1 Kronikɛls 29 - EBƆRƐ BE KAWƆL

Ŋkɛ nɛ b ta m pɔr bɔrɛlambu na be asheŋ

¹ Kede be kaman nɛ ewura Deevid kaŋɛ basa na malɛ le: “M pibinyɛn Sɔlɔmɔn nɛ Ebɔrɛ lara fanɛ e pɔr bɔrɛlambu na ama mo alɛ kra la kebia nna, e maŋ naŋ pin asheŋ nɛnɛ. Bɔrɛlambu na malɛ be kushuŋ maŋ la alefasha, ŋkpal manɛ so k maŋ la edimɛdi peya, Enyɛnpe Ebɔrɛ be bɔrɛlambu nna.

² Amoso nɛ n wora ania n fin shuwa nɛ gbiti nɛ danyaŋ nɛ abɛlso nɛ ndibi nɛ yawu kpakpaso be ajembu be yiri yiri nɛ abitasɔ nɛ ajembu kpakpaso lela nɛ baa ta a pɔr na, nɛ e beeŋ ta m pɔr kumo na.

³ Ade kikɛ be kaman, n lara ŋ gbagba be gbiti nɛ shuwa n sa, nɛ loŋ bee ŋini kananɛ Ebɔrɛ be bɔrɛlambu ere be asheŋ tir ma.

⁴ Shuwa lela nɛ amo be egbɛ sa fanɛ kilo ŋgboŋ kalfa, nɛ gbiti nɛ amo alɛ be egbɛ sa fanɛ kilo ŋgboŋ alfa anyɔ nɛ adena nɛ n ta n sa fanɛ b ji bɔrɛlambu na be egbalana kebita,

⁵ nseŋ ta ako malɛ n sa basa nɛ b kɔ enɔ to be kushuŋ be kenyi nɛ b lɔŋɛ asɔ warabi. Naniere, wanɛ e naŋ bugi kagbene n sa kusɔ ko nɛ b ta m pɔr Enyɛnpe Ebɔrɛ be bɔrɛlambu na?”

⁶ Ewura Deevid ka malga n loge na, nɛ kanaŋ kanaŋ be bejuŋkparpoana nɛ eyiri to be benimuana nɛ benapo be benimuana nɛ ekrachi nimuso kikɛ bugi ŋgbene n sa asɔ.

⁷ B daŋ sa shuwa nɛ amo be egbɛ sa fanɛ kilo ŋgboŋ kalfa nɛ adushunu, nɛ gbiti nɛ amo be egbɛ sa fanɛ kilo ŋgboŋ alfa asa nɛ adena, nɛ danyaŋ nɛ amo be egbɛ sa fanɛ ŋgboŋ alfa ashe nɛ adunyɔ, nɛ abɛlso nɛ amo alɛ be egbɛ sa fanɛ kilo ŋgboŋto ŋgboŋto be ŋgboŋ asa nɛ ŋgboŋ alfa ana.

⁸ Ekama nɛ e daa kɔ yawu kpakpaso be ajembu daŋ ta amo nna n yɔ bɔrɛlambu na be amansherbi nɛ asɔ be ebu nɛ Jehiɛl nɛ e la Livai be esa nsaa shi Gɛshɔm be kabuna na bee keni so na to nna.

⁹ Ewura Deevid nɛ basa na kikɛ be ŋgbene daŋ fuli bumo ga nna nɛ b ji eyur ŋkpal ŋkɛ nɛ b daŋ bugi ŋgbene n sa Enyɛnpe Ebɔrɛ na so.

Ewura Deevid ka di Ebɔrɛ epaŋ be asheŋ

¹⁰ Ewura Deevid daŋ yili basa na kikɛ be anishito nna n di Enyɛnpe Ebɔrɛ epaŋ ŋ kaŋɛ le: “Enyɛnpe Ebɔrɛ nɛ fo la an nana Jeekɔb be Ebɔrɛ na, kapandi e baa la fo peya mbaanaayɔ!

¹¹ Fo kuwurgboŋ nɛ eleŋ nɛ kemaŋkura nɛ kuwurji wɔtɔ nna mbaanaayɔ. Fo e kɔ esoso nɛ kasawule so kikɛ be eleŋ nsaa ji kusɔ kama so kuwura.

¹² Fo e naa sa basa kedamaya nɛ eleŋ nɛ kemaŋkura. Fo gbagba be eleŋ nɛ yuku so nɛ fee ji kusɔ kama so kuwura.

¹³ Anyi be Ebɔrɛ, kechɔrɔ nɛ kapandi e baa la fo peya.

¹⁴ Ma nɛ ma basa maŋ kɔ ekpa nɛ an ji eyur ŋkpal ŋkɛ nɛ an sa fo ere so, ŋkpal manɛ so asɔ na kikɛ chɛr a la fo peya nna.

¹⁵ An la befɔ nna a wɔ durnya ere to fanɛ kananɛ an nananyɛnana gba daa wɔ kumo to na. Anyi be nchɛ du nna fanɛ kiyoyul na, k maa chɛr nsaa choŋ.

¹⁶ O Enyɛnpe Ebɔrɛ, asɔ damta nɛ an ta m ba nɛ an ba pɔr bɔrɛlambu m maŋkura fo ketre ere kikɛ la fo peya nna. Fo e wɔ amo nseŋ ta amo n sa anyi.

¹⁷ N nyi fo ka nyi ekama be kagbene. Ma nɛ ma basa nɛ b wɔ nfe ere kikɛ bugi ŋgbene kagbenefuliso nna m bar asɔ ere kikɛ m ba sa fo.

¹⁸ Enyɛnpe Ebɔrɛ nɛ fo la an nananyɛn Eebraham nɛ Aizek nɛ Jeekɔb be Ebɔrɛ na, shin nɛ fo basa e baa kɔ kakɛ be ŋgbene nsaa ji kashenteŋ a sa fo loŋ mbaanaayɔ.

¹⁹ Jande sa m pibinyɛn Sɔlɔmɔn kasonu be kagbene nseŋ shin nɛ e ta kenishipere m pɔr bɔrɛlambu nɛ n chala kumo be kepɔr be asɔ kikɛ ere.”

²⁰ Kede be kaman nɛ ewura Deevid kaŋɛ basa na kikɛ le: “Men di Enyɛnpe men nananyɛnana be Ebɔrɛ na epaŋ.” Ndoŋ nna nɛ basa na kikɛ di Ebɔrɛ epaŋ nseŋ jɔŋɛ ŋ kurgi bumo be amu n yuu to m bunyaŋ Enyɛnpe Ebɔrɛ nɛ ewura Deevid kikɛ.

²¹ Kumo be ŋklade, nɛ b mɔ asɔbɔya n lara esarga n sa Enyɛnpe Ebɔrɛ na. Kumo be kaman nɛ b mɔ egbolu kagboŋ nɛ ekpakpa kagboŋ nɛ ekpakpafɔlbi kagboŋ n chɔɔ n lara sarga bɔrɛsure na so n sa mo. B daŋ ta asɔnuuso gba n ti so n lara sarga na.

²² Kumo be kamɔnchɛ ekama be kagbene daŋ fuli mo ga nɛ b ji nseŋ nuu ashi Enyɛnpe Ebɔrɛ be anishito. Ndoŋ nɛ b lara Sɔlɔmɔn kelɛ nyɔsopo fanɛ ewura nseŋ yili Enyɛnpe Ebɔrɛ be ketre to n ta ŋku n do mo so n lara mo ŋ ki bumo be ewura nseŋ ta ŋku n do Zadɔk malɛ so n lara mo ŋ ki bumo be bɔrɛmatapo.

²³ Amoso Sɔlɔmɔn e daŋ sɔ mo tuto so n ji kuwura nɛ Enyɛnpe Ebɔrɛ yili n sa bumo na, nɛ asheŋ nite nɛnɛ nɛ Israɛl be efuli na so ebi kikɛ bee nu a sa mo.

²⁴ Benimuana nɛ benapo na nɛ ewura Deevid be mbinyɛnsobi na kikɛ daŋ nase kɔnɔ fanɛ baaŋ baa nu a sa mo fanɛ bumo be ewura.

²⁵ Enyɛnpe Ebɔrɛ daŋ maŋ Sɔlɔmɔn so nna nseŋ shin nɛ mbe kuwurji daa kɔ kemaŋkura a chɔ Israɛl be ewura kama peya; nɛ kumo be loŋ daŋ chinchiŋ efuli na so ebi kikɛ ga.

Ewura Deevid be lalaloge be asheŋ

²⁶ Jɛsi pibinyɛn Deevid nɛ e la Sɔlɔmɔn mo tuto na e daa la Israɛl kikɛ be ewura.

²⁷ Nfɛ adena nɛ e daŋ ji kuwura ashi Israɛl be efuli so kikɛ. E daŋ ji kuwura Hibrɔn be kade to nfɛ ashunu nna nseŋ ji kuwura nfɛ adesa nɛ asa malɛ Jerusalɛm be kade to.

²⁸ E daa la damawura nna nsaa kɔ kemaŋkura basa kutɔ, nseŋ bel pɔɛŋ n wu nɛ mo pibinyɛn Sɔlɔmɔn sɔ mo so n ji kuwura.

²⁹ Kusɔ kama nɛ Deevid wora saŋɛ so nɛ e daa la ewura na be asheŋ kikɛ daa wɔ anebi Samuɛl nɛ Neetan nɛ Gad be nwɔl to.

³⁰ Asheŋ nɛ b daŋ sibɛ n wɔtɔ nwɔl na to daa ŋini kananɛ e daŋ ji kuwura, nɛ kananɛ e ji eleŋ, nɛ asheŋ nɛ a tu mo nɛ Israɛl be efuli, nɛ efuliana nɛ a kulti kumo na kikɛ.