa maa nu a sa Enyɛnpe Yesu Kristo be kashenteŋ be mmalga na nɛ kashenteŋ be abɔrɛsheŋ be kebaawɔtɔ nɛ k daga fanɛ an baa wɔtɔ na la esa nɛ kamoowu tan nna nɛ e maŋ nyi shɛŋ.

⁴ Loŋ be esa bee kaa ta mbe kasha kikɛ nna a wɔtɔ emɔrɔ be keji to nsaa kpal mmalga so a bile. Asheŋ ere kikɛ malɛ e naa bar yurkishi nɛ kolu nɛ basa be kebaatege abar nɛ kebirkɔnshi be kebaawora abar basa to

⁵ nɛ basa be kebaaji abar emɔrɔ fanɛ bumo nɛ b maŋ kɔ nfɛra a maŋ naa nyi kashenteŋ be ekpa na ŋkpal b ka bee tama fanɛ abɔrɛsheŋ to nɛ baaŋ bɔla n nya amansherbi so.

⁶ Ama esa nɛ e wɔ abɔrɛsheŋ na be kebaawɔtɔ to nsaa shin nɛ asɔ nɛ e kɔ bee bɔlɔ mbe kenishi a kukwe mo na nawule e la damawura.

⁷ An ka bee ba durnya ere to an maŋ bar shɛŋ, anyi alɛ naa lar kumo to, anyi maaŋ tiŋ n ta shɛŋ n lar.

⁸ Amoso, nɛ an baa kɔ ajibi nɛ asɔbuuso, a kukwe anyi.

⁹ Ama basa nɛ baa sha kedii dama bee luri kechɔŋkeni to nna n tɔr kawulisheŋ nɛ ayɛlgasɔ damta be kejigbelɛ to nɛ a doro bumo m mur bumo.

¹⁰ Ŋkpal manɛ so, amansherbi be kasha ga to nɛ kulubi be yiri kikɛ bee shi. Ŋkpal amansherbi be kasha ga so basa ko foe yirda be ekpa na so n luri kagbenejija damta to.

Asɔ nɛ Pɔɔl ta m bɔɔ Timoti enɔ be asheŋ

¹¹ Ama fo ere ka la Ebɔrɛ be esa ere, baa gelge le be asɔ ere kikɛ nsaa kɔ a fin alelasheŋ nɛ abɔrɛsheŋ be kebaawɔtɔ nɛ yirda nɛ kasha nɛ awurfoŋ to be kanyiti nsaa du boeŋ.

¹² Pere kenishi a kɔ yirda to be kolu lela na. Baa kɔ ŋkpa nɛ k maŋ kɔ ekar nɛ b tre fo n wɔtɔ kumo to saŋɛ nɛ fo yili basa damta to n ji fo shɛda na to.

¹³ Ebɔrɛ nɛ e bee sa kusɔ kikɛ ŋkpa nɛ Yesu Kristo nɛ e yili Gomena Pɔnshes Pailat be anishito n ji shɛda lela na be anishito nɛ n yil a kaŋɛ fo fanɛ fo baa nu a sa asɔ nɛ ŋ ŋini fo na kikɛ

¹⁴ nsaa maŋ shin nɛ kulubi be yiri kikɛ e gbiti amo n chɛrga amo hale nɛ an Nyɛnpe Yesu Kristo e naaŋ ya lar m ba.

¹⁵ Ebɔrɛ, bewura to be Ewura nɛ benyɛnpe to be Enyɛnpe nɛ durnya kikɛ be Ekenipo koŋwule nɛ e kɔ nɛfa na malɛ e naaŋ shin nɛ Yesu Kristo be kenamba na e fo jemanɛ na gbagba.

¹⁶ Mo nawule kpeŋ e maa wu kikɛ nsaa wɔ kefulto parrbi nɛ esa kikɛ maaŋ tiŋ ŋ keni kumo kikɛ na to. Esa kama malɛ maŋ naŋ wu mo ŋ ku so, ekama malɛ maaŋ tiŋ n wu mo kikɛ. Bunyaŋ nɛ kuwurji nɛ k maŋ kɔ ekar e baa wɔ mo so. Amɛn.

Damawura be asheŋ

¹⁷ Ŋini bumo nɛ b kɔ dama durnya ere to na fanɛ b sa maa wu bumo be amu ŋko a ta bumo be yirda a deŋi bumo be asɔ so, ŋkpal manɛ so, esa kikɛ maaŋ tiŋ m pin kananɛ mbe asɔ beeŋ chɛr a wɔ mo kutɔ. Kusɔ nɛ k daga damawuraana ka wora e la b ka yirda Ebɔrɛ, ŋkpal manɛ so, mo e naa bugi kagbene a kɛ anyi asɔ yɛlyɛla so nɛ an baa ta a wushi an be ŋgbene.

¹⁸ Ŋini bumo fanɛ b baa wora kelela nsaa la basa a bugi ŋgbene a sa basa bumo be asɔ na be ako.

¹⁹ Le be asheŋ ere e naaŋ shin nɛ b nya asɔ nɛ baaŋ fute n yige so kachako so. Nɛ baa wora loŋ, baaŋ nya ŋkpa gbagba na.

²⁰ Timoti, baa de kusɔ nɛ Ebɔrɛ ta m bɔɔ fo enɔ na so nɛnɛ nsaa gelge chilchil be emɔrɔ be mmalga nɛ a maa par Ebɔrɛ nɛ efɛ be keŋini nɛ baa tre kashennyi be keŋini na.

²¹ Ŋkpal manɛ so, basa ko ka kaŋɛ fanɛ b kɔ le be kashennyi na maŋ naa wɔ yirda na to. Ebɔrɛ e sa menyi kikɛ mbe kuwɔr be kakɛ na.