1 Bewura 21 - EBƆRƐ BE KAWƆL

Nabɔf be asɔrso nɛ baa tre greep na be ndɔ be asheŋ

¹ Kanyɛn ko nɛ baa tre Nabɔf daa kɔ asɔrso nɛ baa tre greep na be kudɔ nna m mata ewura Ahab be laŋ ashi Jizreel.

² Kachako nɛ ewura Ahab ya kaŋɛ Nabɔf le: “Ta fo asɔrso nɛ baa tre greep na be kudɔ nɛ k mata ma laŋ na n sa ma nɛ n dɔ epofantaŋ be kudɔ. Meeŋ sa fo asɔrso nɛ baa tre greep na be kudɔ lela n tal to. Nɛ fee sha malɛ, meeŋ ka fo kanaŋkama nɛ feeŋ fa kumo n sa ma.”

³ Nɛ Nabɔf kaŋɛ ewura na le: “N nananyɛnana kutɔ nɛ n ji asɔrso be kudɔ ere be kapetɛ, amoso Ebɔrɛ e baa pete ma gba nɛ n ta kumo n sa fo!”

⁴ Nɛ ewura Ahab nya agbo m bɛta n yɔ epe nɛ kagbenejija ŋkpal kusɔ nɛ Nabɔf kaŋɛ mo na so. E ka ba epe nɛ e ba dese ŋ kilgi mbe anishito n shoŋi egbal nseŋ kini keji ajibi.

⁵ Ndoŋ nna nɛ mbe eche Jɛzebel ya bishi mo le: “Manɛ nna nɛ fo kagbene jija fo loŋ hale nɛ fo kini keji ajibi?”

⁶ Nɛ e yɛ: “Ŋkpal ŋ ka kaŋɛ Nabɔf fanɛ e fa mbe asɔrso be kudɔ n sa ma ŋko e shin nɛ n ta kuko n chɛr mo kumo, nɛ e kaŋɛ ma fanɛ e maaŋ sa ma kumo na so!”

⁷ Nɛ Jɛzebel malɛ bishi mo le: “Fo maŋ la ewura nna nsaa beeŋ tiŋ n wora kusɔ kama nɛ fee sha a? Sa maŋ shin nɛ fo kagbene e baa jija fo. Koso n ji ajibi. Meeŋ fin Nabɔf be asɔrso nɛ baa tre greep na be kudɔ na n sa fo!”

⁸ Ndoŋ nna nɛ e ta ewura Ahab be ketre n sibɛ nwɔl n ta mbe tɔɔnɛ be kebersobi n deŋi amo so nseŋ ta amo n shoŋi benimuana na nɛ bunyaŋwuraana nɛ b wɔ Jizreel nɛ k la Nabɔf be kade na to kikɛ.

⁹ Kananɛ e sibɛ nwɔl na nde: “Men lara kachɛ koŋwule m ber kebomboŋ n tre basa kikɛ n shɛr nseŋ kishi n shin nɛ Nabɔf e chena kemaŋkura be echenakpa nshɛr na to.

¹⁰ Men fin befɛpo anyɔ nɛ b yili mbe anishito ŋ ku mo kɔnɔ fanɛ e sho Ebɔrɛ nɛ ewura kikɛ kɔnɔ. Kumo be kaman nɛ men lara mo n yɔ kade na be ekarso n ya kpla mo ajembu m mɔ.”

¹¹ Ndoŋ nna nɛ benimuana na nɛ bunyaŋwuraana nɛ b wɔ Jizreel be kade na to kikɛ wora kusɔ nɛ Jɛzebel kaŋɛ na gbagba chap.

¹² B daŋ lara kachɛ koŋwule nna m ber kebomboŋ n tre basa kikɛ n shɛr ŋ kishi, nseŋ shin nɛ Nabɔf chena kemaŋkura be echenakpa nshɛr na to.

¹³ Ndoŋ nna nɛ befɛpo anyɔ ko lar n yili Nabɔf be anishito ŋ kaŋɛ fanɛ e sho Ebɔrɛ nɛ ewura na kɔnɔ. Ŋkpal loŋ so nɛ b gberge mo n lar kade na be ekarso n ya kpla mo ajembu m mɔ.

¹⁴ B ka mɔ mo n loge nɛ b ta le be kubɔya n ya sa Jɛzebel: “An kpla Nabɔf na ajembu m mɔ.”

¹⁵ Jɛzebel ka baŋ nu loŋ, epul to nɛ e ya kaŋɛ ewura Ahab le: “Nabɔf wu, amoso naniere bre feeŋ tiŋ n ya ta mbe asɔrso nɛ baa tre greep be kudɔ nɛ e kini kefa n sa fo na ŋ ki feya.”

¹⁶ Ewura Ahab ka nu loŋ, epul to nɛ e koso n yɔ nɛ e ya sɔ kudɔ na.

¹⁷ Ndoŋ nna nɛ Enyɛnpe Ebɔrɛ kaŋɛ anebi Elaija nɛ e shi Tishbe be kade to na le:

¹⁸ “Yɔ Israɛl be ewura Ahab nɛ e bee shin nɛ e sɔ Nabɔf be asɔrso be kudɔ ŋ ki mo peya na kutɔ,

¹⁹ n ya kaŋɛ mo fanɛ ma Enyɛnpe Ebɔrɛ na e naa kaŋɛ mo fanɛ naniere fo ka mɔ Nabɔf na, mbe kapetɛ e ka nɛ fo ta ŋko? Kaŋɛ mo fanɛ kakpa nɛ njɔnɔ dente Nabɔf be ŋklaŋ na, ndoŋ gbagba nɛ baaŋ dente mo alɛ gba be ŋklaŋ!”

²⁰ Ewura Ahab ka wu Elaija nɛ e kaŋɛ le: “Ma doŋ, fo wu ma a?” Nɛ anebi Elaija malɛ kaŋɛ le: “Mm, n wu fo. Fo kebaawɔtɔ to kikɛ fee wora alubi nna a gbiti Enyɛnpe Ebɔrɛ na.

²¹ Amoso Enyɛnpe na yɛ: ‘Meeŋ shin nɛ fo ji jɛrbi. Meeŋ mur fo nseŋ mur fo kanaŋ to be benimu nɛ mbia kama nɛ b la benyɛn na kikɛ.

²² Kananɛ n wora Nebat pibinyɛn ewura Jeroboam nɛ Ahija pibinyɛn ewura Baasha na, nɛ mee shin nɛ n wora fo alɛ gba, ŋkpal fo ka wɔtɔ ma agbo to nseŋ shin nɛ ma basa Israɛlebi luri kulubi to so.’

²³ Enyɛnpe Ebɔrɛ na yɛ Jɛzebel bre, njɔnɔ e naaŋ ji mbe eyur ashi Jizreel be kade ere to.

²⁴ Njɔnɔ malɛ gba e naaŋ ji fo kurgepo kama nɛ e wu kade na to nɛ ejita malɛ e ji fo kurgepoana kama nɛ b wu kupuŋ to.”

²⁵ Esa kama daa maŋ wɔtɔ loŋ be jemanɛ na nɛ kulubi bee wora mo ebel a chɔ ewura Ahab. Mbe eche Jɛzebel malɛ e daŋ shin nɛ e ki loŋ.

²⁶ Alubi nɛ a maŋ walɛ kekeni nɛ e daŋ wora, ŋkpal e ka daa shuŋ agbir fanɛ kananɛ Amɔriebi nɛ Enyɛnpe Ebɔrɛ daŋ ju dra dra kasawule na so pɔɛŋ nɛ Israɛlebi na ba sɔ kumo na daa shuŋ na so.

²⁷ Anebi Elaija ka malga n loge nɛ ewura Ahab kpɛa mbe epiŋi to nseŋ lara amo n ta kagbenejijaso be piŋi a buu kapa nɛ kanya a ŋini fanɛ mbe kagbene jija ga. E daŋ kini ajibi gba nna nseŋ gbir kenishito.

²⁸ Ndoŋ nna nɛ Enyɛnpe Ebɔrɛ kaŋɛ anebi Elaija le:

²⁹ “Fo gbagba ere wu kananɛ Ahab bar mbe kumu kaseto n sa ma nna na, amoso, m maaŋ shin nɛ jɛrbi e tu mo ama mo pibi be jemanɛ so nɛ meeŋ shin nɛ jɛrbi e ba mbe kanaŋ kikɛ so.”