1 Bewura 7 - EBƆRƐ BE KAWƆL

Ewura Sɔlɔmɔn ka pɔr ewura be laŋ be asheŋ

¹ Nfɛ kuduasa nɛ Sɔlɔmɔn daŋ ta m pɔr ewura be laŋ na.

^2-3 Laŋ na to be lambugboŋ nɛ b daa tre Lebanɔn be Kupo na be nteŋ daa la ayadra kalfa nɛ adunu nna nɛ kumo be mpar malɛ daa la ayadra adushunu nɛ anu nɛ kumo be jeŋgreŋ malɛ la ayadra adena nɛ anu. Sida be eshabɔrɛ be egbaŋ ana nɛ amo be kekama kɔ eshabɔrɛ kuduanu nɛ b ta elarbeŋ adena nɛ anu n deŋi amo so nɛ b daŋ yɔɔri kowu na kikɛ n deŋi so.

⁴ Kumo be nteŋ to be egbal anyɔ nɛ a shoŋi abar na be kekama daa kɔ etokuro asasa nna.

⁵ Kumo be lambu na be anishito daa kɔ akuloŋ asa nna nɛ etokuro na malɛ shoŋi abar.

⁶ Lambu nɛ baa tre eshabɔrɛ damta be lambu na be nteŋ daa la fanɛ ayadra adushunu nɛ anu nna nɛ kumo be mpar malɛ la ayadra adena nɛ anu. B daŋ yuu eshabɔrɛ nna n wora kedɛdɛ.

⁷ B daŋ pɔr kuwurputi gba be lambu nɛ baa tre demuji be lambu na nna. Ndoŋ nɛ ewura Sɔlɔmɔn daa chena a ji asheŋ. Sida be ndibi nɛ b daŋ ta m mata kumo be egbal na kikɛ so n yili kaseto n ya fo esoso kikɛ.

⁸ Kuwurlaŋ na be kakpa nɛ ewura Sɔlɔmɔn gbagba wɔ na, daa wɔ lambu nɛ baa tre demuji na be kaman to nna nseŋ duli lambu na. E daŋ shin nna nɛ b pɔr laŋ nɛ k du fanɛ kumo nɛ e wɔtɔ na gbagba n sa mbe eche nɛ e la Ijipt be ewura Fɛɛro pibiche na.

⁹ Ajembu lela nɛ b daŋ ta n yili kaseto m pɔr ebuana na nɛ kelɔnɛ na be egbal n ya fo esoso. Kakpa nɛ baa bure ajembu to na nɛ b daŋ ya shɛl amo.

¹⁰ B daŋ shɛl ajembu gboŋgboŋi nɛ amo be ako be nteŋ la fanɛ ayadra kuduanu nɛ ako malɛ la ayadra kuduanyɔ nna m pɔr kowu na kikɛ be gbaltɔlase.

¹¹ B daŋ shɛl ajembu krokrobi nna m pɔr m bɛ gbaltɔlase na so nseŋ ta sida be ndibi be eshabɔrɛ n deŋi amo so.

¹² B ta ajembu nɛ b shɛl nna m pɔr egbal asa pɔɛŋ nseŋ ta sida be ndibi n deŋi so ŋ kulti ewura be laŋ na fanɛ kananɛ b baŋ pɔr bɔrɛlambu na nɛ kumo be kelɔnɛ be egbalana na.

¹³ Ewura Sɔlɔmɔn daŋ shuŋi n tre kanyɛn ko nɛ baa tre Huram nɛ e wɔ Tayɛ be kade to nsaa kɔ edanyaŋ be keta n lɔŋɛ asɔ na be enɔ to be kenyi nna.

¹⁴ Mo tuto nɛ e la Tayɛ be esa nsaa maŋ naa wɔ ŋkpa to na gba daa la esa nɛ e kɔ danyaŋ be keta n lɔŋɛ asɔ be enɔ to be kenyi nna. Mo nio daŋ shi Naftali be yiri to nna. Huram daa la esa nɛ e kɔ enɔ to be kenyi nɛnɛ nna, amoso ewura Sɔlɔmɔn ka tre mo n ta danyaŋ be keta n lɔŋɛ asɔ be kushuŋ be kenimu n sa mo, e daŋ shuli nna.

Danyaŋ be eshabɔrɛ anyɔ na be asheŋ

¹⁵ Huram daŋ ŋalga danyaŋ nna m bɛl eshabɔrɛ anyɔ. Kuko be jeŋgreŋ daa la ayadra adunyɔ nɛ ashunu nna nɛ kumo be bumburuŋ malɛ la ayadra kuduaburwa.

¹⁶ E daŋ lɔŋɛ danyaŋ be nwuro anyɔ nɛ amo be kekama be jeŋgreŋ la ayadra ashunu nɛ bargato m buu eshabɔrɛ na be esoso nna.

¹⁷ E daŋ wora asɔ ko nɛ e du fanɛ ŋgbɛlɛbi m mɛa abar na, be egbaŋ ashunushunu nna n deŋi eshabɔrɛ na be nwuro na be esoso,

¹⁸ nseŋ wora asɔ kulkulsobi ko nɛ a du fanɛ asɔrso nɛ baa tre pomegranates na be egbaŋ anyɔnyɔ n wea asɔ nɛ e duli ŋgbɛlɛbi na to n deŋi deŋi eshabɔrɛ na be kekama be esoso n ji amo kebita.

¹⁹ Kedɛdɛ na to be eshabɔrɛ na be nwuro na be nteŋ daa la ayadra asheshe nna, nɛ e wora ketotodibi nɛ baa tre lili na be ndulgi n deŋi amo so,

²⁰ nseŋ wora ŋgbɛlɛbi nɛ a mɛa abar be ndulgi nɛ asɔ kulkulsobi ko nɛ a du fanɛ asɔrso nɛ baa tre pomegranates na be ndulgi kalfa kalfa n deŋi deŋi eshabɔrɛ na be kekama so, n ji amo kebita.

²¹ E daŋ yuu eshabɔrɛ na be kuko bɔrɛlambu na be kabuna to be anishito be kelargato be kaseto be kaba so nɛ baa tre kumo Jakin na nna nseŋ yuu kuko malɛ kumo be kelargato be esoso be kaba so nɛ baa tre kumo alɛ Boaz na.

²² B daŋ ta nwuro nɛ a duli ketotodibi nɛ baa tre lili na nna m buu eshabɔrɛ na so, nɛ eshabɔrɛ na be kushuŋ loge.

²³ Huram daŋ lɔŋɛ danyaŋ be katishaŋgboŋ kulkulso nɛ baa tre Teku nna nɛ kumo be mpar daa sa fanɛ ayadra kuduanu, nɛ kumo be chuŋguluŋ malɛ daa sa fanɛ ayadra ashunu nɛ bargato nɛ kumo be kɔnɔkarso ŋ kulti be bumburuŋ daa la ayadra adena nɛ anu.

²⁴ B daŋ ta danyaŋ nna n wora asɔ ko fanɛ ndeŋke nɛ a bɛ abar so esoso nɛ kaseto egbaŋ anyɔ n deŋi katishaŋgboŋ na be kɔnɔkarso n chambɔ. Katishaŋgboŋ na be kɔnɔkarso be keyadra be nteŋ kikɛ daa kɔ amo be kudukudu nna.

²⁵ Katishaŋgboŋ na daa bɛ egbolu kuduanyɔ nɛ b ta danyaŋ n wora na so nna. Danyaŋ be egbolu na daŋ pal mman nna n sa abar nɛ besa kilgi anishito n shoŋi kelargato be esoso be kaba so nɛ besa malɛ kilgi n shoŋi kelargato be kaseto be kaba so nɛ besa malɛ kilgi n shoŋi epeŋitɔrkpa be kaba so nɛ besa malɛ kilgi anishito n shoŋi epeŋilarkpa be kaba so.

²⁶ Katishaŋgboŋ na be nwɔr daa sa fanɛ enɔ be epunto be mpar. Nɛ kumo be kɔnɔkarso malɛ daa du fanɛ kusɔnuunchu nseŋ naŋ to n lar kaman fanɛ atoto na. K daa beeŋ tiŋ n sɔ nchu egalɔn ŋgboŋ kudukako nɛ alfa anu.

²⁷ Huram malɛ daŋ naŋ ta danyaŋ nna n lɔŋɛ asɔ nɛ baa ta asɔ a bɛ so kudu, nɛ a kɔ aya. Amo be kekama be nteŋ daa la ayadra asheshe nna nɛ amo be jeŋgreŋ malɛ daa la ayadra anana nɛ bargato nɛ amo be mpar gba la ayadra ashe ashe.

²⁸ Ndibi baŋɛso nɛ b daŋ ta n yili teteri nseŋ ta amo be ako malɛ ŋ gbir m mata amo nɛ a yil na be akel to.

²⁹ B daŋ wora ebuluŋ nɛ egbolu nɛ emalaika anyɔ na be ndulgi nna n deŋi ndibi nɛ a yil teteri na nɛ amo nɛ b ber m mata akel to na kikɛ so nna. Awule nɛ b daŋ ta n ji kakpa nɛ b wora ebuluŋ be ndulgi n deŋi so na be esoso nɛ kaseto kikɛ kebita.

³⁰ Kusɔ nɛ baa ta asɔ a bɛ so na be kekama daa kɔ danyaŋ be aya ana nna nɛ danyaŋ be mpuliyabi fanɛ cheche be aya be mpuliyabi na. B lɔŋɛ abɛlso nna n wɔtɔ asɔ nɛ baa ta asɔ a bɛ so na be kekama be esoso be kebonfu kikɛ to nna a ta danyaŋ be ntishaŋ na a bɛso.

³¹ Kekrande kulkulso pantraŋ daa wɔ asɔ na be kekama to nna nɛ kumo be kakpa nɛ k tu n lar kusɔ na be esoso la keyadra koŋwule nɛ bargato nɛ kakpa nɛ k yuu to na malɛ la ayadra anyɔ nɛ gbrɛbi. B daŋ wora atoto be ndulgi nna n deŋi kekrande na be kɔnɔkarso na ŋ kulti. Kumo be kusɔ nɛ baa ta asɔ a bɛ so na bre gbagba daa maŋ du kulkulbi.

³² Amo be aya na be kekama be jeŋgreŋ daa la ayadra anyɔ nɛ gbrɛbi nna nɛ amo be mpuliya nɛ asɔ nɛ baa ta asɔ a bɛ so na la kukoŋwule.

³³ Aya na duli gbaŋɛturko be aya nna nɛ b ta danyaŋ n lɔŋɛ amo be anyembi nɛ mpuliyabi, nɛ kusɔ kikɛ.

³⁴ Asɔ na be kekama be kebonfu to kikɛ daa kɔ kusɔ nɛ baa pɛ to nna nɛ k tu n lar kowu.

³⁵ Amo be kekama be kɔnɔkarso daa kɔ kekrande kulkulso nɛ kumo be bumburuŋ sa fanɛ keyadra be nteŋ nna nɛ b wora asɔ ko kumo be kebonfu to m pɛ kumo ŋ keta.

³⁶ B daŋ wora atoto nɛ ebuluŋ nɛ abii be ndibi nɛ emalaika anyɔ na be ndulgi nna n deŋi asɔ na be kaplɛkama.

³⁷ B daŋ lɔŋɛ asɔ na nna nɛ amo kikɛ sasa nseŋ duli abar.

³⁸ Huram malɛ gba daŋ naŋ ta danyaŋ n lɔŋɛ ntishaŋ kudu, turko kama nɛ kumo peya. Kusɔ nɛ baa ta asɔ a bɛ so kama nɛ kumo peya. Ntishaŋgboŋ na be kekama be kpaŋgelaŋ daa sa fanɛ ayadra ashe nna, nɛ amo be kekama beeŋ tiŋ n sɔ nchu egalɔn alfa anyɔ nɛ adesa.

³⁹ E daŋ ta asɔ nɛ baa ta asɔ a bɛ so na be anu nna n yili bɔrɛlambu na be kelargato be kaseto be kaba so nseŋ ta anu nɛ a ka na malɛ n yili kelargato be esoso be kaba so nseŋ ta katishaŋgboŋ nɛ baa tre Teku na malɛ n yili kumo be kelargato be kaseto a yɔ epeŋilarkpa be kukɔlɔbi na ase be kaba so.

^40-45 Huram daŋ lɔŋɛ mpuliya nɛ eshabɔl nɛ ntishaŋ gba nna. Asɔ nɛ e daŋ nase kɔnɔ n sa ewura Sɔlɔmɔn fanɛ e beeŋ lɔŋɛ n sa bɔrɛlambu na nseŋ lɔŋɛ amo kikɛ n loge na be ako nde: Eshabɔrɛ anyɔ na nɛ amo be nwuro anyɔ nɛ a deŋ amo be esoso na, nɛ asɔ nɛ b chaŋ fanɛ ŋgbɛlɛbi nɛ a mɛa abar a deŋ shabɔrɛ na be kekama so na. Asɔ alfa ana nɛ a du fanɛ asɔrso kulkulbi nɛ baa tre amo pomegranates nɛ b ta danyaŋ n lɔŋɛ n deŋi eshabɔrɛ na be kekama so na. Asɔ nɛ baa ta asɔ a bɛ so kudu nɛ ntishaŋgboŋ kudu na nɛ Katishaŋgboŋ nɛ baa tre Teku na Edanyaŋ be egbolu kuduanyɔ nɛ katishaŋgboŋ na yil so na Mpuliya nɛ eshabɔl nɛ ntoechɛgɛto na. Huram nɛ e kɔ enɔ to be kushuŋ be kenyi ga na e daŋ lɔŋɛ asɔ ere kikɛ. Danyaŋ nɛ k bee nyɛpkɛso nɛ e daŋ ta n lɔŋɛ amo fanɛ b ta a shuŋ Enyɛnpe Ebɔrɛ be bɔrɛlambu na to fanɛ kananɛ ewura Sɔlɔmɔn ŋini fanɛ b wora na gbagba.

⁴⁶ Ewura na daŋ shin nna nɛ b ŋalga danyaŋ na nseŋ chulgi amo n wɔtɔ mpuliya nɛ b pɔr n yili lɔr nɛ baa tre Jɔɔdan na be keplasawule nɛ k wɔ Sukɔf nɛ Zereda be nferinto na to.

⁴⁷ Ewura Sɔlɔmɔn daa maŋ shin nɛ b karga asɔ nɛ b ta danyaŋ n lɔŋɛ na be egbɛ. B daŋ ta danyaŋ nna n lɔŋɛ asɔ damta hale bumo gbagba maŋ naa nyi kananɛ amo be egbɛ sa.

⁴⁸ Ewura Sɔlɔmɔn daŋ shin nna nɛ b ta shuwa n lɔŋɛ bɔrɛlambu na to be asɔwurbi. Amo e la, bɔrɛsure na nɛ teebɔl nɛ baa ta ebodobodo a deŋi so a sa Ebɔrɛ na,

⁴⁹ nɛ efitilatɔl kudu nɛ amo be anu yil acheembiana to be kakpa cheembi na be kelargato be kaseto be kaba so, nɛ anu malɛ yil kumo be kelargato be esoso be kaba so;

⁵⁰ nɛ asɔ nuunchu nɛ asɔ nɛ baa ta a duŋ efitila nɛ ntishaŋ nɛ eduwu be mba nɛ ntishaŋ nɛ b kɔ a chɔɔ ajanwulɛ na. Shuwa lela nɛ b daŋ ta n lɔŋɛ asɔ ere kikɛ.

⁵¹ Ewura Sɔlɔmɔn ka wora bɔrɛlambu na to be kushuŋ kikɛ n loge, nɛ e ta asɔ nɛ mo tuto ewura Deevid ta m bɔɔ Enyɛnpe Ebɔrɛ enɔ na n wɔtɔ bɔrɛlambu na be ebuana nɛ baa ta asɔwurbi a yili na to. Amo e la shuwa nɛ gbiti nɛ asɔ nɛ baa ta a shuŋ bɔrɛlambu na to na.