1 Kronikɛls 12 - EBƆRƐ BE KAWƆL

Deevid be bebɛsopo nɛ b shi Bɛnjamin be yiri to na be asheŋ

¹ Jemanɛ ko Deevid daŋ yɔ Ziklag nna n ya ŋana Kish pibinyɛn ewura Sɔɔl so. Ndoŋ nɛ benapo lempo ko ba tu mo.

² Benapo na daŋ shi Bɛnjamin be yiri nɛ Sɔɔl gba shi kumo to na nna. B daa nyi ata nɛ atababu be keto ga. B daa tiŋ a ta enɔjiso nɛ enɔ bena kikɛ a to ata.

^3-7 Shema nɛ e shi Gibia na be mbinyɛnsobi Ahieza nɛ Jɔash e daa la bumo be bejuŋkparpo. Benapo na e daa la Azmavɛf be mbinyɛnsobi Jeziɛl nɛ Pɛlɛt nɛ Berika nɛ Jehu nɛ b shi Anatɔf na nɛ Ishmaya nɛ e la enapo lempo nseŋ shi Gibiɔn n daa la benapo adesa na be ejuŋkparpo na, nɛ Jɛremaya nɛ Jahaziɛl nɛ Johanan nɛ Jozabad nɛ e shi Gɛdera na, nɛ Eluzai nɛ Jɛrimɔf nɛ Bialia nɛ Shamariya nɛ Shefatiya nɛ e shi Harif na, nɛ Ɛlkana nɛ Isshaya nɛ Azarɛl nɛ Joeza nɛ Joshabim nɛ e shi Koora be kabuna na, nɛ Jeroham nɛ e shi Gɛdɔ na be mbinyɛnsobi Jola nɛ Zebadiya.

Deevid be bebɛsopo nɛ b shi Gad be yiri to na be asheŋ

⁸ Gad be yiri na to be basa ko gba daŋ ya tu Deevid ashi mbe kumɔlga be kakpa lempo keshishɛrsawule na so nna nseŋ ki mbe benapo. Bumo alɛ gba daa la benapo lempo nna nsaa nyi kananɛ baa ta asɔ kuŋso nɛ ekpa a kɔ kena nsaa gbir kenishi fanɛ ebuluŋ nseŋ naa du wurɛwurɛbi malɛ fanɛ kebee so be chibir.

^9-13 Kananɛ b bɛ abar so nde. Eza e daa la bumo be ejuŋkparpo, n ta Obadaya m bɛ so n ta Eliab nɛ Mishmana nɛ Jɛremaya nɛ Attai nɛ Eliɛl nɛ Johanan nɛ Elzabad nɛ Jɛremaya nɛ Makbanaya.

¹⁴ Gad be yiri to be basa ere be beko daa la benapo be benimugboŋ nɛ b daa keni benapo be katuŋ kagboŋ so nna nɛ beko malɛ la benimu nɛ baa keni benapo be katuŋ kalfa so.

¹⁵ Bumo e daŋ dii Jɔɔdan be lɔr na saŋɛ nɛ k bɔlɔ n lar apla kafɛ be kufɔl juŋkparso to na n ju basa nɛ b wɔ kumo be epeŋilarkpa nɛ epeŋitɔrkpa be kaba so be kepla so na nɛ b pesaŋ to.

Deevid be bebɛsopo nɛ b shi Bɛnjamin nɛ Juda na be asheŋ

¹⁶ Saŋko Bɛnjamin nɛ Juda be benapo be katuŋ ko daŋ yɔ Deevid kutɔ nna ashi kumɔlga be kakpa lempo na.

¹⁷ Ndoŋ nna nɛ Deevid daŋ lar n ya tu bumo nseŋ kaŋɛ bumo le: “Nɛ men la beteri nɛ baa ba nɛ b ba chɛ ma to ŋ kɔ nna bre, kumo ere mee wora menyi ansaŋ nɛ keba. Ama nɛ fanɛ men ba nna nɛ men ba debɔr ma ŋ ŋini ma doŋana saŋɛ nɛ m maŋ wora menyi kulubi kikɛ ere, an nananyɛnana be Ebɔrɛ na beeŋ gberge menyi kusoe.”

¹⁸ Ebɔrɛ be kiyoyu daŋ gbelge Amasai nɛ e la bumo be eko nseŋ ba ki benapo adesa na be enimu na so nna, nɛ e kaŋɛ: “Jɛsi pibinyɛn Deevid, an la feya nna! Fo nɛ fo basa beeŋ ba kɔ a pɔso saŋkama! Ŋkpal manɛ so Ebɔrɛ wɔ fo kaman.” Nɛ Deevid sɔ bumo nɛnɛ nseŋ ta bumo ŋ ki mbe benapo nɛ baa ta kena a purgi basa na be benimu.

Deevid be bebɛsopo nɛ b shi Manase be yiri to na be asheŋ

¹⁹ Manase be yiri to be benapo ko daŋ ya ti Deevid be benapo so nna saŋɛ nɛ e daŋ lar n ya tu Filistiebi na nɛ e kɔ ewura Sɔɔl kena na. E daa maŋ naŋ chɛ Filistiebi na to ŋkpal manɛ so b daa fɛ nna fanɛ e beeŋ debɔr bumo ŋ ŋini mo nyɛnpe dra Sɔɔl. Amoso b daŋ shin nna nɛ Deevid bɛta n yɔ Ziklag.

²⁰ Benapo nɛ b daŋ shi Manase be yiri to n ya ti Deevid so saŋɛ so nɛ e bɛta a yɔ Ziklag na e daa la Adna nɛ Jozabad nɛ Jedial nɛ Maikel nɛ Jozabad nɛ Elihu nɛ Zilletai. Bumo b ekama daa keni benapo kagboŋ be katuŋ so ashi Manase be yiri to nna.

²¹ B daa la benapo lempo nna. Ŋkpal loŋ so nɛ Deevid ta bumo ŋ ki mbe benapo be benimu. Bumo e daa chɛ mo to a kɔ mo doŋana nɛ baa ta kena a purgi basa na.

²² Saŋkama benapo popɔr daa ti Deevid be benapo na so nna ŋkpal loŋ so nɛ mbe benapo na wora kishi ga.

Deevid be benapo be asheŋ

^23-37 Saŋɛ so nɛ Deevid daa wɔ Hibrɔn na, benapo damta ko daŋ ba ti mbe benapo so nna nseŋ ta Deevid ŋ ki ewura n tal Sɔɔl be katelamu fanɛ kananɛ Enyɛnpe Ebɔrɛ kaŋɛ na gbagba. Kananɛ benapo na daa sa nde. Juda be benapo daa wɔ ŋgboŋ ashe nɛ alfa aburwa nsaa kɔ akɔsɔ damta nseŋ keta asɔ kuŋso nɛ akpa. Simiɔn be yiri to be benapo nɛ b nyi kena be kekɔ nɛnɛ daa wɔ ŋgboŋ ashunu nɛ kalfa. Livai be yiri to be benapo daa wɔ ŋgboŋ ana nɛ alfa ashe. Ɛɛrɔn mo nanabi Jehowada be benapo nɛ b daa bɛ mo so daa la ŋgboŋ asa nɛ alfa ashunu nna. Zadɔk nɛ e la enapo lempo na malɛ mo kurgepoana nɛ b la benapo daa wɔ basa adunyɔ nɛ anyɔ. Bɛnjamin be yiri nɛ k la Sɔɔl gbagba be yiri na daa kɔ benapo ŋgboŋ asa. Bɛnjamin be yiri na to be basa damta daa shuŋ Sɔɔl nna. Efrayim be yiri to be benapo lempo nɛ bumo be kanaŋ to be mbuna nɛ ekama nyi bumo be asheŋ daa wɔ basa ŋgboŋ adunyɔ nɛ alfa aburwa. Manase be yiri na to be epeŋitɔrkpa be kaba so be benapo nɛ b daŋ lara fanɛ b ya buu Deevid kuwura m ba na daa wɔ basa ŋgboŋ kuduaburwa. Isaaka be yiri to be bejuŋkparpo nɛ basa nɛ b daa juŋkpar a ŋini kusɔ nɛ k daga kewora nɛ kusɔ nɛ k ba nɛ k daga b ka wora kumo na kikɛ daa wɔ basa alfa anyɔ. Zɛbyulɔn be yiri to be benapo nɛ b nyi akɔsɔ be yiri kikɛ be keta ŋ kɔ kena nseŋ wora kena to be keyɔ be shiriya saŋkama malɛ daa wɔ basa ŋgboŋ adunu, Naftali be yiri to be benapo juŋkparpo daa wɔ kagboŋ, nɛ bumo nɛ bumo be benapo nɛ b nyi asɔkuŋso nɛ ekpa b keta ŋ kɔ kena nɛnɛ malɛ daa wɔ basa ŋgboŋ adesa nɛ ashunu. Dan be yiri na to be benapo nɛ b koya kena be kekɔ nɛnɛ daa wɔ ŋgboŋ adunyɔ nɛ aburwa nɛ alfa ashe. Asha be yiri to be benapo nɛ b wora shiriya nɛ b yɔ kena to saŋkama daa wɔ basa ŋgboŋ adena. Ruben nɛ Gad nɛ Manase be epeŋilarkpa be yiri nɛ b daa wɔ Jɔɔdan be lɔr na be epeŋilarkpa be kaba so na be benapo nɛ b nyi akɔsɔ be yiri kikɛ b k ta ŋ kɔ kena na, daa wɔ ŋgboŋ kalfa nɛ adunyɔ.

³⁸ Benapo na kikɛ daŋ yɔ Hibrɔn nna nɛ b ya buu Deevid Israɛl be kuwura. Israɛlebi kikɛ gba daa sha kumo be loŋ nna.

³⁹ Bumo nɛ Deevid kikɛ daŋ ji ndoŋ nchɛ asa nna nsaa ji ajibi a nuu asɔnuuso nɛ bumo kurgepoana bar bumo na.

⁴⁰ Isaaka nɛ Zɛbyulɔn nɛ Naftali be eyiri nɛ b wɔ kufɔ na daŋ sulɔ ajibi nɛ nyifu nɛ asɔrso nɛ baa tre greep na be awɔlso nɛ asɔnuuso nɛ ɔlif be ŋku, ekurma nɛ enyɔma nɛ egbolufɛlso so nna. B daŋ bar ana nɛ mbolpɔ gba ndoŋ m ba mɔ n ji. Ade kikɛ daa ŋini kagbenefuli nɛ b nya efuli na so nna.