1 Bewura 6 - EBƆRƐ BE KAWƆL

Ewura Sɔlɔmɔn ka pɔr bɔrɛlambu na be asheŋ

¹ Israɛlebi ka lar Ijipt be efuli so na be nfɛ alfa ana nɛ aduburwa be kaman, nɛ Sɔlɔmɔn ka ji Israɛl be kuwura be kafɛ nasopo nɛ Hibruwebi be kafɛ to be kufɔl nyɔsopo nɛ baa tre Ziv na to nɛ ewura Sɔlɔmɔn be beshumpo fara bɔrɛlambu na be kapɔr.

² Bɔrɛlambu nɛ ewura Sɔlɔmɔn daŋ pɔr n sa Enyɛnpe Ebɔrɛ na be epunto be nteŋ daa la ayadra adekpanu nna nɛ kumo be mparto malɛ daa la ayadra adesa nɛ kumo be jeŋgreŋ malɛ daa la ayadra adena nɛ anu.

³ Bɔrɛlambu na be anishito kikɛ daa kɔ kedɛdɛ nna nɛ kedɛdɛ na be mpar daa la ayadra kuduanu.

⁴ B daŋ wora bɔrɛlambu na be etokuro nna nɛ amo be kowushina muya nɛ amo be epunto bre kpalgato.

⁵ B daŋ pɔr ebuwurbiana nɛ baa ta asɔ a wɔtɔ nna m mata bɔrɛlambu na be egbalana m bɛ abar so esoso.

⁶ Amo be kumo nɛ k wɔ kaseto na be mpar daa la ayadra ashunu nɛ bargato nna, nɛ kumo nɛ k bɛ so na malɛ be mpar daa la ayadra akpanu nɛ kumo nɛ k wɔ esoso na malɛ be mpar la ayadra kudu nɛ bargato. B daŋ yuu ndibi nna n sɔ ebuana na to saŋɛ na so amo be egbɛ maaŋ bɛ bɔrɛlambu na be egbal na so.

⁷ Ŋkpal ewura Sɔlɔmɔn ka daa maa sha akpanfu nɛ b kɔ a bure ajembu to be awɔr kakpa nɛ baa pɔr bɔrɛlambu na so, e daŋ shin nna nɛ mbe beshumpo shɛl ajembu nɛ baaŋ ta m pɔr kumo ashi kakpa nɛ baa bure ajembu to ashi kebee so be efuli so na pɔɛŋ nseŋ sulɔ amo m ba kade to.

⁸ Ebu nɛ k wɔ kaseto na be kabuna daa wɔ bɔrɛlambu na be kelargato be kaseto be kaba so nna. Ndoŋ nɛ b daŋ yili n wora diiso a yɔ ebu nyɔsopo na nɛ kesasopo na kikɛ to.

⁹ Ewura Sɔlɔmɔn ka pɔr bɔrɛlambu na be egbalana n loge nɛ e shin nɛ b ta elarbeŋ nɛ sida be ndibi baŋɛso m buu kumo so.

¹⁰ E daŋ naŋ pɔr ebuwurbiana nɛ baa ta asɔwurbiana a wɔtɔ nna m mata bɔrɛlambu na be egbal na so. Sida be ndibi be elarbeŋ nɛ b daŋ ta m buu ebuana nɛ b pɔr m mata bɔrɛlambu na so. Ebu na be kekama be jeŋgreŋ daa la ayadra ashunu nɛ bargato nna.

¹¹ Ndoŋ nna nɛ Enyɛnpe Ebɔrɛ kaŋɛ ewura Sɔlɔmɔn le:

¹² “Fo baŋ bɛ ma mbra nɛ asɔ nɛ ŋ kaŋɛ fo ere kikɛ so, meeŋ wora kusɔ kama nɛ n nase kɔnɔ n sa fo tuto ewura Deevid na n sa fo.

¹³ Meeŋ baa wɔ ma basa Israɛlebi to ashi bɔrɛlambu nɛ menyee pɔr ere to, ma alɛ maaŋ kini bumo n lɛ.”

¹⁴ Ade kikɛ be kaman nɛ ewura Sɔlɔmɔn be beshumpo pɔr bɔrɛlambu na n loge.

Kananɛ b lɔŋɛ bɔrɛlambu na be epunto be asheŋ

¹⁵ Ndibi nɛ baa tre paɛŋ na nɛ b daŋ ta n nase bɔrɛlambu na be kasawule nseŋ ta ndibi nɛ baa tre sida na malɛ n yili kasawule m mata kumo be atarbi so n ya fo kumo be epɔ to.

¹⁶ B daŋ pɔr ŋkpar to be ebu nɛ baa tre acheembiana to be kakpa cheembi na bɔrɛlambu na to nna. Sida be ndibi nɛ b daŋ ta n yili kumo be kaseto m mata kumo be atarbi so hale n ya fo kumo be epɔ to kikɛ. Kumo be nteŋ daa la ayadra adesa nna.

¹⁷ Bɔrɛlambu na be lambugboŋ na nɛ k wɔ acheembiana to be kakpa cheembi na be anishito na be nteŋ daa la ayadra adeshe nna.

¹⁸ B daŋ ta sida be ndibi nna m mata kumo alɛ gba be epunto be egbal na so ŋ kuŋ ajembu nɛ b ta m pɔr kumo na so, nseŋ wora ndeŋke nɛ atoto be ndulgi n deŋi sida be ndibi na so n ji amo kebita.

¹⁹ Bɔrɛlambu na be acheembiana to be kakpa cheembi na nɛ b ta Enyɛnpe Ebɔrɛ be ŋkre be deka na n yili.

²⁰ Ŋkpar to be ebu nɛ baa tre acheembiana to be kakpa cheembi na be nteŋ daa la ayadra adesa nna nɛ kumo be mpar gba daa la ayadra adesa nɛ kumo jeŋgreŋ la ayadra adesa. B daŋ ta shuwa lela nna m mata kumo be epunto, nɛ sida be ndibi be bɔrɛsure nɛ k yil kumo to na kikɛ so.

²¹ B daŋ ta shuwa nna m mata bɔrɛlambu na be epunto kikɛ nseŋ ta shuwa be ŋgbɛlɛbi n chɛ ŋ kuŋ acheembiana to be kakpa cheembi na be kabuna to

²² ashi bɔrɛlambu na be epunto nɛ acheembiana to be kakpa cheembi na nɛ bɔrɛsure nɛ k wɔ ndoŋ na kikɛ daŋ baa la shuwa nna.

²³ Ɔlif be kedibi nɛ b daŋ ta n lɔŋɛ asɔ anyɔ ko nɛ a du fanɛ emalaika nɛ baa tre amo chɛrubim na nseŋ ta amo n yili acheembiana to be kakpa cheembi na to. Amo be kekama be jeŋgreŋ daa la ayadra kuduanu nna.

^24-26 Asɔ anyɔ na kikɛ daŋ duli abar nna nseŋ naa sasa. Amo be kekama daa kɔ aba anyɔ anyɔ nna nɛ kekama malɛ be keba be nteŋ daa sa fanɛ ayadra ashunu nɛ bargato. Amoso yili kukoŋwule be keba ko be ekar n ya fo kuko malɛ be keba be ekar be nteŋ daa la ayadra kuduanu nna.

²⁷ B daŋ ta amo nna n yili acheembiana to be kakpa cheembi na nɛ amo be kekama parga aba to nɛ keba ko bee chute ebu na be kaba ko be egbal nɛ kuko malɛ bee chute kumo barkasa be keba ashi ebu na be nferinto.

²⁸ B daŋ ta shuwa nna m mata mata amo anyɔ na kikɛ so.

²⁹ B daŋ wora emalaika anyɔ na nɛ abii be ndibi nɛ atoto be ndulgi nna n deŋi bɔrɛlambu na be epunto nɛ kumo be ŋkpar to be ebu nɛ baa tre acheembiana to be kakpa cheembi na be egbalana kikɛ so.

³⁰ B daŋ nase kumo be kasawule malɛ kikɛ shuwa nna.

³¹ Ɔlif be kedibi nɛ b ta n lɔŋɛ acheembiana to be kakpa cheembi na be kabuna to be akuloŋgboŋ anyɔ nɛ amo be kabuna to be ndibi nɛ amo be esoso pɛlte na.

³² B daŋ wora emalaika anyɔ na nɛ abii be ndibi nɛ atoto be ndulgi nna n deŋi akuloŋ na so n ji amo kebita, nseŋ ta shuwa m mata amo nɛ emalaika anyɔ na nɛ abii be ndibi be ndulgi na kikɛ so.

³³ Ɔlif be ndibi nɛ b ta n lɔŋɛ bɔrɛlambu na gbagba be kabuna to be ndibi yuuso nɛ akuloŋana bee shiga so na.

³⁴ Paɛŋ be ndibi malɛ nɛ b daŋ ta n lɔŋɛ akuloŋ anyɔ nɛ a kɔ akulombi anyɔnyɔ na,

³⁵ nseŋ wora emalaika anyɔ nɛ abii nɛ atoto be ndulgi n deŋi amo so, nseŋ ta shuwa m mata amo kikɛ so.

³⁶ Ajembu nɛ b shɛl na nɛ b daŋ ta m pɔr bɔrɛlambu na be kelɔnɛ nɛ k wɔ kumo be anishito na be egbal asa m bɛ abar so nseŋ ta sida be ndibi n deŋi so.

³⁷ Ewura Sɔlɔmɔn ka ji kuwura be kafɛ nasopo to nɛ Hibruwebi be kafɛ to be kufɔl nyɔsopo nɛ baa tre Ziv na to nɛ b daŋ pɔr bɔrɛlambu na be gbaltɔlase na.

³⁸ Ewura Sɔlɔmɔn ka ji kuwura be kafɛ kudukakosopo to, nɛ Hibruwebi be kafɛ to be kufɔl burwasopo nɛ baa tre Buul na to nɛ b pɔr bɔrɛlambu na n loge fanɛ kananɛ b kre na gbagba chap. Nfɛ ashunu nɛ ewura Sɔlɔmɔn daŋ ta m pɔr bɔrɛlambu na n loge.