1 Kronikɛls 21 - EBƆRƐ BE KAWƆL

Ewura Deevid ka karga mbe basa be asheŋ

¹ Setani daa sha kebar tɔrɔ Israɛl be basa so nna, amoso e daŋ sa ewura Deevid nfɛra nna fanɛ e karga basa na.

² Ndoŋ nna nɛ ewura Deevid kaŋɛ Jɔab nɛ benimuana na le: “Meeŋ ya yili Dan be kade to ashi efuli na so be kelargato be esoso ŋ karga Israɛlebi na kikɛ n ya fo Bɛshiba ashi kelargato be kaseto. Saŋɛ na so meeŋ pin bumo nɛ b fo kena to be keyɔ be kɔnɔ.”

³ Nɛ Jɔab kaŋɛ ewura Deevid le: “Yiramu, hale nɛ Enyɛnpe fo Ebɔrɛ na shin nɛ Israɛl be benapo wora kishi n ti so fanɛ ntuŋ kalfa a chɔ kananɛ b du naniere gba bumo kikɛ kra la fo nyɛrbi nna. Manɛ e ba nɛ fee sha fanɛ fo wora le be kesheŋ nɛ k maŋ shi Ebɔrɛ kutɔ ere n shin nɛ nfɛra lubi ere e ba efuli ere so?”

⁴ Ama ewura Deevid kini kechɛrga mbe nfɛra nseŋ shin nɛ Jɔab nu n sa mo nseŋ ya karga Israɛl be benapo na nseŋ bɛta m ba Jerusalɛm,

⁵ m ba kaŋɛ ewura Deevid fanɛ benapo nɛ b fo kena be kekɔ ashi Israɛl be efuli so wɔ ŋgboŋto ŋgboŋto be kagboŋ koŋwule nɛ ŋgboŋ kalfa, nɛ Juda malɛ be benapo la ŋgboŋ alfa ana nɛ adushunu.

⁶ Ŋkpal ewura na be kusɔ nɛ e kaŋɛ na ka daŋ maŋ par Jɔab so, e daa maŋ karga Livai nɛ Bɛnjamin bre be eyiri na.

⁷ Ŋkpal ewura Deevid ka shin nɛ b karga benapo na so Ebɔrɛ daŋ nya agbo nna nseŋ gberge Israɛlebi kusoe.

⁸ Ndoŋ nna nɛ ewura Deevid kaŋɛ Enyɛnpe Ebɔrɛ le: “Kusɔ nɛ n wora ere bee ŋini nna fanɛ n wora kulubi gboŋgboŋi. Amoso jande, ta m paŋ ma ŋkpal manɛ so n wora kawulisheŋ.”

⁹ Ndoŋ nna nɛ Enyɛnpe Ebɔrɛ kaŋɛ anebi Gad le:

¹⁰ “Ya kaŋɛ Deevid fanɛ e lara asɔ asa nɛ mee sa mo ere to be kumo nɛ e bee sha fanɛ n ta ŋ gberge mo kusoe.”

¹¹ Ndoŋ nna nɛ anebi Gad yɔ ewura Deevid kutɔ n ya kaŋɛ mo kusɔ nɛ Enyɛnpe Ebɔrɛ kaŋɛ na. E yɛ: “Asɔ asa ere to be kumo nɛ feeŋ ba sha?

¹² Akoŋgboŋ be ketɔr fo kasawule so nfɛ asa ŋko fo keshile fo doŋana afɔl asa ŋko kulɔ be aleblawu ko be keba fo kasawule so m ba mɔ basa nchɛnsa? Fɛ kumo be asheŋ nseŋ kaŋɛ ma kusɔ nɛ fee sha fanɛ ŋ kaŋɛ Enyɛnpe Ebɔrɛ.”

¹³ Ndoŋ nna nɛ ewura Deevid kaŋɛ Gad le: “N wɔ kagbenejija be kebaawɔtɔ to nna ama maa sha dimɛdi ka gberge ma kusoe. Ŋkpal Enyɛnpe Ebɔrɛ ka bee wu kuwɔr so, mo gbagba e gberge ma kusoe.”

¹⁴ Amoso Enyɛnpe Ebɔrɛ daŋ shin nna nɛ kulɔ be aleblawu ba Israɛlebi so nɛ bumo be basa ŋgboŋ adushunu kikɛ wu.

¹⁵ Enyɛnpe Ebɔrɛ ka shuŋi malaika fanɛ e ya mur Jerusalɛm na, nɛ kuwɔr naŋ pɛ mo nɛ e chɛrga mbe nfɛra a yɔ basa na be kasogberge be kaplɛa so nseŋ kaŋɛ malaika nɛ e bee mɔ bumo na le: “K nyalɛ loŋ, Lara fo enɔ ashi bumo be asheŋ to!” Kumo be jemanɛ na nɛ Malaika na teŋ fo Aruna nɛ e shi Jerusalɛm na be kugooro na ase.

¹⁶ Deevid ka wu malaika na ka wɔ esoso ŋ keta mbe tokobi nɛ e mur Jerusalɛm na, nɛ mo nɛ Israɛl be bejuŋkparpoana nɛ b buu kagbenejijaso be asɔbuuso na tɔr epun so n dese kasawule.

¹⁷ Nɛ Deevid kule Enyɛnpe Ebɔrɛ ŋ kaŋɛ le: “Ma e wora n jija nseŋ wora kulubi ŋkpal ŋ ka shin nɛ baa karga basa na so. Nɛ manɛ nɛ bebɔlpo ere malɛ wora? N nyɛnpe nɛ ma Ebɔrɛ. Ma nɛ ma kanaŋ e daga fo ka gberge kusoe nseŋ yige basa ere bre.”

¹⁸ Nɛ Enyɛnpe Ebɔrɛ be malaika na kaŋɛ Gad fanɛ e ya kaŋɛ ewura Deevid le: “Yɔ Aruna be kugooro nɛ baa bri asɔ na so n ya pɔr bɔrɛsure n sa Enyɛnpe Ebɔrɛ na.”

¹⁹ Ndoŋ nna nɛ ewura Deevid wora kusɔ nɛ Enyɛnpe Ebɔrɛ bɔla anebi Gad so ŋ kaŋɛ mo na.

²⁰ Aruna nɛ mbe mbinyɛnsobi ana ka wɔ kugooro na so a bri ayu nseŋ wu malaika na, nɛ mbe mbinyɛnsobi na shile n ya ŋana.

²¹ Aruna ka wu ewura Deevid ka bee ba mo kutɔ na, nɛ e lar kugooro na so n ya gbir kasawule Deevid be anishito ŋ kur mbe kumu n yuu to.

²² Ndoŋ nna nɛ ewura Deevid kaŋɛ mo le: “M ba nna nɛ m ba tɔ fo kugooro ere m pɔr bɔrɛsure n sa Enyɛnpe Ebɔrɛ, saŋɛ na so e beeŋ ju aleblawu ere ashi anyi so. Meeŋ tɔ kumo kanaŋkama nɛ feeŋ fa kumo.”

²³ Nɛ Aruna kaŋɛ le: “Yiramu! Ta kumo n wora kusɔ kama nɛ kepar fo n sa Enyɛnpe Ebɔrɛ na. Ana gba nde! Feeŋ tiŋ n ta amo n lara sarga bɔrɛsure na so nseŋ ta ndibi nɛ b kɔ a bri ayu na malɛ m puga edɛ nseŋ ta ayu malɛ n lara ajibi be sarga. Amo kikɛ la feya nna.”

²⁴ Nɛ ewura Deevid malɛ kaŋɛ mo le: “M-m, meeŋ ka amo be kukɔ n sa fo ŋkpal manɛ so m maa sha k lara sarga nɛ m maŋ bɔ kukɔ kumo so n sa Enyɛnpe Ebɔrɛ.”

²⁵ Kede be kaman nɛ e tɔ kugooro na Aruna kutɔ shuwa be ndarbi alfa ashe.

²⁶ E daŋ pɔr bɔrɛsure ndoŋ nna n sa Enyɛnpe Ebɔrɛ nseŋ lara esarga chɔɔso nɛ kɔnɔkoŋwuleso be esarga, nɛ Enyɛnpe Ebɔrɛ shin nɛ edɛ shi esoso m ba chɔɔ sarga na ashi bɔrɛsure na so.

²⁷ Ndoŋ nna nɛ Enyɛnpe Ebɔrɛ kaŋɛ malaika na fanɛ e ta mbe tokobi na n wɔtɔ kumo be efar to, nɛ e wora loŋ.

²⁸ Ewura Deevid ka wu malaika na ka wora loŋ a ŋini fanɛ Enyɛnpe Ebɔrɛ nu mbe kekule na, nɛ e naŋ lara esarga n ti so n sa Enyɛnpe na ashi Aruna be kugooro na so.

²⁹ Enyɛnpe Ebɔrɛ be wajɛbu nɛ Mosis daŋ yuu ashi kiyi na to nɛ bɔrɛsure nɛ e pɔr nɛ b daa lara sarga chɔɔso kumo so na kikɛ daa wɔ kakpa nɛ baa bunyaŋ Enyɛnpe Ebɔrɛ loŋ be saŋɛ na ashi Gibiɔn na nna;

³⁰ ama ewura Deevid bre daa maŋ tiŋ n yɔ ndoŋ n ya bunyaŋ Ebɔrɛ ŋkpal e ka daa ŋana Enyɛnpe Ebɔrɛ be malaika na be tokobi na so.