1 Timoti 2 - EBƆRƐ BE KAWƆL

Asɔri to be kabɔrɛshuŋ be asheŋ

¹ To, kusɔ nɛ mee sha kejuŋkpar ŋ kaŋɛ e la fanɛ a daga fanɛ bebɛsopo e baa kule Ebɔrɛ a sa basa kikɛ. B baa kaŋɛ Ebɔrɛ basa be asheŋ tirso be asheŋ nsaa kule mo asɔ a sa bumo nseŋ naa chɔrɔ mo a sa bumo a ti so.

² B baa wora asheŋ ere a sa basa kikɛ, fɔnfɔŋ bewura nɛ basa nɛ b wɔ kenimu be yiri kikɛ to na. Loŋ e naaŋ shin nɛ an baa wɔ abɔrɛsheŋ be kebaawɔtɔ to boeŋ nɛ bunyaŋ nsaa kɔ kagbenewushi.

³ Le be asɔ la asɔ lela nna

⁴ nsaa par Ebɔrɛ nɛ e mɔlga anyi nsaa sha fanɛ basa kikɛ e nya kumɔlga nseŋ pin kashenteŋ be keŋini na.

⁵ Ŋkpal manɛ so, Ebɔrɛ koŋwule nɛ enyiŋgbasa nɛ Ebɔrɛ be nferinto be ematapo koŋwule nɛ baa tre Kristo Yesu Nyiŋgbasa na nawule e wɔtɔ.

⁶ Mo e ta mbe kumu n sɔ basa kikɛ n yige. Kumo e naa ŋini kumo be jemanɛ na gbagba chap fanɛ Ebɔrɛ bee sha basa kikɛ ka nya kumɔlga.

⁷ Amoso nɛ Ebɔrɛ lara ma fanɛ m baa la eshuŋipo nɛ nnyamase be eŋinipo a bɔ yirda nɛ kashenteŋ be kubɔya na. M maa fule nna, kashenteŋ nɛ mee ji.

⁸ Mee sha nna fanɛ kaplɛkama benyɛn nɛ b maa ta bumo be enɔana a shuŋ alubi e baa maŋ amo so kabɔrɛkule to nsaa maa keta kanya agbo ŋko a kini keyirda fanɛ Ebɔrɛ bee nu kabɔrɛkule.

⁹ Mee sha nna fanɛ beche malɛ e baa nyi asheŋ nsaa buu asɔ nɛ a bee kukwe a yulge bumo so nɛnɛ. B sa maa kre bumo be amu kenyishaso ŋko a buu yawu kpakpaso be asɔbuuso ŋko a wɔtɔ shuwa nɛ yawu kpakpaso be abitasɔ nsaa wu bumo be amu kamoowuso.

¹⁰ Asɔ nɛ a daga b ka wora nɛ basa e wu e la alelasheŋ nɛ a daga beche nɛ b yɛ baa bunyaŋ Ebɔrɛ.

¹¹ A daga fanɛ beche e baa yɔɔ bumo be amu a lo to boeŋ a nu keŋini.

¹² Ma alɛ maŋ sa ekpa fanɛ eche kama e baa ŋini benyɛn abɔrɛsheŋ ŋko e baa kɔ eleŋ benyɛn so. Ama a daga fanɛ e baa lo mbe kɔnɔ boeŋ.

¹³ Ŋkpal manɛ so, Adam nɛ Ebɔrɛ daŋ pɔr pɔɛŋ nseŋ pɔr Hawa.

¹⁴ Mannɛ Adam malɛ nɛ Setani daŋ juŋkpar n fule, eche na nɛ Setani daŋ fule nɛ e tɔr alubi to.

¹⁵ Ama nɛ eche baa wɔtɔ a kurge nsaa yirda Ebɔrɛ nseŋ naa sha basa a kɔ kanyiasheŋ a wɔ kebaawɔtɔ cheembi to nsaa du boeŋ a wɔtɔ, e beeŋ nya kumɔlga.