1 Bewura 3 - EBƆRƐ BE KAWƆL

Sɔlɔmɔn ka kule Ebɔrɛ n fin kanyiasheŋ be asheŋ

¹ Ewura Sɔlɔmɔn nɛ Ijipt be ewura daŋ wora kɔnɔkoŋwule nna nɛ Sɔlɔmɔn ta Ijipt be ewura na pibiche. E daŋ ta mo nna m ba chena Jerusalɛm ewura Deevid be kade to hale n ya fo saŋɛ so nɛ e pɔr mbe laŋ nɛ bɔrɛlambu na nɛ egbal nɛ k kulti Jerusalɛm na kikɛ n loge.

² Kumo be saŋɛ na nɛ b maŋ naŋ pɔr bɔrɛlambu n sa Enyɛnpe Ebɔrɛ na, ŋkpal loŋ so abee so be mboŋ ko nɛ ekama daa yɔ n ya kaa bunyaŋ Ebɔrɛ nsaa lara sarga.

³ Ewura Sɔlɔmɔn ka daa sha Enyɛnpe Ebɔrɛ ga so, e daŋ bɛ kusɔ nɛ mo tuto ewura Deevid kaŋɛ mo so nna. Mo alɛ gba daa ta asɔbɔya nna a lara sarga nsaa chɔɔ duwu ashi abee so be kakpa nɛ baa bunyaŋ Enyɛnpe Ebɔrɛ na.

⁴ Kachɛgboŋachɛ ko, e daŋ yɔ kakpa nɛ baa bunyaŋ Ebɔrɛ ashi Gibiɔn na nna n ya lara sarga bɔrɛsure nɛ keshi a chɔ amo nɛ a ka na kikɛ so. E daŋ lara esarga damta kumo so nna.

⁵ Kamɔnchɛ be kanyɛso gbagba nɛ Enyɛnpe Ebɔrɛ lara mbe kumu ŋ ŋini ewura Sɔlɔmɔn edare to m bishi mo le: “Manɛ nɛ fee sha ŋ ka wora n sa fo?”

⁶ Nɛ ewura Sɔlɔmɔn kaŋɛ Enyɛnpe Ebɔrɛ le: “Fo kasha nɛ fo kɔ n sa fo kayɛrbi, n tuto Ewura Deevid na maa chɛrga kikɛ. Mo alɛ daa la esa lela nna nsaa ji kashenteŋ a sa fo. Naniere fo shin nɛ mbe kebia yili mbe katelamu to ŋ ki ewura.

⁷ O Enyɛnpe Ebɔrɛ, fo shin nɛ n sɔ n tuto so n ji kuwura. Ama n du fanɛ kebibi nna nsaa maŋ nyi kananɛ kejuŋkpar basa be asheŋ du.

⁸ Naniere, ma nɛ fo ta ŋ ki fo basa nɛ fo lara nɛ b shibi m baŋ so kekarga na be ewura,

⁹ amoso jande sa ma kanyiasheŋ nɛ nfɛra nɛ meeŋ ta a pin kulubi nɛ kelela. Saŋɛ na so meeŋ tiŋ n ji bumo so kuwura nɛnɛ; nɛ mannɛ aloŋ, nuso nɛ meeŋ tiŋ n wora n ji fo basa damta ere kikɛ so kuwura?”

¹⁰ Kusɔ nɛ ewura Sɔlɔmɔn kule na daŋ fuli Enyɛnpe Ebɔrɛ na be kagbene ga.

¹¹ Nɛ Enyɛnpe Ebɔrɛ kaŋɛ ewura Sɔlɔmɔn le: “Fo kule kusɔ nɛ k walɛ. Fo maŋ kule kedamaya ŋko amansherbi ŋko fo doŋana be luwu ŋko ŋkpa tenteŋ n sa fo kumu ama kanyiasheŋ nɛ nfɛra nɛ fo kule ma nɛ fo tiŋ n ji ma basa nɛ n ta fo ŋ ki bumo be ewura na so kuwura nɛnɛ.

¹² Meeŋ sa fo kusɔ nɛ fo kule na. Meeŋ sa fo kanyiasheŋ nɛ nfɛra a chɔ basa kama nɛ b juŋkpar fo m ba durnya ere to nɛ bumo nɛ baaŋ ba kumo to fo kaman kikɛ.

¹³ Meeŋ ta asɔ nɛ fo maŋ kule ma gba n ti fo so. Meeŋ sa fo kedamaya nɛ amansherbi nseŋ shin nɛ fo ketre e dii a chɔ bewura kama nɛ b juŋkpar fo nɛ bumo nɛ baaŋ ba fo kaman kikɛ.

¹⁴ Nɛ fo baa nu a sa ma nsaa bɛ ma mbra so fanɛ kananɛ fo tuto ewura Deevid daa bɛ ma so na bre, ma alɛ beeŋ teŋi fo ŋkpa so.”

¹⁵ Ewura Sɔlɔmɔn ka tiŋi edi to nɛ e pin fanɛ Ebɔrɛ e daŋ malga mo kutɔ edare to. Ndoŋ nna nɛ e yɔ Jerusalɛm n ya yili Enyɛnpe Ebɔrɛ be ŋkre be deka na be anishito n lara sarga chɔɔso nɛ kɔnɔkoŋwuleso be sarga n sa Enyɛnpe Ebɔrɛ. Kumo be kaman nɛ e wora kejigboŋ n sa mbe benimuana.

Sɔlɔmɔn ka ji demu kpakpaso be asheŋ

¹⁶ Kachako nɛ beche anyɔ ko ba ewura Sɔlɔmɔn kutɔ.

¹⁷ Nɛ bumo be eko kaŋɛ le: “Yiramu, ma nɛ kache ere e wɔ laŋ koŋwule to nɛ ŋ kurge ebinyɛn ndoŋ.

¹⁸ Nchɛ asa be kefɛato nɛ mo alɛ gba kurge ebinyɛn. Anyi alɛ basa anyɔ na nawule e wɔ laŋ na to, esa kama maŋ naŋ ti anyi so ndoŋ.

¹⁹ Kachako kanyɛso nɛ kache ere wora edeselɔ ŋ gbelti n dese mbe kebia so m mɔ.

²⁰ Kumo be kaman nɛ e koso kiidiso saŋɛ nɛ n dese a di na m ba ta ma ere pibi na nseŋ ta mbe kebia nɛ e wu na m ba nase ma edesekpa.

²¹ Kare ka chɛ kachipurso nɛ mee sha kesa ma kebia kenyipo, nseŋ keni nɛ e wu. Ŋ ka keni mo nɛnɛ nɛ n wu fanɛ mannɛ m pibinyɛn na nna.”

²² Nɛ eche nyɔsopo na malɛ kaŋɛ le: “K maŋ la kashenteŋ! Kebia nɛ e maŋ wu na la meya nna, nɛ emo nɛ e wu na malɛ la feya!” Nɛ b yili ewura na be anishito a ji emɔrɔ.

²³ Ndoŋ nɛ Ewura Sɔlɔmɔn kaŋɛ le: “Menyi beche anyɔ ere kikɛ kaŋɛ fanɛ kebia nɛ e bee keni ere la men kikɛ peya nna, nɛ emo nɛ e wu na maŋ la menyi be ekama peya, ŋko?.”

²⁴ Ndoŋ nna nɛ ewura Sɔlɔmɔn shin nɛ b ya fin tokobi m bar mo,

²⁵ nɛ e kaŋɛ le: “Men ku kebia nɛ e bee keni na to nseŋ ta mbe kaba ko n sa beche na be eko n ta kuko malɛ n sa eko.”

²⁶ Ndoŋ nna nɛ kuwɔr pɛ kebia na mo nio gbagba nɛ e kaŋɛ ewura na le: “Jande, Yiramu, sa maŋ mɔ kebia na! Ta mo n sa mbarkasa na.” Ama eche nyɔsopo na bre daŋ kaŋɛ le nna: “Sa maŋ ta kebia na n sa anyi be ekama; barga mo to anyɔ n sa anyi.”

²⁷ Ndoŋ nna nɛ ewura Sɔlɔmɔn kaŋɛ le: “Men sa maŋ naŋ mɔ kebia na! Men ta mo n sa eche sososo na, ŋkpal manɛ so, mo e la kebia na mo nio gbagba.”

²⁸ Israɛl be basa ka nu kananɛ Ewura Sɔlɔmɔn ji asheŋ na nɛ b ta bunyaŋ gboŋgboŋi n sa mo ŋkpal b ka pin fanɛ Ebɔrɛ e sa mo loŋ be kanyiasheŋ nɛ e tiŋ n ji le be asheŋ kpakpaso ere nɛnɛ so.