1 Bewura 11 - EBƆRƐ BE KAWƆL

Ewura Sɔlɔmɔn ka kini Enyɛnpe Ebɔrɛ na be asheŋ

¹ Ijipt be efuli so be ewura pibiche na be kaman ewura Sɔlɔmɔn daŋ ta efuli pɔtɛana fanɛ Hiti nɛ Mowab nɛ Ammɔn nɛ Edɔm nɛ Sidɔn be beche damta nna n ti so.

² Kashenteŋ nna fanɛ Enyɛnpe Ebɔrɛ kaŋɛ Israɛlebi na fanɛ b sa maŋ kaŋ ta efuli pɔtɛana so be beche, ŋkpal manɛ so baaŋ shin nɛ b baa bunyaŋ bumo be agbirana, ama ewura Sɔlɔmɔn kini nseŋ wora loŋ.

³ E daŋ ta bewura be mbichebi alfa ashunu a kil nsaa kɔ bejipo malɛ alfa asa. Bumo e daŋ shin nɛ e kini Ebɔrɛ.

⁴ Ewura Sɔlɔmɔn ka bel nɛ mbe beche na yɛr mo kagbirshuŋ to nɛ e daa maŋ naa ji kashenteŋ a sa Enyɛnpe mbe Ebɔrɛ na fanɛ kananɛ mo tuto ewura Deevid daŋ wora na.

⁵ Ewura Sɔlɔmɔn daa shuŋ Sidɔn be kade be kegbirche Astat nɛ Ammɔn be efuli so be kegbir Molɛk, nɛ Ebɔrɛ kishi amo be asheŋ ga na nna.

⁶ E daŋ wora alubi nna ŋ gbiti Enyɛnpe Ebɔrɛ na nsaa maa bugi kagbene a shuŋ mo fanɛ kananɛ mo tuto ewura Deevid daŋ shuŋ mo na.

⁷ Ewura Sɔlɔmɔn daŋ pɔr agbirlambu ashi Jerusalɛm be kebee na be epeŋitɔrkpa be kaba so nna nɛ baa shuŋ Mowab be efuli so be kegbir nɛ baa tre Chemɔsh na nɛ Ammɔn be efuli so be kegbir nɛ baa tre Mɔlɛk nɛ Ebɔrɛ kishi ga na.

⁸ E daŋ pɔr agbir be mboŋ nɛ mbe beche nɛ b shi efuli pɔtɛana so na bee chɔɔ duwu nsaa lara esarga a sa bumo be agbirana gba nna.

^9-10 Enyɛnpe Israɛl be Ebɔrɛ na daŋ nya agbo nna n wɔtɔ ewura Sɔlɔmɔn ŋkpal e ka daŋ lara mbe kumu ŋ ŋini mo ale anyɔ kikɛ ŋ kaŋɛ mo fanɛ e sa maŋ kaŋ shuŋ efuli pɔtɛana so be agbir kikɛ, nɛ Sɔlɔmɔn kini so so.

¹¹ Amoso le nɛ Enyɛnpe Ebɔrɛ daŋ kaŋɛ ewura Sɔlɔmɔn: “Ŋkpal fo ka kute ŋ kini ma nɛ fo be kɔnɔkoŋwule be ŋkre na nɛ ma mbra na be kebɛso so, meeŋ sɔ kuwurji na fo kutɔ n sa fo benimuana na be eko.

¹² Ama ŋkpal fo tuto ewura Deevid so, m maaŋ wora loŋ saŋɛ so nɛ fo kraa wɔ ŋkpa to ere. Jemanɛ nɛ fo pibi beeŋ ki ewura na nɛ meeŋ wora loŋ.

¹³ Ma alɛ maaŋ sɔ efuli na kikɛ mo kutɔ ŋkpal ma kayɛrbi ewura Deevid nɛ Jerusalɛm nɛ k la ma kade na so. Meeŋ yige efuli na be kaba ko n sa mo.”

Sɔlɔmɔn mo doŋana be asheŋ

¹⁴ Ade kikɛ be kaman nɛ Enyɛnpe Ebɔrɛ shin nɛ ewura Hadad nɛ e shi Edɔm be efuli so be kuwurji be kanaŋ to na nɛ ewura Sɔlɔmɔn ki bedoŋ.

^15-16 Dra dra na ewura Deevid daŋ kɔ Edɔm be efuli kena nna m pɔɔ kumo so nɛ mbe benapo be enimu Jɔab yɔ ndoŋ n ya puli basa nɛ b mɔ kena na to na kikɛ. Kumo be kaman nɛ mo nɛ mbe basa chena Edɔm afɔl ashe m mɔ enyɛn kikɛ nɛ e daa wɔ Edɔm.

¹⁷ Loŋ be jemanɛ na so nɛ ewura Hadad daa la kebia nna, nɛ mo nɛ mo tuto be nyɛrbiana ko daŋ shile n yɔ Ijipt be efuli so.

¹⁸ B daŋ yili Midian nna n yɔ Paran nɛ basa ko ya ti bumo so, nɛ b yɔ Ijipt be ewura kutɔ nɛ ewura na sa Hadad kasawule nɛ laŋ nɛ ajibi.

¹⁹ Hadad be asheŋ daŋ par Ijipt be ewura na ga nna nɛ e ta mbe eche ewurche Tapenis mo sipo n sa Hadad nɛ e ki mbe eche.

²⁰ Hadad be eche na daŋ kurge ebinyɛn nna nɛ b nase mbe ketre Genubaf. Ewurche na e daŋ bela mo nɛ Ijipt be ewura na be mbia kikɛ laŋ koŋwule to.

²¹ Hadad ka wɔ Ijipt nseŋ nu fanɛ ewura Deevid nɛ Jɔab nɛ e la Israɛl be benapo be enimu na kikɛ wu, nɛ e kaŋɛ Ijipt be ewura na le: “Shin nɛ m bɛta n yɔ ma kade to.”

²² Ndoŋ nna nɛ Ijipt be ewura na bishi mo le: “Fee sha kusɔ ko nna nɛ m mɔn fo so nɛ fee sha kebɛta n yɔ epe a?” Nɛ Hadad kaŋɛ ewura na le: “M-m, m baa sha nɛ n yɔ nna.” Nseŋ bɛta n yɔ mbe kade to.

²³ Ebɔrɛ malɛ daŋ shin nna nɛ Eliada pibinyɛn Rezɔn nɛ ewura Sɔlɔmɔn ki bedoŋ. Saŋɛ so nɛ ewura Deevid daŋ kɔ kena m pɔɔ ewura Hadadeza so nseŋ mɔ Siriya be basa nɛ b daŋ ba chɛ mo to a kɔ na nɛ Rezɔn ere daŋ shile mo nyɛnpe Zoba be ewura Hadadeza,

²⁴ n ya kaa juŋkpar basa nɛ b maa nu a sa basa na be katuŋ. Rezɔn nɛ mbe basa na daŋ ya chena Damaskɔs nna nɛ b ta mo ŋ ki Siriya be ewura.

²⁵ Ewura Sɔlɔmɔn be kuwurji be jemanɛ so kikɛ, nɛ Rezɔn nɛ Hadad la Israɛl be efuli so ebi bumo doŋ nna.

Ebɔrɛ ka nase kɔnɔ n sa Jeroboam be asheŋ

²⁶ Nebat pibinyɛn Jeroboam nɛ e shi Efrayim be kade ko nɛ baa tre Zereda nseŋ daa la ewura Sɔlɔmɔn be benimuana na be eko na gba daŋ kilgi nna ŋ ki ewura Sɔlɔmɔn mo doŋ. Mo nio Zeruwa daa la ekulpoche nna.

²⁷ Kananɛ asheŋ na daŋ nite nde. Ewura Sɔlɔmɔn daa lɔŋɛ Jerusalɛm be egbal na nna a pɔr nseŋ shin nɛ baa sulɔ ajembu a wɔtɔ kemaŋ nɛ k wɔ kumo be epeŋilarkpa be kaba so na to.

²⁸ Jeroboam malɛ daa la esa nɛ e bee pere kenishi nna a shuŋ ga. Ewura Sɔlɔmɔn ka wu kumo be loŋ na, nɛ e lara mo fanɛ e baa la beshumpo nɛ b shi Manase nɛ Efrayim be eyiri to na be ejuŋkparpo.

²⁹ Kachako, Jeroboam ka lar Jerusalɛm a yɔ kade ko, nɛ Enyɛnpe Ebɔrɛ be anebi nɛ baa tre Ahija nɛ e shi Shilo be kade to na tu mo nawule kepuŋ to kade na be ekpa to.

³⁰ Nɛ anebi Ahija bugi mbe piŋi popɔr ŋ kpɛa kumo to achɛbi kuduanyɔ,

³¹ nseŋ kaŋɛ Jeroboam le: “Ta achɛbi ere be kudu nɛ a baa la feya, ŋkpal manɛ so Enyɛnpe Israɛl be Ebɔrɛ na e naa kaŋɛ fo le: ‘Meeŋ sɔ kuwurji na ashi ewura Sɔlɔmɔn kutɔ nseŋ shin nɛ fo baa ji eyiri kudu so kuwura.

³² Ama ŋ kraa beeŋ shin nɛ Sɔlɔmɔn e baa ji efuli na be kaba ko so nɛ Jerusalɛm nɛ k la ma kade laraso ashi Israɛl be efuli so na so kuwura ŋkpal e ka la ma kayɛrbi ewura Deevid pibinyɛn na so.

³³ Meeŋ wora loŋ nna, ŋkpal manɛ so Sɔlɔmɔn kini ma nsaa shuŋ Sidɔn be kade be kegbir nɛ baa tre Astat na nɛ Mowab be efuli so be kegbir nɛ baa tre Chemɔsh na nɛ Ammɔn be efuli so be kegbir nɛ baa tre Mɔlɛk na. Sɔlɔmɔn kini kenu n sa ma, nseŋ kini ma mbra be kebɛso nɛ kebaawora asheŋ niŋiso fanɛ kananɛ mo tuto ewura Deevid daa wora na.

³⁴ Ama maaŋ sɔ efuli na kikɛ mo kutɔ. Ŋ kraa beeŋ shin nɛ e baa ji kuwura n ya fo saŋɛ nɛ e beeŋ wu, ŋkpal ma kayɛrbi ewura Deevid nɛ ŋ gbagba lara nɛ e bɛ ma mbra nɛ ma keŋini so na so.

³⁵ Ewura Sɔlɔmɔn bre pibinyɛn be enɔ to nɛ meeŋ sɔ kuwurji na nseŋ ta eyiri kudu na n sa fo,

³⁶ nseŋ shin nɛ kuwurji na be kaba ko e baa kraa wɔ Sɔlɔmɔn pibinyɛn na be enɔ to, saŋɛ na so ewura Deevid be kanaŋ to be esa beeŋ baa kraa ji kuwura ashi Jerusalɛm be kade nɛ n lara fanɛ b baa bunyaŋ ma na to.

³⁷ Ama fo ere Jeroboam bre, meeŋ shin nɛ fo nya kusɔ nɛ fo kagbene bee sha, nseŋ ki Israɛl be eyiri kudu nɛ b wɔ kelargato be esoso be kaba so na be ewura.

³⁸ Nɛ fo baa bɛ ma mbra kikɛ so, nsaa wora kusɔ nɛ mee kaŋɛ, fanɛ kananɛ ma kayɛrbi ewura Deevid daa wora na bre, ma alɛ beeŋ baa wɔ fo kutɔ saŋkikɛ. Meeŋ shin nɛ fo ki Israɛl be ewura nɛ fo kaman to ebi gba e baa kaa ji kuwura fanɛ kananɛ n wora Deevid na.

³⁹ Ŋkpal Sɔlɔmɔn be kulubi nɛ e wora ere so, meeŋ gberge ewura Deevid be kaman to ebi kusoe n ya fo jemanɛ ko.’ ”

⁴⁰ Ewura Sɔlɔmɔn ka nu kusɔ nɛ Enyɛnpe Ebɔrɛ kaŋɛ Jeroboam na nɛ e bee sha kemɔ mo nɛ Jeroboam shile n yɔ Ijipt be efuli so n ya ŋana ewura Shishak kutɔ hale nɛ ewura Sɔlɔmɔn ya wu.

⁴¹ B daŋ sibɛ ewura Sɔlɔmɔn be kushuŋ be asheŋ nɛ mbe kanyiasheŋ nɛ e kɔ nɛ kusɔ nɛ e wora kikɛ be asheŋ nna n wɔtɔ Sɔlɔmɔn be adrasheŋ be nwɔl to.

⁴² Nfɛ adena nɛ ewura Sɔlɔmɔn daŋ ji Israɛl be kasawule so kikɛ be kuwura ashi Jerusalɛm to.

⁴³ E ka wu nɛ b puli mo Jerusalɛm nɛ baa tre ewura Deevid be kade to na nɛ mo pibi Rehoboam sɔ mo so ŋ ki ewura.