تیتوس 3 - کتاب مقدس به زبان گیلکی - گویش رشت و غرب گیلان

هر خُبِ کارِ ره آماده بیبید

¹ اوشانِ یاد باور کی حاکمان و صاب منصبانِ فرمانبر بیبید، و هر خُبِ کارِ ره آماده بیبید،

² هیکّسِ بدَ نیگید، دعوا نیگیرید، آرام بیبید و تمان مردومِ امرا اَدبِ مَرا رفتار بُکونید.

³ چونکی اَمانم ایی زمات نادان بیم، نافرمان و گُمراه بیم، همه جور هوا و هوس و خوشی ئانِ نوکر بیم، حسودی و کینه درون زیندگی کودیم. مردوم اَمی جا خفت داشتید و امان همدیگرِ جا.

⁴ ولی اُ زمات کی اَمی نجات دهنده خُدا مهربانی، و اونِ محبت، مردوم ره آشکارَ بوست،

⁵ اون، امرا نجات بدَه. اَ نجات نه اُ کارانِ واسی کی اَمان صالحی درون بکودیم بلکی خو رحمتِ خاطری، و اُ شوستنِ راه درون بو کی بواسطه ی اون، روح القُدّس اَمرا تازه تولد و تازه زیندگی فدَه،

⁶ کی خُدا، هو مقدّسِ روحَ بواسطه اَمی نجات دهنده عیسی مسیح، فَت و فراوان اَمی سر فُکود،

⁷ تا اونِ فیضِ امرا، صالح بحساب بائیم و عین اُ امید کی ابدی زیندگیَ داریم، وارثان بیبیم.

⁸ اَ گبَ شه اطمینان کودن، و تی جا خوائم کی اَ چیانِ سر اصرار بدَاری، تا اوشانیَ کی خُدایَ ایمان باوردیدِ حواس بمانه کی خوشانَ خُبِ کارانِ ره وقف بُکونید. اَ چیان، مردومِ ره خُبِ و فایده داره.

⁹ ولی جنگ و جدال کی حماقتِ جا ایسه، شجره نامه ئان و اختلافان و دعوا مرافه ئانِ جا کی شریعت باره ایسه دوری بُکون، چونکی اَشان بی فایده و بی اَرزش ایسید.

¹⁰ اُ کسِ باره کی جُدایی تَودِه، ایوار و بازون دو وار اونَ اخطار بدَن و بازون پس دِه اونِ مرا شوئن و آمون نُکون.

¹¹ چره کی دانی اَجور آدمی فاسدَ بوسته و گناه کار ایسه. اون خودش، خورَه محکوم کونه.

آخرتا نصیحتان و سَلام ئان

¹² هَطوکی آرتِماس یا تیخیکوسَ تی ورجه اوسه کودم، تا تانی تقلا بُکون کی نیکوپولیسِ شار می ورجه بائی، چونکی تصمیم بیگیفتم زمستانَ اویا بأسَم.

¹³ تا اویا کی تانی، وکیل زیناس و آپولسَ اُ سفر درون کی داریدی کمک بُکون، تی حواس بمانه کم و کسری ندارید.

¹⁴ وَئَل اَمی مردوم یاد بیگیرید، احتیاجاتِ برطرف کودن واسی خوشانَ خُبِ کارانِ ره، وقف بُکونید و بی ثمر نیبید.

¹⁵ تمانِ اوشانی کی می اَمرائید، تَره سلام فارسانیدی. اوشانیَ کی ایمانِ درون اَمرا دوست داریدی سلام برسان. فیض شیمی همتانِ اَمرا بِبه.