1 Bewura 12 - EBƆRƐ BE KAWƆL

Kelargato be esoso be kaba so be eyiriana na ka nyaŋɛto n wɔtɔ Rehoboam be asheŋ

¹ Rehoboam daŋ yɔ Shɛkɛm nna nɛ Israɛlebi be kelargato be esoso be kaba so be eyiriana nɛ b chala abar a jo mo ndoŋ na, e buu mo kuwura.

² Jeroboam nɛ e la Nebat pibinyɛn nseŋ daŋ shile n ya ŋana ewura Sɔlɔmɔn so ashi Ijipt be efuli so na ka nu loŋ nɛ e bɛta m ba epe.

³ Kelargato be esoso be kaba so be eyiriana na e daŋ shuŋi n tre mo, nɛ bumo nɛ mo kikɛ yɔ Rehoboam kutɔ n ya kaŋɛ mo le:

⁴ “Fo tuto ewura Sɔlɔmɔn bre daŋ tintiŋ anyi nna nseŋ shin nɛ anyee shuŋ a gben ga. Fo baŋ ku anyi be ashuŋ so nɛ anyi maŋ naa shuŋ tintiŋ be kushuŋ nɛ asheŋ bɔ n sa anyi bre, kumo ere anyi alɛ beeŋ baa shuŋ fo saŋkama.”

⁵ Nɛ Rehoboam kaŋɛ bumo le: “Men sa ma nchɛ asa nɛ n fɛ kesheŋ ere be asheŋ. Kumo be kaman nɛ men bɛta m ba nu kusɔ nɛ k wɔtɔ.” Ndoŋ nna nɛ basa na bɛta n yɔ.

⁶ Kumo be kaman nɛ Rehoboam ya bishi benimu nɛ b daa la mo tuto be besoetojipoana na le: “Manɛ nɛ menyee sha ŋ ka kaŋɛ basa ere?”

⁷ Nɛ bumo alɛ kaŋɛ le: “Fo baa wora basa ere kelela nsaa wora kusɔ nɛ baa sha a sa bumo, kumo ere bumo alɛ beeŋ baa shuŋ fo saŋkikɛ.”

⁸ Ama e daŋ kini benyɛnnimu na be kasotoji nna nseŋ ya ta mo braana mbifɔlbi, nɛ mo nɛ bumo la sarato na ŋ ki mbe besoetojipo.

⁹ Le nɛ e daŋ bishi bumo: “Manɛ be kasotoji nɛ men kɔ n sa ma? Manɛ nɛ menyee sha ŋ ka kaŋɛ basa nɛ baa kaŋɛ ma fanɛ ŋ ku bumo be kushuŋ so n sa bumo ere?”

¹⁰ Ndoŋ nna nɛ mo braana nɛ mo nɛ bumo koso kebiato na kaŋɛ le: “Kaŋɛ basa na le: ‘Men sa maa ta n tuto a ber ma.

¹¹ Nɛ n tuto daa ta ashuŋ damta a sa menyi, ma ere beeŋ naŋ wora amo keshi n ti so. Nɛ e daa ta kuchuchɔ fuloŋ a kuya menyi so, gbaŋɛ be kuchuchɔ nɛ ma ere beeŋ ta a kuya menyi so!!’ ”

¹² Nchɛ asa na ka fo nɛ Jeroboam nɛ basa na kikɛ bɛta m ba Rehoboam kutɔ fanɛ kananɛ e yili bumo na gbagba.

¹³ Rehoboam daŋ kini benyɛnnimu na be kasotoji nna nsaa malga basa na mmalga jiga,

¹⁴ fanɛ kananɛ mbrantiɛbia na kaŋɛ mo na, a kaŋɛ le: “Nɛ n tuto daa shin nɛ menyee shuŋ ga, ma ere beeŋ shin nɛ men shuŋ a chɔ loŋ. Nɛ e daa ta kuchuchɔ fuloŋ a kuya menyi so, ma ere beeŋ ta gbaŋɛ be kuchuchɔ ŋ kuya menyi so!”

¹⁵ K daa la Enyɛnpe Ebɔrɛ be kepar nna fanɛ kusɔ nɛ e bɔla anebi Ahija nɛ e shi kade nɛ baa tre Shilo na so ŋ kaŋɛ Nebat pibinyɛn Jeroboam na bɔlɔ so Kumo alɛ be loŋ so nɛ Rehoboam be shɛŋ daa maŋ wɔ basa na to na.

¹⁶ Basa na ka wu fanɛ Rehoboam maŋ nu n sa bumo na, nɛ b ponte ŋ kaŋɛ le: “Anyi nɛ ewura Deevid nɛ mbe kanaŋ maŋ kɔ shɛŋ! Manɛ nɛ b daŋ wora n sa anyi? Israɛlebi, men shin nɛ an yɔ epe! Men yige Rehoboam nɛ e baa ji mbe laŋ to ebi nawuleso kuwura. Ndoŋ nna nɛ Israɛlebi na kini kenu n sa mo

¹⁷ nɛ Juda nɛ Bɛnjamin be kaba so ebi nawule sɔ Rehoboam fanɛ bumo be ewura.”

¹⁸ Kede be kaman nɛ ewura Rehoboam shuŋi Adoniram nɛ e bee keni basa nɛ baa tintiŋ nɛ baa shuŋ na so fanɛ e ya malga Israɛlebi na kutɔ. E ka yɔ nɛ b kpa mo ajembu m mɔ. Nɛ Rehoboam nya manaŋ n luri mbe gbaŋɛturko to n shile n yɔ Jerusalɛm.

¹⁹ Baŋ yili loŋ be saŋɛ m ba fo kabre, basa nɛ b wɔ Israɛl be kelargato be esoso be kaba so na bee kini kebaanu a sa ewura Deevid be kanaŋ to ebi be kuwurji be mbra nna.

²⁰ Ndoŋ nna nɛ Israɛlebi na tre Jeroboam nɛ e shi Ijipt be efuli so m bɛta m ba Jerusalɛm na m buu mo Israɛl be kuwura. Nɛ Juda nɛ Bɛnjamin be eyiri na nawule ka a bɛ ewura Deevid be kaman to ebi so.

Shemaya be kewuŋkaŋɛ be asheŋ

²¹ Ewura Rehoboam ka ba Jerusalɛm na, nɛ e tre Bɛnjamin nɛ Juda be yiri na to be benapo lempo ŋgboŋ kalfa nɛ aduburwa m ba abar so. E daa sha keyɔ n ya kɔ Israɛl be eyiri nɛ a wɔ kelargato be esoso be kaba so na kena nna, nseŋ shin nɛ efuli na kikɛ e baa kraa la kukoŋwule.

²² Ama Enyɛnpe Ebɔrɛ na daŋ kaŋɛ anebi Shemaya na fanɛ,

²³ e ta le be kubɔya ere n sa ewura Rehoboam nɛ Juda nɛ Bɛnjamin be yiri to be basa na kikɛ.

²⁴ E yɛ: “Men sa maŋ kaŋ kɔ menyi gbagba be basa Israɛlebi kena. Menyi kikɛ e baa yɔ epe. Ma keparso nɛ le be asheŋ ere kikɛ wora na.” Nɛ b nu kusɔ nɛ Enyɛnpe Ebɔrɛ kaŋɛ bumo na nseŋ yige keyakɔ Jeroboam nɛ mbe basa kena.

²⁵ Ewura Jeroboam daŋ naŋ pɔr egbalshin nna n sɔ kumo nɛ b pɔr ŋ kulti Shɛkɛm be kade ashi Efrayim be kebee be efuli so na to nna nseŋ chena ndoŋ n ji nchɛnnyɔ. Ade kikɛ be kaman nɛ e naŋ pɔr egbalshin n sɔ egbal nɛ b pɔr ŋ kulti Penuɛl gba na to.

^26-27 Ndoŋ nna nɛ Jeroboam fɛ le: “Kananɛ asheŋ bee nite naniere, nɛ n shin nɛ ma basa bee yɔ bɔrɛlambu na to ashi Jerusalɛm n ya kaa lara esarga a sa Enyɛnpe Ebɔrɛ, baaŋ shile m bɛ Juda be ewura Rehoboam so nseŋ mɔ ma.”

²⁸ E ka fɛ loŋ n loge, nɛ e ta shuwa n lɔŋɛ egbolu fɔlbi anyɔ nseŋ kaŋɛ mbe basa na le: “Menyi be kebaayɔ Jerusalɛm n ya ka bunyaŋ Enyɛnpe Ebɔrɛ na wora kufɔ ga. Israɛlebi menyi be agbir nɛ a lara men nananyɛnana ashi Ijipt be kasawule so na nde!”

²⁹ E daŋ ta egbolufɔlbi nɛ e ta shuwa n lɔŋɛ na be kuko nna n yɔ Bɛtɛl be kade to nseŋ ta kuko malɛ n yɔ Dan be kasawule so.

³⁰ Nɛ basa na wora kulubi ŋ gbiti Ebɔrɛ ŋkpal b ka bee yɔ Bɛtɛl nɛ Dan be nde to n ya ka shuŋ agbir na so.

³¹ Ewura Jeroboam gba daŋ wora kakpa nɛ baa shuŋ agbir nna ashi abee so nseŋ lara basa nɛ b maŋ shi Livai be kanaŋ to nɛ b ki bɔrɛmatapoana.

³² Ewura Jeroboam malɛ gba daŋ naŋ yili kumo nna fanɛ b baa ji kabɔrɛshuŋ be kachɛgboŋ na kufɔl burwasopo be kachɛ kuduanusopo kikɛ fanɛ kananɛ baa ji Juda peya na. E daŋ lara esarga n sa shuwa be egbolu fɔlbi be agbir na nna ashi Bɛtɛl be bɔrɛsure na so nseŋ lara bɔrɛmatapoana n chena Bɛtɛl nɛ baa keni kagbirshuŋ be mboŋ nɛ e pɔr n yili na so.

³³ Kufɔl burwasopo be kachɛ kuduanusopo nɛ mo gbagba lara n yili fanɛ k baa la kachɛgboŋ na nɛ e yɔ Bɛtɛl n ya lara sarga bɔrɛsure na so n ji loŋ be kachɛgboŋ na nseŋ kaŋɛ Israɛlebi na fanɛ b baa ji kumo kanyiŋi so.