1 Bewura 16 - EBƆRƐ BE KAWƆL

¹ Le be kubɔya nɛ Enyɛnpe Ebɔrɛ daŋ ta n sa Hanani pibinyɛn anebi Jehu fanɛ e ya sa Israɛl be efuli so be ewura Baasha:

² “Fo daa maŋ la shɛŋ nɛ n lara fo ashi fo basa to nseŋ ta fo ŋ ki ma basa Israɛlebi be ejuŋkparpo. Ama fo alɛ wora alubi fanɛ kananɛ ewura Jeroboam daŋ wora na nseŋ shin nɛ ma basa wora alubi nɛ ma agbo kaa.

³ Ŋkpal loŋ so meeŋ mur fo nɛ fo kanaŋ kikɛ, fanɛ kananɛ n wora ewura Jeroboam nɛ mbe kanaŋ na.

⁴ Njɔnɔ e naaŋ we fo kanaŋ to be esa kama nɛ e wu kade to, nɛ ejita malɛ e ji ekama nɛ wu kade na be kupuŋ to.”

⁵ B sibɛ kusɔ kama nɛ ewura Baasha wora, nɛ eleŋ nɛ e ji kikɛ be asheŋ n wɔtɔ Israɛl be bewura be adrasheŋ be nwɔl to.

⁶ Ewura Baasha ka wu Tiiza be kade to nɛ b puli mo nɛ mo pibinyɛn Ela sɔ mo so n ji kuwura.

⁷ Anebi Jehu so nɛ Enyɛnpe Ebɔrɛ bɔla n fiɛ ewura Baasha nɛ mbe kanaŋ so, ŋkpal alubi nɛ ewura Baasha daŋ wora ŋ gbiti Enyɛnpe Ebɔrɛ na fanɛ kananɛ ewura Jeroboam daŋ wora na, nɛ ŋkpal e ka mɔ Jeroboam be kanaŋ kikɛ na so nɛ Enyɛnpe Ebɔrɛ be agbo daŋ kaa ga na.

⁸ Juda be ewura Asa be kuwurji be kafɛ kuduashesopo to nɛ ewura Baasha pibinyɛn Ela ki Israɛl be ewura nseŋ ji kuwura Tiiza to nfɛ anyɔ.

⁹ Kanyɛn ko nɛ baa tre Zimri nɛ e daa la ewura Ela be benimuana na be eko nsaa keni mbe egbaŋɛturkoana be bargato so na daŋ kre keyamɔ ewura Ela nna. Kachako nɛ Ela yɔ Arza nɛ e bee keni ewura be laŋ to so na pe ashi Tiiza n ya nuu nsa m boo.

¹⁰ Ndoŋ nna nɛ Zimri luri laŋ na to m mɔ Ela nseŋ sɔ mo so n ji kuwura. Juda be ewura Asa be kuwurji be kafɛ adunyɔ nɛ ashunusopo to nɛ le be asheŋ ere kikɛ daŋ wora.

¹¹ Zimri ka baŋ ki ewura, epul na to nɛ e mɔ Baasha be kanaŋ kikɛ. E daŋ mɔ mo kurgepo nɛ mo teriana kama nɛ b la enyɛn kikɛ nna.

¹² Zimri daŋ mɔ Baasha be kanaŋ kikɛ nna, nɛ kusɔ nɛ Enyɛnpe Ebɔrɛ daŋ bɔla anebi Jehu so n fiɛ Baasha so ŋ kaŋɛ na bɔla so.

¹³ Enyɛnpe Israɛl be Ebɔrɛ na be agbo kaa ŋkpal Baasha nɛ mo pibinyɛn Ela ka daa shuŋ agbir nseŋ shin nɛ Israɛlebi wora alubi so.

¹⁴ B sibɛ kusɔ kama nɛ ewura Ela daŋ wora be asheŋ nna n wɔtɔ Israɛl be bewura be adrasheŋ be nwɔl to.

Israɛl be ewura zimri be asheŋ

¹⁵ Juda be ewura Asa be kuwurji be kafɛ adunyɔ nɛ ashunusopo to nɛ Zimri malɛ gba ji Israɛl be kuwura nchɛnshunu ashi Tiiza be kade to. Loŋ be saŋɛ nɛ Israɛl be benapo daŋ kulti Gibitɔn nɛ Filisti be efuli so be nde n wɔtɔ na.

¹⁶ B ka nu fanɛ Zimri kre ewura na kulubi nna nseŋ mɔ mo na, nɛ bumo kikɛ wora kɔnɔkoŋwule m buu bumo be benapo be enimu Omri Israɛl be kuwura.

¹⁷ Ndoŋ nna nɛ Omri nɛ mbe benapo lar Gibitɔn be kade to n ya kulti Tiiza be kade n wɔtɔ ŋ kɔ bumo kena.

¹⁸ Zimri ka wu fanɛ b kɔ m pɔɔ kade na so, nɛ e ya luri ewura be laŋ na to be kumɔlga be kakpa lempo na to nseŋ wɔtɔ laŋ na edɛ nɛ k suse so n chɔɔ mo m mɔ.

¹⁹ Asheŋ ere kikɛ daŋ ba mo so nna ŋkpal e ka daŋ wora kulubi ŋ gbiti Enyɛnpe Ebɔrɛ fanɛ kananɛ ewura Jeroboam gba wora kulubi nseŋ shin nɛ Israɛl kikɛ wora kulubi na.

²⁰ B sibɛ kusɔ kama nɛ ewura Zimri daŋ wora nɛ kananɛ e kre Ela kulubi be asheŋ nna n wɔtɔ Israɛl be bewura be adrasheŋ be nwɔl to.

Israɛl be ewura Omri be asheŋ

²¹ Ewura Zimri ka wu be kaman, nɛ Israɛlebi na barga to. Bumo be beko daa sha Ginaaf pibinyɛn Tibni ka ki ewura nna nɛ beko malɛ daa sha Omri ka ki ewura.

²² Ŋkpal Omri be basa nɛ b bɛ mo so na ka daa kɔ eleŋ ga so, b daŋ mɔ Tibni nna nɛ Omri nawule ka a ji Israɛl be kuwura.

²³ Juda be ewura Asa ka ji kuwura be kafɛ adesa nɛ kakosopo to nɛ Omri malɛ gba ki Israɛl be ewura nseŋ ji kuwura nfɛ kuduanyɔ. E daŋ ji kuwura Tiiza be kade to nfɛ ashe,

²⁴ nseŋ tɔ kebee nɛ baa tre Samɛria na gbiti be ndarbi ŋgboŋ ashe ashi kanyɛn nɛ baa tre Shema na kutɔ. Loŋ be kebee na so nɛ Omri daŋ pɔr mbe kadegboŋ nseŋ ta Shema nɛ e tɔ kebee na mo kutɔ na be ketre Samɛria n nase kumo.

²⁵ Ewura Omri be alubi nɛ e wora ŋ gbiti Enyɛnpe Ebɔrɛ daa chɔ bewura kama nɛ b juŋkpar mo na kikɛ be alubi.

²⁶ Kulubi nɛ ewura Jeroboam daŋ wora hale n shin nɛ Israɛlebi bee shuŋ agbir, nɛ Enyɛnpe nɛ e la Israɛl be Ebɔrɛ na be agbo kaa na, gbagba nɛ mo alɛ gba daŋ wora.

²⁷ B sibɛ kusɔ kama nɛ ewura Omri daŋ wora be asheŋ nna n wɔtɔ Israɛl be bewura be adrasheŋ be nwɔl to.

²⁸ Ewura Omri ka wu Samɛria nɛ b puli mo nɛ mo pibinyɛn Ahab sɔ mo so n ji kuwura.

Israɛl be ewura Ahab be asheŋ

²⁹ Ewura Asa ka ji kuwura ashi Juda be efuli so be kafɛ adesa nɛ aburwasopo be jemanɛ so nɛ ewura Omri malɛ pibinyɛn Ahab ki Israɛl be efuli so be ewura nseŋ ji kuwura Samɛria to nfɛ adunyɔ nɛ anyɔ.

³⁰ Mo alɛ gba daŋ wora alubi ŋ gbiti Enyɛnpe Ebɔrɛ na a chɔ bewura kama nɛ b juŋkpar mo na kikɛ.

³¹ Mannɛ alubi nɛ Nebat pibinyɛn Jeroboam wora na nawule be yiri nɛ Ahab daŋ wora ama e daŋ wora amo nɛ a maŋ walɛ kekeni gba nna hale n ta Sidɔn be kade to be ewura Ɛfbaal pibiche Jɛzebel ŋ ki mbe eche nsaa shuŋ bumo be kegbir nɛ baa tre Baal na gba.

³² Ahab daŋ pɔr kegbir nɛ baa tre Baal na be lambu nna nseŋ pɔr bɔrɛsure n wɔtɔ kumo to ashi Samɛria.

³³ E daŋ pɔr kegbirche Ashira gba nna n yili, nseŋ wora asheŋ lubi damta ga a chɔ Israɛl be bewura na kikɛ, nɛ Enyɛnpe nɛ e la Israɛl be Ebɔrɛ na be agbo kaa ga.

³⁴ Jemanɛ nɛ Ahab daa ji kuwura na, nɛ Heil nɛ e shi Bɛtɛl na lɔŋɛ m pɔr Jɛriko be kade na. Saŋɛ so nɛ Heil daa pɔr kade na be egbal na be gbaltɔlase, nɛ mbe wurkoŋnyɛn Abiram wu. E ka pɔr kumo be mbunagboŋ a loge na malɛ nɛ mbe kowurnyɛn Segɔb malɛ wu. Le be kesheŋ ere daŋ wora nna nɛ kusɔ nɛ Enyɛnpe Ebɔrɛ daŋ bɔla Nun pibi Joshuwa so ŋ kaŋɛ dra dra na e bɔlɔ so.