1 Bewura 18 - EBƆRƐ BE KAWƆL

Anebi Elaija nɛ Baal be agbirwuraana be asheŋ

¹ Saŋɛ so nɛ ewule tɔr na be kafɛ sasopo to, nɛ Enyɛnpe Ebɔrɛ kaŋɛ anebi Elaija le: “Ta fo kumu n ya ŋini ewura Ahab pɔɛŋ nɛ n shin nɛ bɔrɛ e ba.”

² Ndoŋ nna nɛ Elaija pɛ ekpa n yɔ nɛ e ya wu ewura Ahab. Kumo be jemanɛ so nɛ akoŋgboŋ tɔr Samɛria be kade to,

³ nɛ ewura Ahab shuŋi n tre Obadaya nɛ e daa keni ewura be laŋ so na. Obadaya daa shuŋ Ebɔrɛ kashenteŋto nna,

⁴ amoso Jɛzebel ka daa mɔ Enyɛnpe Ebɔrɛ be anebiana na, Obadaya e daŋ ta bumo be basa kalfa n ya ŋana abeelaŋ anyɔ to nsaa sa bumo ajibi nɛ nchu ndoŋ. E daŋ barga bumo to basa adununu nna n wɔtɔ kebeelaŋ kama to.

⁵ Obadaya ka ba nɛ ewura Ahab kaŋɛ mo le: “Shin nɛ an yɔ efuli ere be abuye nɛ kumo be ataŋɛ kikɛ to n ya keni anyeeŋ nya afitiri ndoŋ nɛnɛ nɛ anyi be egbaŋɛ nɛ ekurma e baa ji a? Saŋɛ na so an maaŋ mɔ amo be kekama ŋkpal akoŋ so.”

⁶ Ndoŋ nna nɛ b lara kaba mo so nɛ bumo be ekama beeŋ bɔla, nɛ Ahab sɔ kaba ko nɛ Obadaya malɛ sɔ kuko.

⁷ Obadaya ka bee yɔ nɛ e ya tu anebi Elaija ekpa to m pin mo, nseŋ jɔŋɛ m bunyaŋ mo m bishi mo le: “N nyɛnpe Elaija, fo nde a?”

⁸ Nɛ Elaija kaŋɛ: “Mm, ma nna. Ya kaŋɛ fo nyɛnpe ewura Ahab fanɛ n wɔ nfe.”

⁹ Nɛ Obadaya kaŋɛ le: “Manɛ nɛ n wora fo nɛ fee sha keta ma n wɔtɔ asheŋ to nɛ Ewura Ahab e mɔ ma?

¹⁰ Enyɛnpe fo Ebɔrɛ na be ketre so nɛ mee kaŋɛ fo na fanɛ ewura Ahab nite durnya ere be kaplɛkama a fin fo. Efuli kama malɛ nɛ b fin fo n yɔ, nɛ kumo be ewura kaŋɛ fanɛ e maŋ wu fo mbe efuli so, ewura Ahab bee shin nɛ e bɔ nna fanɛ e maŋ wu fo kashenteŋto.

¹¹ Kashenteŋto, fee sha fanɛ n ya kaŋɛ n nyɛnpe fanɛ anebi Elaija wɔ nfe a?

¹² Ŋ kaŋ lar fo kutɔ, m maŋ nyi kakpa nɛ Enyɛnpe Ebɔrɛ na be kiyoyu beeŋ ta fo n yɔ. Ŋ kaŋ ya kaŋɛ Ahab fanɛ fo wɔ nfe, nɛ e maŋ wu fo nfe, e beeŋ mɔ ma. Baa nyiŋi fanɛ n fara a bunyaŋ Ebɔrɛ saŋɛ so nɛ n la kebifɔlbi kikɛ nna.

¹³ Fo maŋ nu fanɛ Jɛzebel bee mɔ Enyɛnpe Ebɔrɛ be anebiana na nna a? Ma e daŋ barga bumo be basa kalfa to basa adununu n ya ŋana abeelaŋ to nsaa yɛr ajibi nɛ nchu n ya ka sa bumo na.

¹⁴ Amoso fo ka kaŋɛ ma fanɛ n ya kaŋɛ ewura Ahab fanɛ anebi Elaija wɔ nfe ere, nɛ n wora loŋ e beeŋ mɔ ma?”

¹⁵ Ndoŋ nna nɛ anebi Elaija kaŋɛ le: “Enyɛnpetale Ebɔrɛ nɛ mee shuŋ ere be ketre to, meeŋ yɔ n ya wu ewura Ahab kabre.”

¹⁶ Ndoŋ nna nɛ Obadaya ya kaŋɛ ewura Ahab nɛ Ahab yɔ nɛ e ya tu anebi Elaija.

¹⁷ Ewura Ahab ka wu Elaija nɛ e kaŋɛ mo le: “Fo e la Israɛl kikɛ be asheŋwura na ŋko?”

¹⁸ Nɛ anebi Elaija malɛ kaŋɛ le: “M maŋ la esa nɛ mee ku asheŋ. Fo nɛ fo tuto e naa ku asheŋ, nseŋ kini kebaanu a sa Enyɛnpe Ebɔrɛ nsaa shuŋ Baal be kegbir na.

¹⁹ Kaŋɛ Israɛlebi na kikɛ nɛ b ba kebeegboŋ nɛ baa tre Kamɛl na ase m ba tu ma. Keta Baal be agbirwuraana alfa ana nɛ adunu nɛ kegbirche Ashira be agbirwuraana alfa ana nɛ baa tu ewurche Jɛzebel a ji na m ba!”

²⁰ Ndoŋ nna nɛ ewura Ahab kaŋɛ Israɛlebi na nɛ Baal be agbirwuraana na fanɛ b shɛr kebeegboŋ nɛ baa tre Kamɛl na ase.

²¹ Nɛ anebi Elaija yɔ basa na kutɔ n ya kaŋɛ bumo le: “Nchɛ afanɛ nɛ men yɛ men ta n yili men be kagbene kukoŋwule? Nɛ Enyɛnpe na e la Ebɔrɛ, men baa shuŋ mo! Nɛ Baal malɛ e la Ebɔrɛ kumo ere men baa shuŋ mo alɛ gba!” Ama basa na daa maŋ tuge shɛŋ.

²² Ndoŋ nna nɛ anebi Elaija naŋ kaŋɛ le: “Ma nawule e la Enyɛnpe Ebɔrɛ be anebi nɛ e ka, ama Baal be agbirwuraana bre wɔ alfa ana nɛ adunu.

²³ Men ta egbolu anyɔ m ba, nseŋ shin nɛ Baal be agbirwuraana e ta kukoŋwule m mɔ ŋ kuya to n deŋi ndibi so; ama b sa maŋ wɔtɔ ndibi na edɛ. Ma alɛ gba beeŋ ta gbolu nɛ k ka na n wora loŋ.

²⁴ Kumo be kaman nɛ fo shin nɛ Baal be agbirwuraana na e kule bumo be kegbir nɛ ma alɛ e kule Enyɛnpe Ebɔrɛ na. Bumo be emo nɛ e beeŋ nu kekule n shin nɛ edɛ e ba na e la Ebɔrɛ.” Nɛ basa na cha awɔr fanɛ b wora loŋ.

²⁵ Ndoŋ nna nɛ anebi Elaija kaŋɛ Baal be agbirwuraana na le: “Menyi ere ka shibi ere, men juŋkpar n ta gbolu ko n wora loŋ, nseŋ kule menyi be kegbir na, ama men sa maŋ kaŋ wɔtɔ ndibi na to edɛ.”

²⁶ Nɛ b mɔ gbolu nɛ b sa bumo na n wora kananɛ b ŋini na nseŋ yili chipurso ŋ kule bumo be kegbir Baal na hale n ya fo kapaso. Le nɛ b daa cha awɔr a kaŋɛ: “Baal, nu anyi be kekule!” B daa boŋ nshɛ nna a cha awɔr a cha a kulti bɔrɛsure nɛ b pɔr na ama b daa maŋ nu shɛŋ.

²⁷ Kapa ka fo nɛ anebi Elaija fara a wora bumo eyurto a kaŋɛ le: “Men baa kule men be kegbir na awɔrso. E ka la kegbir so, ashere e bee di nna nsaa ku edare, ŋko e yɔ nna nɛ e ya jɔŋɛ, ŋko e yɔ kade nna, ŋko e di nna m mel nseŋ daga fanɛ men tiŋi mo na!”

²⁸ Amoso agbirwuraana na daa kule awɔrso nna nseŋ ta nsaŋɛbi nɛ etokobi a ku bumo be eyurana daŋkare be ekpa so nɛ ŋklaŋ bee lar.

²⁹ B daa cha awɔr nna nsaa malga kawuliso be mmalga hale n ya fo kaaseso ama amo nɛ amo kikɛ b daa maŋ nu shɛŋ.

³⁰ Kumo be kaman nɛ Elaija kaŋɛ basa na le: “Men firgi n taga ma to.” Ndoŋ nna nɛ bumo kikɛ ba shɛr ŋ kulti mo. Nɛ e fara a lɔŋɛ Enyɛnpe Ebɔrɛ be bɔrɛsure nɛ k bure na.

³¹ Kede be kaman nɛ e ta ajembu kuduanyɔ nɛ amo be kekama yili n sa Jeekɔb, nɛ Enyɛnpe Ebɔrɛ na nase ketre Israɛl na, be mbinyɛnsobi kuduanyɔ na be ekama.

³² Loŋ be ajembu na nɛ e ta n lɔŋɛ m pɔr Enyɛnpe Ebɔrɛ be bɔrɛsure nɛ baaŋ ba lara sarga kumo so a bunyaŋ mo na. E daŋ kur kaman nɛ k beeŋ tiŋ n sɔ nchu egalɔn asa nna ŋ kulti bɔrɛsure na.

³³ Kumo be kaman nɛ e ta ndibi n deŋi bɔrɛsure na so nseŋ mɔ gbolu na ŋ kuya to n deŋi ndibi na so nseŋ kaŋɛ basa na le: “Men jɔ nchu m bɔlɔ mpuya gboŋgboŋi ana n chulgi n wurge sarga na nɛ ndibi na so.” Ndoŋ nna nɛ b wora loŋ.

³⁴ Kumo be kaman nɛ e naŋ kaŋɛ le: “Men naŋ laŋɛ n wora loŋ.” Nɛ b wora. Nɛ e naŋ kaŋɛ: “Men naŋ wora loŋ kela sasopo.” Nɛ b wora.

³⁵ Nɛ nchu na shile m bɔlɔ kaman nɛ b kur ŋ kulti bɔrɛsure na.

³⁶ Kaaseso be saŋɛ nɛ baaŋ lara sarga na ka fo, nɛ anebi Elaija yɔ bɔrɛsure na ase n ya kule Ebɔrɛ ŋ kaŋɛ le: “O Enyɛnpe, Eebraham nɛ Aizek nɛ Jeekɔb be Ebɔrɛ, shin nɛ basa ere e pin fanɛ fo e la Israɛl be Ebɔrɛ nɛ ma alɛ la fo kayɛrbi nsaa bɛ fo kɔnɔ so a wora asheŋ ere kikɛ.

³⁷ Enyɛnpe, nu ma kekule, saŋɛ na so basa ere beeŋ pin fanɛ fo Enyɛnpe na e la ma Ebɔrɛ, saŋɛ na so baaŋ kilgi bumo be ŋgbene m bɛ fo so.”

³⁸ Epul na to nɛ Enyɛnpe Ebɔrɛ shin nɛ edɛ ba chɔ sarga na nɛ ndibi na nɛ ajembu na nɛ shishɛr na, nɛ nchu nɛ a wɔ kemaŋ nɛ b kur ŋ kulti sarga na kikɛ feeto kuraa.

³⁹ Basa na kikɛ ka wu loŋ, nɛ b jɔŋɛ kasawule nseŋ boŋto ŋ kaŋɛ le: “Enyɛnpe na nawule e la Ebɔrɛ! Enyɛnpe nawule e la Ebɔrɛ!”

⁴⁰ Nɛ Elaija ponte ŋ kaŋɛ le: “Men pɛ Baal be agbirwuraana na. Men sa maŋ shin nɛ bumo be ekama e shile!” Nɛ basa na pɛ bumo kikɛ n yɔ Kishɔn be lɔr na to nɛ anebi Elaija shin nɛ b mɔ bumo kikɛ ndoŋ.

⁴¹ Kede be kaman nɛ anebi Elaija kaŋɛ ewura Ahab le: “Ya fin kusɔ ko n ji naniere bre, ŋkpal manɛ so n nu bɔrɛ ka bee gbri a ba.”

⁴² Ahab ka yɔ nɛ e ya ji, nɛ Elaija dii kebeegboŋ nɛ baa tre Kamɛl na be esoso n ya murgi n ta kumu n wɔtɔ aya to ŋ kule Ebɔrɛ.

⁴³ Kumo be kaman nɛ e kaŋɛ mbe kayɛrbi le: “Lar n ya keni Teku be kaba so.” Mbe kayɛrbi na ka ya keni, nɛ e bɛta m ba kaŋɛ anebi Elaija fanɛ mo ere maŋ wu shɛŋ. Ela ashunu kikɛ nɛ Elaija daŋ kaŋɛ mo fanɛ e ya keni.

⁴⁴ E ka ya keni kela shunusopo na nɛ e bɛta m ba m ba kaŋɛ le: “N wu kuwɔlpa ko fanɛ enɔ be epunto be mpar ka shi Teku na be kaba so a ba.” Nɛ Elaija ponte ŋ kaŋɛ mbe kayɛrbi le: “Ya kaŋɛ ewura Ahab nɛ e wora manaŋ n luri mbe gbaŋɛturko to n yɔ epe pɔɛŋ nɛ bɔrɛ ere e kuŋ mo akpa.”

⁴⁵ K maŋ chɛr ko nɛ awɔlpa to kikɛ nyɔ le gbitigbiti. Nɛ afu fara a chala nɛ bɔrɛ fara a chulgi. Ndoŋ nna nɛ Ahab luri mbe gbaŋɛturko to n shile m bɛta n yɔ Jizreel be kade to.

⁴⁶ Nɛ Enyɛnpe Ebɔrɛ be kiyoyu gbelge anebi Elaija so nɛ e lɔŋɛ mbe epiŋi ŋ kre to nseŋ shile n ya choŋ Ahab so n yɔ Jizreel be kade to.