1 Kronikɛls 15 - EBƆRƐ BE KAWƆL

B ka ta ŋkre be deka na m ba Jerusalɛm to be asheŋ

¹ Ewura Deevid daŋ pɔr nwu damta nna ashi Jerusalɛm nseŋ shin nɛ b yuu wajɛbu nɛ b ta ŋkre be deka na bre n yili ndoŋ.

² Kumo be kaman nɛ Deevid kaŋɛ le: “Livaiebi na nawule a daga fanɛ b baa sulɔ ŋkre be deka na ŋkpal manɛ so bumo nɛ Enyɛnpe Ebɔrɛ lara fanɛ b baa sulɔ kumo nsaa shuŋ mo mbaanaayɔ.”

³ Kumo be kaman nɛ Deevid tre Israɛlebi na kikɛ m ba Jerusalɛm, nɛ b ya ta ŋkre be deka na m ba wajɛbu nɛ e yuu ŋkpal kumo so na to.

⁴ Kede be kaman nɛ e tre Ɛɛrɔn malɛ be kaman to ebi nɛ Livaiebi na.

⁵ E daŋ tre Kohaf be kabuna nɛ b shi Livai be yiri to na be ejuŋkparpo nɛ baa tre Yuriɛl nɛ e bee juŋkpar mbe kabuna be basa kalfa nɛ adunyɔ na,

⁶ nɛ Asaya nɛ e bee juŋkpar basa alfa anyɔ nɛ adunyɔ ashi Mɛrari be kabuna na,

⁷ nɛ Jowɛl nɛ e bee juŋkpar basa kalfa nɛ adesa ashi Gɛshɔn be kabuna na,

⁸ nɛ Shamaya nɛ e bee juŋkpar basa alfa anyɔ ashi Elizafan be kabuna na

⁹ Eliɛl nɛ e daa juŋkpar basa aduburwa ashi Hibrɔn be kabuna na,

¹⁰ nɛ Aminadab nɛ mo alɛ daa juŋkpar basa kalfa nɛ kuduanyɔ ashi Uziɛl be kabuna na.

¹¹ Ewura Deevid daŋ shuŋi n tre Zadɔk nɛ Abiata nɛ b la bɔrɛmatapoana nɛ Livai be basa ashe nna. Bumo e la Yuriɛl nɛ Asaya nɛ Jowɛl nɛ Shemaya nɛ Eliɛl nɛ Aminadab.

¹² Le nɛ e daŋ kaŋɛ Livaiebi na: “Menyi e la Livaiebi na be kabuna be bejuŋkparpoana. Amoso menyi nɛ men braana Livaiebi na e lara alubi ashi menyi be ŋgbene to nseŋ ki cheembi, saŋɛ na so menyeeŋ tiŋ n ta Enyɛnpe Israɛl be Ebɔrɛ na be ŋkre be deka na n yɔ kakpa nɛ n lɔŋɛ fanɛ b ta kumo m ba yili na.

¹³ Ŋkpal men ka daa maŋ wɔtɔ nɛ men sulɔ kumo sososo na so, Enyɛnpe Ebɔrɛ daŋ gberge anyi kusoe nna ŋkpal anyi ka daa maŋ wora kusɔ nɛ k daga so.”

¹⁴ Ndoŋ nna nɛ bɔrɛmatapoana nɛ Livaiebi na lara alubi bumo be ŋgbene to nseŋ ki cheembi, saŋɛ na so baaŋ tiŋ n sulɔ Enyɛnpe Israɛl be Ebɔrɛ na be ŋkre be deka na.

¹⁵ Livaiebi na daa ta ndibi tentembi nna a wɔtɔ kumo to a maŋ so a deŋi bumo be abatimu so a sulɔ fanɛ kananɛ Enyɛnpe Ebɔrɛ baaŋ kaŋɛ Mosis na gbagba.

¹⁶ Ewura Deevid daŋ kaŋɛ Livaiebi be bejuŋkparpo na kenishipereso nna fanɛ b lara Livaiebi na be beko nɛ b baa boŋ nshɛ nsaa laŋ ejaŋjilaŋ nɛ echakachaka kagbenefuliso

^17-21 Beshɛbompo nɛ b daa laŋ danyaŋ be echakachaka e daa la Jowɛl pibinyɛn Heman, nɛ mo kurgepo Asaf nɛ e la Berekia pibinyɛn na, nɛ Kushiya pibinyɛn Etan nɛ e shi Mɛrari be kabuna na. Basa nɛ b daa chɛ bumo to a laŋ ejaŋjilaŋ wurbi e daa la Zakareya nɛ Jaziɛl nɛ Shemiramɔf nɛ Jehiɛl nɛ Yuni nɛ Eliab nɛ Maseya nɛ Bɛnaya. Bumo nɛ bumo alɛ daa laŋ ejaŋjilaŋ gboŋgboŋi na e daa la, Matitiya nɛ Elifilehu nɛ Mikneya nɛ Azaziya n ta Obɛd Edɔm nɛ Jeɛl nɛ b la bɔrɛlambu na to be mbuna be bekenipo na n ti so.

²² Ŋkpal Chɛnanaya ka daa kɔ nshɛ be keboŋ be kakɛ so, mo nɛ b daŋ lara fanɛ e baa la Livaiebi na be beshɛbompo be ejuŋkparpo.

^23-24 Bɛrekaya nɛ Ɛlkana nɛ Obɛd Edɔm nɛ Jehiya nɛ b daŋ lara fanɛ b baa keni ŋkre be deka na so. Bɔrɛmatapoana Shebaniya nɛ Joshafat nɛ Netanɛl nɛ Amaziya nɛ Zakareya nɛ Bɛnaya nɛ Elieza nɛ b daŋ lara fanɛ b baa foŋ mbel ashi ŋkre be deka na be anishito.

B ka bar ŋkre be deka na Jerusalɛm to be asheŋ

²⁵ Ewura Deevid nɛ Israɛl be bejuŋkparpoana na nɛ benapo be benimuana na daŋ yɔ Obɛd Edɔm be laŋ to nna nɛ b ya ta ŋkre be deka na nseŋ ji eyur ndoŋ ga.

²⁶ Ŋkpal Ebɔrɛ ka daŋ chɛ Livaiebi na to nɛ b tiŋ n sulɔ Enyɛnpe be ŋkre be deka na so, egbolu ashunu nɛ ekpakpa ashunu nɛ b daŋ ta n lara sarga n sa Enyɛnpe Ebɔrɛ na.

²⁷ Deevid nɛ beshɛbompo be enimu Chɛnanaya nɛ Livaiebi nɛ b daŋ sulɔ ŋkre be deka na daŋ buu ago be kechɛbi lela be epiŋi nna. Ewura Deevid bre daŋ buu kabɔrɛmata be piŋi nɛ baa tre ɛfɔd na nna n daŋi mbe piŋi so.

²⁸ B ka ta ŋkre be deka na a ba na, Israɛlebi na kikɛ daa boŋ nshɛ kagbenefuliso nna nsaa foŋ mbel a laŋ echakachaka nɛ ejaŋjilaŋ hale m ba luri Jerusalɛm to.

²⁹ B ka ta ŋkre be deka na a luri kade na to na, nɛ Sɔɔl pibiche Mikaal keni tokuro to n wu ewura Deevid ka bee cha a tɛto, nɛ mbe asheŋ nu mo agbo alegaiso nɛ e maŋ naa keni mo a bɔlɔ kenishi.