1 Kronikɛls 17 - EBƆRƐ BE KAWƆL

Neetan ka ta kubɔya m ba sa ewura Deevid be asheŋ

¹ Ewura Deevid ka ya kaa wɔ mbe kuwura laŋ popɔr na to nɛ e tre anebi Neetan ŋ kaŋɛ mo le: “Keni! Ndibi nɛ baa tre sida na nɛ b ta m pɔr ewura be laŋ nɛ n wɔtɔ ere, ama Enyɛnpe Ebɔrɛ be ŋkre be deka na bre wɔ wajɛbu to nna!”

² Nɛ Neetan shuli so ŋ kaŋɛ le: “Wora kusɔ kama nɛ fee fɛ fanɛ feeŋ wora, ŋkpal manɛ so Enyɛnpe Ebɔrɛ na wɔ fo kutɔ.”

³ Kumo be kanyɛso, nɛ Enyɛnpe Ebɔrɛ kaŋɛ Neetan le:

⁴ “Ya kaŋɛ ma kayɛrbi Deevid fanɛ ma Enyɛnpe Ebɔrɛ e naa kaŋɛ mo na fanɛ mannɛ mo nɛ mee sha fanɛ e pɔr bɔrɛlambu n sa ma nɛ m baa wɔtɔ.

⁵ Yili jemanɛ so nɛ n lara Israɛlebi ashi Ijipt be efuli so dra dra na m ba fo kabre, m maŋ naŋ chena bɔrɛlambu to kikɛ. Kaplɛkama nɛ n yɔ malɛ, wajɛbu to nɛ mee luri.

⁶ Enite damta nɛ ma nɛ Israɛlebi nite ere kikɛ, m maŋ naŋ bishi bumo be bejuŋkparpo nɛ n tre fanɛ b baa keni ma basa so fanɛ kananɛ mbolpɔkpapo bee keni mbe mbolpɔ so na be ekama kusɔ nɛ k ba nɛ b maŋ ta ndibi nɛ baa tre sida na m pɔr bɔrɛlambu n sa ma.”

⁷ Amoso ya kaŋɛ ma kayɛrbi Deevid fanɛ le nɛ ma Enyɛnpetale na kaŋɛ: “N lara fo ashi mbolpɔkpapo be kushuŋ to nna n ta fo ŋ ki ma basa Israɛlebi na be ejuŋkparpo.

⁸ Kaplɛkama nɛ fo daŋ yɔ, ma nɛ fo nna. Nɛ ma alɛ bee pɔɔ fo doŋana kikɛ so a sa fo. Kananɛ basa ko be atre dii ga durnya ere to na, loŋ gbagba nɛ meeŋ shin nɛ fo alɛ gba be ketre e dii.

^9-10 N sa ma basa Israɛlebi bumo gbagba be kakpa nɛ baaŋ chena nɛ basa lubi maaŋ naŋ mɛaŋ bumo. Baŋ yili saŋɛ nɛ b ba chena kasawule ere so nɛ saŋɛ nɛ n sa bumo bejuŋkparpo na kikɛ, basa lubi maŋ yige bumo, ama loŋ maaŋ naŋ wora kikɛ. Ŋkpal manɛ so, meeŋ pɔɔ fo doŋana so n sa fo nseŋ shin nɛ fo kaman to ebi e baa ji kuwura.

¹¹ Fo kaŋ wu nɛ b ta fo n ya nase fo nananyɛnana be edesekpa, meeŋ shin nɛ fo mbinyɛnsobi ere be eko e ki ewura, nɛ n shin nɛ mbe kuwurji malɛ e baa kɔ eleŋ ga.

¹² Mo e naŋ pɔr ma bɔrɛlambu n sa ma. Ma alɛ beeŋ shin nɛ mbe kuwurji e baa wɔtɔ mbaanaayɔ.

¹³ Meeŋ ki mo tuto, nɛ mo alɛ e baa la m pibinyɛn. M maaŋ yige kebaachɛ mo to fanɛ kananɛ n yige Ewura Sɔɔl mo nɛ n lara kuwurji to nseŋ ta fo n yuu to na.

¹⁴ Meeŋ ta mo ŋ ki ma basa be ejuŋkparpo nɛ e baa keni ma efuli kikɛ so. Mbe mbia e naŋ ba ji kuwura a ka a sa abar so mbaanaayɔ.”

¹⁵ Kusɔ nɛ Ebɔrɛ daŋ kaŋɛ Neetan na gbagba chap nɛ e kaŋɛ ewura Deevid.

Ewura Deevid be kabɔrɛchɔrɔ be asheŋ

¹⁶ Ndoŋ nna nɛ Ewura Deevid ya luri Enyɛnpe Ebɔrɛ be wajɛbu na to n ya chena ŋ kule Ebɔrɛ ŋ kaŋɛ le: “Ma nɛ ma kanaŋ maŋ daga kenya kusɔ nɛ fo wora n sa anyi ere.

¹⁷ Kede be kaman, fo kraŋ nase kɔnɔ n sa ma kaman to ebi. Enyɛnpe Ebɔrɛ, fee keni ma a bɔlɔ kenishi fanɛ esagboŋ ko nna.

¹⁸ Manɛ nɛ n naa kɔ nɛ ŋ kaŋɛ? Fo nyi ma, fo kenya nɛnɛ. Ama fo kraŋ ta ma n yili kemaŋkura be eyilikpa.

¹⁹ Fo keparso nɛ fo wora asheŋ ere n sa ma nseŋ nase le be nnɔgboŋ ere n sa ma.

²⁰ Ebɔrɛ kikɛ maŋ naa wɔtɔ fanɛ fo Enyɛnpe na. Fo nawule nɛ an nyi fo ka la Ebɔrɛ.

²¹ Efuli kikɛ maŋ naa wɔ kasawule ere so fanɛ Israɛl be efuli nɛ fo lara ashi kenyaya to nseŋ shin nɛ b ki fo basa na. Mamachi be asɔ damta nɛ fo wora n sa bumo na e shin nɛ fo ketre dii durnya ere to. Fo mɔlga fo basa ashi Ijipt be kasawule so, m bar bumo nfe nseŋ ju efuli ere so ebi n shin nɛ fo basa chena bumo be nsawule so.

²² Dra dra na kikɛ nɛ fo ta Israɛlebi ŋ ki fo gbagba be basa mbaanaayɔ, nseŋ ki bumo be Ebɔrɛ.

²³ N nyɛnpe nɛ ma Ebɔrɛ shin nɛ kusɔ nɛ fo nase n sa ma nɛ ma kaman to ebi na e bɔlɔ so. Enyɛnpe, jande wora kusɔ nɛ fo kaŋɛ na.

²⁴ Saŋɛ na so fo ketre beeŋ dii nɛ ekama e baa kaŋɛ le: ‘Enyɛnpetale na e la Israɛl be Ebɔrɛ.’ Feeŋ yili ma kuwurji mbaanaayɔ.

²⁵ Ŋkpal fo ka la ma Ebɔrɛ nseŋ nase kɔnɔ fanɛ ma kaman to ebi beeŋ baa la bewura na so nɛ fo kayɛrbi maa pɔ aba nɛ kebaakule fo na.

²⁶ Enyɛnpe, fo e la Ebɔrɛ nseŋ nase le be kɔnɔ fanɛ feeŋ wora asɔ lela ere n sa ma.

²⁷ Enyɛnpetale nɛfa ma kaman to ebi, saŋɛ na so feeŋ baa lara fo bewura bumo to saŋkama. Fo Enyɛnpe Ebɔrɛ na e nase kɔnɔ fanɛ fo nɛfa beeŋ baa wɔ ma kaman to ebi so hale mbaanaayɔ.”