1 Bewura 9 - EBƆRƐ BE KAWƆL

Ebɔrɛ ka lara mbe kumu ŋ ŋini ewura Sɔlɔmɔn be asheŋ

¹ Ewura Sɔlɔmɔn ka pɔr bɔrɛlambu na nɛ ewura be laŋ na nɛ kusɔ kama nɛ e bee sha na n loge,

² nɛ Enyɛnpe Ebɔrɛ lara mbe kumu ŋ ŋini mo edare to kanyɛso ashi Gibiɔn

³ ŋ kaŋɛ mo le: “N nu fo kabɔrɛkule nseŋ shuli fanɛ bɔrɛlambu ere to nɛ baaŋ baa bunyaŋ ma mbaanaayɔ. Ma alɛ beeŋ baa kuŋ kumo saŋkikɛ.

⁴ Nɛ feeŋ baa kɔ kasonu n sa ma nsaa ji kashenteŋ fanɛ kananɛ fo tuto ewura Deevid daa du na, nsaa bɛ ma mbra nɛ ma keŋini so bre,

⁵ kumo ere ma kɔnɔ nɛ n nase n sa fo tuto fanɛ mbe kanaŋ to be esa e naaŋ baa ji Israɛl be kuwura saŋkama na beeŋ bɔlɔ so.

⁶ Ama nɛ fo ŋko fo kaman to ebi be beko kini kebɛ ma mbra so nsaa shuŋ efuli pɔtɛana so be agbir bre,

⁷ kumo ere meeŋ lara ma basa Israɛlebi ashi kasawule nɛ n ta n sa bumo ere so, nseŋ lar bɔrɛlambu nɛ n nɛfa ŋ kaŋɛ fanɛ meeŋ baa wɔ ndoŋ nɛ b baa bunyaŋ ma na to. Saŋɛ na so basa kikɛ beeŋ ba fɛl Israɛlebi nsaa keni bumo jiga.

⁸ Bɔrɛlambu ere beeŋ ki ajembu n deŋi abar so. Kumo be loŋ kaŋ wora malɛ, k beeŋ chinchiŋ basa kama nɛ baa bɔla kumo ase a choŋ na, nɛ b baa bishi le: ‘Manɛ nna nɛ Enyɛnpe Ebɔrɛ wora mbe basa nɛ b wɔ mbe bɔrɛlambu to ere le?’

⁹ Nɛ basa e kaŋɛ le: ‘Ŋkpal b ka kini Enyɛnpe bumo be Ebɔrɛ nɛ e lara bumo nanaana ashi Ijipt be kasawule so na, nseŋ ya kaa bunyaŋ efuli pɔtɛana so be agbir so nɛ Enyɛnpe Ebɔrɛ shin nɛ le be asheŋ ere ba bumo so na.’ ”

Ewura Sɔlɔmɔn nɛ ewura Hiram be kɔnɔkoŋwule be ŋkre be asheŋ

¹⁰ Nfɛ adunyɔ nɛ ewura Sɔlɔmɔn daŋ ta m pɔr bɔrɛlambu na nɛ ewura be laŋ n loge.

¹¹ Tayɛ be ewura, Hiram, e daŋ sa ewura Sɔlɔmɔn sida nɛ paɛŋ be ndibi nɛ shuwa nɛ b ta n shuŋ kushuŋ na kikɛ. B ka loge kumo be kushuŋ na, nɛ ewura Sɔlɔmɔn ta Galili be kebonfu na be kaba so be nde adunyɔ n sa ewura Hiram.

¹² Ewura Hiram ka ya wu nde na, amo be asheŋ daa maŋ par mo.

¹³ Nɛ e kaŋɛ ewura Sɔlɔmɔn le: “N niopibi, nde nɛ fo ta n sa ma nde a?” Amoso e daŋ nase loŋ be kebonfu na be kaba so Kabɔl nna ŋkpal k ka daa maŋ kɔ tɔnɔ so.

¹⁴ Ewura Hiram daŋ shin nna nɛ b ta shuwa nɛ amo be egbɛ sa fanɛ kilo ŋgboŋ ana nna n ya sa ewura Sɔlɔmɔn.

Asɔ nɛ Sɔlɔmɔn naŋ wora n ti so be asheŋ

¹⁵ Ewura Sɔlɔmɔn daŋ tintiŋ basa nna nɛ b pɔr bɔrɛlambu na nɛ ewura be laŋ na nseŋ sulɔ ajembu m mata kade na be epeŋilarkpa be kaba so be egbal na. Kumo be kaman nɛ e shin nɛ b pɔr egbal ŋ kulti kade na kikɛ. E daŋ shin nɛ b lɔŋɛ m pɔr Hazɔɔ nɛ Majido nɛ Gaza be nde gba nna.

¹⁶ Ijipt be ewura e daŋ ya kɔ Gɛza kena m pɔɔ so m mɔ basa nɛ b wɔ kumo to kikɛ nseŋ wɔtɔ kumo edɛ. Kumo be kaman nɛ e ta kumo n sa mo pibiche fanɛ mbe kejafɔ to be kakɛ saŋɛ so nɛ e ya kil ewura Sɔlɔmɔn na.

¹⁷ Ndoŋ nna nɛ Ewura Sɔlɔmɔn shin nɛ b naŋ lɔŋɛ kumo nɛ Bɛf Hɔrɔn nɛ k wɔ kaseto be kaba so na,

¹⁸ nɛ Balaaf nɛ Tamaa nɛ k wɔ keshishɛrsawule nɛ k wɔ Juda be efuli so na m pɔr,

¹⁹ nseŋ pɔr nde nɛ e bee ta mbe ajibi nɛ egbaŋɛturko nɛ egbaŋɛ a yili to na. Ewura Sɔlɔmɔn daŋ shin nna nɛ mbe beshumpo pɔr asɔ nɛ e bee sha n yili Jerusalɛm nɛ Lebanɔn nɛ mbe efuli so be kaplɛkama.

^20-21 Ewura Sɔlɔmɔn daŋ shin nna nɛ Keenan be efuli so be basa, nɛ Israɛlebi daa maŋ mɔ saŋɛ nɛ b daŋ lar Ijipt m ba sɔ kasawule na bee shuŋ a sa mo. Bumo e daa la Hitebi nɛ Amɔriebi nɛ Pɛrizebi nɛ Hivebi nɛ Jebusiebi nɛ bumo be kaman to ebi la anya hale m ba fo kabre.

²² Ewura Sɔlɔmɔn daa maa tintiŋ Israɛlebi na bre nɛ baa shuŋ ashuŋ kpakpaso ama e daŋ ta bumo be beko nna ŋ ki benapo n ta beko malɛ ki benapo be benimu n ta beko ŋ ki egbaŋɛturko be benimu nɛ beko malɛ bee dii egbaŋɛ a kɔ kena.

²³ Sɔlɔmɔn daŋ lara ekrachi alfa anu nɛ adunu nna nɛ baa keni beshumpo nɛ baa pɔr mbe asɔ na kikɛ so.

²⁴ Ewura Sɔlɔmɔn be eche nɛ e la Ijipt be ewura pibiche na, daŋ koso Jerusalɛm be kaba ko nɛ baa tre Deevid be kade to na nna n yɔ ewura be laŋ popɔr nɛ ewura Sɔlɔmɔn pɔr n sa mo na to.

²⁵ Kafɛ kikɛ, ale asa nɛ ewura Sɔlɔmɔn daa chɔɔ duwu nsaa lara esarga chɔɔso nɛ kɔnɔkoŋwuleso be esarga a deŋi bɔrɛsure nɛ e pɔr n sa Enyɛnpe Ebɔrɛ na so, hale m ba pɔr bɔrɛlambu na n loge.

²⁶ Kumo be kaman nɛ ewura Sɔlɔmɔn yɔ Eziɔngɛba nɛ Elaf nɛ a wɔ teku peper na be kɔnɔ ase na n yaa wora ekuloŋgboŋana.

²⁷ Ewura Hiram daŋ shin nna nɛ mbe basa nɛ b nyi nchu to be asheŋ nɛnɛ na ta ekuloŋgboŋana, nɛ bumo nɛ ewura Sɔlɔmɔn be basa bee shuŋ.

²⁸ Bumo nɛ ewura Sɔlɔmɔn be basa e daŋ bɔla nchu so n yɔ efuli nɛ baa tre Ɔfir na. B ka bɛta a ba, nɛ b bar ewura Sɔlɔmɔn shuwa nɛ amo be egbɛ sa fanɛ kilo ŋgboŋ kuduana.