1 Kronikɛls 19 - EBƆRƐ BE KAWƆL

Ewura Deevid ka kɔ m pɔɔ Ammɔnebi nɛ Siriyaebi so be asheŋ

¹ K maŋ chɛr ko nɛ Ammɔn be ewura Nahaash wu, nɛ mo pibinyɛn Hanuun ki ewura.

² Ndoŋ nna nɛ ewura Deevid fɛ le: “A daga ŋ ka bugi kagbene n wora Hanuun kelela, fanɛ kananɛ, mo tuto Nahaash gba daŋ bugi mbe kagbene n wora ma kelela na.” Amoso Deevid daŋ shuŋi mbɔ nna fanɛ b ya wora Hanuun edaŋkena. B ka ya fo Ammɔn be kasawule so,

³ nɛ Ammɔn be bewurbi na kaŋɛ ewura na le: “Fee fɛ fanɛ fo tuto be bunyaŋ so nɛ ewura Deevid shuŋi basa ere fanɛ b ba wora fo edaŋkena ere a? Manɛ loŋ so nna! E shuŋi bumo nna nɛ b ba dara anyi be efuli ere saŋɛ na so e beeŋ ba kɔ m pɔɔ anyi so!”

⁴ Ndoŋ nna nɛ Hanuun shin nɛ b pɛ Deevid be mbɔ na n she bumo be ntɔl nseŋ ku bumo be epiŋi be aya ase n ya fo bumo be nshɛr to nseŋ yige bumo nɛ b choŋ.

⁵ Nɛ mbɔ na fin kananɛ baaŋ naŋ bɛta n yɔ epe ŋ gben ŋkpal anishinyɔr so. Ewura Deevid ka nu kusɔ nɛ k wora na nɛ e shuŋi n ya kaŋɛ mbɔ na fanɛ b ya kaa wɔ Jɛriko n ya fo jemanɛ nɛ bumo be ntɔl na beeŋ kɔr pɔɛŋ nɛ b ba epe.

⁶ Ewura Hanun nɛ Ammɔnebi na malɛ ka pin fanɛ ewura Deevid ki bumo doŋ, nɛ b ta gbiti be ndarbi nɛ amo be egbɛ sa fanɛ kilo ŋgboŋ adesa nɛ ana n ya haya egbaŋɛturko nɛ egbaŋɛturko be bediipoana ashi Mɛsopoteemia be efuli so nɛ Maaka nɛ Zoba nɛ a la Siriyaebi be efuli na.

⁷ Egbaŋɛturko nɛ amo be bediipo ŋgboŋ adesa nɛ anyɔ nɛ b daŋ haya na, nɛ Maaka be ewura be benapo e daŋ ba wora bumo be keyi to m mata Mɛdiba. Nɛ Ammɔn be benapo na malɛ lar bumo be nde to n ya bela ase nɛ b kɔ kena.

⁸ Ewura Deevid ka nu kusɔ nɛ k bee wora na, nɛ e shuŋi Jɔab nɛ mbe benapo kikɛ nɛ b ya tu bumo.

⁹ Nɛ Ammɔn be benapo kre kena n yili bumo be kade Raba be kabunagboŋ na ekpa nɛ Siriya be benapoana na malɛ kre n yili kade na be laŋgar.

¹⁰ Jɔab ka wu fanɛ mo doŋana na wɔ mbe anishito nɛ kaman kikɛ na, nɛ e lara Israɛl be benapo lempo na fanɛ b ya kɔ Siriyaebi na,

¹¹ nseŋ shin mo sipo Abishai malɛ juŋkpar benapo nɛ b ka na n ya kaa kɔ Ammɔnebi na.

¹² Le nɛ Jɔab kaŋɛ Abishai: “Fo baŋ wu fanɛ Siriyaebi na bee pɔɔ ma so, fo wora ania m ba chɛ ma to, nɛ Ammɔnebi na kaa pɔɔ fo alɛ so, ma alɛ beeŋ ba chɛ fo to.

¹³ Baa kɔ eleŋ nsaa leŋ fo kumo to kpakpa! Men shin nɛ an pere kenishi ŋ kɔ n sa anyi be basa nɛ Ebɔrɛ be nde, nɛ Enyɛnpe Ebɔrɛ be aparsheŋ e wora.”

¹⁴ Ndoŋ nna nɛ Jɔab nɛ mbe benapo yɔ nɛ b ya kɔ Siriyaebi na kena, nɛ b shile.

¹⁵ Ammɔnebi na ka wu fanɛ Siriyaebi na bee shile, nɛ bumo alɛ gba lara keya fuful Abishai nɛ mbe benapo be anishito n shile n luri kade to. Ndoŋ nna nɛ Jɔab bɛta n yɔ Jerusalɛm.

¹⁶ Siriyaebi na ka wu fanɛ Israɛlebi na pɔɔ bumo so na nɛ b shuŋi n tre Siriyaebi nɛ b wɔ lɔrgboŋ nɛ baa tre Yufreetes na be kaba ndoŋ na. Shobak nɛ e bee juŋkpar Zoba be ewura Hadadeza be benapo na e daa la bumo be ejuŋkparpo.

¹⁷ Ewura Deevid ka nu loŋ nɛ e shin nɛ Israɛl be benapo na kikɛ chala abar so n dii Jɔɔdan be Lɔr na, n ya tu Siriyaebi na. Kena na ka fara na,

¹⁸ nɛ Israɛlebi na ju m buu Siriyaebi be benapo na so nɛ ewura Deevid nɛ mbe benapo mɔ Siriyaebi na be egbaŋɛturkodiipo ŋgboŋ ashunu nɛ benapo nɛ b na ayaso malɛ ŋgboŋ adena. B daŋ mɔ Shobak nɛ e la Siriyaebi be benapo be enimu na gba kena na to nna.

¹⁹ Bewura mo nɛ b daa bɛ ewura Hadadeza so na ka pin fanɛ Israɛlebi na pɔɔ bumo so nɛ b fara a fin kagbenewushi ewura Deevid kutɔ, hale n shin nɛ e ki bumo be ewura. Kumo be kaman nɛ Siriyaebi na kini fanɛ b maaŋ naŋ chɛ Ammɔnebi na to kikɛ.