1 Bewura 5 - EBƆRƐ BE KAWƆL

Ewura Sɔlɔmɔn ka bela ase nɛ e pɔr bɔrɛlambu na be asheŋ

¹ Ewura Deevid mo teri kpakpaso e daa la Hiram nɛ e la Tayɛ be kade be ewura na, amoso e ka nu fanɛ Sɔlɔmɔn e sɔ mo tuto so n ji kuwura, nɛ e shuŋi mbe benimu fanɛ b ya chɔrɔ mo.

² Mbɔ na ka bɛta a yɔ nɛ ewura Sɔlɔmɔn ta le be kubɔya n sa fanɛ b ya sa ewura Hiram:

³ “Fo gbagba nyi fanɛ ŋkpal ana damta nɛ n tuto ewura Deevid kɔ mo doŋana na so, e daa maŋ tiŋ m pɔr bɔrɛlambu nɛ baaŋ baa bunyaŋ Enyɛnpe Ebɔrɛ kumo to na hale n ya fo saŋɛ nɛ Enyɛnpe Ebɔrɛ shin nɛ e pɔɔ mo doŋana kikɛ so.

⁴ Naniere bre Enyɛnpe Ebɔrɛ bar kayurwushi ashi ma kasawule so kikɛ. Bedoŋ na kikɛ maŋ naa wɔtɔ, amoso kayurwushi ba.

⁵ Ŋkpal Enyɛnpe Ebɔrɛ ka nase kɔnɔ n sa n tuto ewura Deevid fanɛ mbe kebia e naaŋ ba ki ewura nseŋ pɔr bɔrɛlambu nɛ baaŋ baa bunyaŋ Enyɛnpe Ebɔrɛ kumo to mbe kaman na so nɛ n yili kumo fanɛ meeŋ pɔr kumo nɛ b baa bunyaŋ Enyɛnpe ma Ebɔrɛ na kumo to.

⁶ Amoso chɛ ma to nseŋ shuŋi fo basa nɛ b yɔ Lebanɔn n ya ku ndoŋ be ndibi gboŋgboŋi nɛ baa tre sida na m bar ma. Bumo nɛ ma basa beeŋ baa shuŋ nɛ ŋ ka fo basa na kanaŋkama nɛ feeŋ sɔ ma, ŋkpal manɛ so ma basa maŋ nyi ndibi be kushuŋ fanɛ fo basa.”

⁷ Ewura Sɔlɔmɔn be kubɔya ere ka tu ewura Hiram, nɛ mbe kagbene fuli mo ga m baŋ so. Nɛ e kaŋɛ le: “Kemaŋkura e baa la Eyɛnpe Ebɔrɛ na peya ŋkpal e ka sa ewura Deevid kebianyiashempo nɛ e sɔ mo so n ji efuli lempo ere be kuwura so.”

⁸ Kumo be kaman nɛ ewura Hiram malɛ ta le be kubɔya ere n shoŋi ewura Sɔlɔmɔn. E yɛ: “N nya fo kubɔya na, ma alɛ wora shiriya nɛ n wora kusɔ nɛ fee sha na kikɛ n sa fo. Meeŋ sa fo sida be ndibi na nɛ ndibi nɛ baa tre paɛŋ na gba.

⁹ Ma beshumpo beeŋ ta ndibi na n shi Lebanɔn n yɔ Teku nɛ baa tre Mɛditerenia na ase n ya kre amo to m mata abar n deŋi nchu na so nɛ a fuŋiso a yɔ kaplɛkama nɛ fee sha fanɛ an yɛr amo. A baŋ fo kakpa nɛ fee sha na nɛ ma basa e saŋɛ amo to n nase eboŋkar nɛ fo alɛ be basa e baa ta amo ndoŋ. Kukɔ nɛ feeŋ ka ma e la kebaasa ma laŋ to ebi ajibi.”

¹⁰ Kumo be kaman nɛ ewura Hiram sa ewura Sɔlɔmɔn sida nɛ paɛŋ be ndibi nɛ e bee sha na kikɛ,

¹¹ nɛ ewura Sɔlɔmɔn malɛ bee sa ewura Hiram ayu nɛ amo be egbɛ sa fanɛ kilo ŋgboŋ ŋgboŋto be ŋgboŋ alfa anyɔ nɛ ɔlif be ŋku lela egalɔn ŋgboŋ adekpanu, kafɛ kikɛ.

¹² Enyɛnpe Ebɔrɛ daŋ bɛ mbe kɔnɔ naseso so nna nseŋ sa ewura Sɔlɔmɔn kanyiasheŋ. Ewura Hiram nɛ ewura Sɔlɔmɔn daŋ nase kagbenewushi be kɔnɔ nna n sa abar fanɛ b maaŋ kɔ abar kena kikɛ saŋɛ na so kagbenewushi beeŋ baa wɔ bumo be kefɛato.

¹³ Beshumpo ŋgboŋ adesa nɛ ewura Sɔlɔmɔn daŋ fin ashi Israɛl be efuli so kikɛ fanɛ b ku bɔrɛlambu na be ndibi.

¹⁴ Kanyɛn ko nɛ baa tre Adoniram na nɛ e daŋ lara fanɛ e baa keni beshumpo na so. Ewura Sɔlɔmɔn daŋ barga beshumpo na to ŋgboŋ kudu kudu be ntuŋ asa nna nɛ katuŋ kikɛ bee ji kufɔl koŋwule ashi Lebanɔn, nsaa ji afɔl anyɔ malɛ ashi epe.

¹⁵ E daa kɔ beshumpo ŋgboŋ aduburwa nna nɛ baa shɛl ajembu ashi kebee so be efuli na so nɛ beshumpo ŋgboŋ adushunu malɛ bee sulɔ amo a ba Jerusalɛm be kade to,

¹⁶ nɛ basa ŋgboŋ asa nɛ alfa asa malɛ bee keni beshumpo na so nɛ baa shuŋ.

¹⁷ Ewura Sɔlɔmɔn daŋ shin nna nɛ b shɛl ajembu gboŋgboŋi m pɔr bɔrɛlambu na be gbaltɔlase.

¹⁸ Ewura Sɔlɔmɔn nɛ ewura Hiram be beshumpo nɛ beshumpo nɛ b kɔ enɔ to be kushuŋ be kenyi nseŋ shi Baiblɔs be kade to na e daŋ ta ajembu nɛ b shɛl na, nɛ ndibi na nɛ b pɔr bɔrɛlambu na.