1 Timoti 4 - EBƆRƐ BE KAWƆL

Befɛpo be keŋini be asheŋ

¹ Kiyoyu Cheeŋ na baŋ kaŋɛ geeŋ fanɛ lalaloge be nchɛ ere to basa ko beeŋ lar kashenteŋ be keŋini ere to nsaa nu a sa efɛ be mbuibi lubi a wɔtɔ a koya amo be keŋini.

² Le be keŋini ere shi kebirkɔnshi be befɛpo nɛ nfɛra lubi deŋ bumo na kutɔ nna.

³ Asɔ nɛ basa na bee ŋini na e la fanɛ a maŋ daga beche nɛ benyɛn e baa kil abar, kumo alɛ maŋ naŋ daga basa ka ji ajibi ko. Le be ajibi ere malɛ, Ebɔrɛ to amo nna n sa basa, nɛ basa nɛ b yirda Yesu Kristo a nyi kashenteŋ na e chɔrɔ Ebɔrɛ n sɔ amo nɛ enɔ anyɔ.

⁴ Ŋkpal manɛ so, kusɔ kama nɛ Ebɔrɛ to walɛ nna, amoso, a maŋ daga basa ka kini kumo. A daga fanɛ basa ka sɔ kumo kabɔrɛkule so nɛ enɔ anyɔ.

⁵ Ŋkpal manɛ so, Ebɔrɛ be kamalga na nɛ kabɔrɛkule na nɛfa kumo nɛ k ki kusɔ lela Ebɔrɛ be anishito.

Yesu Kristo be kenya be asheŋ

⁶ Nɛ fo ŋini bekurgepoana na asheŋ ere, feeŋ baa la Kristo Yesu be kenya lela a kɔ yirda be mmalga nɛ keŋini lela nɛ fo bɛ so na be eleŋ.

⁷ Baa gelge chilchil be mmalga nɛ edaŋkare be mmalga nɛ a maa bunyaŋ Ebɔrɛ nseŋ ŋini fo kumu abɔrɛsheŋ be kebaawɔtɔ.

⁸ Ŋkpal manɛ so, esa be kebaakeni mbe eyur so la kusɔ lela nna, ama esa baa ŋini mbe kumu abɔrɛsheŋ be kebaawɔtɔ, loŋ e bɔ, ŋkpal manɛ so, k beeŋ tiŋ n chɛ mo to durnya ere to nfe nseŋ naŋ chɛ mo to saŋɛ nɛ e beeŋ yɔ ebɔrɛso na.

⁹ Le be kamalga ere la kashenteŋ nna, kumo alɛ maŋ kɔ emɔrɔ kikɛ kumo to.

¹⁰ Anyee shuŋ ga a maŋ kɔ kachena ŋkpal an ka ta anyi be yirda n wɔtɔ Ebɔrɛ nɛ e kɔ ŋkpa nsaa la basa kikɛ be Emɔlgapo, fɔnfɔŋ bumo nɛ b yirda mo na to so.

¹¹ Ŋini basa asɔ ere nseŋ kaŋɛ bumo kenishipereso fanɛ b baa bɛ amo so.

¹² Sa maŋ shin nɛ esa kama e fɛl fo ŋkpal fo ka la kabrantiɛbia so, ama shin nɛ beyirdapo na e keni fo kebaawɔtɔ to ŋ koya asɔ ashi fo mmalga nɛ fo da to nɛ fo kasha nɛ fo yirda nɛ kananɛ fo maŋ kɔ kusɔ jigaya be nfɛra to.

¹³ Pɔɛŋ nɛ m ba, baa kraŋ abɔrɛsibɛ na a sa asɔri to ebi a leŋ bumo to nsaa ŋini bumo abɔrɛsheŋ na.

¹⁴ Loŋ na fo maaŋ gal kusɔ nɛ Ebɔrɛ ta m bɔɔ fo enɔ fanɛ fo wora saŋɛ nɛ basa wu fo asheŋ ŋ kaŋɛ nɛ benimu daŋ ta enɔana n deŋi fo so ŋ kule Ebɔrɛ n sa fo na n lɛ.

¹⁵ Baa wora asɔ ere nseŋ ta fo kagbene kikɛ n wɔtɔ amo to nɛ basa kikɛ e wu kananɛ fo abɔrɛsheŋ be kenyi bee wora keshi a ti so.

¹⁶ Baa de so a keni fo kumu nɛ fo abɔrɛsheŋ be keŋini na so nɛnɛ. Baa wora asɔ ere, ŋkpal manɛ so, loŋ e naaŋ mɔlga fo nɛ bumo nɛ baa nu fo mmalga na.