1 Bewura 8 - EBƆRƐ BE KAWƆL

B ka bar Enyɛnpe Ebɔrɛ be ŋkre be deka na bɔrɛlambu na to be asheŋ

¹ B ka pɔr bɔrɛlambu na n loge be kaman nɛ Ewura Sɔlɔmɔn shuŋi n tre bejuŋkparpoana na kikɛ nɛ Israɛl be eyiriana nɛ mbuna mbunaana be benimuana kikɛ fanɛ b ba shɛr Jerusalɛm n ta Enyɛnpe Ebɔrɛ be ŋkre be deka na ashi Zayɔn nɛ k la Deevid be kade to na n yɔ bɔrɛlambu na to.

² Kufɔl shunusopo nɛ baa tre Itaim na be saŋɛ nɛ baa ji ewajɛbu to be kejigboŋ na nɛ bumo kikɛ ba shɛr abar so.

³ Bejuŋkparpoana na kikɛ ka shɛr abar so, nɛ bɔrɛmatapoana na maŋ ŋkre be deka na so,

⁴ n ta kumo n yɔ bɔrɛlambu na to. Bɔrɛmatapoana nɛ Livaiebi na gba daŋ ta Enyɛnpe Ebɔrɛ be wajɛbu na nɛ kumo be asɔ nɛ baa ta a shuŋ kumo to na kikɛ nna n yɔ bɔrɛlambu na to.

⁵ Ewura Sɔlɔmɔn nɛ Israɛlebi na kikɛ daŋ shɛr Enyɛnpe Ebɔrɛ be ŋkre be deka na be anishito nna m mɔ mbolpɔ nɛ ana damta nɛ b maŋ kɔ kekarga n lara sarga.

⁶ Bɔrɛmatapoana na e daŋ sulɔ Enyɛnpe Ebɔrɛ be ŋkre be deka na n ya yili m mata emalaika anyɔ na be aya ase ashi acheembiana to be kakpa cheembi na.

⁷ Emalaika anyɔ na be atɛ daŋ parga to nna m buu deka na nɛ ndibi nɛ b kɔ a sulɔ kumo na so.

⁸ Ndibi na daa wɔ nteŋ nna ga nɛ esa beeŋ tiŋ n yili acheembiana to be kakpa cheembi na be kabuna to n wu amo ama mannɛ kakpa kikɛ nɛ esa beeŋ tiŋ n yili n wu amo. Loŋ be ndibi na kraa wɔ ndoŋ hale nɛ mbre.

⁹ Shɛŋ shɛŋ daa maŋ wɔ ŋkre be deka na to ama ajembufalta anyɔ nɛ Mosis daŋ ta n wɔtɔ kumo to ashi kebeegboŋ nɛ baa tre Sainai na ase, saŋɛ so nɛ Enyɛnpe Ebɔrɛ daŋ lara Israɛlebi na Ijipt be efuli so nɛ bumo nɛ mo nase nnɔ n sa abar dra dra na.

¹⁰ Bɔrɛmatapoana na ka bee lar acheembiana to be kakpa cheembi na to, nɛ Enyɛnpe Ebɔrɛ be kuwɔlpa ba bɔlɔ bɔrɛlambu na kikɛ to

¹¹ nɛ mbe kefulto bee nyɛkpɛ le palpal bumo be anishito nɛ b maŋ naŋ tiŋ m bɛta n luri n ya shuŋ bumo be ashuŋ.

¹² Ndoŋ nna nɛ ewura Sɔlɔmɔn kule Ebɔrɛ le: “Enyɛnpe Ebɔrɛ, fo e to epeŋi ere n shiga esoso ama fo kaŋɛ fanɛ feeŋ baa wɔ awɔlpa lembir ere to.

¹³ Naniere bre m pɔr kemaŋkura be bɔrɛlambu nɛ feeŋ baa wɔ ndoŋ mbaanaayɔ.”

Sɔlɔmɔn ka malga n sa mbe basa be asheŋ

¹⁴ Israɛlebi na kikɛ daŋ shɛr abar so a yil ndoŋ nna nɛ ewura Sɔlɔmɔn kilgi mbe anishito n shoŋi bumo nseŋ nɛfa bumo.

¹⁵ Le nɛ e daŋ kaŋɛ: “Kapandi e baa la Enyɛnpe Ebɔrɛ Israɛl be Ebɔrɛ na peya! Mo e daŋ shin nɛ mbe nnɔ naseso bɔlɔ so n sa n tuto ewura Deevid nseŋ kaŋɛ mo le:

¹⁶ ‘Yili saŋɛ so nɛ n lara ma basa ashi Ijipt be efuli so na hale m ba fo kabre, maŋ lara kade kama ashi Israɛl be kasawule so fanɛ k baa la kakpa nɛ baaŋ pɔr bɔrɛlambu nsaa bunyaŋ ma, ama fo Deevid nɛ n lara fanɛ fo baa juŋkpar ma basa Israɛlebi.’ ”

¹⁷ Kumo be kaman nɛ ewura Sɔlɔmɔn kaŋɛ le: “N tuto ewura Deevid e daŋ yili kumo fanɛ e beeŋ pɔr bɔrɛlambu nɛ b baa bunyaŋ Enyɛnpe Israɛl be Ebɔrɛ na ndoŋ,

¹⁸ ama le nɛ Enyɛnpe Ebɔrɛ na daŋ kaŋɛ mo. ‘Fo ka yɛ feeŋ pɔr bɔrɛlambu n sa ma ere, k kɔ ekpa ga,

¹⁹ ama mannɛ fo e naaŋ pɔr kumo, fo pibinyɛn nɛ e la fo gbagba be ŋklaŋ e naŋ ba pɔr ma bɔrɛlambu na n sa ma.’

²⁰ Enyɛnpe Ebɔrɛ be kɔnɔ nɛ e nase na bɔlɔ so naniere bre: Ma e sɔ n tuto so n ji Israɛl be kuwura, ma alɛ e pɔr bɔrɛlambu nɛ baaŋ ba bunyaŋ Enyɛnpe Israɛl be Ebɔrɛ na.

²¹ N ta Enyɛnpe Ebɔrɛ be ŋkre be deka nɛ afaltajembu nɛ a la ŋkre nɛ Enyɛnpe Ebɔrɛ nɛ mbe basa Israɛlebi kre saŋɛ nɛ e lara bumo ashi Ijipt be kasawule so na, n wɔtɔ n yili bɔrɛlambu na to.”

Sɔlɔmɔn be kabɔrɛkule be asheŋ

²² Ndoŋ nna nɛ ewura Sɔlɔmɔn yili bɔrɛsure na be anishito Israɛlebi na kikɛ be anishito m maŋ mbe enɔana so ŋ kule Ebɔrɛ le:

²³ Enyɛnpe nɛ fo la Israɛl be Ebɔrɛ na, ashi esoso nɛ kasawule kikɛ, Ebɔrɛ kikɛ maŋ naa wɔtɔ fanɛ fo. Fo maa teŋ ŋkre nɛ fo nɛ fo basa nase n sa abar na so kikɛ. Fo alɛ bee ŋini bumo fo kasha saŋɛ nɛ b ta bumo be ŋgbene kikɛ a wora kasonu a sa fo na nna.

²⁴ Fo bɛ kɔnɔ nɛ fo nase n sa n tuto ewura Deevid na so nseŋ shin nɛ kumo kikɛ bɔlɔ so kabre.

²⁵ Naniere, Enyɛnpe Israɛl be Ebɔrɛ, shin nɛ fo kɔnɔ nɛ fo nase n sa n tuto fanɛ mbe kaman to ebi e naaŋ baa ji Israɛl be kuwura, nɛ baaŋ baa wora kasonu a sa fo mbra na fanɛ kananɛ n daŋ wora na, bɔlɔ so.

²⁶ Amoso Enyɛnpe Israɛl be Ebɔrɛ, shin nɛ kusɔ kama nɛ fo nase kɔnɔ n sa fo kenya ewura Deevid na e bɔlɔ so.

²⁷ Ebɔrɛ beeŋ tiŋ a wɔ edimɛdi to durnya ere to a? Esoso kikɛ gba maaŋ tiŋ n sɔ fo. Nɛ nuso nɛ bɔrɛlambu nɛ m pɔr ere bre beeŋ tiŋ n sɔ fo?

²⁸ N nyɛnpe Ebɔrɛ, n la fo kayɛrbi nna, nu ma kabɔrɛkule ere nseŋ wora kusɔ nɛ mee kule ere n sa ma.

²⁹ Baa keni bɔrɛlambu ere so kapa nɛ kanyɛ. Fo nase kɔnɔ n sa ma fanɛ ndoŋ nɛ baaŋ baa bunyaŋ fo. Amoso saŋkama nɛ m baŋ kilgi anishito n shoŋi bɔrɛlambu ere ŋ kule fo, fo nu n sa ma.

³⁰ Saŋkama nɛ ma nɛ fo basa Israɛlebi baŋ kilgi anishito n shoŋi kakpa ere a kule fo Ebɔrɛ, fo yili fo pe ebɔrɛso n nu n sa anyi nseŋ ta anyi be alubi m paŋ anyi.

³¹ Nɛ fanɛ b ku asheŋ nna n deŋi esa fanɛ e wora mo barkasa kulubi nseŋ bar mo bɔrɛsure ase ashi fo bɔrɛlambu ere to ŋ kaŋɛ fanɛ e bɔ ntaŋ fanɛ e maŋ wora shɛŋ,

³² kumo ere Enyɛnpe Ebɔrɛ, fo yili esoso n ji fo nyɛrbi demu ŋ gberge esa nɛ e ji n tɔr na kusoe nseŋ yige emo nɛ e maŋ ji n tɔr na.

³³ Bedoŋ baaŋ kɔ m pɔɔ fo basa Israɛlebi so ŋkpal b ka wora alubi ŋ gbiti fo so, nɛ b baaŋ chɛrga bumo be nfɛra m bɛ fo so nseŋ ba fo kutɔ bɔrɛlambu ere to m ba kule fo alubi be ketampaŋ bre,

³⁴ kumo ere fo yili esoso n nu bumo be kekule nseŋ ta bumo be alubi m paŋ bumo n naŋ bɛta bumo m ba kasawule nɛ fo ta n sa bumo nɛ bumo nananyɛnana na so.

³⁵ Fo baaŋ pɛ bɔrɛ ŋ keta ŋkpal fo basa ka wora kulubi ŋ gbiti fo so nɛ b chɛrga nseŋ kilgi bumo be anishito n shoŋi bɔrɛlambu ere nseŋ bar bumo be amu ase ŋ kule fo,

³⁶ kumo ere, Enyɛnpe Ebɔrɛ, yili esoso n nu bumo be kekule nseŋ ta fo basa Israɛlebi be alubi m paŋ bumo nseŋ ŋini bumo kusɔ nɛ k daga, n shin nɛ bɔrɛ e ba fo kasawule nɛ fo ta n sa fo basa fanɛ bumo be kapetɛ mbaanaayɔ ere so.

³⁷ “Akoŋ baŋ tɔr kasawule ere so, ŋko aleblawu ko e ba ŋko afugboŋ tushiso ŋko elotɔr e ba jija bumo be adɔjibi, ŋko bedoŋ ko e ba kaa kɔ bumo kena ŋko kayurnyaŋ ŋko kulɔ ko e ba luri bumo to,

³⁸ kumo ere fo nu bumo be kekule. Nɛ fo basa Israɛlebi baŋ ta kagbenejija n teŋi bumo be enɔana kabɔrɛkule to n shoŋi bɔrɛlambu ere,

³⁹ fo yili esoso n nu bumo be kekule nseŋ ta bumo be alubi m paŋ bumo. Fo nawule e nyi dimɛdi be kagbene to. Shin nɛ ekama e nya mbe asheŋ woraso be kakɔka,

⁴⁰ saŋɛ na so fo basa beeŋ baa bunyaŋ fo nsaa nu a sa fo ashi kasawule nɛ fo ta n sa an nananyɛnana ere so.

^41-42 Befɔ nɛ b shi kufɔ na kaŋ nu eleŋ nɛ fo kɔ, nɛ asheŋgboŋ nɛ fee wora na, nseŋ ba bɔrɛlambu ere to m ba kule fo,

⁴³ kumo ere fo yili esoso n nu bumo be kekule nseŋ wora kusɔ nɛ baa sha n sa bumo, saŋɛ na so durnya be basa kikɛ beeŋ pin fo nsaa nu a sa fo fanɛ kananɛ fo basa Israɛlebi bee nu a sa fo na. Loŋ nɛ baaŋ pin fanɛ bɔrɛlambu nɛ m pɔr ere la kakpa nɛ k daga b ka bee bunyaŋ fo nna.

⁴⁴ Fo kaŋ kaŋɛ fo basa kenishipereso fanɛ b ya kɔ bumo doŋana kena nɛ b yili kaplɛkama ŋ kilgi bumo be anishito n shoŋi kade nɛ fo lara ere nɛ bɔrɛlambu nɛ m pɔr n sa fo ere ŋ kule fo,

⁴⁵ kumo ere fo yili esoso n nu bumo be kekule n shin nɛ b kɔ m pɔɔ so.

⁴⁶ Ekama bee wora alubi, amoso hale nɛ fo basa wora alubi ŋ gbiti fo nɛ fo nya agbo n wɔtɔ bumo nseŋ ta bumo m bɔɔ bumo doŋana enɔ nɛ b pɛ bumo n yɔ efuli pɔtɛ wɔfɔ so gba,

⁴⁷ fo nu fo basa be kabɔrɛkule. Nɛ fanɛ b chɛrga bumo be nfɛra nseŋ kule fo a bugi to a kaŋɛ bumo be alubi kananɛ b la basa lubi nɛ kananɛ b la amu kpakpasowuraana ashi efuli na so, kumo ere Enyɛnpe Ebɔrɛ, fo nu bumo be kekule.

⁴⁸ Nɛ fanɛ b chɛrga bumo be nfɛra kashenteŋto nna ashi efuli na so bre nseŋ kilgi bumo be anishito n shoŋi kasawule nɛ fo ta n sa an nananyɛnana na nɛ kade nɛ fo lara ere nɛ bɔrɛlambu nɛ m pɔr n sa fo ere nseŋ kule fo,

⁴⁹ kumo ere fo yili esoso n nu bumo be kekule nseŋ wu bumo kuwɔr,

⁵⁰ n ta fo basa be alubi nɛ b wora ŋ gbiti fo kikɛ m paŋ bumo n shin bumo doŋana e baa wora bumo kelela.

⁵¹ Fo basa gbagba e la bumo nɛ b daa ji awurfoŋ ga nɛ fo lara bumo ashi Ijipt be kasawule so na.

⁵² Enyɛnpetale, saŋkama nɛ fo mbia Israɛlebi nɛ bumo be ewura baŋ kule fo fanɛ fo chɛ bumo to, fo nu n sa bumo.

⁵³ Fo ka lara an nananyɛnana ashi Ijipt be kasawule so na, nɛ fo kaŋɛ fo kayɛrbi Mosis fanɛ durnya ere kikɛ to, Israɛlebi nɛ fo lara fanɛ b baa la fo basa.”

Lalaloge be kabɔrɛkule

⁵⁴ Ewura Sɔlɔmɔn ka kule Enyɛnpe Ebɔrɛ n loge, nɛ e niŋito n yili bɔrɛsure nɛ e gbir kumo ase na be anishito

⁵⁵ ŋ kule Ebɔrɛ be nɛfa awɔrso n sa basa nɛ b shɛr na ŋ kaŋɛ:

⁵⁶ “Kemaŋkura e baa la Enyɛnpe Ebɔrɛ nɛ e nase kɔnɔ fanɛ e beeŋ sa mbe basa kagbenewushi na peya. E daŋ bɔla mbe kayɛrbi Mosis so nna n shin nɛ mbe nnɔ naseso nɛ e nase n sa bumo na kikɛ bɔlɔ so.

⁵⁷ Enyɛnpe anyi be Ebɔrɛ na e baa wɔ anyi alɛ gba kutɔ fanɛ kananɛ e daa wɔ an nananyɛnana kutɔ na, nsaa maŋ yige anyi ŋko ŋ kplaŋ anyi so;

⁵⁸ E chɛ anyi to n shin nɛ an baa nu a sa mo nsaa bɛ mbe mbra nɛ keŋini nɛ e ta n sa an nananyɛnana na so.

⁵⁹ Enyɛnpe anyi be Ebɔrɛ na, e baa nu ma kabɔrɛkule saŋkama. E baa chɛ Israɛl be basa nɛ bumo be ewura to nsaa wora bumo karechɛ kama be asheŋ tirso a sa bumo.

⁶⁰ Saŋɛ na so durnya kikɛ beeŋ pin fanɛ fo Enyɛnpe na nawule e la Ebɔrɛ. Ebɔrɛ kikɛ maŋ naa wɔtɔ.

⁶¹ Men ta men be ŋgbene kikɛ a bɛ Enyɛnpe men be Ebɔrɛ na be mbra so fanɛ kananɛ menyee wora kabre ere.”

Bɔrɛlambu na be keta m bɔɔ Ebɔrɛ enɔ be asheŋ

⁶² Ndoŋ nna nɛ ewura Sɔlɔmɔn nɛ basa nɛ b wɔ ndoŋ na kikɛ lara esarga n sa Enyɛnpe Ebɔrɛ.

⁶³ Ewura Sɔlɔmɔn daŋ mɔ ana ŋgboŋ adunyɔ nɛ anyɔ nɛ mbolpɔ nɛ mboe malɛ ŋgboŋ kalfa nɛ adunyɔ nna n lara kɔnɔkoŋwuleso be esarga pɔɛŋ nɛ mo nɛ basa na kikɛ ta bɔrɛlambu na m bɔɔ Ebɔrɛ enɔ.

⁶⁴ Ewura Sɔlɔmɔn daŋ ta kelɔnɛ na be nferinto a mata bɔrɛlambu na be anishito ase na nna m bɔɔ Ebɔrɛ enɔ nseŋ lara sarga chɔɔso nɛ kɔnɔkoŋwuleso be sarga be asɔbɔya be nfɔ nɛ ajibi nɛ asɔnuuso be sarga. E daŋ wora loŋ nna ŋkpal danyaŋ be bɔrɛsure nɛ e daŋ pɔr bɔrɛlambu na be anishito na ka daa maŋ shibi ga nɛ b baa lara esarga na kikɛ kumo so so.

⁶⁵ Ewura Sɔlɔmɔn nɛ Israɛlebi na kikɛ daŋ ji abuu to be kebaawɔtɔ be kejigboŋ nchɛnshunu nna m bɛ abar so. Basa na daŋ shi efuli na be kaplɛkama nna. Bedamta daŋ shi Hamaf Paas ashi kelargato be esoso be kaba so nna nɛ beko malɛ shi Ijipt be kasawule be egbaŋ to ashi kelargato be kaseto be kaba so.

⁶⁶ Kumo be kachɛ burwasopo na, nɛ ewura Sɔlɔmɔn shin nɛ basa na kikɛ yɔ bumo peana. Nɛ bumo be ŋgbeneana fuli bumo ga ŋkpal kananɛ Enyɛnpe Ebɔrɛ daŋ nɛfa mbe basa Israɛlebi, nɛ mbe kayɛrbi ewura Deevid na so.