1 Timoti 1 - EBƆRƐ BE KAWƆL

¹ Kawɔl ere shi ma Pɔɔl nɛ n la Kristo Yesu be eshuŋipo ŋkpal Ebɔrɛ an be Emɔlgapo be keparso nɛ Kristo Yesu nɛ an be tama wɔ mo so na kutɔ nna

² a yɔ fo Timoti nɛ fo la m pibi kashenteŋto ashi yirda na to na kutɔ. Ebɔrɛ Etuto na nɛ Kristo Yesu an Nyɛnpe e baa sa fo kuwɔr be kakɛ nɛ kuwɔr nɛ kagbenewushi.

Befɛpo ŋinipo be asheŋ

³ Ŋ ka daa yɔ Masɛdonia, ŋ kaŋɛ fo fanɛ fo shir a wɔ Ɛfeses. Mee sha fanɛ fo baa kraa wɔ ndoŋ ŋkpal basa nɛ b wɔ ndoŋ a ŋini keŋini pɔtɛ nɛ a daga fo ka ju bumo loŋ to na so.

⁴ Shin nɛ b lar ablɔmbi fuloŋ nɛ kakurge to be mmalga tenteŋana na to. Loŋ be mmalga bee bar emɔrɔ nna a maa ŋini kabɔrɛbɛso nɛ k bee shi yirda to na.

⁵ Anyi ere be keŋini ere be kumu e la kasha nɛ k shi kagbene cheembi nɛ nfɛra lela nɛ yirda kpakpaso to na nna.

⁶ Basa ko bre lar le be asheŋ ere to n foe a wɔ emɔrɔ fuloŋana to.

⁷ Baa sha kebaala mbra na be beŋinipo nna, ama b maa pin bumo gbagba be mmalga na nɛ asɔ nɛ b kɔ a malga kenyiso na to.

⁸ An nyi fanɛ mbra na la kusɔ lela nna nɛ esa baa bɛ kumo so nɛ kumo be ekpa so nna na.

⁹ Anyi alɛ naa nyi fanɛ Ebɔrɛ maŋ bar mbra na nna ŋkpal basa lela so. E bar kumo nna ŋkpal basa nɛ baa wora a da ntaŋ na so ŋko bumo nɛ b maa nu a sa Ebɔrɛ ŋko a bunyaŋ mo na so so. Alubiworapoana nɛ bumo nɛ b maŋ du cheembi nɛ bɔrɛkinipoana nɛ bumo nɛ baa mɔ bumo tutoana nɛ bumo nioana nɛ basa pɔtɛ na so e shin nɛ Ebɔrɛ bar mbra na.

¹⁰ Mo alɛ naŋ bar mbra na nna ŋkpal kesakaleawuraana nɛ benyɛn nɛ bumo gbagba kɔ abar a di na nɛ bumo nɛ baa yuri basa a fin kasɔji na nɛ befɛpo nɛ basa nɛ b maa yɛ asheŋ a wora na nɛ bumo nɛ baa wora asheŋ nɛ a maa bɛ kashenteŋ be keŋini na so kuraa na kikɛ so.

¹¹ Le nɛ nɛfa be Ebɔrɛ na be baru lela nɛ kemaŋkura wɔ kumo to nɛ b ta m bɔɔ ma enɔ na bee ŋini.

Pɔɔl ka bee chɔrɔ Ebɔrɛ be asheŋ

¹² Mee chɔrɔ Yesu Kristo an Nyɛnpe ŋkpal e ka sa ma le be kushuŋ ere be eleŋ nseŋ yirda ma n lara ma fanɛ n shuŋ mbe kushuŋ nsaa maŋ ta dra na be mmalga lubi nɛ n daŋ malga ŋ gbiti mo na nɛ kananɛ n tɔrɔ mbe basa nseŋ fɛl mo na n wɔtɔ mbe kagbene to so.

¹³ Ama e wu ma kuwɔr, ŋkpal manɛ so, ŋ ka daa maŋ yirda na so e shin nɛ n wora kawulisheŋ na.

¹⁴ An Nyɛnpe bugi kagbene n wu ma kuwɔr ga nseŋ sa ma yirda nɛ kasha ashi Kristo Yesu to.

¹⁵ Le be kamalga ere la kashenteŋ nna, kumo alɛ maŋ kɔ emɔrɔ kikɛ fanɛ: Kristo Yesu ba durnya to nna nɛ e ba mɔlga basa ashi bumo be alubi to, ma alɛ be alubi e shi a chɔ ekama peya.

¹⁶ Ama Ebɔrɛ wu ma, alubiworapoana be ejuŋkparpo na kuwɔr nɛ e ŋini durnyaebi kananɛ Kristo Yesu be kanyiti ka shi nɛ b yirda mo nseŋ nya ŋkpa nɛ k maŋ kɔ ekar na.

¹⁷ Bunyaŋ nɛ epaŋ be kedi e baa wɔ Ewurgboŋ nɛ e wɔ ŋkpa to saŋkikɛ na nɛ mo koŋwule nɛ e la kashenteŋ be Ebɔrɛ nɛ esa kikɛ maaŋ tiŋ n ta kenishi fuful n wu mo kikɛ na so mbaanaayɔ. Amɛn.

¹⁸ M pibi Timoti, mee ta asheŋ nɛ ŋ ŋini fo ere nna a bɔla mmalga nɛ anebiana na daŋ wu ŋ kaŋɛ fo asheŋ na so a bɔɔ fo enɔ. Baa ta amo a wɔtɔ fo kagbene to nsaa kɔ yirda nɛ nfɛra lela a ki fo akɔsɔ a kɔ yirda be kena lela na.

¹⁹ Basa ko bre kplaŋ le be akɔsɔ ere so nseŋ foe yirda be ekpa na so cheche.

²⁰ Loŋ be basa na be beko e la Haimɛneeyes nɛ Alɛkzaanda nɛ n ta m bɔɔ Setani enɔ nɛ b pin fanɛ k daga b ka lar kebaamalga a gbiti Ebɔrɛ to.