1 Bewura 4 - EBƆRƐ BE KAWƆL

Ewura Sɔlɔmɔn be benimuana be asheŋ

¹ Saŋɛ so nɛ Sɔlɔmɔn daa la Israɛl be ewura na,

² benimu nɛ e daŋ lara nde. Zadɔk pibinyɛn Azariya e daa la Bɔrɛmatapowura.

³ Shisha be mbinyɛnsobi Elihorɛf nɛ Abija e daa la demujikpa be nwɔlsibɛpoana, Ahilud pibinyɛn Jehoshafat malɛ e daa la esa nɛ e bee sibɛ asheŋ a nase kawɔl to a sa abane;

⁴ Jehowada pibinyɛn Bɛnaya e daa la benapo be enimu nɛ Zadɔk nɛ Abiata daa la bɔrɛmatapoana.

⁵ Esa nɛ e daa la abane na be abonfu abonfu be bejuŋkparpo be enimu gboŋ e daa la Neetan pibinyɛn Azariya, nɛ bɔrɛmatapo Zabud nɛ mo alɛ gba la Neetan pibinyɛn na malɛ la bewura be asoetojipo.

⁶ Ahisha malɛ e daa keni ewura be laŋ to be nyɛrbi so, nɛ Abda pibinyɛn Adoniram malɛ bee keni basa nɛ baa shuŋ eleŋ be kushuŋ na so.

⁷ Ewura Sɔlɔmɔn daŋ lara basa kuduanyɔ nna nɛ b ki abonfu nɛ a wɔ Israɛl be efuli so na be abane be benimu. Bumo e daa sa ewura na nɛ mbe laŋ to ebi ajibi. Bumo be ekoŋwule kama bee bar ajibi kufɔl lelemu nna pɔɛŋ nɛ ako malɛ e sɔ so. Baa wora loŋ kebɛso kebɛso nna kafɛ kikɛ.

⁸ Benimu kuduanyɔ na nɛ abonfu nɛ baa keni so na be atre nde. Bɛnhur e daa keni kebee so be efuli nɛ k wɔ Efrayim na be kebonfu so.

⁹ Bɛndɛka malɛ e daa keni kebonfu nɛ Maakaz nɛ Shaalbim nɛ Bɛf Shɛmɛsh nɛ Elɔn nɛ Bɛf Hanan be nde wɔ na so.

¹⁰ Bɛnhɛsɛd malɛ e daa keni kebonfu nɛ Arubof nɛ Soko nɛ Hifa be kasawule so be nde kikɛ wɔ na so.

¹¹ Bɛnabinadab nɛ e daŋ ta ewura Sɔlɔmɔn pibiche Taphaf na, e daa keni Nafaaf Dɔɔ be kebonfu be kaba na kikɛ so.

¹² Ahilud pibinyɛn Baana e daa keni kebonfu nɛ Tanaak nɛ Majido be nde wɔ na so. Mo koŋwule na e daŋ naa keni kebonfu nɛ k wɔ Bɛf Shan nɛ k mata Zeratan nɛ k wɔ Jezreel be kelargato be kaseto be kaba so, nɛ yili Bɛf Shan a yɔ Abel Mɛhola n ya fo Jokmiam be kaba so na kikɛ so.

¹³ Bɛngeba e daa keni Ramɔf be kade nɛ k wɔ Giliad na, nɛ ndewurbi nɛ a wɔ kumo be kasawule so nsaa la Jair nɛ e la Manase be kaman to ebi na peya na so. Mo koŋwule na e daŋ naa keni Agob be kebonfu nɛ k wɔ Bashan be kasawule so nsaa kɔ nde adeshe nɛ b pɔr egbal ŋ kulti amo nseŋ ta danyaŋ n lɔŋɛ amo be akuloŋgboŋana na kikɛ so.

¹⁴ Ido pibinyɛn Ahinadab e daa keni Mahanayim be kebonfu na so.

¹⁵ Ahimaaz nɛ e daŋ ta ewura Sɔlɔmɔn pibiche Basmat na, e daa keni Naftali be kebonfu na so.

¹⁶ Hushai pibinyɛn Baana e daa keni Asha be kebonfu nɛ Bialɔf be kade to so.

¹⁷ Paruwa pibinyɛn Jehoshafat e daa keni Issaka be kebonfu na so.

¹⁸ Ela pibinyɛn Shimei e daa keni Bɛnjamin be kebonfu na so.

¹⁹ Uri pibinyɛn Gɛba e daa keni Giliad be kakpa nɛ Amɔriebi be ewura Sihɔn nɛ Bashan be ewura Ɔg daa wɔ dra dra na so. Basa kuduanyɔ ere be kaman, b daa kɔ esa koŋwule nɛ e la kasawule na kikɛ so be gomena nna.

Ewura Sɔlɔmɔn be efuli be asheŋ

²⁰ Saŋɛ nɛ Sɔlɔmɔn daa la ewura na, Juda nɛ Israɛl be basa daa shibi ga nna fanɛ teku ase be shishɛr. Ama bumo kikɛ ka bee nya a ji nsaa nuu yɛlyɛla so, bumo kikɛ be ŋgbene daa fuli bumo nna.

²¹ Ewura Sɔlɔmɔn be efuli daŋ yili Yufreetes be Lɔr na ase ashi epeŋilarkpa be kaba so nna n ya fo Filisti be efuli ashi epeŋitɔrkpa, ŋ keta loŋ n ya gbuŋ Ijipt be kasawule. Loŋ be efuli na so be basa daa ka lampo nna a sa mo nsaa shuŋ mo hale nɛ e ba wu.

²² Nyifu lela ebɔtɛ kalfa nɛ ayu ebɔtɛ alfa anyɔ nɛ baa bar ewura Sɔlɔmɔn karechɛ kikɛ.

²³ Asɔ nɛ b kraa naa bar a ti so e la ana kudu nɛ b ta aboyu m bela, nɛ ana adunyɔ nɛ b ta afitiri m bela nɛ mbolpɔ nɛ mboe kalfa nɛ echibir nɛ ejafɔlɔŋɛ nɛ echibir nyɛnso nɛ ŋkoshi.

²⁴ Ewura Sɔlɔmɔn e daa ji yili Yufreetes be Lɔr na be epeŋilarkpa be kaba so be kasawule nɛ k yili Tipsa n ya fo Gaaza nɛ k wɔ epeŋitɔrkpa be kaba so na so kuwura. Bewura nɛ b daa wɔ Yufreetes be epeŋitɔrkpa be kaba so na daa shuŋ mo nna nɛ kayurwushi daa wɔ mo nɛ bumo nɛ mbe bechenashapoana be kefɛato.

²⁵ Juda nɛ Israɛl be efuli nɛ k yili Dan nɛ k wɔ kelargato be esoso n ya fo Bɛshiba ashi kelargato be kaseto kikɛ daa kɔ kayurwushi nna saŋɛ nɛ ewura Sɔlɔmɔn wɔ ŋkpa to na. Ekama nɛ mbe kanaŋ daa chena mbe kefeelebi nɛ k bee sɔr asɔrso nɛ baa tre greep na nɛ figi be ndibi be afito kagbenewushiso nna.

²⁶ Ewura Sɔlɔmɔn be egbaŋɛ nɛ baa gberge egbaŋɛturko na daa wɔ aluu ŋgboŋ adena nɛ mbe egbaŋɛ nɛ baa dii a kɔ kena malɛ daa wɔ ŋgboŋ kuduanyɔ.

²⁷ Mbe benimu kuduanyɔ nɛ baa keni mbe efuli be abonfu so na be ekama daa bar mo nɛ mbe kanaŋ ajibi kufɔl kufɔl nna a ka sa abar hale nɛ kafɛ e ba chambɔ. B daa sa ewura Sɔlɔmɔn kusɔ kama nɛ e daa sha nna.

²⁸ B daa bar ayu nɛ afitiri nna m ba kaa sa egbaŋɛ na saŋɛ nɛ k daga.

²⁹ Ebɔrɛ daŋ sa ewura Sɔlɔmɔn kanyiasheŋ nɛ asheŋ be kepinto nɛ nfɛra alegaiso nna.

³⁰ Ewura Sɔlɔmɔn daa kɔ kanyiasheŋ a chɔ epeŋilarkpa be kaba so be benyiashempo nɛ Ijipt be efuli so be benyiashempo kikɛ.

³¹ E daa nyi asheŋ a chɔ esa kikɛ ashi durnya to. E daa nyi asheŋ a chɔ Eetan nɛ e shi Ɛzra be kanaŋ to na nɛ Heman nɛ Kalkol nɛ Daada nɛ b la Mahɔl be mbinyɛnsobi na. Mbe ketre daŋ dii ga n yɔ efuli nɛ a kulti Juda nɛ Israɛl na.

³² E daŋ sibɛ aŋasa ŋgboŋ asa, nseŋ wora nshɛ kagboŋ.

³³ E daŋ malga ndibigboŋana nɛ awurbi nɛ afitiri be yiri yiri be asheŋ, nseŋ ŋini asɔbɔya nɛ mbuibi nɛ asɔ gbeyeso nɛ ekɔrɔtɔ kikɛ be asheŋ.

³⁴ Durnya be bewura kikɛ nu mbe kanyiasheŋ be asheŋ nseŋ shuŋi basa nɛ b ya nu mbe kanyiasheŋ be mmalga.