1 Bewura 10 - EBƆRƐ BE KAWƆL

Shɛba be ewurche ka ba chɔrɔ ewura Sɔlɔmɔn be asheŋ

¹ Shɛba be efuli so be ewurche ka nu kananɛ ewura Sɔlɔmɔn be ketre dii ga na, nɛ e yɔ Jerusalɛm nɛ e ya wora mo ŋ keni.

² E daŋ keta mbe benimu damta ko nna nseŋ kre asɔ nɛ a kɔ efɛa belbelso nɛ yawu kpakpaso be abitasɔ nɛ shuwa damta ko n deŋi enyɔma so n yɔ. E ka ya fo nɛ mo nɛ ewura Sɔlɔmɔn malga asheŋ nɛ a wɔ mbe nfɛra to kikɛ.

³ Ewura Sɔlɔmɔn daŋ sa mmalga nɛ e bishi mo na kikɛ be atuwebi nna. Asheŋ bishiso na be kekama be ketuwebi daa maŋ du ewura Sɔlɔmɔn so kpakpa.

⁴ Shɛba be ewurche na daŋ nu ewura Sɔlɔmɔn be kanyiasheŋ be mmalga nseŋ wu mbe laŋ gboŋ nɛ e pɔr na gba.

⁵ E ka wu ajibi nɛ b chige n yili ewura Sɔlɔmɔn be teebɔl so na, nɛ ebuana nɛ mbe benimuana wɔtɔ na, nɛ kananɛ ewura be laŋ na to be beshumpo be asheŋ bee bɛ abar so nɛnɛ na, nɛ epiŋi nɛ nyɛrbi nɛ baa chige ajibi bee buu na, nɛ k chinchiŋ mo alegaiso.

⁶ Le nɛ ewurche na daŋ kaŋɛ ewura Sɔlɔmɔn: “Kusɔ nɛ n nu ma efuli so ashi fo kaplɛa so nɛ kanyiasheŋ nɛ fo kɔ na be asheŋ kikɛ la kashenteŋ nna!

⁷ N daa maŋ yirda kumo be loŋ ama ŋ gbagba ka ba wu kumo be kashenteŋ ere pɔɛŋ nɛ n yirda. N daŋ maŋ nu fo kanyiasheŋ nɛ fo kedamaya ere be asheŋ be bargato gba. Naniere kusɔ nɛ n nu ere chɔ kananɛ n nu kumo be asheŋ basa kutɔ na ga.

⁸ Basa nɛ baa shuŋ fo nsaa wɔ fo kutɔ saŋkikɛ a nu fo kanyiasheŋ be mmalga na, nu ebel pasaa!

⁹ Kemaŋkura e baa la Enyɛnpe fo Ebɔrɛ na peya. Mbe kagbene fuli fo so ga nna so nɛ e ta fo ŋ ki Israɛlebi be ewura nɛ fo baa ji bumo so eleŋ. Ŋkpal kasha nɛ e kɔ n sa mbe basa Israɛlebi na ka maŋ kɔ ekar so, nɛ e ta fo ŋ ki bumo be ewura nɛ fo baa ji asheŋ nɛ amo be ekpa so nsaa wora asɔ nɛ a niŋi ekpa a sa bumo na.”

¹⁰ Ewurche na daŋ ta shuwa kilo ŋgboŋ ana nɛ yawu kpakpaso be abitasɔ damta nɛ asɔ nɛ a kɔ efɛa belbelso nɛ amo be efɛa maŋ kɔ sara nna m ba sa ewura Sɔlɔmɔn. Yawu kpakpaso be asɔ nɛ a kɔ efɛa belbelso kikɛ daa maŋ walɛ fanɛ amo nɛ Shɛba be ewurche na ta m ba sa ewura Sɔlɔmɔn na.

¹¹ Ewura Hiram nɛ e daa la kadegboŋ nɛ baa tre Tayɛ na be ewura be ekuloŋgboŋana nɛ a shi Ɔfir na gba daŋ sulɔ shuwa nɛ ndibi nɛ baa tre Junipa na be abaŋɛso nɛ yawu kpakpaso be abitasɔ nna m ba.

¹² Ewura Sɔlɔmɔn daŋ ta ndibi na nna n lɔŋɛ bɔrɛlambu na nɛ ewura be laŋ be asɔ nɛ baa bɔla so a dii a luri amo to na, nseŋ ta amo be ako n lɔŋɛ ejaŋjilaŋ nɛ ejirgo n sa beshɛbompoana. Amo e daa la junipa be ndibi lela nɛ b daŋ shi efuli so m bar Israɛl be efuli so. B maŋ naŋ bar loŋ be ndibi Israɛl be efuli so kikɛ hale kabre.

¹³ Ewura Sɔlɔmɔn daŋ sa Shɛba be ewurche na kakɛ nɛ baa sa befɔ na nna nseŋ naŋ sa mo kusɔ kama nɛ e bee sha n ti so. Asɔ nɛ ewura Sɔlɔmɔn daŋ sa mo na daa chɔ kakɛ nɛ ewurche na bar mo na. Ndoŋ nna nɛ ewurche na nɛ mbe basa bɛta n yɔ Shɛba.

¹⁴ Kafɛ kikɛ ewura Sɔlɔmɔn daa nya shuwa kilo ŋgboŋ adunyɔ nɛ asa nna ashi lampo nɛ e bee sɔ to.

¹⁵ Eyawujipo nɛ benitepo be kusɔ nɛ baa sa mo bre maŋ ti so. Areebia be efuli so be bewura nɛ Israɛl be efuli so be abonfu be gomena be benimu gba daŋ ba sa mo shuwa nna.

¹⁶ Ewura Sɔlɔmɔn daŋ lɔŋɛ abɛlso be asɔkuŋso gboŋgboŋi nɛ benapo bee keta na be alfa anyɔ nɛ b bɛa shuwa nɛ amo be egbɛ sa fanɛ kilo ashunu m mata amo be kukoŋwule kikɛ so.

¹⁷ E daŋ wora asɔkuŋso wurbi alfa asa nɛ b bɛa shuwa nɛ amo be egbɛ sa fanɛ kilo anyɔ m mata amo alɛ gba be kekama so. E daŋ shin nna nɛ b ta asɔkuŋso na kikɛ n yili ewura be laŋ to be ebugboŋ nɛ baa tre Lebanɔn be kupo na to.

¹⁸ Kusɔlnyi nɛ b daŋ ta n lɔŋɛ mbe echenakpa nseŋ ta shuwa lela malɛ m mata mata kumo so.

^19-20 Diiso nɛ baa dii a fo kuwurputi na be echenakpa na la ateŋgreŋ ashe nna, nɛ buluŋ be kapɔrduli yil kuwurputi na be kaba kama so. B daŋ ta shuwa nna m mata mbe aya ase nɛ echenakpa na be kakpa nɛ mbe aya bee deŋi so kikɛ la shuwa. Efuli kama be kuwurji maŋ naŋ ji eleŋ durnya ere to fanɛ kumo.

²¹ Shuwa lela nɛ b daŋ ta n lɔŋɛ ewura Sɔlɔmɔn be asɔ nuunchu nɛ laŋ to be asɔjito nɛ a wɔ mbe laŋ to be ebugboŋ nɛ baa tre Lebanɔn be kupo na to. Ewura Sɔlɔmɔn be jemanɛ so, b daa maa keni gbiti a bɔlɔ kenishi ŋkpal shuwa ka daŋ chase kaplɛkama so.

²² Ewura Sɔlɔmɔn daa kɔ nchu so be ekuloŋgboŋ damta nna, nɛ amo nɛ ewura Hiram be nchu so be ekuloŋgboŋ bee nite nchu so. Nfɛ asa kikɛ mbe nchu so be ekuloŋgboŋ na daa sulɔ shuwa nɛ gbiti nɛ asɔlnyii nɛ enyare nɛ efɛate nna a ba.

²³ Ewura Sɔlɔmɔn daa kɔ kedamaya nɛ kanyiasheŋ a chɔ ewura kikɛ durnya to.

²⁴ Durnya to be bewura kikɛ daa fin kananɛ baaŋ baa ba mo kutɔ nna m ba kaa nu mbe kanyiasheŋ be mmalga nɛ Ebɔrɛ ta n sa mo na be asheŋ.

²⁵ Bewura kama nɛ b ba mo kutɔ daa bar mo kakɛ nna. Beko daa bar mo gbiti nɛ shuwa nɛ epiŋi tenteŋ nɛ adoŋsɔ nɛ asɔ nɛ a kɔ efɛa belbelso nɛ egbaŋɛ nɛ ekurma nna. Loŋ nɛ bekama nɛ baa ba mo kutɔ kafɛ kafɛ kikɛ na daa wora.

²⁶ Mbe egbaŋɛturko nɛ egbaŋɛ daŋ baa wora keshi nna hale m ba fo egbaŋɛturko kagboŋ nɛ alfa ana nɛ egbaŋɛ malɛ ŋgboŋ kuduanyɔ. E daŋ yige beko Jerusalɛm nna nseŋ yige beko malɛ ndegboŋ na be ako to.

²⁷ Saŋɛ so nɛ e daa ji kuwura na, gbiti bre daŋ gbigi nna fanɛ ajembu ashi Jerusalɛm be kade to nɛ ndibi nɛ baa tre sida na gba daŋ baŋ gbigi fanɛ ndibi nɛ baa tre sikamɔɔ nɛ a wɔ Juda be abee be efuli so na.

²⁸ Ijipt nɛ efuli pɔtɛana so nɛ ewura Sɔlɔmɔn daa tɔ mbe egbaŋɛ.

²⁹ Gbiti be ndarbi alfa ashe nɛ b daŋ tɔ mbe gbaŋɛturko na be kekama nseŋ tɔ gbaŋɛ kama malɛ gbiti be ndarbi kalfa nɛ adunu. Ijiptebi e daa fa egbaŋɛ nɛ egbaŋɛturko a sa Hitebi nɛ Siriyaebi be bewura gba.