1 Kronikɛls 16 - EBƆRƐ BE KAWƆL

¹ B daŋ ta ŋkre be deka na nna n ya yili wajɛbu nɛ Deevid yuu ŋkpal kumo so na to, nseŋ lara esarga chɔɔso nɛ kɔnɔkoŋwuleso be esarga n sa Ebɔrɛ.

² Ewura Deevid ka lara esarga chɔɔso na n loge nɛ e nɛfa basa na ashi Enyɛnpe Ebɔrɛ be ketre to,

³ nseŋ sa bumo kikɛ ajibi. E daŋ sa Israɛl be eche nɛ enyɛn kikɛ bodobodo lelemu nɛ eblaŋ tɔso nɛ greep be asɔrso wɔlso nna.

⁴ Deevid daŋ lara Livaiebi na be beko nna fanɛ b baa shuŋ Enyɛnpe Israɛl be Ebɔrɛ na be kushuŋ nsaa boŋ nshɛ a maŋkura mo ashi ŋkre be deka na ase.

⁵ Asaf e daa la bumo be ejuŋkparpo nɛ Zakareya bɛso. Jeɛl nɛ Shemiramɔf nɛ Jehiɛl nɛ Matitiya nɛ Eliab nɛ Benaya nɛ Obɛd Edɔm nɛ Jeɛl e daa laŋ ejaŋjilaŋ. Asaf malɛ e daa laŋ echakachaka

⁶ nɛ Bɛnaya nɛ Jahaziɛl nɛ b la bɔrɛmatapoana na malɛ daa foŋ mbel ashi ŋkre be deka na be anishito saŋkama.

⁷ Kumo be jemanɛ nɛ ewura Deevid ta nshɛ be keboŋ n di Enyɛnpe Ebɔrɛ epaŋ be kushuŋ n sa Asaf nɛ mo braana Livaiebi na.

Kapandi be kashɛ

⁸ Men ta kechɔrɔ n sa Enyɛnpe Ebɔrɛ nsaa maŋ mbe ketregboŋ na so, men kaŋɛ basa mbe asheŋ woraso ŋ ŋini ekama.

⁹ Men boŋ kapandi be nshɛ m maŋkura Enyɛnpe Ebɔrɛ; nseŋ kaŋɛ mbe mamachi be asheŋ woraso be asheŋ.

¹⁰ Men shin nɛ men be ŋgbene e baa fuli menyi ŋkpal anyi ka la mo peya so; nɛ bekama nɛ baa bunyaŋ mo na malɛ be ŋgbene e fuli bumo!

¹¹ Men ta men be yirda n deŋi Enyɛnpe Ebɔrɛ na so, nsaa bunyaŋ mo saŋkikɛ.

^12-13 Menyi Jeekɔb be kaman to ebi nɛ Ebɔrɛ be anya nɛ menyi Israɛl be kaman to ebi nɛ Ebɔrɛ lara na, men baa nyiŋi Ebɔrɛ be emamachisheŋ nɛ kananɛ e bee ji asheŋ nɛ amo be ekpa so be asheŋ.

¹⁴ Enyɛnpe na e la anyi be Ebɔrɛ; nɛ mbe mbra wɔtɔ n sa durnya kikɛ.

¹⁵ Men sa maŋ kaŋ teŋ Ebɔrɛ be ŋkre nɛ e kre mbaanaayɔ na kikɛ so,

¹⁶ loŋ be ŋkre na nɛ mo nɛ Eebraham kre, nɛ e nase kumo be kɔnɔ n sa Aizek malɛ na.

¹⁷ Enyɛnpe Ebɔrɛ na nɛ Jeekɔb gba daŋ kre ŋkre nɛ k beeŋ baa wɔtɔ mbaanaayɔ.

¹⁸ E yɛ: “Meeŋ ta Keenan be kasawule na n sa menyi, nɛ k baa la menyi be kapetɛ.”

¹⁹ Kumo be jemanɛ na nɛ Ebɔrɛ be basa daa maŋ shi, nseŋ daa la befɔ ashi Keenan be kasawule so.

²⁰ B daŋ baa wɔtɔ nna a kilgi to efuliana nɛ nsawuleana so.

²¹ Ama Ebɔrɛ daa maŋ shuli nɛ ekama mɛaŋ bumo. E daŋ kpele ndoŋ be bewura kusoe nna saŋɛ na so b maaŋ wora bumo shɛŋ,

²² nseŋ kaŋɛ bumo le: “Men sa maŋ kaŋ tɔrɔ ma basa laraso, ŋko n tɔrɔ ma anebiana.”

²³ Ekama nɛ e wɔ durnya ere to e boŋ kashɛ n sa Enyɛnpe Ebɔrɛ na! Men baa malga kananɛ e mɔlga menyi na be asheŋ karechɛ kikɛ.

²⁴ Men malga kananɛ Ebɔrɛ be kemaŋkura du n sa efuliana kikɛ, nseŋ malga mbe asheŋgboŋ nɛ e bee wora ŋ ŋini basa kikɛ.

²⁵ Enyɛnpe Ebɔrɛ kɔ eleŋ nseŋ daga kemaŋkura. Mo e daga bunyaŋ a chɔ agbir.

²⁶ Agbir nɛ efuli pɔtɛana bre be basa bee shuŋ, ama Enyɛnpe Ebɔrɛ e to esoso nɛ kasawule.

²⁷ Kemaŋkura nɛ kuwurji daga mo nna, nɛ eleŋ nɛ kagbenefuli kikɛ bɔlɔ mbe bɔrɛlambu to.

²⁸ Ekama nɛ e wɔ durnya ere to e di Enyɛnpe Ebɔrɛ epaŋ, men ta mbe kemaŋkura nɛ mbe eleŋ n sa mo.

²⁹ Enyɛnpe be ketre daga bunyaŋ, amoso men shin nɛ an maŋkura mo. Men ta men be sarga m ba mbe lambu to. Enyɛnpe cheembi na kaŋ lar a ba, a daga fanɛ men bunyaŋ mo.

³⁰ Esa kama nɛ e wɔ durnya ere to beeŋ chicha ashi mbe anishito! Durnya na yil kiŋkiŋ nna nsaa maa gbuŋgbuŋ.

³¹ Esoso nɛ kasawule so ebi, men shin nɛ men be ŋgbene e baa fuli! Men kaŋɛ efuliana na fanɛ Enyɛnpe Ebɔrɛ na e la ewura.

³² Teku nɛ kusɔ kama nɛ k wɔ kumo to e baa cha awɔr; Ndɔana nɛ asɔ kama nɛ a wɔ amo to, men baa kɔ kagbenefuli!

³³ Ndibi nɛ a wɔ kupo to beeŋ baa boŋ nshɛ kagbenefuli ŋkpal manɛ so Enyɛnpe na bee ba nɛ e ba ji durnya be basa demu.

³⁴ Men ta kechɔrɔ n sa Enyɛnpe Ebɔrɛ ŋkpal manɛ so, e walɛ, nɛ mbe kasha malɛ wɔtɔ mbaanaayɔ.

³⁵ Men kaŋɛ mo le: “Anyi be Ebɔrɛ nɛ anyi be emɔlgapo, mɔlga anyi. Gbegbar anyi abar so nseŋ mɔlga anyi ashi efuli pɔtɛ ana be enɔ to, saŋɛ na so anyeeŋ ta kechɔrɔ n sa fo, nseŋ di fo ketre cheembi ere epaŋ.”

³⁶ Men di Enyɛnpe Israɛl be Ebɔrɛ na epaŋ! Men di mo epaŋ naniere hale mbaanaayɔ! Ndoŋ nna nɛ basa na kikɛ shuli so ŋ kaŋɛ le: “Amɛn” Nseŋ di Enyɛnpe Ebɔrɛ epaŋ.

B ka bee shuŋ Enyɛnpe Ebɔrɛ ashi Jerusalɛm nɛ Gibiɔn be asheŋ

³⁷ Ewura Deevid daŋ lara Asaf nɛ Livaiebi nɛ b la kabuna koŋwule ebi na nna fanɛ b baa keni kakpa nɛ ŋkre be deka na yil na be kushuŋ so karechɛ kikɛ.

³⁸ Jedutum pibinyɛn Obɛd Edɔm nɛ mbe kabuna be basa adeshe nɛ aburwa e daa chɛ bumo to. Hosa nɛ Obɛd Edɔm e daa keni mbuna na so.

³⁹ Bɔrɛmatapowura Zadɔk nɛ mo braana bɔrɛmatapoana e daa keni Enyɛnpe Ebɔrɛ be wajɛbu na so ashi Gibiɔn.

⁴⁰ Kachipurso nɛ kaaseso kikɛ b daa lara sarga chɔɔso nna a deŋi bɔrɛsure na so fanɛ kananɛ Enyɛnpe Ebɔrɛ kaŋɛ Israɛlebi na mbe mbra to na gbagba.

⁴¹ Heman nɛ Jedutum e daa la bumo be bechɛtopo, n ta bumo nɛ b daŋ lara fanɛ b baa boŋ nshɛ a maŋkura Enyɛnpe Ebɔrɛ ŋkpal mbe kasha ka maŋ kɔ ekarso na n ti so.

⁴² Heman nɛ Jedutum malɛ gba e daŋ naa foŋ mbel nsaa laŋ echakachaka nɛ alaŋsɔ nɛ baa laŋ nsaa boŋ nshɛ a di Ebɔrɛ epaŋ jemanɛ kikɛ. Basa nɛ b shi Jedutum be kabuna na e daa keni bumo be mbunaana so.

⁴³ Ndoŋ nna nɛ ekama yɔ epe nɛ Deevid malɛ yɔ mbe kanaŋ kutɔ.