1 Timoti 3 - EBƆRƐ BE KAWƆL

Basa nɛ b daga kenimu asɔri to be asheŋ

¹ Le be kamalga ere maŋ kɔ emɔrɔ fanɛ esa kama nɛ e yili kumo mbe kagbene to fanɛ e beeŋ ki asɔri to be ejuŋkparpo lara ashuŋ kikɛ to be kelela.

² Amoso, a daga fanɛ asɔri to be ejuŋkparpo e baa la esa nɛ e maŋ kɔ amoso. A daga fanɛ e baa la eche koŋwule wura a nyi asheŋ a maa nya agbo jigajiga, ama e baa fɛ nfɛra dede a la esa nɛ basa bee sa bunyaŋ. A daga fanɛ e baa la esa a sha basa nsaa tiŋ a ŋini basa abɔrɛsheŋ na nɛnɛ.

³ E sa maa nuu nsa ga ŋko a la esa brembreŋ, ama a daga fanɛ e baa du boeŋ nsaa maa la elushapo ŋko a ta mbe kagbene a wɔtɔ amansherbi to.

⁴ Ama a daga fanɛ e baa tiŋ a keni mbe eche nɛ mbia so nsaa tiŋ a shin nɛ mbe mbia e baa nu a sa mo bunyanso.

⁵ Ŋkpal manɛ so, esa nɛ e maŋ nyi kananɛ e beeŋ keni mo gbagba be kowu to ebi so, nuso nɛ e beeŋ wora ŋ keni Ebɔrɛ be asɔri to ebi so?

⁶ Esa nɛ e la asɔri to be ejuŋkparpo na daga e ka chɛr kebɛso na to nna, nɛ mannɛ aloŋ, e beeŋ luri kamoowu to nɛ Ebɔrɛ e ji mo kumo be demu fanɛ kananɛ Setani daŋ wora nɛ Ebɔrɛ gberge mo kusoe na.

⁷ A daga fanɛ loŋ be enimu e baa kɔ ketre basa pɔtɛ nɛ b maŋ wɔ asɔri to na to, nɛ mannɛ aloŋ, e beeŋ nya ketre lubi nseŋ tɔr Setani be kejigbelɛ to n wora alubi.

Asɔri to be bechɛtopo be asheŋ

⁸ A daga fanɛ asɔri to be bechɛtopo gba e baa kɔ da lela nsaa maa la besheŋjipo ŋko nsanuupoana ŋko a kɔ kejimuni.

⁹ A daga fanɛ b baa kɔ kashenteŋ be wulo nɛ Ebɔrɛ bugi to ŋ ŋini na to kpakpa nɛ nfɛra lela.

¹⁰ Pɔɛŋ nɛ b ki bechɛtopo asɔri to, a daga basa ka keni bumo be kebaawɔtɔana to nɛnɛ ŋ keni ŋko loŋ be kenimu daga bumo a.

¹¹ Bumo be beche gba e baa kɔ da lela nsaa maa ji bumo braana be asheŋ. A daga fanɛ b baa fɛ nfɛra dede a la beshenteŋjipo.

¹² A daga fanɛ asɔri to be bechɛtopo e baa la beche koko wuraana nsaa tiŋ a shin nɛ bumo be beche nɛ mbia e baa nu a sa bumo nɛnɛ.

¹³ Nɛ bechɛtopo baa shuŋ bumo be ashuŋ nɛnɛ, basa bee sa bumo bunyaŋ nna nɛ b baa tiŋ a kaŋɛ basa kenyɛnso fanɛ b yirda Kristo Yesu kashenteŋ.

Wulogboŋ na be asheŋ

¹⁴ K maaŋ naŋ chɛr ko nɛ m ba wu fo, ama mee sibɛ asɔ ere nna a sa fo,

¹⁵ saŋɛ na so ŋ kaŋ maŋ naŋ tiŋ m ba manaŋ, kawɔl ere beeŋ ŋini fo kebaawɔtɔ nɛ k daga fanɛ anyi nɛ an la Ebɔrɛ be kanaŋ to ebi nɛ baa tre ŋkpa to be Ebɔrɛ be asɔri na ka wora. Asɔri na e kɔ kashenteŋ be keŋini na to nsaa keni kumo so.

¹⁶ Kashenteŋto, esa kikɛ maaŋ tiŋ ŋ kaŋɛ anyi be keŋini ere nɛ Ebɔrɛ lara ŋ ŋini ere maŋ la keŋinigboŋ, ŋkpal manɛ so, k bee ŋini esa nɛ e ta nyiŋgbasa be eyur nna n shi ebɔrɛso m ba durnya to be asheŋ. Mo nɛ Kiyoyu Cheeŋ na daŋ kaŋɛ anyi fanɛ e maŋ kɔ kulubi na, emalaika daŋ wu mo nɛ basa bɔ mbe kubɔya nnyamase to nɛ durnya to be basa yirda mo. Mo koŋwule na nɛ Ebɔrɛ daŋ shin nɛ e luri to n yɔ kemaŋkura be ŋkpa na to.