1 Timoti 5 - EBƆRƐ BE KAWƆL

Kebaakeni bebɛsopo kikɛ so be asheŋ

¹ Sa maŋ kaa ponte enyɛnnimu so, ama baa malga mo kutɔ a leŋ mo to fanɛ kananɛ feeŋ wora fo tuto kurgeso. Baa leŋ mbrantiɛbia to fanɛ kananɛ feeŋ wora fo sipoana gbagba.

² Baa leŋ bechenimu to fanɛ kananɛ feeŋ wora fo nio kurgeso. Baa leŋ besuŋgurbi to fanɛ kananɛ feeŋ wora fo sipocheana gbagba nsaa maa kɔ kusɔ jigaya be nfɛra.

³ Baa bunyaŋ bekulpoche nɛ b maŋ kɔ bechɛtopo na.

⁴ Ama ekulpoche kama nɛ e kɔ mbia ŋko benanabi, a daga fanɛ mbe mbia na nɛ mo nanabiana na ka pin fanɛ bumo e daga b ka nu n sa Ebɔrɛ ŋ keni bumo gbagba be kanaŋ to be esa so. Loŋ na kelela nɛ baa wora a tal bumo nioana nɛ bumo tutoana nɛ bumo nanaana na to na, kumo alɛ be loŋ e naa par Ebɔrɛ.

⁵ Ekulpoche gbagba nɛ e maŋ kɔ esa kikɛ nɛ e bee keni mo so be tama wɔ Ebɔrɛ so nna fanɛ e baa chɛ mo to. Mo alɛ baa wɔtɔ nna a kule Ebɔrɛ kapa nɛ kanyɛ fanɛ Ebɔrɛ e chɛ mo to.

⁶ Ama ekulpoche nɛ e ta mbe nfɛra n wɔtɔ ebel be keji to wu nna nsaa wɔ basa to na.

⁷ Ta le be mmalga ere n fiɛ asɔri to ebi na so nɛ b bɛ amo so nɛ esa kikɛ e sa maŋ wu kulubi bumo so.

⁸ Ama eche kama nɛ e maa keni mo kurgepoana so, fɔnfɔŋ basa nɛ b mata mo na, yige kebaakɔ anyi be yirda na to nna na. Esa nɛ e maŋ yirda Yesu Kristo na malɛ gba bɔ loŋ be esa.

⁹ Ekulpoche nɛ e chɔ nfɛ adeshe, mo alɛ nseŋ naa la eche nɛ e kil kela koŋwule ŋ ku so, nɛ esa nɛ ekama nyi e ka la alelashenworapo

¹⁰ nɛ emo nɛ e tiŋ ŋ keni mbe mbia so nɛnɛ nɛ b daŋ, nɛ emo nɛ e la esa, nɛ emo nɛ e bar mbe kumu kaseto n sa Ebɔrɛ be bebɛsopo ŋko n chɛ awurfoŋ ŋko tɔrɔ be mbia to nseŋ wora kelela be yiri kikɛ, ber mo n wɔtɔ bekulpoche nɛ b daga kechɛto na to.

¹¹ Sa maŋ kaŋ ber bekulpoche nɛ b maŋ la beche kpar n wɔtɔ bumo nɛ b daga kechɛto na to, ŋkpal manɛ so, nɛ benyɛn be kayɛlga baŋ ba pɛ bumo nɛ b naa sha kekil, baa lar Yesu Kristo be kebɛso na to nna,

¹² saŋɛ na so n tɔr kɔnɔ nɛ b juŋkpar n nase fanɛ baaŋ bɛ Yesu Kristo na so na be ntaŋ.

¹³ Kumo be kaman b wɔtɔ nna a jija bumo be saŋɛ a na basa pe, kumo alɛ be buushi nɛ b fara a ji asheŋ nsaa luri basa be asheŋ to a wɔtɔ a malga mmalga nɛ a maŋ nya bumo.

¹⁴ Amoso, ma ere kutɔ, a daga fanɛ bekulpoche nɛ b maŋ la beche kpar ka kil ŋ kurge mbia nseŋ keni bumo be nwu so nsaa maa wora asheŋ kama nɛ a beeŋ shin nɛ edompo kama e nya ekpa n wu bumo kulubi.

¹⁵ Mee malga asheŋ ere nna, ŋkpal manɛ so, bekulpoche ko nɛ b maŋ la beche kpar teŋ foe kashenteŋ be ekpa na so nsaa bɛ Setani so.

¹⁶ A daga fanɛ ebɛsopo kama nɛ e kɔ bekulpoche mbe kanaŋ to ka bee keni bumo so nsaa maŋ baŋ yige bumo n sa asɔri to ebi. Nɛ le be bekulpoche bee nya kechɛto bumo kurgepoana kutɔ, asɔri na to ebi beeŋ tiŋ ŋ keni bekulpoche gbagba so.

Fo nɛ benimu be asheŋ

¹⁷ Asɔri to be benimu nɛ baa juŋkpar bumo be basa nɛnɛ daga b ka bunyaŋ bumo ga, fɔnfɔŋ bumo nɛ baa bɔ kubɔya na nɛ bumo nɛ baa ŋini abɔrɛsibɛ na.

¹⁸ Ŋkpal manɛ so, abɔrɛsibɛ na bee kaŋɛ: “A maŋ daga esa ka kre kena nɛ e bee shuŋ ajibi akpa be kɔnɔ,” nɛ “A daga eshumpo ka nya mbe kakɔka.”

¹⁹ Esa koŋwule baŋ ba kaŋɛ fo enimu ko be kulubi be asheŋ, sa maŋ nu n sa mo epul na to she eshɛdajipoana wora benyɔ ŋko besa nna.

²⁰ Benimu nɛ b wɔ alubi to na, fiɛ bumo so asɔri to ebi na kikɛ be anishito nɛ kufu e pɛ bumo nɛ b ka na.

²¹ Ebɔrɛ nɛ Kristo Yesu nɛ emalaika nɛ b lara n yili na be anishito nɛ n yil a kaŋɛ fanɛ fo nu n sa le be keŋiniana ere nsaa maŋ kpal fo ka nyi esa ko be kebaawɔtɔ so a ji mo ŋkpɛatoso be demu.

²² Sa maa nya manaŋ a ta fo enɔ a deŋi esa kikɛ so a ta mo a bɔɔ Ebɔrɛ enɔ kabɔrɛkule to. Fo alɛ e sa maŋ kaŋ luri basa pɔtɛ be alubi to ŋko kusɔ jigaya be kebaawɔtɔ to.

²³ Sa maŋ naa nuu nchu nawule, baa nuu waindibi be nsa gba gbrɛgbrɛ nɛ a baa chɛ fo epun to be alɔ.

²⁴ Basa ko be alubi baŋ fuli nna geeŋ a juŋkpar bumo a yɔ kasogberge to. Beko malɛ be alubi bee ŋana nna loŋ pɔɛŋ n ya lar efuli kacha ko.

²⁵ Loŋ koŋwule na nɛ basa bee wu alelasheŋ gba ka fuli a dese geeŋ, hale amo nɛ a ŋana naniere gba beeŋ lar efuli so kacha ko.