1 Bewura 1 - EBƆRƐ BE KAWƆL

Ewura Deevid be mbel to be saŋɛ be asheŋ

¹ Ewura Deevid daŋ bel ga nna, amoso b ka ta ata m buu mo so gba nɛ awo kraa luri mo to nna.

² Ndoŋ nna nɛ mbe benimu kaŋɛ mo le: “Yiramu, shin nɛ an fin kasuŋgurbia nɛ e ba kaa keta fo. E beeŋ baa dese a mata fo saŋɛ na so awo maaŋ naa luri fo to.”

³ Kumo be kaman nɛ b luri Israɛl be efuli kikɛ to a fin kasuŋgurbia nɛ e walɛ kebita ga nseŋ ya wu kebichebi ko nɛ baa tre Abishag nɛ e shi kade nɛ baa tre Shunɛm na, nseŋ keta mo m ba sa ewura na.

⁴ Kebichebi na daa keta ewura na nɛnɛ ga ama mo nɛ mo daa maŋ di keche nɛ kenyɛn.

Adonija ka bee fin k ki ewura be asheŋ

^5-6 Absalɔm ka wu na nɛ ewura Deevid be eche Hagif pibinyɛn Adonija ki ewura Deevid pibinyɛn nimuso. Mo e daa bɛ Absalɔm so nseŋ daa walɛ kayɛrbi ga. Kachako nɛ e yili kumo fanɛ e beeŋ ta mbe kumu ŋ ki ewura. Ndoŋ nna nɛ mo gbagba fin egbaŋɛturko nɛ egbaŋɛ nseŋ ta benapo adunu fanɛ b baa kuŋ mo. Mo tuto, ewura Deevid, malɛ daŋ maŋ bishi mo kusɔ nɛ k ba nɛ e bee wora loŋ, ŋkpal manɛ so, e maŋ naŋ fiɛ mo so kikɛ.

⁷ Adonija daŋ ya kaŋɛ Jɔab nɛ mo nio daa la Zeruwa na, nɛ bɔrɛmatapo Abiata kesheŋ nɛ e bee sha nɛ e wora na nna nɛ b shuli m bɛ mo so.

⁸ Ama bɔrɛmatapo Zadɔk nɛ Jehowada pibinyɛn Bɛnaya nɛ anebi Neetan nɛ Shimei nɛ Rei nɛ enapo nɛ e bee kuŋ ewura Deevid na bre daa maŋ bɛ kusɔ nɛ Adonija kaŋɛ na so.

⁹ Kachako nɛ Adonija ta mbolpɔ nɛ egbolu nɛ anafɔlbi nɛ b daa walɛ eyurto n lara sarga ashi kefalta nɛ baa tre ‘Kuwɔ’, nɛ k mata kebuye nɛ baa tre Enrogɛl na ase. E daŋ tre mo sipo nyɛnsobiana nɛ ewura Deevid be benimuana nɛ b shi Juda na nna m ba loŋ be sarga be kejigboŋ na to.

¹⁰ Ama e daa maŋ tre mo sipo Sɔlɔmɔn nɛ bɔrɛmatapowura Neetan nɛ Bɛnaya nɛ ewura Deevid be enapo nɛ e bee kuŋ mo na bre.

B ka buu Sɔlɔmɔn kuwura be asheŋ

¹¹ Anebi Neetan ka nu kumo nɛ e ya bishi Sɔlɔmɔn mo nio Bɛshiba le: “Fo nu Hagif pibinyɛn Adonija ka buu mo gbagba be kumu kuwura nɛ ewura Deevid gba maŋ nyi kumo be asheŋ a?

¹² Nɛ fee sha kumɔlga fo kumu nɛ fo pibinyɛn Sɔlɔmɔn bre, kumo ere meeŋ ji fo asoeto nna

¹³ nɛ fo yɔ ewura Deevid kutɔ n ya bishi mo le: ‘Yiramu, fo maŋ nase kɔnɔ n sa ma fanɛ fo kaman m pibinyɛn Sɔlɔmɔn e naaŋ ba ji kuwura a? Nɛ manɛ e ba nɛ Adonija teŋ ta mbe kumu ŋ ki ewura naniere?’

¹⁴ Saŋɛ so nɛ fee malga ewura Deevid kutɔ na, ma alɛ beeŋ ba m ba ji kusɔ nɛ fee kaŋɛ na be shɛda.”

¹⁵ Ewura Deevid daa wɔ ebuŋkpar to nna nɛ Abishag nɛ e shi kade nɛ baa tre Shunɛm na wɔ ndoŋ a keni mo so ŋkpal e ka bel ga so.

¹⁶ Nɛ Bɛshiba ya jɔŋɛ ewura na ase bunyaŋ so, nɛ ewura Deevid bishi mo le: “Manɛ nɛ fee sha nɛ n wora n sa fo?”

¹⁷ Nɛ Bɛshiba kaŋɛ: “Yiramu, fo nase kɔnɔ ashi Enyɛnpe fo Ebɔrɛ na be ketre to fanɛ fo kaman, m pibinyɛn Sɔlɔmɔn e naaŋ ki ewura.

¹⁸ Ama Adonija teŋ ta mbe kumu ŋ ki ewura nɛ fo alɛ maŋ nyi kumo be asheŋ.

¹⁹ E ta egbolu nɛ mbolpɔ nɛ ana fɔlbi nɛ b daŋ a walɛ eyurto damta n lara sarga nseŋ tre bɔrɛmatapo Abiata nɛ Jɔab nɛ e la fo benapo be enimu na nɛ fo mbinyɛnsobiana kikɛ kejigboŋ na to, she fo pibinyɛn Sɔlɔmɔn nawule.

²⁰ Yiramu, Israɛl be basa kikɛ bee jo nna nɛ fo kaŋɛ bumo esa nɛ e beeŋ ki ewura fo kaman.

²¹ Fo baa maŋ wora loŋ pɔɛŋ nseŋ ta fo anishi ŋ ŋana, kumo ere Adonija beeŋ ta ma nɛ m pibinyɛn Sɔlɔmɔn ŋ ki bedoŋ nseŋ mɔ anyi.”

²² E kraa malga nna nɛ anebi Neetan ba ewura be laŋ to.

²³ Nɛ esa ko ya kaŋɛ ewura Deevid fanɛ anebi Neetan ba. Ndoŋ nna nɛ Neetan yɔ ewura na kutɔ n ya jɔŋɛ m bunyaŋ mo.

²⁴ Kumo be kaman nɛ e bishi le: “Yiramu, fo e kaŋɛ fanɛ fo kaman Adonija e naaŋ ki ewura n chena fo mputi so a?

²⁵ Kabre chipur ere e ta egbolu nɛ mbolpɔ nɛ ana nɛ b daŋ a walɛ eyurto damta n ya lara sarga nseŋ tre fo mbinyɛnsobi kikɛ nɛ fo benapo be enimu Jɔab nɛ bɔrɛmatapo Abiata nɛ bumo kikɛ wɔ ndoŋ a ji bumo be eyur nsaa cha awɔr a kaŋɛ le: ‘Ebɔrɛ e sa ewura Adonija ŋkpa tenteŋ!’

²⁶ Ama e maŋ tre ma nɛ bɔrɛmatapo Zadɔk nɛ Bɛnaya nɛ Sɔlɔmɔn bre.

²⁷ Yiramu, fo e yili kumo be loŋ nsaa maŋ kaŋɛ fo benimuana kikɛ nɛ b pin esa nɛ e beeŋ ji kuwura fo kaman a?”

Ewura Deevid ka ta Sɔlɔmɔn ŋ ki ewura be asheŋ

²⁸ Ndoŋ nna nɛ Ewura Deevid kaŋɛ le: “Bɛshiba nu nfe.” Ndoŋ nna nɛ Bɛshiba firgi n taga ewura Deevid to.

²⁹ Nɛ e kaŋɛ mo le: “Ŋkpal Ebɔrɛ nɛ e wɔ ŋkpa to na ka lara ma ashi etɔrɔ kikɛ to so,

³⁰ kɔnɔ nɛ n nase ashi Enyɛnpe Israɛl be Ebɔrɛ na be ketre to fanɛ ma kaman Sɔlɔmɔn e naaŋ ki ewura na, beeŋ bɔlɔ so.”

³¹ Nɛ Bɛshiba jɔŋɛ mo ase ŋ kaŋɛ: “Ebɔrɛ e teŋi fo ŋkpa so Yiramu!”

³² Kede be kaman nɛ Ewura Deevid shuŋi n tre Zadɔk nɛ Neetan nɛ Bɛnaya. B ka ba,

³³ nɛ e kaŋɛ bumo le: “Men keta ma benimuana ere be beko n ya shin nɛ m pibi Sɔlɔmɔn e dii ŋ gbagba be kurma n chena so nɛ men bɛ mo so ŋ keta mo n yɔ kebuye nɛ baa tre Gihɔn na ase,

³⁴ nɛ bɔrɛmatapo Zadɔk nɛ anebi Neetan e ya chulgi ŋku n do mbe kumu so m buu mo Israɛl be kuwura. Kumo be kaman nɛ men shin nɛ b foŋ kabel n shin nɛ ekama e cha awɔrso ŋ kaŋɛ le: ‘Ebɔrɛ e sa ewura Sɔlɔmɔn ŋkpa tenteŋ!’

³⁵ Men kaŋ wora loŋ n loge nɛ men bar mo nfe nɛ e ba chena ma kuwurputi so n yili ma katelamu to a ji kuwura, ŋkpal manɛ so, mo nɛ n lara fanɛ e baa la Israɛl nɛ Juda be efuliana kikɛ so be ewura.”

³⁶ Nɛ Bɛnaya kaŋɛ: “Anyeeŋ wora loŋ yeramu. Enyɛnpe Ebɔrɛ nɛ e la anyi be ewura be Ebɔrɛ na e shin nɛ loŋ e wora.

³⁷ Enyɛnpe Ebɔrɛ na e baa wɔ Sɔlɔmɔn gba kutɔ fanɛ kananɛ e daŋ baa wɔ fo kutɔ na, nseŋ shin nɛ mbe kuwurji e baa kɔ eleŋ ga a chɔ feya gba.”

³⁸ Ndoŋ nna nɛ bɔrɛmatapo Zadɔk nɛ anebi Neetan nɛ Bɛnaya nɛ benapo nɛ baa kuŋ ewura Deevid na shin nɛ Sɔlɔmɔn chena ewura Deevid be kurma so nɛ b keta mo n yɔ kebuye nɛ baa tre Gihɔn na ase.

³⁹ Ndoŋ nɛ bɔrɛmatapo Zadɔk nɛ anebi Neetan chulgi ɔlif be ŋku nɛ b ta ashi Enyɛnpe be wajɛbu na to na n wurge Sɔlɔmɔn be kumu so n buu mo kuwura nseŋ foŋ kabel nɛ basa na cha awɔrso ŋ kaŋɛ: “Ebɔrɛ e sa ewura Sɔlɔmɔn ŋkpa tenteŋ!”

⁴⁰ Kumo be kaman nɛ bumo kikɛ bɛ Sɔlɔmɔn so a foŋ nlopi a boŋ nshɛ awɔrso m bɛta a yɔ Jerusalɛm hale nɛ bumo be awɔr na shin nɛ kasawule bee gbuŋgbuŋ.

⁴¹ Saŋɛ nɛ Adonija nɛ basa nɛ e tre mbe kejigboŋ na to ji a loge na nɛ b nu awɔr na. Jɔab ka nu kabel na be kushu, nɛ e bishi le: “Manɛ be awɔr e naa cha kade to le?”

⁴² E kraa malga nna nɛ bɔrɛmatapo Abiata pibinyɛn Jonatan ba ndoŋ. Nɛ Adonija kaŋɛ mo le: “Fo maŋ la esa fɔmbi, amoso feeŋ baa kɔ baru lela ko a bar anyi.”

⁴³ Nɛ Jonatan kaŋɛ: “Mannɛ baru lela kikɛ nna. Anyi be ewura Deevid ta Sɔlɔmɔn nna ŋ ki ewura.

⁴⁴ E shuŋi bɔrɛmatapo Zadɔk nɛ anebi Neetan nɛ Bɛnaya nɛ basa nɛ baa kuŋ mo na nna nɛ b ya ta mo n chena ewura be kurma so m ba,

⁴⁵ nɛ Zadɔk nɛ Neetan duga ŋku n do mo so m buu mo kuwura ashi Gihɔn be kebuye na ase. Nɛ basa na cha awɔr kagbenefuliso m bɛta n luri kade na to nɛ awɔr sɔ kaplɛkama. Loŋ be awɔr na nɛ fo nu na.

⁴⁶ Naniere Sɔlɔmɔn e ki ewura.

⁴⁷ Hale ewurkpa be benimuana na ya chɔrɔ ewura Deevid nseŋ kaŋɛ mo le: ‘Fo Ebɔrɛ na e shin nɛ Sɔlɔmɔn be kuwurji e baa kɔ eleŋ a chɔ feya, nseŋ shin nɛ mbe ketre gba e dii a chɔ feya, nɛ mbe kedamaya gba e ba chɔ feya.’ Nɛ Ewura Deevid gba chena gedo so ŋ kurge kumu n yuu to

⁴⁸ ŋ kule Ebɔrɛ ŋ kaŋɛ le: ‘Kemaŋkura e baa la Enyɛnpe Israɛl be Ebɔrɛ na peya. Mo e shin nɛ n chena n wu esa nɛ e beeŋ sɔ ma so n ji kuwura!’ ”

⁴⁹ Adonija nɛ basa nɛ mo nɛ bumo tase a ji na ka nu loŋ na nɛ kufu pɛ bumo nɛ bumo kikɛ janto nɛ ekama pɛ mbe ekpa n choŋ.

⁵⁰ Nɛ kufu pɛ Adonija, ŋkpal e ka bee fɛ fanɛ Sɔlɔmɔn beeŋ mɔ mo so nɛ e shile n yɔ Enyɛnpe be wajɛbu na ase n ya pɛ bɔrɛsure na be abonfu nɛ a duli alambɛ na to ŋ keta ŋ kuŋ mbe kumu.

⁵¹ B ka kaŋɛ Sɔlɔmɔn fanɛ Adonija bee ŋana mo nseŋ shile n ya pɛ bɔrɛsure na be abonfu to be asɔ nɛ a duli kusɔbɔya be alambɛ na to ŋ keta nseŋ kaŋɛ fanɛ ewura Sɔlɔmɔn e nase kɔnɔ n sa mo fanɛ e maaŋ mɔ mo.

⁵² Nɛ Sɔlɔmɔn malɛ kaŋɛ le: “Nɛ e beeŋ bɛ ma so bre, m maaŋ yuu mo kukuti gba; ama nɛ e maaŋ wora loŋ bre, e beeŋ wu.”

⁵³ Kede be kaman nɛ ewura Sɔlɔmɔn shuŋi nɛ b ya keta Adonija bɔrɛsure na ase m ba. Adonija ka ba jɔŋɛ ewura Sɔlɔmɔn ase nɛ ewura Sɔlɔmɔn kaŋɛ mo fanɛ e baa yɔ epe.